Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 1 2016

 TOPICO PRINCIPAL | DICON BO MESTER TA HONESTO?

Ta Bale la Pena Ser Honesto

Ta Bale la Pena Ser Honesto

“Nos tin e confianza cu nos tin un consenshi limpi, y nos kier comporta nos mes na un manera honesto den tur cos.”—Hebreonan 13:18.

Den Bijbel, e palabra Griego original traduci como “honesto” ta nifica literalmente “algo cu di naturaleza ta bon.” E por nifica tambe algo bunita den sentido moral.

Pues, cu bon motibo cristiannan ta tuma na pecho e palabranan inspira di apostel Pablo, cu ta bisa: “Nos kier comporta nos mes na un manera honesto den tur cos.” Kico e palabranan ey ta nifica?

UN LUCHA INTERNO

Mayoria di hende ta wak nan mes den spiel tur dia prome cu nan sali for di cas. Dicon? Pasobra nan kier mustra bon. Pero tin algo hopi mas importante cu un bunita estilo di cabey of paña cu ta na moda. Sin duda, e persona cu nos ta di paden por sea laga nos mustra bon of daña nos apariencia.

E Palabra di Dios ta bisa bon cla cu nos ta inclina na haci loke ta malo. Genesis 8:21 ta bisa: “E intencion di curason di hende ta malo for di su hubentud.” Pesey, si nos kier ta honesto, nos tin cu lucha contra nos tendencianan pecaminoso. Apostel Pablo a duna un descripcion bibo di su lucha ora el a bisa: “Realmente, mi tin placer den e ley di Dios segun e hende cu mi ta di paden, pero mi ta mira den mi curpa un otro ley cu ta bringa contra e ley di mi mente. Y e ley di pica aki tin mi preso.”—Romanonan 7:22, 23.

Por ehempel, si nos haya nos den un tentacion pa haci algo deshonesto, nos no tin motibo pa entrega na e impulsonan ey, comosifuera nos no tin dominio riba nos accionnan. Ta keda na nos pa dicidi kico nos ta haci. Ora nos rechasa un mal pensamento, nos por keda honesto aunke hende rond di nos ta deshonesto.

CON PA GANA E LUCHA

Pa nos por ta hende honesto, nos mester tin norma moral halto. Pero, lamentablemente, mayoria di hende ta mas preocupa cu nan apariencia cu nan norma- y balornan. Como resultado, nan ta honesto solamente ora ta cumbini nan. E buki The (Honest) Truth About Dishonesty ta bisa: “Basicamente, nos ta gaña te asina leu cu nos por sigui kere cu nos ta hende honesto.” Pero, tin algo cu por yuda nos dicidi si nos por hustifica un falta di honrades? Claro cu si.

Miyones di hende rond mundo a haya sa cu Bijbel por yuda nos den esey. Su normanan moral no tin comparacion. (Salmo 19:7) Bijbel ta un buki cu ta duna conseho confiabel riba tereno di bida di famia, empleo, moralidad y hende su relacion cu Dios, y te awe esakinan ta practico. Su ley- y principionan ta beneficioso pa hende di tur nacion, rasa, tribu y pueblo. Ora nos lesa Bijbel, medita riba dje y aplica loke e ta bisa, nos por train nos curason pa ta honesto y recto.

 Pero nos ta biba den un mundo moralmente degrada cu ta pone hopi presion riba nos pa conforma nos cu su normanan. Pesey, si nos kier gana den e lucha pa hiba un bida honesto, conocemento di Bijbel no ta suficiente. Nos mester di Dios su apoyo, y pesey nos tin cu pidie yuda nos. (Filipensenan 4:6, 7, 13) Ora nos haci esey, nos lo haya e curashi necesario pa para firme pa loke ta corecto y ser honesto den tur cos.

BENEFICIO DI TA HONESTO

Hitoshi, kende nos a menciona den e prome articulo, tin e reputacion di ta un trahador honesto, y esey a benefici’e masha hopi. Awor e ta traha pa un doño di trabou cu ta balora su honestidad. Hitoshi a bisa: “Mi ta agradecido cu mi por a haya un trabou cu ta laga mi keda cu un consenshi limpi.”

Otro hende tambe tin e mesun sintimento. Considera algun ehempel di esnan cu a saca beneficio ora nan a aplica e principio di Bijbel pa “comporta nos mes na un manera honesto den tur cos.”

  • Un Consenshi Limpi

    “Mi a kita for di scol tempo mi tabatin 13 aña pa asina mi por a join un grupo di ladron. Como resultado, 95 porciento di mi entrada tabata bin di actividadnan ilegal. Cu tempo mi a casa, y ami cu mi casa a tuma un curso di Bijbel cerca testigonan di Jehova. Ora nos a siña cu Jehova * Dios ta odia practicanan deshonesto, nos a cambia nos manera di biba. Na aña 1990 nos a dedica nos bida na Jehova y a batisa como testigo di Jehova.”—Proverbionan 6:16-19.

    “Antes mi cas tabata yen yen di cos horta, pero awor no mas; pesey mi ta sinti cu mi tin un consenshi limpi. Ora mi pensa bek riba tur e añanan cu mi tabata horta, mi ta gradici Jehova pa su gran misericordia cu el a mustra na mi. Awor mi por bay drumi trankil tur anochi sabiendo cu Jehova ta contento cu mi.”—Cheryl, Irlanda.

    “Ora mi doño di trabou a haya sa cu mi a rechasa placa pasa bou di mesa di un posibel cliente, el a bisa mi: ‘Bo Dios a haci bo echt un persona confiabel. Ta un bendicion cu nos tin bo como trahador hunto cu nos.’ Como cu mi ta honesto den tur cos, mi por tin un consenshi limpi dilanti di Jehova Dios. Ademas, mi por yuda mi famia y otronan pa ta mescos.”—Sonny, Hong Kong.

  • Paz Mental

    “Mi ta traha como un secretario na un banco internacional. Den e trabou aki, bira rico ta mas importante cu ser un persona honesto. Pues e punto di bista comun ta: Ki malo tin ora bo ta un tiki deshonesto si bo ta bira rico y yuda e economia? Pero, como cu mi ta honesto, mi tin paz mental. Mi doño di trabou sa cu lo mi no gaña nan ni gaña pa nan. Mi ta determina pa keda honesto y ta cla pa wanta cualkier consecuencia cu esey lo por trece cu ne.”—Tom, Merca.

  • Respet Propio

    “Mi supervisor na trabou a bisa mi pa gaña tocante algun cos cu a disparce na oficina, pero mi a nenga di haci esey. Ora nan a gara e ladronnan, mi doño di trabou a gradici mi cu mi tabata honesto. Bo mester tin curashi pa bo ta honesto den un mundo cu no ta honesto. Pero al final, nos ta gana e confianza y respet di otronan.”—Kaori, Japon.

E recompensa di por tin un consenshi limpi, paz mental y respet propio ta demostra cu ta bale la pena ser honesto. Abo no ta di acuerdo cu esey?

^ par. 18 Bijbel ta bisa cu Dios su nomber ta Jehova.