Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 1 2016

 TOPICO PRINCIPAL | DICON BO MESTER TA HONESTO?

Honestidad A Bay for di Moda?

Honestidad A Bay for di Moda?

Hitoshi tabata traha den e departamento di accountant di un uitzendbureau na Japon. Mientras cu e tabata controla un relato financiero hunto cu su hefe, su hefe a bis’e pa falsifica e relato. Hitoshi a splic’e cu su consenshi no ta permitie haci esey. Su hefe a menas’e di kit’e for di trabou, y como resultado, Hitoshi a perde su trabou.

Den e lunanan cu a sigui, Hitoshi a bira hopi desanima pasobra no tabata facil p’e haya un trabou caminda e no tin nodi gaña. Durante un di e entrevistanan pa trabou, el a menciona cu e no ta dispuesto pa gaña pa doño di trabou. E persona cu tabata entrevist’e a bis’e: “Bo manera di pensa ta straño.” A pesar cu Hitoshi su famia y amigonan a anim’e pa e keda honesto, el a cuminsa duda si esey tabata bale la pena. Por ehempel, el a bisa: “Mi a cuminsa puntra mi mes si tabata un bon idea pa mi bisa kico mi creencianan ta.”

Hitoshi su experencia ta laga nos mira cu lamentablemente no ta tur hende ta balora honestidad. Algun hende por hasta mir’e como un desbentaha, specialmente na trabou. Un señora di Sur Africa a bisa: “Na mi trabou, unda cu mi bira tin hende deshonesto, y tin biaha mi ta sinti cu e presion pa ta mescos cu nan ta hopi fuerte.”

Gañamento ta un di e maneranan mas comun cu hende awe ta mustra un falta di honestidad. Algun aña pasa, Robert Feldman, un psicologo na e Universidad di Massachusetts Amherst, a haci un estudio cu a indica cu 60 porciento di adulto ta gaña por lo menos un biaha durante un combersacion di 10 minuut. El a bisa: “E resultadonan ey a laga nos keda boca habri. Nos no a spera cu gañamento tabata algo asina comun den bida di tur dia.” Dicon hopi hende ta gaña aunke nan mes no ta gusta at all pa otro hende gaña nan?

Dicon gañamento, hortamento y otro formanan di deshonestidad ta asina comun awe? Con falta di honestidad ta afecta henter nos sociedad? Y mas importante ainda, con nos por evita di haya nos mes envolvi den practicanan deshonesto?