Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Spierta!  |  Num. 5 2017

Ta Bale la Pena pa Spaar Energia?

Ta Bale la Pena pa Spaar Energia?

NOS tur ta depende di energia pa nos por cende nos airco of verwarming na cas, pa core nos auto riba caminda y pa nos por haci nos actividadnan di tur dia. Pero hende rond mundo ta preocupa cu e problemanan cu tin relaciona cu energia.

Por ehempel, Gary, di Sur Africa, ta preocupa cu e echo cu “prijs di gasolin ta sigui subi.” Jennifer, di Filipinas, ta preocupa cu e problemanan cu e compania di electricidad tin, ya cu “frecuentemente coriente ta bay.” Y Fernando, di El Salvador, a bisa cu e ta “preocupa cu e efecto riba medioambiente.” Ya cu hopi compania cu ta produci energia rond mundo ta contamina medioambiente.

Pesey kisas bo ta puntra bo mes: Kico ta loke ami por haci encuanto e problemanan aki?

Wel, nos tur por dicidi di uza energia na un manera mas consciente. Si nos spaar energia y uz’e na un manera sabi, nos mes lo beneficia. Si nos uza menos, nos lo paga menos. Ademas, nos lo proteha medioambiente pasobra menos energia mester ser produci.

Laga nos papia riba tres area den cua nos por uza energia na un manera mas consciente: na cas, riba caminda y durante nos actividadnan di tur dia.

NA CAS

Uza verwarming y airco na un manera consciente. Un estudio cu nan a haci na un pais Europeo ta mustra cu e manera mas eficiente pa spaar energia durante un aña ta door di baha verwarming djis dos grado den winter. Derek, kende ta biba na Canada, ta eens cu esey. El a bisa: “Si nos uza trui of sweater durante winter en bes di subi verwarming, nos ta spaar coriente.”

E mesun principio ta conta pa airco. Rodolfo, di Filipinas, ta ahusta su airco di tal manera cu e temperatura no ta mucho abou. Dicon? El a bisa: “Pa nos spaar placa y energia.”

Tene porta y bentana cera ora verwarming of airco ta cendi. * Si nos zorg pa aire cayente of friu no sali pafo, nos ta evita di malgasta energia. Djis un ehempel, un porta cu keda habri ta pone cu e verwarming tin cu gasta mas coriente pa tene un cas cayente.

Ademas di tene e porta- y bentanan cera, tin hende a instala mihor sistema di isolacion y bentana special pa yuda mantene e temperatura paden stabiel.

Uza bombio cu ta gasta menos coriente. Jennifer, kende nos a menciona na principio, a bisa: “Nos a cambia tur nos bombionan tradicional pa esnan cu  ta gasta menos coriente.” Bombio cu ta gasta menos coriente ta mas caro, pero como cu nan ta uza menos coriente, bo ta spaar placa a largo plaso.

RIBA CAMINDA

Uza transporte publico si ta posibel. Andrew, di Gran Britania, a bisa: “Tur ora cu mi por, mi ta bay trabou cu trein of cu bais.” E buki Energy: What Everyone Needs to Know ta recorda nos cu “auto ta gasta tres biaha mas combustibel pa cada pasahero na comparacion cu bus of trein.”

Si bo uza bo auto, plania bon. Si bo plania di antemano, bo por evita di core bay bin pa loco cu bo auto. Kico ta e beneficio? Bo ta gasta menos gasolin y bo ta spaar tempo y placa.

Jethro, di Filipinas, ta aparta un suma fiho di placa tur luna pa gasolin. El a bisa: “Esaki ta pone mi plania bon pa nos no core bay bin pa loco.”

ACTIVIDADNAN DI TUR DIA

Uza menos awa cayente. Segun un estudio cu nan a haci na Australia, “e energia cu cada cas ta gasta pa produci awa cayente ta un averahe di 1,3% di e energia cu e stadnan na Australia ta uza”, loke ta nifica cu “cada cas ta uza 27% di energia pa awa cayente.”

Ya cu mester di energia pa keinta awa, esey ta nifica cu si bo uza menos awa cayente, bo ta spaar energia. Pues, cu rason, Victor, di Sur Africa, a bisa: “Ora nos ta baña, nos ta purba di uza menos awa cayente.” Segun e cientifico Steven Kenway: “Si nos uza menos awa cayente posibel, tur hende ta sali gana”, pasobra “consumidornan ta uza menos energia y awa, e demanda pa energia di companianan di awa ta baha y famianan ... ta spaar placa.”

Paga nan. Kico mester paga? Wel, luz, aparatonan electronico, manera osterizer, toaster, television, computer, etcetera. Hopi di e aparatonan aki ta sigui gasta coriente hasta ora nan ta paga. Pesey, algun experto ta recomenda pa ranca plug di coriente of uza un power strip cu bo por paga pa bo spaar coriente. Fernando, kende nos a menciona caba, tin un bon custumber. El a bisa: “Mi ta paga tur luz y ranca plug di coriente di e aparatonan cu mi no ta uzando.”

Aunke cu personalmente nos no tin control riba e costo di energia ni riba contaminacion cu esaki ta causa, toch nos por dicidi di uza energia na un manera mas consciente. Hende rond mundo ta buscando manera pa logra spaar energia. Ta berdad cu esey ta nifica mas trabou y planeamento, pero ta bale la pena. Valeria, di Mexico, a bisa: “Mi ta spaar placa y proteha medioambiente.”

^ par. 10 Sigui tur instruccion di fabrica cuidadosamente. Pa siguridad, tin cierto sistema di verwarming of airco ta rekeri ventilacion of aire fresco. Den e caso ey, lo mester laga un porta of bentana habri.

Mas Informacion

E TOREN DI VIGILANCIA

Hende Lo Caba cu Nos Planeta?

Bijbel a pronostica cu nos medioambiente lo sufri daño y kico lo caus’e.

Kico Bijbel Ta Siña Realmente?

Kico Ta Dios Su Proposito pa e Tera?

Dios su proposito pa un paradijs riba Tera lo bira realidad? Si ta asina, ki tempo esey lo sosode?