Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Spierta!  |  Num. 5 2017

 YUDANSA PA FAMIA | HOBENNAN

Ta Bale la Pena pa Pone Bo Bida na Peliger?

Ta Bale la Pena pa Pone Bo Bida na Peliger?

E PROBLEMA

“Mi a keda para cerca di un trein cu tabata pasa cu un velocidad hopi halto den un tunnel. Mi adrenalina a subi asina hopi cu mi a lubida tur mi problemanan.”—Leon. *

“Ora mi bula den awa for di un baranca hopi halto, mi ta sinti mi completamente liber pa algun seconde. Mayoria di biaha mi tabata gusta, pero tin biaha mi tabata haya miedo.”—Larissa.

Mescos cu Leon y Larissa, hopi mucha jong gusta e sensacion cu nan ta haya ora nan test te con leu nan por bay. Pero tin biaha nan ta risca nan bida. Abo tambe sa sinti gana di purba esey? Si ta asina, lo ta bon pa bo lesa e articulo aki.

LOKE TA BON PA BO SA

Bo por bira adicto na actividadnan peligroso. Kisas lo bo haya un sensacion masha dushi mes pa un momento cortico, pero despues lo bo no keda satisfecho; semper lo bo kier mas. Marco, kende mescos cu Leon tabata keda para cerca di treinnan cu ta pasa den tunnel, a bisa: “Mi a cay den un circulo vicioso. Mi tabata contento pa un momento. Pero despues mi tabata kier a haya e sensacion ey atrobe.”

Justin, kende a purba di core rollerblade wanta na un auto cu tabata coriendo, a bisa: “E sensacion cu mi tabata haya tabata asina dushi cu mi a haya gana di bolbe haci esey. Mi tabata kier pa hende admira mi, pero mi a termina den hospital.”

Bo amigonan por pone bo haci cos sin pensa. Un mucha homber di 22 aña cu yama Marvin a bisa: “Mi amigonan tabata presiona mi pa subi un edificio halto sin uza proteccion. Nan tabata bisa mi: ‘Ban Marvin, bo por!’ Mi tabata sinti mi hopi insigur y mi tabata tembla ora mi a cuminsa subi.” Larissa, kende nos a menciona caba, a bisa: “Mi tabata haci loke tur hende ta haci. Mi a djis sigui nan.”

Tin hende ta pone video riba internet pa crea un tipo di presion di grupo. Nan ta halsa esnan cu ta risca nan bida, y nan ta duna e impresion cu esey no ta nada malo. Ademas, algun di e videonan ey ta bira viral riba rednan social, y asina esnan cu ta risca nan bida ta haya fama y atencion.

Por ehempel, den algun di e video popular ey bo por mira un actividad cu yama parkour. Esaki ta encera cu e persona tin cu pasa over di cierto obstaculo manera muraya, cas  of trapi door di core, bula of subi na un manera agil sin uza ekipo di siguridad. Esaki por pone bo pensa cu (1) no tin hopi riesgo y (2) cu tur hende por haci esey. Como resultado bo por haya gana di haci loke nan ta haci y asina pone bo bida na peliger.

Tin maneranan mas mihor y safe pa test kico ta bo limite. Bijbel ta bisa: “Entrenamento fisico ta yuda cu algo.” (1 Timoteo 4:8) Pero Bijbel ta spierta bo tambe pa “biba cu sano huicio.” (Tito 2:12) Con bo por haci esey?

LOKE BO POR HACI

Pensa bon kico por ta e riesgonan. Bijbel ta bisa: “Tur hende prudente [sabi] ta trata cu conocemento, ma un bobo ta manifesta locura.” (Proverbionan 13:16) Pues, prome cu bo participa den un actividad, wak kico ta e riesgonan. Puntra bo mes: Mi ta pone mi bida na peliger of mi por haya un accidente serio?—Principio di Bijbel: Proverbionan 14:15, BPK.

Scoge amigo cu tin respet pa bida. Un bon amigo lo no anima bo pa pone bo bida na peliger ni tampoco e lo no purba di convence bo pa haci algo cu abo no kier haci. Larissa a bisa: “Mi a haya bon amigo cu ta stabiel. Nan a yuda mi scoge actividad cu lo ta bon pa participa aden. Ora mi a scoge otro amigonan, mi bida a cambia.”—Principio di Bijbel: Proverbionan 13:20.

Puntra bo mes: Mi ta pone mi bida na peliger of mi por haya un accidente serio?

Haci bon uzo di bo habilidadnan sin pone bo bida na peliger. E buki Adolescent Risk Behaviors ta bisa cu “siña establece principio y limite” ta un parti importante di e proceso pa bira un adulto. Bo por test bo limite den un ambiente mas sigur. Con? Wel, uza ekipo di proteccion y tuma medida di siguridad.

Haci loke lo duna bo balor propio. Hende lo respeta bo pa e manera cu bo ta logra resolve problema den bida, y no pa loke bo ta tribi di haci. Larissa a bisa: “Bula den awa for di baranca halto tabata djis e comienso di un parti di mi bida cu por a causa mi hopi daño. Lo tabata hopi mas mihor si mi a siña bisa no.”

Kico ta e conclusion? En bes di pone bo bida na peliger djis pa bo haya un dushi sensacion, scoge diberticion na un manera sabi.—Principio di Bijbel: Proverbionan 15:24.

^ par. 4 A cambia algun nomber den e articulo aki.