Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Spierta!  |  Num. 4 2017

 E PUNTO DI BISTA BIBLICO

Tentacion

Tentacion

Un matrimonio kibra, maleza y un consenshi sushi ta djis un par di consecuencia cu un hende cu a cay den tentacion por sufri. Kico nos mester haci pa evita di cay den e trampa aki?

Kico ta tentacion?

Tentacion ta un deseo pa haci algo, principalmente algo malo. Pa nos compronde esaki mihor, laga nos wak un ehempel. Laga nos bisa cu bo ta shop, y bo ta mira algo cu bo tin gana di haya. E pensamento ta pasa den bo mente cu lo ta facil pa bo hort’e sin cu nan gara bo. Pero, bo consenshi ta bisa bo pa no haci esey, y bo ta saca e cos for di bo cabes y ta sigui. Na e momento ey, bo a resisti e tentacion y a gana e bataya.

LOKE BIJBEL TA BISA

 

E echo cu bo a haya e deseo pa haci algo malo no kiermen cu bo ta un malbado. Bijbel ta bisa cu nos tur ta enfrenta tentacion. (1 Corintionan 10:13) Pero loke ta conta ta con nos ta reacciona ora nos haya nos den un situacion asina. Algun hende ta keda pensa riba e mal deseo, anto tardi of trempan nan ta cay den e tentacion. Otronan ta resisti e tentacion di biaha pasobra nan sa cu loke nan kier haci ta algo malo.

“Cada hende ta ser poni na prueba ora e ser atrai y seduci pa su mes deseo.” —Santiago 1:14.

Dicon ta sabi pa actua di biaha ora bo sinti cu bo ta bay cay den tentacion?

Bijbel ta splica nos kico ta e pasonan cu ta hiba na pica. Santiago 1:15 ta bisa: “Ora nutri e deseo [cu no ta bon], e ta duna luz na pica.” Cu poco palabra, si nos keda pensa riba un mal deseo, nos lo yega na e punto cu nos lo peca. Nos por compara esey cu un hende muher na estado cu dado momento tin cu duna luz. E no por evita esey. Sinembargo, nos por evita di bira esclavo di deseonan cu no ta bon; nos por domina nan.

CON BIJBEL POR YUDA NOS

 

Mescos cu nos por alimenta nos mente cu deseo cu no ta bon, nos por elimina nan tambe. Con? Door di focus riba otro cos: haci un actividad, combersa cu un amigo of medita riba pensamentonan cu ta bon. (Filipensenan 4:8) Tambe ta bon pa bo pensa kico lo ta e consecuencianan emocional, fisico y spiritual si bo cay den tentacion. (Deuteronomio 32:29) Oracion tambe ta un gran yudansa. Hesucristo a bisa: “Haci oracion continuamente pa boso no cay den tentacion.”—Mateo 26:41.

“No gaña boso mes: Dios no ta laga hende haci bofon di dje. Pues, kico cu un hende sembra, esey lo e cosecha tambe.”—Galationan 6:7.

 Kico por yuda bo pa bo no cay den tentacion?

E REALIDAD

 

Eigenlijk, tentacion ta manera un trampa of as cu por hinca un persona inocente, sin experencia y cu no ta tene cuidou den peliger. (Santiago 1:14) Esaki ta asina vooral den caso di inmoralidad sexual, cu por tin consecuencianan teribel.—Proverbionan 7:22, 23.

CON BIJBEL POR YUDA NOS

 

Hesucristo a bisa: “Awor bon, si bo wowo drechi ta pone bo trompica, sac’e tira afo.” (Mateo 5:29) Claro cu Hesus no tabata kiermen cu nos mester haci esey literalmente. Mas bien, e tabata kiermen cu si nos kier agrada Dios y haya bida eterno, nos mester domina nos curpa pa nos no peca. (Colosensenan 3:5) Esey por nifica cu nos mester rechasa tentacion na un manera firme. Un hende homber cu tabata sirbi Dios fielmente a pidi den oracion: “Kita mi bista for di banidad.”—Salmo 119:37.

Claro cu no ta facil pa nos domina nos mes pasobra “e carni ta debil.” (Mateo 26:41) Pues, nos lo haci fout. Sinembargo, ora nos tin echt duele di loke nos a haci y ta haci nos best pa no practica e pica ey, nos Creador, Jehova Dios, lo mustra “compasion” y “misericordia” na nos. (Salmo 103:8) Esta un consuelo esey ta!

“Si abo, SEÑOR, tuma inikidadnan na cuenta, o Señor, ken lo por a keda para?” —Salmo 130:3.