Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Spierta!  |  Num. 3 2017

 ENTREVISTA | FAN YU

Un Diseñador di Software Ta Splica Dicon E Ta Kere den Dios

Un Diseñador di Software Ta Splica Dicon E Ta Kere den Dios

DR. FAN YU a cuminsa su carera como investigador matematico na e Instituto di Energia Atomico di China, no hopi leu di Beijing. E tempo ey e tabata ateo y tabata kere den evolucion. Pero awor dr. Yu ta kere cu ta Dios a diseña y crea bida. Spierta! a hacie un par di pregunta.

Conta nos algo di bo mes.

Mi a nace na aña 1959 den e stad Fuzhou, (provincia di Jiangxi, China). Ora cu mi tabatin ocho aña, e pais tabata experenciando e efectonan di loke awor nan ta yama e Revolucion Cultural. Mi tata, un ingeniero civil, a haya encargo pa traha un spoorbaan den un desierto cu ta keda hopi leu. Pa hopi tempo, ta un bes pa aña so e por a bishita nos. E tempo ey mi tabata biba cu mi mama, kende tabata un maestra na un scol basico. Eigenlijk, nos tabata biba na e scol caminda e tabata duna les. Na 1970, nos mester a muda bay Liufang. E tempo ey, Liufang tabata un pueblito pober den e districto di Linchuan, caminda tabatin scarsedad di cuminda.

Den kico bo famia tabata kere?

Mi tata no tabata interesa den religion ni den politica. Mi mama tabata budista. Na scol e maestronan a siña mi cu bida a evoluciona mediante procesonan natural, y ami a kere nan.

Con bin bo a studia matematica?

Mi a gusta matematica pasobra bo tin cu uza logica pa haya e berdad. Mi a bay universidad na 1976, e aña cu Mao Tse-tung, e lider di e revolucion, a muri. Mi a scoge matematica como mi vak principal. Despues cu mi a haya mi master’s degree, mi prome trabou a encera haci investigacion matematica pa yuda produci energia atomico.

Kico tabata bo prome impresion di Bijbel?

Na 1987, mi a bay Merca pa busca mi doctorado na e Universidad di Texas A&M. Mi tabata sa cu na Merca hopi hende ta kere den Dios y ta lesa Bijbel. Y mi a tende cu Bijbel ta  contene hopi bon conseho, pesey mi a pensa cu mi mester les’e.

E siñansanan di Bijbel a zona practico. Pero como cu mi a topa cu un par di cos cu tabata dificil pa compronde, mi a stop di lesa Bijbel.

Kico a lanta bo interes bek den Bijbel?

Nunca mi a yega di tende di un Creador, pues mi a dicidi di haci mi propio investigacion

Na 1990, un testigo di Jehova a bin na mi cas y a mustra mi loke Bijbel ta bisa tocante un mihor futuro pa humanidad. El a pidi un pareha casa pa yuda mi compronde Bijbel mas mihor. Despues, mi esposa, Liping, kende tambe tabata un ateo, a cuminsa studia Bijbel. Na China e tabata duna les di natuurkunde na scol secundario. Nos a siña loke Bijbel ta bisa tocante e origen di bida. Nunca mi a yega di tende di un Creador, pues mi a dicidi di haci mi propio investigacion.

Kico precies bo a haci?

Como matematico, mi a haya entrenamento pa calcula ki probabilidad tin cu algo ta sosode. Tambe mi a siña cu pa bida por cuminsa diripiente mester di proteina. Pesey mi a purba calcula con grandi e chens ta pa proteina yega na existencia di su mes. Proteina ta un di e moleculenan di mas complica cu ta existi, y celnan bibo por tin miles di diferente tipo di proteina cu tin contacto fisico cu otro cu hopi precision. Mescos cu hopi otro hende, mi a realisa cu ta improbabel, of mihor bisa, hasta imposibel pa un proteina forma di su mes. No tin nada cu mi a siña for di e teoria di evolucion cu a convence mi cu e moleculenan sumamente complica aki por a crea nan mes, pa no papia mes di e organismonan bibo cu no por funciona sin proteina. Pa ami, tur e pruebanan ta indica cu mester tin un Creador.

Kico a convence bo cu Dios ta e autor di Bijbel?

Segun cu testigonan di Jehova tabata duna mi les di Bijbel, mi a siña cu tin hopi profecia di Bijbel cu a cumpli. Tambe mi a cuminsa mira cu ta beneficioso pa aplica principionan biblico. Mi a puntra mi mes: Ta con por ta cu escritornan di Bijbel cu a biba miles di aña pasa por a skirbi consehonan cu te awe ta practico? Gradualmente mi a realisa cu Bijbel ta e Palabra di Dios.

Kico mas ta convence bo cu tin un Creador?

Ora mi pensa riba loke tin den naturaleza, mi ta conclui automaticamente cu mester tin un Creador. Actualmente mi ta diseña software pa computer, y hopi bes mi ta keda asombra pasobra nos mente ta hopi mas mihor cu e programanan di computer. Por ehempel, e habilidad cu nos mente tin pa compronde habla ta impresionante. Mayoria di nos facilmente por compronde kico un hende ta bisando, hasta si su frase no ta completo, e ta gagando, hariendo, tosando, of si e tin un accent, of si tin bochincha of algo ta eco den background of si e telefon ta kraak. Kisas bo ta pensa cu esaki ta masha normal. Pero diseñadornan di software sa cu no ta asina. Hasta e mihor software cu por reconoce habla ta leu di loke nos celebro por haci.

Distinto for di e computernan di mas complica, nos celebro por discerni emocion, reconoce accent y identifica ken ta papiando a base di e caracteristicanan di e stem. Diseñadornan di software ta buscando manera pa imita e habilidad cu e celebro humano tin pa compronde habla. Mi ta convenci cu haciendo esey, en realidad nan ta studiando e creacion di Dios.