Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Spierta!  |  Num. 3 2017

 TOPICO PRINCIPAL | BIJBEL TA UN BUKI DI DIOS?

Bijbel Ta Exacto den Tur Sentido

Bijbel Ta Exacto den Tur Sentido

Cientificamente Exacto

AUNKE Bijbel no ta un buki di ciencia, e ta exacto ora e ta papia di fenomenonan di naturaleza. Laga nos ban trata algun ehempel riba tereno di meteorologia y genetica.

METEOROLOGIA: CON YOBIDA TA FORMA

METEOROLOGIA

Bijbel ta bisa: “[Dios] ta hala e gotanan di awa trece ariba; for di neblina nan ta destila awasero, cu e nubianan ta laga basha.”—Job 36:27, 28.

Akinan, Bijbel ta describi e tres partinan principal di e ciclo di awa. Dios, kende ta e fuente di calor di solo, “ta hala e gotanan di awa trece ariba.” Con? Awa ta (1) evapora bay ariba. Despues, e ta (2) condensa y forma nubia cu na su turno ta laga awa sea (3) yobe, sneeuw of hagel. Te ainda meteorologonan no ta compronde completamente tur e detayenan di e fenomeno aki. Ta interesante cu Bijbel ta haci e pregunta: “Tin hende cu por compronde movecion di e nubianan?” (Job 36:29) Pero, e Creador si ta compronde e ciclo di awa y a zorg pa e escritornan di Bijbel skirbi detayenan exacto tocante e ciclo ey. Y el a haci esey hopi tempo prome cu cientificonan por a splica e principionan basico di e proceso aki.

GENETICA: CON EMBRYO HUMANO TA DESAROYA

GENETICA

E escritor di Bijbel Rey David a bisa Dios: “Bo wowo a mira hasta mi embryo, y den bo buki tur su partinan a ser skirbi.” (Salmo 139:16, NW) Na un manera poetico, David ta bisa cu un embryo ta desaroya segun loke ta skirbi di antemano den un “buki”, of mapa. Anto figura bo, esaki a ser skirbi un 3.000 aña pasa!

Sinembargo, ta te rond di aña 1860 Gregor Mendel, un botanico Australiano, a descubri e principionan basico di genetica. Anto te na april 2003 investigadornan finalmente a determina secuencia di e genome humano, cu tin tur e informacion genetico pa forma e curpa di hende. Cientificonan a compara e codigo genetico cu un diccionario yen di palabra cu ta consisti di e letternan di alfabet. E palabranan, na moda di papia, ta e instruccion genetico cu ta laga e celebro, curason, long y man cu pia desaroya den e secuencia corecto y na e momento apropia. Pues, ta na su luga cu cientificonan a yama e genome “e buki di bida.” Ta con ta posibel cu e escritor di Bijbel David por a skirbi un informacion asina exacto? El a admiti humildemente: “E spirito di [Jehova] a papia pa medio di mi, y su palabra tabata riba mi lenga.” *2 Samuel 23:2.

 Bijbel Ta Profetisa Futuro cu Exactitud

ORA ta trata di subida of caida di imperionan y stadnan, ta masha dificil, of mihor bisa casi imposibel, pa sa ki ora y con esey lo tuma luga y e alcance cu esaki lo tin. Pero Bijbel si a profetisa tocante destruccion di stadnan y imperionan poderoso cu luho di detaye. Ban wak djis dos ehempel.

CAIDA Y DESTRUCCION DI BABILONIA

Babilonia di antiguedad tabata e curason di un imperio poderoso cu pa siglonan tabatin masha hopi influencia riba e parti west di Asia. Dado momento, e tabata e stad mas grandi na mundo. Pero un 200 aña di antemano, Dios a inspira e escritor di Bijbel Isaias pa profetisa cu un conkistador cu yama Ciro lo derota Babilonia y cu nunca mas hende lo no biba eynan. (Isaias 13:17-20; 44:27, 28; 45:1, 2) Di berdad e profecia aki a cumpli?

HISTORIA

Wel, na october 539 prome cu Cristo, Ciro e Grandi a conkista Babilonia den un anochi. Cu tempo, e canalnan cu tabata zorg pa e region fertil den bisindario haya awa a plok pa motibo di falta di mantencion. Ya pa aña 200 despues di Cristo, nan tabata bisa cu ningun hende tabata biba den e area ey mas, y te awe Babilonia ta un ruina. Precies manera Bijbel a profetisa, Babilonia a keda “completamente desola.”—Jeremias 50:13.

Ta con bin e escritor di Bijbel tabata sa precies kico lo bay pasa den futuro? Bijbel ta bisa cu esaki tabata “un declaracion formal contra Babilonia cu Isaias yiu di Amos a mira den vision.”—Isaias 13:1, NW.

NINIVE, “SEKU MANERA UN DESIERTO”

Un tempo hende tabata considera e arkitectura di Ninive, capital di e Imperio Asirio, un obra maestral. E stad tabata orguyoso di nan cayanan hancho, hardinnan publico, tempelnan y nan palacionan masha grandi. Toch, profeta Sofonias a profetisa cu e stad impresionante aki lo bira “un lugá inhabitá, seku manera un desierto.”—Sofonias 2:13-15, BPK.

Den siglo 7 prome cu Cristo, Babilonia y Media a uni forsa y a destrui Ninive completamente. Segun un obra di consulta, e ora ey e stad di Ninive “a keda den olvido pa 2500 aña.” Pa un tempo, hende tabata hasta duda cu Ninive a yega di existi. Ta te den mas o menos e decada di 1850 arkeologonan a descubri e ruinanan di Ninive. Actualmente, e luga ta bayendo atras y ta sufri di vandalismo. Pesey, Global Heritage Fund a adverti: “E ruinanan di Ninive lo por keda dera pa semper un biaha mas.”

For di ken Sofonias a haya e informacion aki di antemano? E mes a bisa cu tabata “e palabra di SEÑOR.”—Sofonias 1:1.

 Bijbel Ta Contesta e Preguntanan Mas Importante di Bida

BIJBEL ta contesta e preguntanan mas importante di bida na un manera satisfactorio. Laga nos wak algun ehempel.

DICON TIN ASINA TANTO MALDAD Y SUFRIMENTO?

Bijbel ta papia hopi riba e topico aki. E ta splica:

  1. “Hende a eherce autoridad riba un otro hende pa su daño.”Eclesiastes 8:9.

    Gobernante incompetente y corupto a causa hopi sufrimento pa hende.

  2. “Tempo y suceso imprevisto ta alcansa nan tur.”—Eclesiastes 9:11, NW.

    Cosnan inespera por sosode cu nos tur: Nos por bira victima di un maleza serio, un accidente of un desaster natural na cualkier luga of momento.

  3. “Pa medio di un hende pica a drenta mundo, y morto pa medio di pica.”Romanonan 5:12.

    Na principio, ora Dios a crea e prome pareha humano, ni imperfeccion ni morto no tabata existi. Pica “a drenta mundo” ora nan a desobedece nan Creador deliberadamente.

Bijbel ta splica pakico hende ta sufri. Pero no ta esey so, Bijbel ta priminti tambe cu Dios lo caba cu maldad y “seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.”—Revelacion 21:3, 4.

KICO TA PASA CU NOS ORA NOS MURI?

Bijbel ta splica cu ora un hende ta morto, e no sa nada ni e no por haci nada. Eclesiastes 9:5 ta bisa: “Pasobra e bibonan sa cu nan lo muri, ma e mortonan no sa nada.” Ora un hende muri, “su pensamentonan ta perece.” (Salmo 146:4) Pues morto ta pone un fin na tur actividad celebral, incluso nos cinco sentidonan (bista, oido, olfato, tacto y smaak). Esey ta e motibo cu ora nos muri, nos no por move, sinti ni pensa mas.

Ademas di splica kico ta e condicion di e mortonan, Bijbel ta duna nos un bunita speransa tambe. Kico esey ta? E speransa cu Dios lo lanta hende for di e soño profundo, esta morto, pa medio di e resureccion.—Oseas 13:14; Juan 11:11-14.

KICO TA E PROPOSITO DI BIDA?

Bijbel ta bisa cu Jehova Dios a crea tanto hende homber como hende muher. (Genesis 1:27) Ta pesey Bijbel ta yama e prome hende homber, Adam, “yiu di Dios.” (Lucas 3:38) Dios a crea hende cu un  proposito: Pa e por cera un amistad cu su Tata celestial y hiba un bida feliz y productivo riba Tera pa semper. Pa e motibo ey, Dios a crea hende cu un inclinacion spiritual, esta cu e deseo di kier siña tocante Dios. Y ta pesey Bijbel ta bisa: “Feliz ta esnan cu ta consciente di nan necesidad spiritual.”—Mateo 5:3.

Ademas, Bijbel ta bisa: “Feliz ta esnan cu ta tende e palabra di Dios y ta cumpli cu ne!” (Lucas 11:28) Bijbel ta yuda nos siña tocante Dios. Pero no ta esey so. Tambe e ta yuda nos pa nos por tin un bida mas feliz y un speransa pa futuro.

Con Bo Por Bira Amigo di e Autor di Bijbel?

DESPUES cu nan a haya prueba, miyones di hende rond mundo a yega na e conclusion cu Bijbel no ta djis un obra literario di antiguedad. Nan a keda convenci cu Bijbel ta inspira pa Dios; e medio cu e ta uza pa comunica cu hende, incluso abo tambe. Den Bijbel Dios ta invita bo pa siña conoc’e y pa bira su amigo. Bijbel ta priminti: “Hala cerca Dios, y lo e hala cerca [bo].”—Santiago 4:8.

Ora bo lesa Bijbel, bo ta haya un oportunidad hopi bunita. Kico esey ta? Mescos cu ora bo lesa un buki bo ta haya un idea ta kico tin den mente di e autor, asina tambe Bijbel ta yuda bo mira kico su Autor divino, esta, Dios, ta pensa y sinti. Pensa un rato ta kico esey por nifica pa abo. Wauw! Bo por haya sa kico ta e pensamentonan y sintimentonan di bo Creador. Ademas, Bijbel ta yuda bo haya sa:

Bo ta interesa pa haya sa mas? Testigonan di Jehova lo kier yuda bo cu mil amor. Nan por zorg pa bo haya un curso di Bijbel gratis. E curso por yuda bo hala mas cerca di e Autor divino di Bijbel: Jehova Dios.

E articulo aki a trata algun prueba cu Bijbel ta un buki inspira pa Dios. Pa mas informacion wak capitulo 2 di e buki Kico Bijbel Ta Siña Realmente? publica pa testigonan di Jehova. Bo por download e buki for di www.jw.org/jw-paa

Ademas, bo por wak e video Ken Ta e Outor di Beibel riba www.jw.org/pap

Bay na PUBLICACION > VIDEO

^ par. 10 Bijbel ta bisa cu Dios su nomber ta Jehova.—Revelacion 4:11.

Mas Informacion

PREGUNTA CU BIJBEL TA CONTESTA

Loke Ciencia A Descubri Ta Cuadra cu Bijbel?

Bijbel tin cosnan cu no ta cuadra cu ciencia?

CURSO DI BIJBEL

Dicon Analisa Loke Bijbel Ta Bisa?

Bijbel ta duna contesta pa e preguntanan importante di bida na miyones di hende rond mundo. Abo kier ta un di nan?