Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Spierta!  |  Num. 1 2017

Un hende muher sabi ta respeta su consenshi

 E PUNTO DI BISTA BIBLICO

Abortus

Abortus

Tur aña mas cu cincuenta miyon abortus ta ser cometi. Tin hopi pais cu no tin e cantidad di habitante ey mes.

Un decision personal of e ta algo malo?

LOKE HENDE TA BISA

Algun hende muher ta comete abortus pasobra nan tin problema economico, problema cu nan pareha, of nan kier tin libertad pa sigui studia of pasobra nan no kier ta un mama soltera. Pero tin otronan ta mira abortus como algo malo; nan ta haya cu un hende muher cu comete abortus no ta cumpli cu e responsabilidad cu e tin como mama.

LOKE BIJBEL TA BISA

Den Dios su bista, bida ta sagrado, specialmente bida di hende. (Genesis 9:6; Salmo 36:9) E principio aki ta conta tambe pa un baby cu ta den matriz di su mama: un luga safe cu Dios a diseña specialmente pa e por desaroya. Un escritor di Bijbel a bisa: “Bo a weef [of proteha] mi, forma mi den bariga di mi mama. Bo wowonan a mira mi substancia sin forma; y e dianan cu tabata stipula pa mi, tur tabata skirbi den bo buki.”—Salmo 139:13, 16.

Bo por mira kico ta Dios su punto di bista encuanto un baby cu no a nace ainda refleha den e Ley cu el a duna na e nacion di Israel y tambe den e consenshi cu el a duna nos. E Ley di Dios ta bisa cu si un homber “lastima un muher na estado” y e yiu muri, e asesino mester a paga cu su propio bida, es decir, “bida pa bida.” (Exodo 21:22, 23, NW) Ta claro cu un hues mester a tene cuenta cu e circunstancianan y e intencion.—Numbernan 35:22-24, 31.

Ademas, Dios a duna hende un consenshi. Ora un hende muher ta haci caso di su consenshi, of e bos cu ta bis’e kico ta bon y kico ta malo, y e ta respeta bida di su baby cu no a nace ainda, su consenshi por ta limpi. * Pero si e no haci caso di su consenshi, su consenshi lo molesti’e of hasta conden’e. (Romanonan 2:14, 15) Si, tin estudionan cu ta mustra cu hende muher cu a comete abortus tin mas chens di haya depresion of sinti ansiedad.

Pero kico si ta bay bira hopi dificil pa cria un yiu, specialmente si e embaraso no tabata plania? Wak kico Dios ta priminti esnan cu lealmente ta biba di acuerdo cu su normanan: “Cu hende leal, lo bo actua cu lealtad; cu homber balente, liber di falta, bo ta trata di manera liber di falta.” (Salmo 18:25, NW) Nos ta lesa tambe: “SEÑOR ta stima husticia y no ta bandona su santonan.”—Salmo 37:28.

“Nan consenshi ... ta duna testimonio y, pa medio di nan mes pensamentonan, nan ta keda acusa of hasta disculpa.”—Romanonan 2:15.

 Kico si bo a comete abortus?

LOKE HENDE TA BISA

Ruth, un mama soltera, a bisa: “Mi tabatin tres yiu chikito caba y mi tabata sinti cu cuater yiu si lo mi no por cria. Pesey mi a comete abortus. Pero despues m’a sinti cu mi a haci algo horibel.” * Acaso el a haci algo cu Dios no por pordona?

LOKE BIJBEL TA BISA

Hesucristo ta yuda nos mira kico ta Dios su pensamento tocante e asunto ey ora el a bisa: “Mi no a bini pa yama hende husto, sino pa yama pecador pa nan arepenti.” (Lucas 5:32) Si, ora nos arepenti di algo malo cu nos a haci y nos pidi Dios pa pordona nos, e ta haci esey libremente, hasta si nos a comete un pica grandi. (Isaias 1:18) Salmo 51:17 ta bisa: “Un curason arepenti y kibra, o Dios, bo no ta desprecia.”

Fuera di un consenshi limpi, Dios ta duna esnan cu arepenti paz mental ora nan acudi humildemente na dje den oracion. Filipensenan 4:6 y 7 ta bisa: “Pa medio di oracion y suplica hunto cu gradicimento, laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason y boso mente.” * Ruth a studia Bijbel y desahoga su mes cu Dios den oracion, y asina el a haya paz mental. Ademas, el a haya sa cu “cerca [Dios] tin pordon.”—Salmo 130:4.

“[Dios] no a trata cu nos segun nos picanan, ni a paga nos segun nos inikidadnan.”—Salmo 103:10.

^ par. 8 Un maleza cu kisas por pone sea bida di e mama of di e baby na peliger no ta un bon motibo pa haci abortus. Si durante e parto un pareha mester scoge entre e bida di e mama y esun di e yiu, ta e pareha mester dicidi kico nan ta haci. Nos tin cu bisa si cu, den hopi pais desaroya, progreso riba tereno di medicina ta yuda cu e tipo di casonan ey ta sosode masha poco.

^ par. 12 A cambia e nomber.

^ par. 14 E speransa di resureccion tambe por duna un hende paz mental. Wak e “Pregunta di Lector” den La Atalaya di 15 di april 2009. E articulo ta trata principionan di Bijbel cu ta indica cu un baby cu a muri prome cu e nace por haya resureccion.