Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Spierta!  |  Num. 2 2017

Consuelo pa Yiunan Cu A Perde un Mayor

Consuelo pa Yiunan Cu A Perde un Mayor

Bo ta tristo pa motibo cu un miembro di bo famia a muri? Si ta asina, con bo por deal cu e perdida ey? Wak con Bijbel a yuda tres hoben den e situacion ey.

DAMI SU STORIA

Dami

Prome, mi tata tabatin gewoon dolor di cabes. Pero ora e dolor a bira pio, mi mama a yama ambulance. Ainda mi ta corda con e paramediconan a bay cu ne. Nunca mi por a biba pensa cu esey lo tabata e ultimo bes cu lo mi mira mi tata na bida. Tres dia despues el a muri di un aneurisma celebral. Mi tabatin seis aña so.

Pa hopi aña mi a culpa mi mes pa e morto di mi tata. Mi tabata keda pensa riba e momento cu e paramediconan a bay cu ne, anto mi tabata puntra mi mes ta pakico mi a djis para wak y dicon mi no a haci nada. Mi tabata wak hende di edad cu tin problema cu salud, y mi tabata puntra mi mes ta dicon nan si ta na bida y mi tata no. Cu tempo, mi mama a yuda mi pa mi por a papia tocante mi sintimentonan. Y como testigo di Jehova, nos congregacion cristian a sostene nos masha bon mes.

Algun hende ta pensa cu bo ta sinti tristeza profundo pa un poco tempo despues di morto di un ser keri y cu despues di esey ta cla. Pero no tabata asina den mi caso. Ta te ora cu mi a bira teenager mi a echt cuminsa sinti mi hopi hopi tristo.

Mi conseho pa hobennan cu a perde un mayor den morto ta: “Papia cu un hende tocante loke bo ta pasando aden. Probablemente, mas lihe bo desahoga bo mes, mas mihor esey lo ta pa bo.”

Ta hopi duro pa mi cu mi tata no t’ey na momentonan importante den mi bida. Pero e promesa na Revelacion 21:4 ta consola mi. E ta bisa cu pronto Dios lo “seca tur lagrima for di [nos] wowo, y lo no tin morto mas; ni tristeza ni sclamacion ni dolor lo no tin mas.”

DERRICK SU STORIA

Derrick

Algun di e recuerdonan mas bunita cu mi tin di ami cu mi tata ta ora nos tabata bay campa den sero y pisca. E tabata gusta bay den sero.

Mi tata tabatin problema cu curason pa basta tempo. Y mi ta corda cu mi a yega di bishit’e un of dos biaha na hospital ora mi tabata mucha. Pero mi no tabata sa cu e tabata hopi malo. Ora mi tabatin nuebe aña, mi tata a muri di maleza di curason.

Despues cu el a muri, mi a yora masha hopi mes. Mi tabata sinti comosifuera mi no por a hala rosea, y mi no kier a papia cu niun hende. Nunca mi a yega di sinti asina malo, y mi no tabatin gana di haci nada mas. Mi tabata forma parti di un grupo  hubenil di misa. Na prome instante nan a mustra interes den mi, pero despues no mas. Nan tabata bisa mi cosnan manera, “Bo tata su ora a yega” of “Dios tabatin mester di dje” of “Awor e ta den cielo.” Nunca e palabranan ey no a consola mi, pero mi no tabatin ningun idea ta kico Bijbel ta siña realmente tocante e cosnan ey.

Despues mi mama a cuminsa studia Bijbel cu testigonan di Jehova, anto despues ami cu mi ruman homber a join e. Nos a siña kico ta e condicion di hende morto y tambe tocante Dios su promesa consolador di resureccion. (John 5:28, 29) Pero e texto cu mas a yuda mi ta Isaias 41:10, caminda Dios ta bisa: “No tene miedo, pasobra mi ta cu bo; no desmaya, pasobra mi ta bo Dios. Lo mi fortalece bo, si, lo mi yuda bo.” Tabata un consuelo hopi grandi pa sa cu Jehova ta cu mi durante mi tristeza, y te awe esey ta un consuelo pa mi.

JEANNIE SU STORIA

Jeannie

Mi mama a muri di cancer ora mi tabatin shete aña. Esey tabata un dia hopi straño pa mi. Mi ta corda cu el a muri na cas y cu mi madushi cu padushi tabat’ey. Mi ta corda cu tur hende tabata trankil. Tambe mi ta corda cu nos a come webo e anochi ey. Morto di mi mama tabata un cambio drastico den mi bida; mi a sinti cu tabata comosifuera un nachtmerrie.

E tempo ey, y pa hopi aña despues, mi a pensa cu mi mester haci duro pa mi ruman muher chikito, y pesey mi no tabata expresa mi sintimentonan di mas profundo. Te awe, mi tin e tendencia di no expresa mi sintimentonan doloroso. Mi sa cu e cos ey no ta bon pa mi.

Mi ta corda con nos congregacion di testigonan di Jehova a mustra nos amor y a duna nos sosten. Maske nos no tabatin hopi tempo ta asisti na e reunionnan na Salon di Reino, e rumannan den fe a sostene nos comosifuera nos ta famia pa hopi aña caba. Mi kier sa cu pa henter un aña mi tata no mester a cushina pasobra semper nan tabata trece cuminda pa nos.

Un texto cu mi gusta hopi ta Salmo 25:16 y 17. E salmista a roga Dios: “Bira wak mi y tene misericordia di mi, pasobra mi ta solitario y afligi. E angustianan di mi curason ta aumenta; saca mi for di mi anshanan.” Pa ami ta un consuelo pa sa cu eigenlijk nunca bo ta echt bo so ora bo ta tristo. Dios ta cu bo. Bijbel a yuda mi sigui cu mi bida y focus riba cos positivo, manera e promesa consolador cu Bijbel ta duna di resureccion. Mi tin speransa di wak mi mama bek y siña conoc’e ora e tin salud perfecto den Paradijs riba Tera.—2 Pedro 3:13.

Bo kier haya mas informacion tocante e mensahe consolador aki cu Bijbel tin pa esnan cu a perde un ser keri? Download e foyeto gratis “Ora un Persona Stimá Muri.” Bay na www.jw.org/pap, y click riba PUBLICACION > BUKI Y FOYETO.

Mas Informacion

PREGUNTA CU BIJBEL TA CONTESTA

Kico Ta Pasa Cu Nos Ora Nos Muri?

E mortonan ta consciente di loke ta pasa rond di nan?