Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Spierta!  |  Num. 2 2017

 E PUNTO DI BISTA BIBLICO

Cruz

Cruz

Hopi hende ta haya cu cruz ta un simbolo di cristianismo. Pero no ta tur ta kere cu mester bistie na cadena of colg’e den cas of den misa.

Hesus a muri na cruz?

LOKE ALGUN HENDE TA BISA

 

E Romanonan a mata Hesus na un cruz cu ta consisti di dos pida palo.

LOKE BIJBEL TA BISA

 

Nan a mata Hesus “door di colg’e na un palo.” (Echonan 5:30, The New Jerusalem Bible) Tur dos palabra Griego cu escritornan di Bijbel a uza pa describi e obheto cu nan a claba Hesus na dje ta indica cu tabata trata di un pida palo, y no di dos pida palo. Segun e buki Crucifixion in Antiquity, e palabra Griego staurós ta nifica “principalmente un palo. E no tin e mesun nificacion cu e palabra ‘cruz.’” E palabra Griego xýlon cu Echonan 5:30 a uza ta nifica “djis un palo of staca stret riba cua e Romanonan tabata claba hende cu nan tabata bisa a ser crucifica.” *

Ademas, Bijbel ta bisa cu e manera cu nan a ehecuta Hesus tabatin di haber cu un ley di Israel di antiguedad. E ley a stipula: “Si un homber a comete un pica digno di morto y e wordo mata, y boso colg’e na un palo, ... esun cu wordo colga ta maldiciona di Dios.” (Deuteronomio 21:22, 23) Referiendo na e ley aki, apostel Pablo a skirbi cu Hesus a bira “un maldicion na nos luga, pasobra ta para skirbi: ‘Maldiciona ta tur hende claba na staca [xýlon].’” (Galationan 3:13) Pues, Pablo a indica cu Hesus a muri na un staca: un pida palo.

“Nan a mat’e door di colg’e na un palo.”Echonan 10:39, The New Jerusalem Bible.

 Acaso e siguidornan di Hesus a uza cruz pa adora Dios of como simbolo di cristianismo?

LOKE BIJBEL TA BISA

 

Ningun caminda Bijbel ta bisa cu e prome cristiannan a uza cruz como un simbolo religioso. Pero e Romanonan di e tempo ey si a uza cruz pa simbolisa nan diosnan. Anto despues, mas o menos 300 aña despues di e morto di Hesus, Emperador Romano Constantino a scoge cruz como simbolo di su ehercito, y despues di esey, a cuminsa identifica cruz cu e asina yama religionnan cristian.

Ta e paganonan a uza cruz pa adora nan diosnan. Pues, bo ta kere cu Hesus su discipelnan lo a uza cruz pa adora e Dios berdadero? Al contrario, nan tabata sa pa hopi tempo caba cu Dios no tabata kier pa nan ador’e mediante nada cu tin “forma di un figura” y cu cristiannan mester a “huy di idolatria.” (Deuteronomio 4:15-19; 1 Corintionan 10:14) “Dios ta un Spirito” cu hende no por mira. Pesey e prome cristiannan no tabata uza ni obheto ni simbolo pa nan sinti nan mes mas cerca di Dios. Mas bien, nan tabata ador’e “cu spirito”, kiermen bou di guia di su spirito santo invisibel, y “cu berdad”, kiermen di acuerdo cu e boluntad di Dios cu ta para skirbi den Bijbel.—Juan 4:24.

“Adoradornan berdadero lo adora e Tata cu spirito y cu berdad.”Juan 4:23.

Con cristiannan mester mustra aprecio pa Hesucristo?

LOKE HENDE TA BISA

 

“Ta masha normal y logico cu e instrumento di salbacion mester bira un obheto di adoracion y veneracion special ... Ken cu ta adora imagen ta adora e persona cu e imagen ta representa.”—New Catholic Encyclopedia.

LOKE BIJBEL TA BISA

 

Cristiannan mester ta hopi agradecido na Hesus. Dicon? Pasobra danki na su morto nos por haya pordon pa nos picanan, nos por acerca Dios den oracion y haya bida eterno. (Juan 3:16; Hebreonan 10:19-22) Bijbel no ta bisa cu nan mester tin un simbolo di Hesus bisti ni cu nan mester simplemente bisa cu nan ta kere den dje pa mustra aprecio pa loke Hesus a haci. Al fin y al cabo, “fe riba su so, si e no tin obra, ta morto.” (Santiago 2:17) Cristiannan mester demostra cu nan tin fe den Hesus. Con nan por haci esey?

Bijbel ta bisa: “E amor di Cristo ta obliga nos pa haci esaki, ya cu ta na e conclusion aki nos a yega: un hende a muri pa tur ... Pa esnan cu ta biba no biba mas pa nan mes, ma pa esun cu a muri pa nan y a ser lanta for di morto.” (2 Corintionan 5:14, 15) E amor inmenso cu Cristo a mustra ora el a entrega su bida ta motiva cristiannan pa cambia nan bida pa sigui su ehempel. Bo no ta haya cu asina nos ta mustra hopi mas aprecio pa loke Hesus a haci pa nos cu si nos uza obhetonan religioso?

“E boluntad di mi Tata ta pa tur hende cu reconoce e Yiu y pone fe den dje haya bida eterno.”Juan 6:40.

^ par. 8 Segun A Critical Lexicon and Concordance to the English and Greek New Testament, e di 11 Edicion, di Ethelbert W. Bullinger, pagina 818-819.

Mas Informacion

SCUCHA DIOS Y BIBA PA SEMPER

Pakico Hesus Mester A Muri?

Nos lo por haya bendicionnan grandi.