Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  March 2016

Di buena gana Ezekiel a cumpli cu su asignacion relaciona cu e sitiamento di Jerusalem

Imita e Spirito di Sacrificio Propio di e Profetanan

Imita e Spirito di Sacrificio Propio di e Profetanan

BO TIN algo en comun cu e profetanan? E lista di aclaracion di palabra den e edicion revisa di e New World Translation ta duna e siguiente definicion di un profeta: “Un persona cu Dios ta uza pa revela su proposito. Profetanan tabata vocero di Dios. Nan no solamente tabata bisa loke ta bay pasa, sino tambe nan a transmiti Jehova su siñansa-, mandamento- y huicionan.” Den nos caso, nos no ta profetisa, pero si nos ta papia pa Dios y ta proclama loke tin para skirbi den su Palabra.—Mat. 24:14.

Ta un gran privilegio pa nos por conta otronan tocante nos Dios, Jehova, y siña nan tocante su proposito pa humanidad. Nos ta haci e trabou aki hunto cu e “angel [cu] ta bula meymey di cielo.” (Rev. 14:6) Pero kisas nos por enfrenta retonan cu por pone nos perde e gran privilegio aki for di bista. Cua ta algun di e retonan aki? Algun di nan ta cansancio, desanimacion y e sintimento di no ta bal nada. E profetanan fiel tambe a haya nan cu e retonan aki, pero nan no a entrega. Y Jehova a yuda nan cumpli cu nan asignacion. Ban considera ehempel di algun profeta y con nos por imita nan.

NAN A HACI TUR NAN ESFUERSO

Tin biaha nos por sinti nos mes cansa debi na nos quehaceres di tur dia y nos no tin gana di bay sirbishi. Claro cu nos mester sosega; hasta Hesus y su apostelnan a haci esey. (Mar. 6:31) Pero pensa riba Ezekiel y su asignacion ora e y e Israelitanan tabata den cautiverio na Babilonia. Un biaha Dios a bisa Ezekiel pa coy un klinker y graba e stad di Jerusalem riba dje. Despues e mester a rondona e stad miniatura aki figurativamente door di drumi riba su banda robes pa 390 dia y  despues riba su banda drechi pa 40 dia. Jehova a bis’e: “Mira, lo mi pasa cabuya rond di bo, asina cu bo no por bira di un banda pa otro, te ora cu bo a caba di completa e dianan cu bo a rondona Jerusalem.” (Eze. 4:1-8) Esey lo mester a hala atencion di e Israelitanan den cautiverio. Pa mas cu un aña, Ezekiel mester a cumpli cu e rekisito aki, loke lo mester a lag’e bastante cansa. Con e profeta por a cumpli cu e asignacion aki?

Ezekiel a compronde pakico Dios a mand’e como profeta. Ora Dios a nombr’e, El a bis’e: “Sea cu nan scucha of laga di scucha ...  nan lo sa cu tabatin un profeta meymey di nan.” (Eze. 2:5) El a tene na mente e proposito di su asignacion. Pesey di buena gana el a cumpli cu su asignacion relaciona cu e sitiamento figurativo di Jerusalem. Asina el a demostra di ta un berdadero profeta. Ezekiel y e otro exiliadonan a haya noticia: “E stad a wordo conkista.” Si, e Israelitanan a realisa cu tabatin un profeta meymey di nan.—Eze. 33:21, 33.

Awe, nos ta spierta hende tocante e binidero destruccion di e mundo malbado di Satanas. Maske nos por ta fisicamente cansa, nos ta uza nos energia pa predica e Palabra di Dios, haci rebishita y dirigi estudio di Bijbel. Segun cu e profecianan tocante e conclusion di e sistema aki ta cumpli, nos tin e satisfaccion di ta “un persona pa medio di ken Dios ta duna di conoce su proposito.”

NAN A DEAL CU DESANIMACION

Nos ta haci tur nos esfuerso cu yudansa di Jehova su spirito, pero tin bes nos por sinti nos desanima pa e manera cu hende sa reacciona na nos mensahe. Si ta asina, pensa riba e ehempel di profeta Jeremias. E Israelitanan a ridiculis’e, insult’e y haci bofon di dje pasobra el a proclama e mensahe di Dios na nan. Na un dado momento Jeremias a sintie asina malo cu el a bisa: “Lo mi no corda riba dje, ni papia mas den su nomber.” Jeremias tabatin mesun sintimentonan cu nos. Toch, el a sigui hiba e mensahe di Dios. Dicon? E profeta a agrega tocante e mensahe: “E ora ey esey ta bira manera candela den mi curason, cera den mi wesonan; mi ta cansa di ten’e paden, y mi no por mas.”—Jer. 20:7-9.

Di mes manera, si nos ta desanima pa motibo di e manera cu hende ta reacciona na nos mensahe, nos por lucha contra e sintimento ey ora nos medita riba e mensahe cu nos ta proclama. E por ta manera un “candela ... cera den [nos] wesonan.” Un bon custumber di lesa Bijbel tur dia por tene e candela ey cendi den nos.

NAN A SUPERA SINTIMENTO NEGATIVO

Algun cristian cu haya un asignacion por sinti nan mes preocupa debi cu nan no sa con nan mester cumpli cu ne of ta dicon nan a hay’e. Profeta Oseas lo a sintie asina. Jehova a bis’e: “Bay, tuma pa bo mes un esposa prostituta y haya yiunan di prostitucion.” (Ose. 1:2) Imagina bo con lo bo sinti si bo ta bay casa pero Dios ta bisa bo cu bo esposa lo bira un prostituta. Oseas a acepta e asignacion. El a tuma Gomer como su esposa, y nan a haya un yiu homber. Despues Gomer a haya un yiu muher y un yiu homber mas. Ta parce cu e ultimo dos yiunan aki tabata fruta di su adulterio. Jehova a bisa Oseas cu su futuro esposa lo a “core tras di su amantenan.” Tuma nota cu Bijbel ta uza e forma plural, “amantenan.” Despues lo el a purba di bay bek cerca Oseas. Awor, si abo tabata e profeta, lo bo a tuma bo casa bek? Esey ta net loke Jehova a bisa Oseas pa haci. E profeta a hasta paga un suma basta halto pa hay’e bek.—Ose. 2:7; 3:1-5.

Kisas Oseas lo a puntra su mes si tabatin sentido pa cumpli cu su asignacion. Sinembargo, el a cumpli cu ne fielmente, y su ehempel ta yuda nos compronde e dolor cu e Todopoderoso a sinti ora Israel a traicion’e. Y echo ta cu algun Israelita di curason honrado a bolbe na Dios.

Awe Dios no ta bisa niun hende pa casa cu un “esposa prostituta.” Pero ki les nos por saca for  di e disposicion di Oseas pa cumpli cu un asignacion asina? Un les ta pa nos ta dispuesto pa predica e bon noticia di e Reino “publicamente y di cas pa cas”, hasta si nos ta haya cu esey no ta nada facil. (Echo. 20:20) Podise algun rasgo di e trabou di predica ta un poco dificil pa bo. Hopi hende cu ta studia Bijbel cu testigonan di Jehova a bisa cu nan ta gusta e estudio pero cu nan si lo no bay di cas pa cas. Pero despues, hopi di nan a cuminsa haci loke un tempo nan a pensa cu tabata imposibel pa nan. Esta un les valioso!

Nos por siña un otro les di Oseas ora el a acepta e asignacion dificil ey. E por a busca un excuus pa no cumpli cu e asignacion ey. Al fin y al cabo, si e no a skirbi tocante dje, niun hende lo no a haya sa. Nos tambe por haya nos den un situacion caminda nos ta haya chens pa conta hende tocante Jehova y niun otro hende lo no haya sa di e oportunidad ey. Esey ta loke cu a pasa cu Anna, un studiante di scol secundario na Merca. Su docente a pidi e klas pa skirbi un opstel di un tema cu nan ta convenci di dje y despues purba di convence e klas di e tema. Anna por a keda sin duna testimonio, pero el a sinti cu ta Dios mes a dun’e e chens ey. E por a imagin’e con e klas lo a reacciona, y pesey el a pidi Jehova yud’e, y un deseo pa probecha di e oportunidad ey a lanta den dje. El a skirbi su opstel y a dun’e e titulo: “Evolucion: Kico e Echonan Ta Mustra?”

Nos hobennan ta imita e spirito di sacrificio propio di e profetanan; cu curashi nan ta defende Jehova como nos Creador

Ora Anna a presenta su opstel, un mucha muher cu ta kere den evolucion a bombardi’e cu pregunta. Anna a defende su mes bon, y su docente a keda asina impresiona cu el a dun’e un premio pasobra su opstel tabata esun di mas convencente. For di e dia ey, Anna a sigui papia cu e mucha muher ey tocante creacion. Pues, e tabata dispuesto pa acepta un “asignacion” di Jehova. Como resultado, Anna a bisa: “Awor mi por predica e bon noticia cu confianza.”

Nos no ta profeta den tur sentido di palabra. Pero ora nos imita e spirito di sacrificio propio di profetanan manera Ezekiel, Jeremias y Oseas, nos tambe por cumpli cu exito cu e boluntad cu Jehova tin pa nos awe. Durante bo Adoracion Como Famia of estudio personal, pakico no lesa tocante otro profetanan y medita riba con bo por imita nan ehempel?