Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  March 2016

Hoben—Bo Ta Cla pa Batisa?

Hoben—Bo Ta Cla pa Batisa?

“Cua di boso cu kier traha un toren no ta sinta calcula e gasto prome pa wak si e tin suficiente pa cab’e?”—LUC. 14:28.

CANTICA: 120, 64

E articulo aki y esun siguiente ta dirigi na hobennan cu tin pensa di batisa

1, 2. (a) Awe, kico ta duna e pueblo di Dios goso? (b) Con mayornan cristian y ancianonan por yuda hobennan compronde kico bautismo ta nifica?

“MI CONOCE bo for di dia cu bo a nace, y mi ta hopi contento di tende cu bo kier batisa.” Asina un anciano a bisa Christopher tempo cu e tabatin 12 aña. Pero despues e anciano a puntr’e: “Dicon bo kier batisa?” E pregunta ey tabata na su luga. Claro cu nos ta keda hopi contento cu tur aña miles di hoben rond mundo ta batisa. (Ecl. 12:1) Pero na mes momento, mayornan cristian y ancianonan di congregacion kier haci sigur cu e decision ey ta bin di e hobennan mes y cu nan ta compronde kico bautismo ta nifica.

2 E Palabra di Dios ta indica cu dedicacion y bautismo ta  comienso di un bida cristian, un bida cu lo trece hopi bendicion di parti di Jehova pero tambe oposicion di Satanas. (Prov. 10:22; 1 Ped. 5:8) Pesey, mayornan cristian ta tuma tempo pa siña nan yiunan kico realmente ta nifica ser discipel di Cristo. Den caso di hobennan cu no tin mayornan cristian, ancianonan di congregacion lo yuda nan compronde kico dedicacion y bautismo ta nifica. (Lesa Lucas 14:27-30.) Mescos cu un hende tin cu plania un proyecto di construccion pa e por cab’e, asina tambe, un hoben tin cu prepara su mes prome cu e batisa pa e por sirbi Jehova fielmente “te na fin.” (Mat. 24:13) Kico por duna un hoben e determinacion pa sirbi Jehova pa resto di su bida? Laga nos ban wak.

3. (a) Kico e palabranan di Hesus na Mateo 28:19 y 20, y e palabranan di Pedro na 1 Pedro 3:21 ta siña nos tocante e importancia di bautismo? (b) Ki preguntanan nos lo considera, y dicon?

3 Bo ta un hoben cu tin pensa di batisa? Si ta asina, nos ta elogia bo pa esey. Ta un gran privilegio pa batisa como testigo di Jehova. Ademas, bautismo ta un rekisito cristian, y e ta un paso importante pa haya salbacion. (Mat. 28:19, 20; 1 Ped. 3:21) Ora bo batisa, bo ta mustra cu bo a priminti di sirbi Jehova pa semper. Y claro cu di curason lo bo kier cumpli cu bo promesa. Pesey, ta bon pa bo analisa e siguiente tres preguntanan pa wak si bo ta cla pa batisa: (1) Mi ta suficiente madura pa tuma e decision pa batisa? (2) E decision ey ta bin di mi mes? (3) Mi ta compronde kico dedica mi bida na Jehova ta nifica? Laga nos considera e preguntanan aki.

BO TA SUFICIENTE MADURA?

4, 5. (a) Dicon bautismo no ta solamente pa hende grandi? (b) Kico ta nifica ser un cristian maduro?

4 Bijbel no ta bisa cu bautismo ta solamente pa hende cu a yega un cierto  edad of pa hende grandi. Proverbionan 20:11 ta bisa: “Te hasta un mucha ta conoci pa su echonan, si su conducta ta puro y recto.” Kiermen, hasta un mucha por compronde kico ta nifica haci loke ta corecto y dedica su bida na su Creador. Pues, bautismo ta un paso importante y apropia pa un hoben cu a demostra cu e tin suficiente madurez spiritual y cu a haci un dedicacion na Jehova.—Prov. 20:7.

5 Awor, kico ta madurez? Madurez ta encera mas cu djis crecemento fisico. Bijbel ta bisa cu hende madura a “entrena [nan capacidad di compronde] pa distingui loke ta bon for di loke ta malo.” (Heb. 5:14) Pues, un persona madura sa kico ta corecto den bista di Jehova y ta determina pa haci esey. Como resultado, hende lo no influenci’e facilmente pa haci malo. Pero tampoco hende lo tin cu bis’e cada rato kico ta e cos corecto pa haci. Pues, un hoben cu batisa lo pega na e normanan di Dios hasta ora su mayornan of otro hende grandi no ta hunto cu ne.—Compara cu Filipensenan 2:12.

6, 7. (a) Ki retonan Daniel a enfrenta tempo cu e tabata na Babilonia? (b) Con Daniel a demostra cu e tabata un hoben maduro?

6 Un hoben realmente por demostra tal madurez? Wel, wak e ehempel biblico di Daniel. Muy probablemente e tabata un teenager ora nan a ranc’e for di su mayornan y hib’e den cautiverio na Babilonia. Di un dia pa otro, el a hay’e ta biba entre hende cu tabatin nan mes concepto di kico ta bon y kico ta malo. Fuera di esey, el a hay’e cu un otro reto: El a haya un trato special na Babilonia; e tabata un di e poco hobennan cu a ser scogi pa sirbi e rey. (Dan. 1:3-5, 13) Ta parce cu Daniel a haya oportunidadnan na Babilonia cu nunca lo e por a haya na Israel.

7 Con e hoben Daniel a reacciona? El a bay tras di tur e cosnan atractivo di Babilonia? Acaso el a laga e habitantenan di Babilonia influenci’e of zwak su fe? Di ningun manera. Bijbel ta bisa cu Daniel a dicidi den su curason pa “no contamina su mes” cu nada cu tabatin di haber cu adoracion falso. (Dan. 1:8) Pues, Daniel a demostra un madurez excepcional.

Un hoben spiritualmente maduro lo no comporta su mes como amigo di Dios na Salon di Reino y na mes momento amigo di mundo ora e ta na scol (Wak paragraf 8)

8. Kico bo por siña for di e ehempel di Daniel?

8 Kico bo por siña for di e ehempel di Daniel? Pa cuminsa, un hoben maduro lo defende su creencianan. E no ta manera un camaleon cu ta cambia di color pa e adapta su mes na su ambiente. E no ta comporta su mes como amigo di Dios na Salon di Reino y na mes momento amigo di mundo ora e ta na scol. En bes di ser benta p’aki y p’aya den e mundo aki, e ta keda fiel hasta bou di prueba.—Lesa Efesionan 4:14, 15.

9, 10. (a) Dicon ta bon pa un hoben pensa riba con el a reacciona ora el a hay’e cu pruebanan mas recien? (b) Con serio bautismo ta?

9 Claro cu niun hende no ta perfecto, y nos tur, tanto hende grandi como hoben, ta faya. (Ecl. 7:20) Pero si bo tin pensa di batisa, ta bon pa bo analisa con determina bo ta pa obedece e mandamentonan di Jehova. Con bo por haci esey? Wel, puntra bo mes: Mi a demostra cu mi ta haci mi best pa pega na e normanan di Dios? Con mi a reacciona riba e pruebanan mas recien cu mi a haya mi cu ne? Mi a demostra cu  mi tin e capacidad pa distingui bon for di malo? Kico si un hende den e mundo di Satanas kier duna mi un trato special, mescos cu Daniel a haya? Si acaso esey ta un tentacion pa mi, mi sa “kico ta e boluntad di Jehova”?—Efe. 5:17.

10 Dicon ta importante pa bo sa e contesta pa e preguntanan personal aki? Pasobra nan lo yuda bo mira con serio bautismo ta. Manera nos a bisa anteriormente, bautismo ta un muestra di un promesa solem cu bo a haci na Jehova. Bo a primintie cu pa semper lo bo stim’e y sirbie cu henter bo curason. (Mar. 12:30) Tur hende cu batisa mester ta determina pa cumpli cu nan promesa.—Lesa Eclesiastes 5:4, 5.

E DECISION PA BATISA TA BIN DI BO MES?

11, 12. (a) Un persona cu tin pensa di batisa mester haci sigur di kico? (b) Kico por yuda bo mira bautismo manera Jehova ta mir’e?

11 Bijbel ta bisa cu e pueblo di Jehova, incluso e hobennan, lo sirbie di buena gana. (Sal. 110:3) Pues, un persona cu tin pensa di batisa mester ta sigur cu e decision ey ta bin di su mes. Pesey bo tin cu analisa pakico bo kier batisa, specialmente si bo a lanta den e berdad.

12 Den transcurso di tempo, kisas bo a mira yen di hende batisa, incluso algun hoben di bo edad y podise bo mes rumannan. Si esey ta e caso, tene cuidou pa bo no pensa cu bo tin cu batisa djis pasobra bo a yega un cierto edad of pasobra tur otro hende ta batisa. Kico por yuda bo haci sigur cu bo ta mira bautismo manera Jehova ta mir’e? Wel, para keto y puntra bo mes pakico bautismo ta asina importante. E articulo aki y esun siguiente lo duna bo diferente bon motibo pakico ta importante pa bo batisa.

13. Con bo por sa si e decision pa batisa ta bin di bo mes?

13 Un manera pa bo sa si di berdad e decision pa batisa ta bin di bo mes ta di analisa bo oracionnan. Cuanto biaha bo sa haci oracion? Con specifico bo oracionnan ta? E contesta riba e preguntanan aki por revela con fuerte bo relacion cu Jehova ta. (Sal. 25:4) Un manera importante cu Jehova ta contesta nos oracionnan ta mediante su Palabra. Pues, si bo ta haci esfuerso pa studia Bijbel, bo ta mustra cu di berdad bo kier hala mas cerca Jehova y sirbie di curason. (Jos. 1:8) Pesey, puntra bo mes: Mi ta haci estudio personal riba un base regular? Si mi ta forma parti di un famia cristian, mi ta participa di buena gana den Adoracion Como Famia? Bo contesta riba e preguntanan ey lo yuda bo mira si e decision pa batisa ta bin di bo mes.

KICO TA NIFICA DEDICA BO BIDA NA JEHOVA?

14. Splica kico ta e diferencia entre dedicacion y bautismo.

14 Algun hende kisas no sa kico ta e diferencia entre dedicacion y bautismo. Por ehempel, algun hoben ta bisa cu nan a haci un dedicacion na Jehova pero cu nan no ta cla pa batisa. Pero esey ta zona logico? Ora bo dedica bo bida na Jehova den oracion, bo ta primintiendo e cu lo bo sirbie pa semper. Na momento cu bo batisa, bo ta mustra publicamente cu ya bo a dedica bo bida na Jehova den oracion. Pues,  prome cu bo batisa, bo mester haci sigur cu bo ta compronde kico dedicacion ta.

15. Kico ta nifica dedica bo bida na Jehova?

15 Cu poco palabra, ora bo dedica bo bida na Jehova, bo ta bis’e cu awor bo ta pertenece na dje. Bo ta priminti Jehova cu bo sirbishi na dje lo ta e cos di mas importante den bo bida. (Lesa Mateo 16:24.) Tur promesa cu bo haci ta serio, pero e promesa aki na Jehova Dios ta hasta mas serio. (Mat. 5:33) Pesey con bo por demostra cu bo no ta biba mas pa bo mes pero pa Jehova?—Rom. 14:8.

16, 17. (a) Duna un ehempel di kico kiermen cu bo no ta biba mas pa bo mes. (b) Kico un persona cu haci un dedicacion na Jehova ta bisando Dios eigenlijk?

16 Por ehempel, imagina bo cu un amigo ta regala bo un auto. E ta pon’e na bo nomber y ta bisa bo: “E auto aki ta pa bo.” Pero imagina bo cu e ta bisa bo: “Ami lo keda cu e yabi. Y ami ta esun cu lo stuur e auto, no abo.” Con lo bo sinti bo cu un regalo asina? Kico lo bo pensa di bo amigo?

17 Awor, pensa riba un persona cu ta bisa Jehova: “Mi ta dedica mi bida na bo. Mi ta pertenece na bo.” Jehova tin derecho di spera cu e persona aki ta tene su mes na su palabra, no ta berdad? Awor, imagina bo cu e persona cuminsa hiba un bida dobel y kisas ta date un hende cu no ta sirbi Jehova. Of e ta acepta un trabou cu ta limita e tempo cu e por traha den sirbishi of ta strob’e di bay su reunionnan. E lo ta cumpliendo cu su promesa na Jehova? E no ta kedando, na moda di papia, cu e yabi di e auto? Un persona cu dedica su bida na Jehova, de echo, ta bis’e: “Si mi tin cu scoge entre haci bo boluntad y haci loke ami mes ta desea di haci, semper lo mi scoge pa haci loke abo kier.” Pues, semper nos lo haci loke Jehova kier, hasta ora ta algo cu nos mes no tin gana di haci. Asina nos ta imita Hesus, kende a bisa: “Mi no a baha for di cielo pa haci mi boluntad, ma pa haci boluntad di esun cu a manda mi.”—Juan 6:38.

18, 19. (a) Con loke Rose y Christopher a bisa ta mustra cu bautismo ta un privilegio cu ta trece bendicion? (b) Kico abo ta pensa di bautismo?

18 Ta bisto anto cu bautismo ta un asunto hopi serio. Na mes momento, ta un gran privilegio pa dedica bo bida na Jehova y batisa. Hobennan cu ta stima Jehova y cu ta compronde kico dedicacion ta lo no duda pa batisa ni lo no duel nan cu nan a tuma e decision ey. Rose, un hoben batisa, a bisa: “Mi ta stima Jehova, y mi ta hopi contento di por sirbie. Anto mi decision pa batisa ta e decision cu mi tabata mas sigur di dje.”

19 Y kico di Christopher, menciona na comienso di e articulo aki? Kico e ta pensa tocante su decision pa batisa tempo cu e tabatin 12 aña? E ta hopi contento cu el a tuma e decision ey. El a cuminsa traha pionero regular cu 17 aña, el a bira sirbidor ministerial cu 18 aña y awor e ta sirbi na Betel. El a bisa: “Bautismo tabata e decision corecto. Mi ta traha pa Jehova y su organisacion, y esey ta duna mi hopi satisfaccion.” Si abo tin pensa di batisa, con bo por prepara p’e? E siguiente articulo lo trata e pregunta ey.