Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2016

Feliz di Por Traha Hunto cu Jehova

Feliz di Por Traha Hunto cu Jehova

“Colaborando hunto cu Dios, nos ta suplica boso pa no acepta Dios su bondad inmereci y keda sin cumpli cu su proposito.”—2 COR. 6:1.

CANTICA: 75, 74

1. Maske Jehova ta e Dios Supremo, kico el a invita otro personanan pa haci?

JEHOVA ta e Dios Supremo, Creador di tur cos, e Ser mas sabi y poderoso di henter universo. Job a compronde esaki. Despues cu Jehova a hacie algun pregunta tocante creacion, Job a contesta: “Mi sa cu bo por haci tur cos, y cu ningun di bo propositonan no por wordo stroba.” (Job 42:2) Pues, Jehova por haci kico cu e dicidi di haci, sin tin mester di niun yudansa. Toch, for di cuminsamento el a invita otro personanan pa traha hunto cu ne pa cumpli cu su proposito.

2. Ki trabou importante Jehova a duna Hesus pa haci?

2 E prome creacion di Dios tabata su Yiu, Hesus. Jehova a permiti su Yiu yud’e crea tur otro cos, tanto cos material como spiritual. (Juan 1:1-3, 18) Apostel Pablo a skirbi lo siguiente tocante Hesus: “Pa medio di dje tur otro cos a ser crea, tanto den cielo como riba Tera, cosnan visibel y cosnan invisibel, sea cu nan ta trono, dominio, gobierno of autoridad. Tur otro cos  a ser crea pa medio di dje y p’e.” (Col. 1:15-17) Pues, Jehova no solamente a laga su Yiu colabora cu ne den e tremendo trabou di creacion, pero tambe el a conta tur hende tocante e papel importante di su Yiu. Esta un gran honor!

3. Ki tarea Jehova a duna Adam, y dicon?

3 Jehova a invita hende tambe pa traha hunto cu ne. Por ehempel, el a duna Adam e tarea di duna bestia nomber. (Gen. 2:19, 20) Sin duda, pa Adam tabata un placer p’e studia e comportacion y caracteristicanan di e bestianan, y despues dicidi ki nomber ta pas pa cada un di nan. Jehova mes por a duna e bestianan nomber; t’e a crea nan. Pero debi na e amor cu e tabatin pa Adam, el a lag’e haci esaki. Tambe el a duna Adam e tarea di extende e Paradijs riba henter e Tera. (Gen. 1:27, 28) Lamentablemente, Adam a dicidi di stop di colabora cu Jehova, y e resultado tabata un desaster, tanto pa Adam como pa su descendientenan.—Gen. 3:17-19, 23.

4. Con varios hende a traha hunto cu Dios pa cumpli cu su boluntad?

4 Tabatin mas hende cu Jehova a invita pa traha hunto cu ne: Noe a traha un arca p’e cu su famia por a sobrevivi e Diluvio. Moises a libra e nacion di Israel for di Egipto. Josue a hiba e nacion ey den e Tera Priminti. Salomon a traha e tempel na Jerusalem. Maria a bira e mama di Hesus. Jehova a uza tur e hendenan fiel aki—y hopi mas—pa colabora cu ne y cumpli cu su boluntad.

5. (a) Den ki trabou nos tur por participa? (b) Jehova tin mester di nos yudansa? (Wak e prome plachi.)

5 Awe, Jehova ta invita nos pa haci tur nos esfuerso pa apoya e Reino Mesianico, y tin varios manera pa haci esey. Kisas nos no por participa den tur e formanan di sirbishi sagrado, pero nos tur por predica e bon noticia di Reino. Claro cu Jehova no tin mester di nos pa haci e trabou ey. Lo e por a papia cu hende directamente for di cielo. Hesus a bisa cu Jehova por a laga hasta e piedranan papia tocante e Rey Mesianico. (Luc. 19:37-40) Toch e ta permiti nos pa ta su “compañero di trabou.” (1 Cor. 3:9) Apostel Pablo a skirbi: “Colaborando hunto cu Dios, nos ta suplica boso pa no acepta Dios su bondad inmereci y keda sin cumpli cu su proposito.” (2 Cor. 6:1) Nos no merece e honor di traha hunto cu Dios, pero nos ta hopi feliz cu el a duna nos e invitacion ey. Laga nos wak dicon.

NOS TA FELIZ DI POR TRAHA HUNTO CU DIOS

6. Con e prome Yiu di Dios a sintie trahando hunto cu su Tata?

6 Jehova su sirbidornan semper a sinti nan hopi feliz di por traha hunto cu ne. Un di nan ta Hesus, e prome Yiu di Dios. Segun Bijbel, el a bisa prome cu el a bin na Tera: “SEÑOR a crea mi na principio di su caminda ... Mi tabata na su lado, manera un trahador experto, y dia tras dia mi tabata su delicia, regocihando semper su dilanti.” (Prov. 8:22, 30) Hesus tabata hopi contento di por a traha hunto cu su Tata, y e tabata feliz cu e resultadonan di su trabou y di sa cu Jehova stim’e. Kico di nos?

Tin un trabou cu por duna nos mas satisfaccion cu esun di siña un hende e berdad? (Wak paragraf 7)

7. Dicon nos ta sinti nos feliz ora nos ta predica?

7 Hesus a bisa cu nos lo ta feliz tanto ora nos ta duna como ora nos ta ricibi algo. (Echo. 20:35) Por ehempel, nos a keda hopi contento ora nos a haya e berdad, y awor nos ta sinti un goso ora nos ta compartie cu otro hende. Dicon? Pasobra nos ta mira con feliz e hendenan  ta bira ora nan conoce Dios y compronde e berdadnan valioso cu tin den su Palabra. Ta emocionante pa mira nan haci cambio, no solamente den nan manera di pensa sino tambe den nan manera di biba. Nos ta mira bon cla con importante e trabou di predica ta, ya cu e ta duna hende e oportunidad di reconcilia cu Dios y haya bida eterno. (2 Cor. 5:20) Acaso tin un trabou cu por duna nos mas satisfaccion y felicidad cu esun di yuda hende haya e berdad cu ta hiba na bida eterno?

8. Kico algun ruman a bisa tocante e goso di por traha cu Jehova?

8 Aunke nos ta keda contento ora hende reacciona bon riba e mensahe cu nos ta predica, nos ta sinti nos mas feliz ainda di sa cu nos ta haciendo e boluntad di Jehova y cu e ta aprecia nos esfuerso pa sirbie. (Lesa 1 Corintionan 15:58.) Marco, cu ta biba na Italia, a bisa: “Mi no por splica con feliz mi ta sinti mi di por duna lo mihor na Jehova y no na un hende cu ta lubida lihe kico mi a haci p’e.” Franco, cu tambe ta sirbi na Italia, a bisa: “Tur dia Jehova ta uza su Palabra, e publicacion- y reunionnan cristian pa corda nos cu e stima nos. Aunke kisas nos ta pensa cu loke nos ta haci ta tiki, nos esfuersonan ta hopi importante p’e. Ta pesey mi ta sinti mi hopi feliz di por traha hunto cu Dios; e ta duna mi bida un proposito.”

UN TRABOU CU TA YUDA NOS HALA MAS CERCA DI DIOS Y DI NOS RUMANNAN

9. (a) Con e relacion entre Jehova y Hesus ta? (b) Con nan a yega na un relacion asina?

9 Ora nos ta traha hunto cu un hende cu nos ta stima, nos amistad cu ne ta bira mas cera. Nos ta siña conoce su personalidad y su cualidadnan. Nos ta haya sa kico ta su metanan y con e ta purba di alcansa nan. Esey ta loke a pasa entre Jehova cu Hesus. Nan a traha hunto pa miles di miyones di aña, y nan a forma un relacion di cariño asina fuerte cu nada no por kibr’e. Nan amistad ta asina cera cu na un ocasion Hesus a bisa: “Ami cu e Tata ta un.” (Juan 10:30) Nan a disfruta di un union maraviyoso y a traha hunto den pleno harmonia.

10. Dicon nos ta bisa cu e trabou di predica ta haci nos amistad cu Jehova y cu nos rumannan mas fuerte?

10 Hesus a pidi Jehova pa proteha su discipelnan. Dicon? Den oracion el a bisa: “Pa nan por ta un mescos cu nos ta un.” (Juan 17:11) Ora nos ta biba segun e normanan di Dios y ta participa den e trabou di predica, nos ta siña conoce su cualidadnan maraviyoso mas mihor. Nos ta siña dicon ta sabi pa confia Jehova y sigui su guia. Mas nos hala cerca Dios, mas e ta hala cerca nos. (Lesa Santiago 4:8.) Nos ta pega mas na nos rumannan tambe ora nos ta obedece Dios y predica. Nos tur tin e mesun problemanan, e mesun motibonan pa alegra y e mesun metanan.  Pues, nos ta traha hunto, alegra hunto y persevera hunto. Octavia, cu ta biba na Inglatera, a bisa: “E echo cu mi por traha hunto cu Jehova ta laga mi pega mas na mi rumannan. No ta cosnan superficial ta uni nos. Mi amigonan tin e mesun metanan cu mi y ta uza nan bida pa sirbi Jehova.” Siguramente, nos tambe ta sinti asina. Nos ta haya mas aprecio pa nos rumannan ora nos mira con nan ta haci esfuerso pa agrada Jehova.

11. Dicon nos amistad cu Jehova y cu nos rumannan lo bira mas fuerte ainda den e mundo nobo?

11 For di awor nos tin un amistad fuerte cu Jehova y cu nos rumannan, pero den e mundo nobo e lo bira mas fuerte ainda. Pensa riba tur e trabou cu nos lo tin cu haci den futuro. Nos mester duna bonbini na hende cu resucita y siña nan obedece e leynan di Jehova. Nos mester transforma e Tera den un paradijs. Tur esey lo ta hopi trabou. Pero ki dushi lo ta pa traha hunto cu nos rumannan y gradualmente bira perfecto bou di e gobernacion di e Reino Mesianico. Tur hende lo ta mas uni cu otro y cu Jehova, kende siguramente lo “satisface e deseo di tur ser bibo.”—Sal. 145:16.

UN TRABOU CU TA PROTEHA NOS

12. Con e trabou di predica ta proteha nos?

12 Como cristian, nos mester proteha nos relacion cu Jehova. Nos ta imperfecto y ta biba den un mundo controla pa Satanas e Diabel, pues ta facil pa e manera di pensa y di comporta di mundo influencia nos. Nos por compara e spirito di mundo cu e coriente fuerte di lama. Pa e coriente no hiba nos bay cu ne, nos tin cu landa cu tur nos forsa contra dje. Di e mesun manera nos tin cu lucha pa e spirito di e mundo di Satanas no hiba nos bay cu ne y destrui nos relacion cu Dios. Pues, con e trabou di predica ta proteha nos? Wel, ora nos ta papia tocante Jehova y Su Palabra, nos ta concentra riba e cosnan importante cu ta beneficia nos, no riba cos cu lo debilita nos fe. (Flp. 4:8) Ora nos ta predica, nos ta repasa e promesa- y normanan di Dios, y esaki ta fortalece nos fe. Tambe esey ta yuda nos mantene e cualidadnan cu nos tin mester pa proteha nos mes contra Satanas y su mundo.—Lesa Efesionan 6:14-17.

13. Con e trabou di predica a yuda un ruman di Australia?

13 Ora nos ta tene nos mes ocupa cu e trabou di predica y cu otro actividadnan spiritual, nos no tin tempo pa preocupa mucho cu nos mes problemanan, y esey tambe ta un proteccion. Joel, kende ta biba na Australia, a bisa cu e trabou di predica ta yud’e pa e no perde for di bista cuanto problema hende tin awe. Pero e si a scapa di hopi dolor di cabes pasobra e ta sigui e consehonan di Bijbel den su bida. El a bisa: “E trabou di predica ta yuda mi keda humilde; e ta duna mi e oportunidad di confia den Jehova y den mi rumannan.”

14. Dicon e echo cu nos ta persevera den e trabou di predica ta un prueba cu Jehova ta apoya nos?

14 Tambe e trabou di predica ta convence nos cu Jehova ta apoya nos cu su spirito santo. Wak un ehempel: Imagina bo cu bo a haya un trabou di parti pan den bo bario. Lo bo no wordo paga pa haci esaki ni bo gastonan lo no wordo cubri. Pio ainda, bo ta ripara cu mayoria di hende no kier e pan cu bo ta parti y cu algun hasta tin rabia riba bo pasobra bo ta cana partie. Lo bo sigui haci un trabou asina? Casi sigur e manera cu e hendenan ta reacciona lo desanima bo, y lo bo  stop. Algo similar ta pasa cu e trabou di predica. Pero e diferencia ta cu hopi di nos a sigui predica aña aden aña afo, cubriendo tur gasto for di nos mes saco y soportando e bofon y desprecio di hende malagradecido. E echo cu nos ta persevera ta un prueba cu ta Jehova su spirito santo ta yuda nos.

UN TRABOU CU TA DEMOSTRA NOS AMOR PA DIOS Y PA HENDE

15. Kico e trabou di predica e bon noticia tin di haber cu e proposito di Dios pa humanidad?

15 Pensa un rato riba e papel cu e trabou di predica ta hunga den Jehova su proposito pa humanidad. Su proposito tabata pa hende biba pa semper riba Tera, y esey no a cambia ora cu Adam a peca. (Isa. 55:11) En bes di esey, Jehova a haci tur loke tabata necesario pa libra nos for di e condena di pica y morto. Hesus a colabora cu e proposito ey y a bin na Tera pa sacrifica su bida pa hende. Pero pa beneficia di su sacrificio, nan mester obedece Dios. Y pa nan por obedec’e, nan mester sa kico su leynan ta. Hesus a siña hende kico Dios ta rekeri di nan y a manda su discipelnan pa nan tambe bay siña hende esey. Pues, ora nos ta predica y ta yuda hende bira amigo di Dios, nos ta colabora directamente cu Dios pa rescata hende for di pica y morto.

16. Ki relacion tin entre nos trabou di predica y e dos mandamentonan di mas grandi?

16 Ora nos ta yuda hende haya e caminda cu ta hiba na bida eterno, nos ta demostra nos amor pa nan y pa Jehova, “kende su boluntad ta pa tur sorto di hende ser salba y yega na un conocemento exacto di e berdad.” (1 Tim. 2:4) Un biaha un fariseo a puntra Hesus cua ta e mandamento di mas grandi cu Dios a duna e nacion di Israel. Hesus a contest’e: “‘Stima Jehova bo Dios cu henter bo curason, cu henter bo alma y cu henter bo mente.’ Esaki ta e mandamento di mas grandi y esun di prome. E di dos, igual cu ne, ta esaki: ‘Stima bo prohimo mescos cu bo mes.’” (Mat. 22:37-39) Ora nos ta predica, nos ta cumpli cu e dos mandamentonan ey.—Lesa Echonan 10:42.

17. Kico bo ta pensa di e privilegio cu bo tin di predica e bon noticia?

17 Jehova a duna nos un trabou cu ta haci nos feliz, cu ta hala nos mas cerca di dje y di nos rumannan y cu ta proteha nos relacion cu ne. Ademas, e trabou di predica ey ta duna nos e oportunidad di demostra nos amor pa Dios y pa otro hende. Esta un gran bendicion esey ta! Jehova tin miyones di sirbidor rond mundo, y cada un di nan tin nan propio circunstancianan. Pero sea cu nos ta hoben of di edad, rico of pober, fuerte of debil, nos tur ta busca maneranan pa papia di nos fe cu otro hende. Sin duda, nos ta di acuerdo cu Chantal cu ta biba na Francia, kende a bisa: “E Persona di mas poderoso den universo, e Creador di tur cos, e Dios feliz, ta bisa mi: ‘Bay! Papia! Papia pa mi, papia di curason. Ami lo duna bo forsa. Tambe lo mi duna bo mi Palabra, yudansa di e angelnan, rumannan pa compaña bo, entrenamento progresivo y instruccion specifico na e debido tempo.’ Esta un gran privilegio di por haci loke Jehova ta pidi nos y di traha hunto cu nos Dios!”