Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2016

“Sigui Stima Otro Manera Ruman”

“Sigui Stima Otro Manera Ruman”

“Sigui stima otro manera ruman.”—HEB. 13:1.

CANTICA: 72, 119

1, 2. Dicon Pablo a skirbi un carta na e cristiannan Hebreo?

TABATA aña 61 di e prome siglo, y den e congregacionnan cristian plama den Israel tabata reina un periodo basta trankil. Hasta apostel Pablo, cu tabata preso na Roma, a pensa cu pronto e lo a sali liber. Su compañero Timoteo a caba di sali for di prizon, y nan a plania pa bay bishita e rumannan na Judea. (Heb. 13:23) Pero nan no tabata sa cu e periodo di paz ey lo no a dura mucho: den apenas cinco aña, un ehercito enemigo lo a rondona Jerusalem, precies manera Hesus a profetisa. Cristiannan na Judea, y specialmente esnan cu tabata biba na Jerusalem, e ora ey lo mester a actua lihe, ya cu Hesus a spierta nan cu nan mester a huy asina cu nan a mira e cosnan aki cuminsa sosode.—Luc. 21:20-24.

2 Hesus a duna e profecia ey 28 aña pasa, y durante e tempo aki, e cristiannan Hebreo a keda fiel a pesar di hopi persecucion y prueba severo. (Heb. 10:32-34) Pero Pablo tabata sa cu un di e pruebanan di mas grandi di nan fe lo mester a bin ainda, y e kier a prepara nan pa esaki. (Mat. 24:20, 21; Heb. 12:4) Nan lo tabatin mester di fe y perseverancia manera nunca prome pa nan por a obedece e palabranan di Hesus; nan bida lo a depende di esey. (Lesa Hebreonan 10:36-39.)  Pues, Jehova su spirito a motiva Pablo pa skirbi e rumannan stima ey. E carta aki, cu awor ta conoci como e buki di Hebreonan, mester a prepara y fortalece nan pa loke tabata spera nan.

3. Dicon e carta na e Hebreonan ta importante pa nos awe?

3 E carta cu Pablo a skirbi na e Hebreonan ta importante pa nos awe tambe. Dicon? Pasobra nos ta biba den un tempo parecido na esun di nan. Durante e “temponan critico, dificil pa trata cu ne” aki, e pueblo di Dios a wanta tur tipo di prueba severo y persecucion, y nos a demostra fuera di tur duda cu nos fe y lealtad na Dios ta firme manera un baranca. (2 Tim. 3:1, 12) Pero mayoria di nos ta bibando den circunstancia basta trankil y no ta pasando den persecucion feroz. Pero mescos cu e cristiannan den tempo di Pablo, nos mester ta alerta, pasobra pronto nos lo enfrenta e prueba di mas grandi di nos fe.—Lesa Lucas 21:34-36.

4. (a) Kico ta e texto di aña pa 2016? (b) Dicon e texto aki ta hopi apropia?

4 Con nos por prepara pa e sucesonan cu tin nos dilanti? Den e carta na e Hebreonan, Pablo a duna varios sugerencia cu por yuda nos haci nos fe mas fuerte. Un di nan nos por haya na Hebreonan 13:1, cu ta bisa: “Sigui stima otro manera ruman.” E versiculo ey a ser scogi como e texto di aña pa 2016.

Nos texto di aña pa 2016: “Sigui stima otro manera ruman.”—Hebreonan 13:1

KICO STIMA OTRO MANERA RUMAN TA ENCERA?

5. Kico stima otro manera ruman ta encera?

5 E palabra Griego cu Pablo a uza pa e expresion “stima otro manera ruman” of, “amor fraternal” ta filadelfia, y e ta nifica literalmente “cariño pa un ruman.” E ta encera un cariño profundo y special cu un hende ta sinti pa un miembro di famia of pa un amigo intimo. (Juan 11:36) Nos no ta djis yama otro ruman, pero nos ta ruman di otro. (Mat. 23:8) Pablo a bisa: “Pa loke ta amor di ruman, tene tierno cariño pa otro. Pa loke ta mustra honor na otro, tuma e iniciativa.” (Rom. 12:10) E tipo di amor aki, hunto cu amor basa riba principio cristian (amor agape), ta mantene e pueblo di Dios uni.

6. Ken cristiannan berdadero ta considera nan “ruman”?

6 Segun un comentarista, e expresion “stima otro manera ruman” ta aparece casi den literatura cristian so. Pa e Hudiunan, e palabra “ruman” a referi mayoria di biaha na un miembro di famia y tin biaha na otro Hudiu, pero nunca na hende di otro nacion. En cambio, cristiannan berdadero ta yama tur hende cu ta sirbi Jehova nan “ruman”, sin importa nan nacionalidad. (Rom. 10:12) Jehova a siña nos stima otro manera ruman. (1 Tes. 4:9) Pero dicon ta asina importante pa nos sigui demostra amor pa nos rumannan?

DICON TA ASINA IMPORTANTE PA SIGUI DEMOSTRA AMOR PA NOS RUMANNAN?

7. Dicon nos mester demostra amor pa nos rumannan?

7 E motibo principal ta pasobra esey ta un mandato di Jehova. Nos no por bisa cu nos ta stima Dios y na mes momento ta nenga di stima nos rumannan. (1 Juan 4:7, 20, 21) Un di dos motibo ta cu nos tin mester di otro, vooral den tempo dificil. Pablo tabata sa cu algun di e cristiannan Hebreo lo mester a laga nan cas y nan pertenencianan atras. Hesus a splica con dificil e tempo ey lo tabata. (Mar. 13:14-18; Luc. 21:21-23)  Pues, mas cu nunca e cristiannan ey mester a haci nan amor pa otro mas fuerte.—Rom. 12:9.

8. Kico nos tin cu haci for di awor, prome cu e tribulacion grandi cuminsa?

8 Pronto, e tribulacion di mas grandi den historia di humanidad lo cuminsa. (Mar. 13:19; Rev. 7:1-3) Ora e momento ey yega, nos lo tin cu obedece e mandato aki di Dios: “Bin, mi pueblo, drenta den bo cambernan y cera bo portanan bo tras; sconde pa un poco tempo, te ora indignacion pasa.” (Isa. 26:20) E “cambernan” aki kisas ta referi na nos congregacionnan. Pues, ta na nos reunionnan nos ta bin hunto como ruman pa adora Jehova. Pero djis bay reunion cu regularidad no ta suficiente. Pablo a bisa e rumannan Hebreo cu nan mester a uza e ocasionnan ey pa “stimula otro pa mustra amor y haci bon obra.” (Heb. 10:24, 25) Pesey, ta awor nos mester fortalece nos cariño pa nos rumannan, pasobra esey lo bay yuda nos wanta cualkier prueba cu bin den futuro.

9. (a) Ki oportunidadnan nos tin pa demostra cu nos ta stima nos rumannan? (b) Con e pueblo di Dios a demostra amor pa nan rumannan? (Wak tambe e nota na final.)

9 For di aworaki caba, prome cu e tribulacion grandi cuminsa, nos tin mester di e cariño cu ta uni nos como ruman. Hopi di nos rumannan ta victima di temblor, inundacion, horcan, tsunami y otro desaster natural. Algun ruman ta sufri pa motibo di oposicion y persecucion. (Mat. 24:6-9) Fuera di tur esaki, tur dia nos ta confronta problemanan financiero causa pa e corupcion cu ta reina den mundo. (Rev. 6:5, 6) Pero mas hopi e problemanan ey bira, mas oportunidad nos lo tin pa demostra nos rumannan cuanto nos ta stima nan. “Amor di mayoria di hende lo fria”, pero nos amor mester sigui florece.—Mat. 24:12. [1]

CON NOS POR SIGUI STIMA NOS RUMANNAN?

10. Kico nos lo bay analisa awor?

10 Con nos por sigui stima nos rumannan a pesar di tur e problemanan cu nos ta confronta den bida? Den ki maneranan nos por demostra e amor ey? Despues cu Pablo a anima e rumannan pa “sigui stima otro manera ruman”, el a menciona varios manera pa demostra esey. Laga nos analisa seis di nan.

11, 12. (a) Kico ta hospitalidad? (b) Con nos por mustra hospitalidad? (Wak e prome plachi.)

11 “No lubida di mustra hospitalidad.” (Lesa Hebreonan 13:2.) E palabra Griego traduci como “hospitalidad” ta nifica literalmente “amor pa hende straño.” Kisas e expresion aki ta pone nos corda riba Abraham y Lot. Nan tur dos a demostra bondad na personanan cu nan no tabata conoce, y despues a resulta cu e bishitantenan ey tabata angel. (Gen. 18:2-5; 19:1-3) Pablo a referi indirectamente na e ehempelnan aki pa anima e cristiannan Hebreo pa nan ta hospitalario y asina mustra cu nan ta stima nan rumannan.

12 Kico di nos? Nos ta mustra hospitalidad na nos rumannan? Nos ta invita nan bin come cerca nos of bin pasa un rato ameno pa anima otro? Nos no tin nodi prepara un banquete grandi of gasta hopi placa pa nos ta hospitalario; ni nos no mester invita solamente hende cu por haci algo bek pa nos. (Luc. 10:42; 14:12-14) Nos meta ta pa anima e rumannan, no pa impresiona nan. Kico di e superintendente di circuito y su  casa? Kisas nos no conoce nan bon, pero nos por haci nos best pa mustra hospitalidad na nan ora nan bishita nos congregacion. (3 Juan 5-8) Pues, no laga stress di bida ni e tantisimo cosnan di haci pone nos “lubida di mustra hospitalidad.”

13, 14. Con nos por “corda riba esnan cu ta den prizon”?

13 “Corda riba esnan cu ta den prizon.” (Lesa Hebreonan 13:3.) Claro cu Pablo no tabata referi na tur preso, sino na e cristiannan cu tabata den prizon pa motibo di nan fe. Ora Pablo a skirbi e carta na e Hebreonan, e mes tabatin mas o menos cuater aña den prizon. (Flp. 1:12-14) El a elogia e rumannan pasobra nan “a mustra compasion na e rumannan cu tabata den prizon.” (Heb. 10:34) Di mes e Hebreonan no por a yuda Pablo personalmente, ya cu e tabata na Roma. Pero tabatin algo cu si nan por a haci p’e: sigui pidi Dios den oracion pa yud’e.—Heb. 13:18, 19.

14 Awe tambe tin rumannan den prizon. E rumannan cu ta biba cerca di e prizon por yuda nan, pero mayoria di nos ta biba leu. Kico nos por haci pa nan? Nos por menciona nan constantemente den nos oracionnan y suplica Jehova pa yuda nan. Esey ta un manera pa demostra cu nos ta corda riba nan y ta stima nan. Por ehempel, nos por resa pa nos rumannan—homber, muher y hasta mucha—cu ta den prizon na Eritrea. Entre nan tin Paulos Eyassu, Isaac Mogos y Negede Teklemariam, kendenan tin mas cu 20 aña den prizon.

15. Con nos por mustra cu nos ta respeta nos matrimonio?

15 “Laga matrimonio ta honorabel den bista di tur hende.” (Lesa Hebreonan 13:4.) Un otro manera cu nos ta mustra amor pa nos rumannan ta ora nos ta keda moralmente limpi. (1 Tim. 5:1, 2) Por ehempel, si nos a comete inmoralidad sexual cu un ruman den congregacion, of cu un miembro di famia di e ruman ey, esey lo perhudica e confianza cu tin entre e rumannan. Y si no tin confianza, no por tin amor. (1 Tes. 4:3-8) Y con bo ta kere un ruman muher lo sintie si e haya sa cu su casa ta wak pornografia? Lo e sinti cu su casa ta stim’e y ta respeta nan matrimonio, of lo e sintie traiciona?—Mat. 5:28.

16. Dicon nos mester keda contento cu loke nos tin?

16 “Keda contento cu loke boso tin.” (Lesa Hebreonan 13:5.) Pa sigui e conseho aki di Pablo, nos mester confia den Jehova. E confianza aki lo yuda nos pa nos tin un punto di bista balansa di cosnan material. (1 Tim. 6:6-8) Esaki lo yuda nos compronde tambe cu nos relacion cu Jehova y cu nos rumannan ta bal mucho mas cu placa of cos material. Un cristian cu ta keda conforme cu loke e tin no ta keha tocante e rumannan, critica nan ni murmura. Tampoco e ta keha di su situacion den bida, envidia otro hende ni cudisha loke nan tin, ya cu e sa cu e sintimentonan ey ta caba cu amor entre ruman. Mas bien, un hende cu ta contento cu loke e tin ta bira un persona mas generoso.—1 Tim. 6:17-19.

17. Dicon nos no mester perde animo?

17 Sea “yen di animo.” (Lesa Hebreonan 13:6.) E cristian cu ta confia den Jehova ta keda positivo y tin e animo pa wanta cualkier dificultad. Anto e actitud positivo ey, hunto cu e amor cu  nos tin pa nos rumannan, lo yuda nos anima nan y consola nan. (1 Tes. 5:14, 15) Nos no tin miedo cu pronto e tribulacion grandi, esta, e periodo di mas scur den historia di humanidad, lo yega. Al contrario, nos lo “para stret y lanta [nos] cabes”, pasobra nos sa cu nos liberacion ta cerca. —Luc. 21:25-28.

Bo ta aprecia tur loke e ancianonan ta haci pa nos? (Wak paragraf 18)

18. Kico nos por haci pa haya mas cariño pa nos ancianonan?

18 “Corda riba esnan cu ta dirigi boso.” (Lesa Hebreonan 13:7, 17.) Ora nos pensa riba cuanto cos e ancianonan ta haci pa nos—sin cu nan ta haya un salario pa esey—nos ta haya mas cariño y aprecio pa nan trabou duro. Hamas nos lo kier haci algo cu ta pone nan perde nan goso of suspira. Al contrario, nos ta trata di obedece nan y di keda sumiso na nan, pasobra di e manera ey nos ta “demostra ... hopi amor y aprecio [pa] nan pa motibo di nan trabou.”—1 Tes. 5:13.

SIGUI STIMA OTRO MAS PLENAMENTE

19, 20. Con nos por sigui stima otro mas plenamente?

19 Sirbidornan di Jehova ta bon conoci pa e amor fraternal cu ta reina entre nan, mescos tabata e caso cu e cristiannan di e prome siglo. Maske Pablo tabata sa esaki, toch el a conseha nan pa “sigui haci esey mas plenamente.” (1 Tes. 4:9, 10) Al fin y al cabo, semper nos por mehora.

20 Pesey cada bes cu bo mira e texto di aña den Salon di Reino, medita riba e preguntanan aki: Mi por ta mas hospitalario? Mi ta corda riba nos rumannan den prizon? Mi ta respeta Dios su areglo di matrimonio? Mi ta contento cu loke mi tin? Con mi por confia mas den Jehova? Con mi por coopera mas plenamente cu e ancianonan? Si nos ta haci nos best pa traha riba e seis puntonan aki, e ora ey nos texto di aña lo no ta djis un borchi colga den Salon di Reino. Su palabranan, “sigui stima otro manera ruman”, lo ta un recordatorio di e importancia di trata nos rumannan cu amor tur dia.—Heb. 13:1.

^ [1] (paragraf 9) Si bo kier haya algun ehempel di e manera cu testigonan di Jehova a demostra amor pa nan rumannan den tempo di desaster, wak E Toren di Vigilancia di 15 di juli 2002, pagina 8 y 9, y e buki E Reino di Dios Ya Ta Goberna, capitulo 20.