Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2016

E Spirito Ta Duna Testimonio Hunto cu Nos Spirito

E Spirito Ta Duna Testimonio Hunto cu Nos Spirito

“E spirito ey tambe ta duna testimonio hunto cu nos spirito cu nos ta yiu di Dios.”—ROM. 8:16.

CANTICA: 109, 108

1-3. (a) Dicon Pentecoste di aña 33 tabata un fecha asina special? (b) Con e sucesonan di e dia ey a cumpli cu loke e Scritura a profetisa? (Wak e prome plachi.)

TABATA diadomingo mainta rond di 9 or, un dia special pa e hendenan na Jerusalem. Esaki tabata un dia di fiesta, y e tabata un sabbat tambe. Sin duda, ya e sumo sacerdote a ofrece e sacrificionan di custumber na e tempel. Awor a yega e momento p’e ofrece e dos pannan cu zuurdeeg, traha di e prome trigo di e cosecha. E sumo sacerdote a “zoya” e pannan di un banda pa otro pa presenta nan na Jehova como un ofrenda di zoyamento. Esaki tabata e dia di Pentecoste di aña 33.—Lev. 23:15-20.

2 E ofrenda di zoyamento aki tabata algo cu ya tabata tuma luga pa cientos di aña den e tempel, y e tabata estrechamente liga cu algo hopi importante cu tabata a punto di sosode na e di dos piso di un cas na Jerusalem. Eynan tabatin un grupo di mas o menos 120 discipel di Hesus cu tabata “persisti den oracion.” (Echo. 1:13-15) Un 800 aña prome, profeta Joel tambe a skirbi tocante e sucesonan cu a tuma luga riba e dia ey. (Joel  2:28-32; Echo. 2:16-21) Di ki suceso historico nos ta papiando?

3 Lesa Echonan 2:2 te cu 4Riba e dia di Pentecoste ey, Jehova a drama su spirito santo riba e grupo di cristian cu tabata den e camber di ariba, y nan a bira ungi. (Echo. 1:8) Nan tur a cuminsa profetisa, of duna testimonio, di e cosnan maraviyoso cu nan a mira y tende. No a tarda mucho cu un multitud a bin rond di nan, y apostel Pedro a splica e hendenan ey loke a caba di sosode y dicon esey tabata asina importante. Despues el a bisa nan: “Arepenti, y cada un di boso batisa den nomber di Hesucristo pa boso por haya pordon di boso picanan. Y boso lo ricibi e spirito santo cu Dios ta duna libremente.” Rond di 3.000 hende a acepta e invitacion e dia ey, nan a ser batisa y a ricibi e spirito santo priminti.—Echo. 2:37, 38, 41.

4. (a) Dicon nos ta interesa den loke a pasa riba e dia di Pentecoste? (b) Ki otro suceso importante kisas a tuma luga añanan prome riba e mesun fecha ey? (Wak e nota na final.)

4 E sucesonan extraordinario di e dia di Pentecoste ey ta masha importante pa nos. Riba e dia ey, e sumo sacerdote a ofrece Jehova dos pan cu zuurdeeg. E sumo sacerdote a representa Hesus. E dos pannan a representa e discipelnan cu a ser scogi for di entre humanidad pecador pa bira yiu adopta di Dios. [1] E discipelnan ey, cu a ser ungi cu spirito, a bira e promenan di un grupo cu Dios a scoge pa bay cielo pa goberna hunto cu Cristo como parti di e Reino di Dios cu lo trece bendicion pa humanidad obediente. E grupo ey ta ser yama “e prome frutanan” di e cosecha. (Sant. 1:18; 1 Ped. 2:9) Sea nos tin e speransa di biba den cielo of riba Tera, loke a pasa e dia ey ta hopi importante pa nos tur.

CON UN PERSONA TA SER UNGI?

5. Con nos sa cu no ta tur cristian a ser ungi di e mesun manera?

5 Si bo tabata un di e 120 discipelnan ey cu a mira loke tabata parce lenga di candela riba nan cabes, hamas lo bo a lubida e dia ey. Lo no tabatin niun duda den bo mente cu bo a ser ungi cu spirito santo, vooral si bo tambe den un forma milagroso a cuminsa papia un idioma cu bo no conoce. (Echo. 2:6-12) Pero no ta tur cristian a ser ungi cu spirito santo na un manera asina espectacular. Por ehempel, Bijbel no ta bisa cu lenga di candela a para riba cabes di e miles di hendenan cu mas laat riba e dia ey a batisa na Jerusalem y ricibi spirito santo. (Echo. 2:38) Ademas, no ta tur cristian ungi a ricibi spirito santo na momento di nan bautismo. Por ehempel, e Samaritanonan a ser ungi cu spirito santo algun tempo despues cu nan a batisa. (Echo. 8:14-17) Y den e caso excepcional di Cornelio y su hendenan di cas, nan a ser ungi hasta prome cu nan a batisa.—Echo. 10:44-48.

6. Kico tur ungi ta ricibi, y ki efecto esey tin riba nan?

6 Pues, cristiannan ta realisa na diferente manera cu nan ta ungi. Tin ta ripara di biaha cu Jehova a ungi nan, mientras cu pa otronan ta dura un poco prome cu nan bin compronde of acepta e echo cu nan ta ungi. Pero sin importa con nan ser ungi, tur ta haya e garantia cu nan tin un herencia reserva den cielo. Apostel Pablo a splica esey asin’aki: “Despues cu boso a kere, Dios a seya boso tambe pa medio di [Cristo] cu e spirito santo cu el a priminti—cu ta un garantia di antemano di nos herencia.” (Efe. 1:13, 14) Pues, Jehova ta uza su spirito santo pa duna e cristiannan aki e conviccion cu el a scoge nan pa bay cielo. Den e  sentido ey, e spirito santo ta manera “un garantia di antemano”—un prueba pa nan—cu den futuro nan lo biba den cielo y no riba Tera.—Lesa 2 Corintionan 1:21, 22; 5:5.

7. Kico cristiannan ungi mester haci si nan kier ricibi nan recompensa celestial?

7 Acaso esaki kiermen cu un cristian ungi su futuro den cielo ta garantisa? No. E persona ey ta sigur cu el a haya e yamada, of invitacion, pa bay cielo, pero e lo ricibi e recompensa aki solamente si e keda fiel na Jehova te na final. Pesey Pedro a anima e rumannan: “Haci tur boso esfuerso pa boso por ta sigur di boso yamamento y scogemento; pasobra si boso sigui agrega e cualidadnan aki na otro, boso lo no fracasa nunca. De echo, di e manera aki boso lo ricibi un entrada glorioso den e Reino eterno di nos Señor y Salbador Hesucristo.” (2 Ped. 1:10, 11) Pues, cada cristian ungi mester haci esfuerso pa keda fiel na Jehova, sino ta pornada el a haya invitacion pa bay cielo.—Heb. 3:1; Rev. 2:10.

CON UN PERSONA POR SA SI E TA UNGI?

8, 9. (a) Dicon pa mayoria di hende ta dificil pa compronde kico ta pasa ora Dios ungi un persona? (b) Con un persona por sa cu el a haya e yamada celestial?

8 Mayoria di sirbidor di Dios awe tin problema pa compronde kico precies ta pasa cu un hende ora Dios ungie. Esaki ta logico, ya cu nan mes no a experencia esey. Jehova a crea hende pa biba pa semper aki riba Tera, no den cielo. (Gen. 1:28; Sal. 37:29) Pero el a haci un excepcion y a scoge algun hende pa bay cielo pa goberna como rey y sacerdote. Pesey ora e ungi e personanan ey, tanto nan speransa como nan manera di pensa ta cambia, y nan ta cuminsa anhela pa bay biba den cielo.—Lesa Efesionan 1:18.

9 Pero con un persona por sa cu el a haya e yamada celestial? Nos ta haya e contesta den e carta cu Pablo a dirigi na e cristiannan ungi cu tabata biba na Roma, kendenan tabata “yama pa ta santo.” El a bisa nan: “Boso no a ricibi un spirito di sclavitud cu ta bolbe causa miedo, ma boso a ricibi un spirito di yiu adopta, y pa medio di e spirito ey nos ta grita: ‘Abba, Tata!’ E spirito ey tambe ta duna testimonio hunto cu nos spirito cu nos ta yiu di Dios.” (Rom. 1:7; 8:15, 16) Cu otro palabra, Jehova ta uza su spirito santo pa laga un persona compronde bon cla cu el a haya e yamada, of invitacion, pa goberna den cielo hunto cu Hesus.—1 Tes. 2:12.

10. Kico 1 Juan 2:27 kiermen ora e ta bisa cu un cristian ungi no tin mester di niun hende pa siñ’e?

10 E cristiannan cu a ricibi e invitacion special aki di Jehova no mester di niun hende pa bisa nan cu en berdad nan a ser ungi. Jehova mes ta percura pa nan ta convenci di esey. Apostel Juan a bisa e cristiannan ungi ey: “Boso si a ser scogi [of “ungi”, nota] pa Esun Santo y boso tur tin conocemento.” Y el a sigui bisa: “Pa loke ta boso, Dios a scoge boso pa medio di su spirito, y e spirito ey ta keda den boso; pues, boso no tin mester di ningun hende pa siña boso. Pero e scogemento aki pa medio di spirito ta algo berdadero y no un engaño, y e ta siña boso tur cos. Keda den union cu ne manera e spirito a siña boso.” (1 Juan 2:20, 27) Ta claro cu cristiannan ungi tambe tin mester di e instruccion di Jehova mescos cu tur ruman. Loke Juan tabata kiermen ta cu nan no tin mester pa niun hende bisa nan cu nan a haya e invitacion pa bay cielo, ya cu e forsa di mas poderoso den universo a duna nan e confirmacion ey caba.

 E UNGINAN TA “NACE DI NOBO”

11, 12. (a) Kico un ungi kisas ta puntra su mes? (b) Pero kico lo e no puntra su mes nunca?

11 Un cristian cu ser ungi cu spirito santo ta experencia un cambio asina profundo cu, segun Hesus, ta comosifuera e ta “nace di nobo”, of “nace di ariba.” [2] (Juan 3:3, 5; nota) Ademas, Hesus a sigui splica un homber di su tempo: “No keda asombra pasobra mi a bisa bo: Boso tin cu nace di nobo. Biento ta supla unda cu e kier, y bo ta tende su zonido, ma bo no sa di unda e ta bin ni unda e ta bay. Asina ta cu tur hende cu nace di spirito.” (Juan 3:7, 8) Pues, ta casi imposibel pa splica un persona cu no a pasa den e proceso aki kico ta nifica ser ungi pa spirito.

12 E personanan cu a haya e yamada aki kisas ta puntra nan mes: Dicon Jehova a scoge ami? Dicon ami y no un otro hende? Kisas hasta nan ta puntra nan mes si nan ta digno di un responsabilidad asina. Pero nunca nan lo puntra nan mes si di berdad Jehova a scoge nan. Nan ta sigur sigur di esey. Ademas, nan ta hopi feliz y agradecido p’e privilegio y ta sinti nan mescos cu Pedro ora el a bisa bou di inspiracion: “Alaba sea e Dios y Tata di nos Señor Hesucristo, pasobra di acuerdo cu su gran misericordia, el a laga nos nace di nobo pa un speransa bibo pa medio di e resureccion di Hesucristo for di morto, pa un herencia cu no por caba na nada, cu ta sin mancha y cu no ta marchita. Esey ta reserva pa boso den cielo.” (1 Ped. 1:3, 4) Ora rumannan ungi lesa e palabranan ey, nan sa sin niun duda cu nan Tata celestial ta papiando cu nan personalmente.

13. (a) Ki cambio un persona ungi ta experencia? (b) Kico ta causa e cambio aki?

13 Prome cu Jehova a invita e cristiannan aki pa bay cielo, nan tabatin e speransa di biba pa semper riba Tera. Nan tabata anhela e dia cu Jehova lo limpia e Tera y caba cu maldad. Casi sigur nan a imagina nan mes ta duna bonbini na nan sernan keri cu a muri. Kisas nan a mira nan mes caba ta biba den e casnan cu nan lo a traha y ta come fruta di e hofi cu nan lo a planta. (Isa. 65:21-23) Dicon nan manera di pensa a cambia, y dicon nan a cuminsa carga un otro speransa? No ta pasobra nan a sinti nan deprimi ni pasobra nan tabata sufri hopi. No ta asina cu diripiente nan a cuminsa pensa cu biba pa semper riba Tera lo por bira algo laf, ni ta pasobra nan a sinti e curiosidad di sa con bida den cielo lo ta. Mas bien, nan a cambia pasobra ora Jehova a duna nan e yamada, of invitacion, pa bay cielo, el a uza su spirito santo pa cambia nan manera di pensa y tambe nan speransa.

14. Con e unginan ta mira nan bida actual riba Tera?

14 Nos mester conclui anto cu e unginan ta desea di muri? Apostel Pablo a contesta esaki. Pa splica con nan ta sinti, el a compara nan curpa humano cu un “tent”, y el a bisa: “Nos cu ta den e tent aki ta keha, carga cu ansiedad; pasobra no ta kita nos kier kita e tent aki, sino mas bien, nos kier bisti e cas celestial, pa asina bida eterno por caba cu loke ta mortal.” (2 Cor. 5:4) E cristiannan aki no a perde gana di biba y kier muri pa caba. Al contrario, nan ta disfruta di bida y kier uza cada dia den e sirbishi di Jehova hunto cu nan famia- y amigonan. Pero sin importa kico nan ta haciendo, semper nan ta corda riba e maraviyoso futuro cu ta spera nan.—1 Cor. 15:53; 2 Ped. 1:4; 1 Juan 3:2, 3; Rev. 20:6.

BO A HAYA E YAMADA CELESTIAL?

15. Ki factornan riba nan mes no ta proba cu un persona ta ungi?

15 Kisas bo ta puntra bo mes si Jehova  a invita bo pa bay cielo. Si bo ta pensa cu si, pensa riba e preguntanan importante aki: Bo ta sinti cu bo tin mas entusiasmo pa e trabou di predica cu mayoria di ruman? Bo ta gusta studia e Palabra di Dios y bay den “hasta e cosnan profundo di Dios”? (1 Cor. 2:10) Bo a mira con Jehova a bendiciona bo sirbishi na un manera special? Bo ta sinti un deseo ardiente pa haci e boluntad di Jehova? Bo tin un amor profundo pa otro hende y ta sinti un gran responsabilidad pa yuda nan sirbi Jehova? Bo tin prueba cu Jehova a interveni specificamente den bo bida? Kico si bo a contesta “si” riba tur e preguntanan aki? Esey kiermen cu bo tambe a haya e yamada celestial? No. Pasobra tur sirbidor di Jehova por experencia e cosnan aki. E spirito santo por actua cu e mesun forsa riba tur cristian, sea cu nan ta bay biba den cielo of riba Tera. En realidad, si bo ta duda cu bo tin e yamada celestial, esey so caba ta indica cu bo no tin e. Esnan scogi pa Jehova no tin nodi puntra nan mes si nan ta ungi of no, nan sa esey caba.

16. Ta tur hende cu sinti e forsa di spirito santo ta bay cielo? Splica esey.

16 Den Bijbel tin hopi ehempel di hombernan fiel cu a sinti e forsa di spirito santo na un manera hopi special pero cu toch no tabatin e speransa di bay cielo. Un di nan tabata Juan Bautista. Hesus a papia hopi bon di dje, pero el a bisa cu Juan lo no ta den e Reino di cielo. (Mat. 11:10, 11) David tambe a ser guia pa spirito santo. (1 Sam. 16:13) Spirito santo a yud’e compronde cosnan profundo tocante Jehova y a inspir’e pa skirbi algun parti di Bijbel. (Mar. 12:36) Toch apostel Pedro a bisa na Pentecoste cu “David no a bay cielo.” (Echo. 2:34) Jehova a uza su spirito santo pa duna e hombernan ey poder pa haci cosnan asombroso, pero niun ora e no a uz’e pa duna nan e testimonio special cu nan a ser scogi pa bay cielo. Acaso ta pasobra nan no tabata suficiente fiel of cualifica pa goberna den cielo? No. Esey simplemente ta indica cu Jehova lo resucita nan pa biba riba Tera.—Juan 5:28, 29; Echo. 24:15.

17, 18. (a) Na unda mayoria di sirbidor di Dios tin e speransa di biba? (b) Ki preguntanan nos lo analisa den e siguiente articulo?

17 Awe, mayoria di sirbidor di Dios no tin e yamada pa bay cielo. Nan tin e mesun speransa cu David, Juan Bautista y otro homber- y muhernan fiel di pasado tabatin. Mescos cu Abraham, nan ta spera di biba riba Tera bou di gobernacion di e Reino di Dios. (Heb. 11:10) Ta 144.000 hende so lo reina den cielo hunto cu Cristo, y di nan ta un resto so tin riba Tera ainda den e tempo di fin aki. E mayoria a muri caba y ta den cielo.—Rev. 12:17.

18 Pues, con nos cu tin e speransa di biba riba Tera mester mira esnan cu ta bisa cu nan ta ungi? Si un hende den bo congregacion cuminsa tuma di e pan cu e biña na Conmemoracion, con bo mester reacciona? Kico si e cantidad di persona cu ta bisa cu nan ta ungi ta aumenta? Esey mester preocupa bo? Den e siguiente articulo nos lo haya contesta riba e preguntanan aki.

^ [1] (paragraf 4) Parce cu Pentecoste a cay riba e mesun fecha cu Moises a duna e Israelitanan e Ley riba Sero di Sinai. (Exo. 19:1) Si esey ta e caso, e pacto cu Jehova a cera cu Israel spiritual (e cristiannan ungi) mediante Hesus a cuminsa funciona riba e mesun fecha cu Jehova a cera e pacto di Ley cu Israel mediante Moises.

^ [2] (paragraf 11) Pa mas informacion tocante kico ta nifica nace di nobo, wak E Toren di Vigilansia di 1 di april 2009, pagina 3 pa 11.