Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2016

Mustra Aprecio pa Dios Su Regalo Extraordinario

Mustra Aprecio pa Dios Su Regalo Extraordinario

“Nos ta gradici Dios pa su regalo cu nos no por describi cu palabra.”—2 COR. 9:15.

CANTICA: 121, 63

1, 2. (a) Di kico e regalo extraordinario di Dios ta consisti? (b) Kico nos lo bay trata den e articulo aki?

MOTIVA pa amor, Jehova a duna nos e regalo di mas grandi ora el a manda su Yiu unigenito na Tera. (Juan 3:16; 1 Juan 4:9, 10) Apostel Pablo a yama esaki un “regalo cu nos no por describi cu palabra.” (2 Cor. 9:15) Dicon Pablo a bisa esey?

2 Pablo tabata sa cu e sacrificio perfecto di Hesus tabata un garantia cu tur e promesanan di Dios lo cumpli. (Lesa 2 Corintionan 1:20.) Pues, e “regalo cu nos no por describi cu palabra” ta consisti di e sacrificio ey y di tur e bondad y amor leal cu nos ta haya di Jehova pa medio di Hesus. Cu rason nos no tin palabra pa describi e regalo extraordinario aki. Ki efecto un regalo asina mester tin riba nos? Kico nos por haci pa mustra cu nos ta aprecia e regalo ey, vooral awor cu nos ta bay conmemora e morto di Hesus riba diaranson 23 di maart 2016?

 UN REGALO EXTRAORDINARIO

3, 4. (a) Con bo ta sinti bo ora un hende duna bo un regalo? (b) Ki tipo di regalo por cambia bo bida? Duna un ehempel.

3 Nos tur gusta haya regalo, pero tin regalo ta asina special cu nan ta cambia nos bida. Por ehempel, imagina bo cu un hende a comete un crimen y a keda condena na morto. Ora nan ta a punto di ehecut’e, un persona cu e no conoce diripiente ta bin dilanti y ofrece pa muri na su luga. Ki efecto un regalo extraordinario asina lo tin riba e persona culpabel?

4 Si algo asina mester pasa cu bo, lo bo no keda sumamente agradecido pa tal muestra di amor? Sin duda esey lo pone bo reflexiona riba kico bo ta haciendo cu bo bida. Podise hasta lo bo sinti bo obliga pa haci algun cambio den bo bida. Probablemente lo bo bira mas generoso y bondadoso, y kisas hasta pordona hende cu a haci bo daño. Pa resto di bo bida lo bo ta agradecido na e persona cu di su propio boluntad a sacrifica su mes pa bo, no ta berdad?

5. Dicon e regalo cu Jehova a haci di e rescate ta mas valioso cu cualkier otro regalo?

5 Loke Jehova a haci pa nos pa medio di Cristo ta algo mucho mas valioso cu djis salba e bida cu nos tin aworaki, manera a ser describi den e ehempel anterior. (1 Ped. 3:18) Laga nos wak dicon. Nos tur ta pecador y ta condena na morto for di ora nos a nace. (Rom. 5:12) Amor a motiva Jehova pa manda Hesus na Tera pa muri pa nos. (Heb. 2:9) Pa medio di e sacrificio ey Jehova a pone e base pa caba cu morto, y esey lo permiti nos biba pa semper. (Isa. 25:7, 8; 1 Cor. 15:22, 26) Pues, tur hende cu pone fe den Hesus lo por biba pa semper den paz y felicidad, sea como rey den cielo hunto cu Hesus of aki riba Tera bou di e Reino di Dios. (Rom. 6:23; Rev. 5:9, 10) Kico mas e regalo cu Dios a duna nos ta inclui?

6. (a) Cua di e bendicionnan di Jehova bo ta anhela mas tanto? (b) Menciona tres cos cu e regalo di Dios ta motiva nos pa haci.

6 Como parti di e regalo di Jehova, e Tera lo bira un paradijs, tur maleza lo ser cura y e mortonan lo resucita. (Isa. 33:24; 35:5, 6; Juan 5:28, 29) Nos por ta hopi agradecido na Jehova y na su Yiu stima pa nan regalo asina maraviyoso; esey sin duda ta laga nos stima nan mas hopi ainda. Pero e pregunta ta keda: Kico nos por haci pa demostra nos aprecio? Laga nos wak tres cos cu e regalo di Jehova ta motiva nos pa haci: (1) sigui e ehempel di Hesus fielmente, (2) trata nos rumannan cu cariño y amor y (3) pordona nan di curason.

“E AMOR DI CRISTO TA OBLIGA NOS”

7, 8. (a) Con e amor di Cristo mester laga nos sinti? (b) Con nos ta demostra cu nos tin e deseo ey?

7 Na prome luga, e amor cu Dios tin pa nos mester motiva nos pa biba pa Cristo Hesus. Manera apostel Pablo a bisa: “E amor di Cristo ta obliga nos.” (Lesa 2 Corintionan 5:14, 15.) Pablo a realisa cu e amor di Cristo ta algo asina extraordinario cu esey mester “obliga nos”—of motiva nos—pa biba pa Cristo. Si di berdad nos a compronde kico Jehova a haci pa nos, nos ta haya e deseo pa biba di alma y curason pa Hesus. Con nos ta demostra cu nos tin e deseo ey?

8 Hende cu ta stima Jehova ta sinti nan motiva pa sigui e ehempel di Hesus y cana den su pasonan fielmente. (1 Ped. 2:21; 1 Juan 2:6) Un otro manera cu nos ta demostra cu nos ta stima Jehova y Hesus ta ora nos ta obedece nan. Hesus  a bisa: “Esun cu acepta mi mandamentonan y cumpli cu nan ta esun cu stima mi. Y esun cu stima mi, mi Tata lo stim’e, y ami tambe lo stim’e y mustr’e bon cla ken mi ta.”—Juan 14:21; 1 Juan 5:3.

9. Ki presion nos ta confronta tur dia?

9 E periodo rond di Conmemoracion di e morto di Hesus, of Memorial, ta un bon oportunidad pa nos analisa nos mes y wak den ki rumbo nos bida ta bay. Puntra bo mes: Te con leu mi ta imitando Hesus? Tin cosnan cu mi mester mehora? Ta hopi importante pa analisa bo mes di e manera aki, pasobra constantemente e mundo ta pone presion riba nos pa haci cos na su manera. (Rom. 12:2) Si nos descuida, nos lo por cuminsa sigui e ideanan popular di mundo y hasta imita su artista- y deportistanan famoso. (Col. 2:8; 1 Juan 2:15-17) Kico por yuda nos resisti e presionnan ey?

10. (a) Kico nos por puntra nos mes durante e temporada di Conmemoracion? (b) Kico nos mester haci despues di contesta e preguntanan ey? (Wak e prome plachi.)

10 Por ehempel, nos por uza e temporada di Conmemoracion pa wak kico nos tin den nos cashi di paña, ki tipo di muziek y video nos tin na cas y kico nos tin riba nos computer, telefon y tablet. Segun bo ta pasa den bo pañanan, puntra bo mes: Si mi mester bay un luga caminda Hesus lo ta presente, lo mi sinti mi comodo cu e paña aki bisti? Si mi bistie, hende lo pensa cu mi ta un testigo di Jehova? (Lesa 1 Timoteo 2:9, 10.) Nos por puntra mescos tocante nos coleccion di pelicula y muziek. Hesus lo wak mi peliculanan? Lo e scucha mi muziek? Si Hesus mester fia mi celular of mi tablet, lo mi sinti berguensa si e wak e cosnan cu mi tin riba nan? Lo mi por splic’e dicon mi gusta cierto video games? Nos amor pa Jehova mester motiva nos pa deshaci di tur loke no ta apropia pa un discipel di Cristo, sin importa cuanto e ta costa. (Echo. 19:19, 20) Ora nos a dedica nos mes na Jehova, nos a primintie cu di e momento ey padilanti nos lo a uza nos bida pa sigui e pasonan di Hesus. Nos no mester keda cu nada cu por stroba nos di haci esey.—Mat. 5:29, 30; Flp. 4:8.

11. (a) Con nos amor pa Jehova y pa Hesus ta influencia nos trabou di predica? (b) Con nos amor por motiva nos pa yuda rumannan di nos congregacion?

11 Nos amor pa Hesus ta motiva nos tambe pa dedica nos mes di henter nos alma na e trabou di predica y siña hende. (Mat. 28:19, 20; Luc. 4:43) Den e periodo rond di Memorial, nos lo tin e oportunidad di sirbi como pionero auxiliar y dedica 30 of 50 ora na e predicacion. Lo bo por regla bo cosnan di tal manera cu bo por haci esey? Un ruman homber viudo di 84 aña a pensa cu e lo no por a traha pionero debi na su edad y problemanan di salud. Pero e pioneronan den su area a dun’e un man y el a logra yega su meta di 30 ora. Nan a busca e teritorionan mas adecuado p’e, y nan tabata bin busc’e y hib’e den sirbishi. Abo lo por yuda un ruman di bo congregacion traha pionero auxiliar den e temporada di Conmemoracion? Ta claro cu no ta tur hende tin e posibilidad di traha pionero, pero nos tur por uza nos tempo y energia pa haci mas den nos sirbishi na Jehova. Esey ta un otro manera pa mustra cu e amor di Cristo ta motiva nos, mescos cu el a motiva Pablo. Kico mas e amor pa Jehova ta motiva nos pa haci?

 NOS TIN E OBLIGACION DI STIMA OTRO

12. E amor cu Dios tin pa nos ta motiva nos pa haci kico?

12 Na di dos luga, e amor cu Dios tin pa nos ta motiva nos pa stima nos rumannan. Apostel Juan a skirbi: “Rumannan stima, si ta asina Dios a stima nos, e ora ey nos tambe ta obliga di stima otro.” (1 Juan 4:7-11) Pues, nos no por spera cu Jehova lo stima nos si nos no kier stima nos rumannan. (1 Juan 3:16) E amor ey no mester ta cu palabra so. Den ki maneranan practico nos por demostr’e?

13. Ki ehempel Hesus a pone pa nos?

13 Wak e ehempel di Hesus. Tempo e tabata riba Tera, el a duna atencion special na hende cu mas tabatin mester di yudansa. El a cura esnan malo, lam, ciego, sordo y mudo. (Mat. 11:4, 5) Hesus no tabata manera e lidernan religioso cu a trata e pueblo comun malo y bisa cu nan “ta maldiciona.” (Juan 7:49) Al contrario, e tabata gusta siña tur hende cu tabata desea di sa mas di Dios. E tabata stima e hendenan humilde ey y a traha duro pa sirbi nan.—Mat. 20:28.

Lo bo por yuda un ruman di edad participa den e trabou di predica? (Wak paragraf 14)

14. Kico bo por haci pa mustra e rumannan di bo congregacion cu bo ta stima nan?

14 E temporada di Conmemoracion ta un bon oportunidad pa nos imita Hesus y tuma tempo pa pensa riba e rumannan di nos congregacion. Sin duda, nos lo mira maneranan cu nos por mustra nan cu nos ta stima nan, vooral esnan di mas edad. Dicon no bishita nan? Kisas bo por hiba un cuminda pa nan, haci un trabou na cas pa nan, hiba nan reunion of invita nan pa sali cu bo den sirbishi. (Lesa Lucas 14:12-14.) No lubida: e amor cu Dios tin pa nos mester motiva nos pa busca maneranan pa mustra cu nos ta stima nos rumannan.

PORDONA NOS RUMANNAN

15. Kico nos tur mester reconoce?

15 Na di tres luga, e amor cu Jehova a demostra mester motiva nos pa pordona nos rumannan. Como cu nos tur ta yiu di e prome homber, Adam, nos tur a hereda pica y ta condena na morto. Niun di nos no por bisa cu nos no tin mester di e rescate di Cristo. Hasta e sirbidor di Dios di mas fiel tin mester di e regalo sumamente bondadoso y inmereci aki di Jehova. Ta comosifuera Jehova a pordona nos un debe masha grandi mes. Dicon ta importante pa nos reconoce esaki? Den un di e ilustracionnan di Hesus nos ta haya e contesta.

16, 17. Kico nos ta siña for di e storia di e rey cu a cancela un debe grandi di su esclavo?

 16 Hesus a conta e storia di un rey cu a cancela e suma di 60.000.000 denario (10.000 talento) cu un di su esclavonan tabata deb’e. Pero e esclavo, na su turno, no tabata dispuesto pa cancela 100 denario cu un compañero tabata deb’e. Ora e rey a haya sa esey, el a bira furioso. Con e esclavo por a cera su curason pa su compañero despues cu e rey si a tene misericordia di dje y cancela su debe? E rey a bis’e: “Esclavo malbado, ami a cancela henter bo debe ora bo a suplica mi. Abo tambe lo no mester a tene misericordia di bo compañero, mescos cu ami a tene misericordia di bo?” (Mat. 18:23-35, nota) En realidad, e esclavo tabatin e obligacion di pordona su compañero, pasobra su doño a tene gran misericordia di dje. Mescos cu e rey, ta comosifuera Jehova a cancela un debe grandi cu nos tin ora cu el a pordona nos picanan. Pues, kico su amor y misericordia mester motiva nos pa haci?

17 Segun cu nos ta prepara pa e Conmemoracion, nos mester puntra nos mes si tin rumannan cu nos tin dificultad pa pordona. Si ta asina, esaki ta un bon momento pa imita e ehempel di Jehova, un Dios cu ta “cla pa pordona.” (Sal. 86:5; Neh. 9:17) Si nos ta aprecia loke Jehova a haci pa nos ora cu el a cancela e debe grandi cu nos tin, e ora ey nos tambe lo tene misericordia cu otro hende y pordona nan di curason. Corda cu si nos no ta stima nos rumannan ni ta pordona nan, nos no por spera cu Jehova lo stima nos y pordona nos. (Mat. 6:14, 15) Ta berdad cu ora nos pordona un hende, esey no ta cambia e echo cu el a haci nos daño. Pero un cos ta sigur, ora nos pordona esey lo yuda nos haya un paz interior y nos lo ta mas feliz.

18. Con e amor cu Dios tin pa nos a yuda Lily soporta e imperfeccionnan di Carol?

18 Pa hopi di nos kisas no ta facil pa “sigui soporta” e imperfeccionnan di nos rumannan. (Lesa Colosensenan 3:13, 14; Efesionan 4:32.) Tuma por ehempel Lily, un ruman muher soltero cu pa hopi tempo tabata yuda Carol, un ruman muher di su congregacion cu tabata viuda. [1] Lily tabata hiba Carol tur caminda cu auto, e tabata haci compras p’e y yud’e cu hopi cos mas. Pero Carol tabatin un caracter masha dificil y tabata critica tur cos. Asina mes, Lily tabata purba di concentra riba e bon cualidadnan di Carol. El a keda yuda Carol pa hopi aña, te ora Carol a bira malo y muri. A pesar di tur cos, Lily ta anhela di mira Carol den Paradijs. El a bisa: “Mi tin gana di sa con lo e ta ora e ta perfecto.” Si, e dia lo yega cu tur imperfeccion lo disparce. Mientrastanto, e amor cu Dios tin pa nos ta motiva nos pa tene pasenshi y sigui soporta nos rumannan.

19. Con abo lo mustra aprecio pa e regalo extraordinario cu Jehova a duna nos?

19 No tin duda cu Jehova a duna nos un regalo extraordinario cu “nos no por describi cu palabra.” No lubida esey nunca. Pesey, laga nos probecha di e temporada aki di Memorial pa pensa y medita riba tur loke Jehova y Hesus a haci pa nos. Esaki lo yena nos curason cu gratitud y lo motiva nos pa sigui e pasonan di Hesus fielmente, pa trata nos rumannan cu cariño y amor, y pa pordona nan di curason.

^ [1] (paragraf 18) A cambia algun nomber den e articulo.