Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  February 2016

 STORIA DI BIDA

Danki na Jehova Mi Tabatin Exito den Sirbishi

Danki na Jehova Mi Tabatin Exito den Sirbishi

Mi a bisa e oficial di ehercito cu mi a bay cera un biaha caba pasobra mi a nenga di bay guera. Mi a puntr’e: “Bo ta bay pone mi pasa den esey atrobe?” E combersacion ey a tuma luga e di dos biaha cu nan a manda yama mi pa drenta e ehercito Mericano.

MI A nace na 1926 den un pueblito cu yama Crooksville (Ohio, Merca). Mi mama cu mi tata no tabata religioso, pero toch nan tabata manda ami cu mi shete rumannan bay iglesia. Mi tabata bay Iglesia Metodista. Ora mi tabatin 14 aña, e pastoor a duna mi un premio pasobra mi a bay iglesia fielmente tur diadomingo pa un aña largo.

Margaret Walker (di dos ruman muher na man robes) a yuda mi haya e berdad

E tempo ey, un bisiña cu yama Margaret Walker, un testigo di Jehova, a cuminsa bishita mi mama pa papia cu ne tocante Bijbel. Un dia, mi a dicidi di sinta scucha. Mi mama a pensa cu mi kier a strob’e di studia, pesey el a bisa mi pa mi bay. Pero mi tabata purba scucha nan combersacion toch. Despues di algun bishita, Margaret a puntra mi: “Bo sa Dios su nomber?” Mi a contest’e: “Tur hende sa esey. Su nomber ta Dios.” El a bisa mi: “Bay busca bo Bijbel anto lesa Salmo 83:18.” * Mi a haci loke el a bisa mi, anto mi a haya sa cu Dios su nomber ta Jehova. Mi a core bay cerca mi amigonan y mi a bisa nan: “Awe nochi, ora boso yega cas, busca Salmo  83:18 den boso Bijbel y wak con Dios su nomber ta.” Bo por bisa cu mi a cuminsa predica di biaha.

Mi a cuminsa studia Bijbel y mi a batisa na 1941. Un poco despues, mi a haya e asignacion pa dirigi un estudio di buki di congregacion. Mi a anima mi mama y mi rumannan pa asisti na e estudio ey, y nan tur a bini. Pero mi tata si no tabata interesa.

MI A HAYA OPOSICION NA CAS

Mi a haya mas responsabilidad den e congregacion, y mi a traha mi propio bibliotheek teocratico na cas. Un dia, mi tata a bisa mi: “Coy tur bo bukinan y sali for di mi cas.” Mi a muda bay un pueblo cerca di Zanesville (Ohio). Pero toch mi tabata bishita mi famia regularmente pa anima nan.

Mi tata tabata busca tur manera pa stroba mi mama di bay reunion. Tin biaha, ora mama tabata riba caminda pa bay salon, papa tabata core su tras, gar’e na su brasa y trec’e cas bek. Pero mama tabata sali for di un otro porta y bay reunion toch. Mi a bisa mama: “No worry. Un dia e lo fada di core bo tras.” Cu tempo, papa a fada y no a strob’e di bay reunion mas.

Na 1943, nos congregacion a cuminsa cu e Scol di Ministerio Teocratico y mi a cuminsa duna parti. E conseho cu mi tabata haya despues di cada parti a yuda mi bira un mihor orador.

MI A KEDA NEUTRAL DURANTE GUERA

Na aña 1944, durante Segundo Guera Mundial, nan a yama mi pa drenta servicio militar. Mi a presenta na e base militar, Fort Hayes (Columbus, Ohio). Mi a haci un checkup y mi a yena e formularionan cu nan a duna mi. Ademas, mi a bisa esnan encarga cu lo mi no bira soldaat, y nan a laga mi bay cas. Un par di dia despues, un polis a bin na mi porta y a bisa mi: “Corwin Robison, mi tin un orden di aresto contra bo.”

Dos siman despues, mi tabata den corte, y hues a bisa mi: “Si ta pa mi, lo mi duna bo bida largo. Bo tin algo di bisa?” Mi a contest’e: “Señor hues, mi ta un minister religioso. * Mi preekstoel ta na cada cas cu mi predica, y mi a predica e bon noticia di Reino na hopi hende.” E hues a bisa e miembronan di hurado: “Boso no ta akinan pa dicidi si e yoncuman aki ta un minister religioso of no. Boso ta akinan pa dicidi si el a nenga di drenta servicio militar of no.” Den menos cu mey ora, e hurado a bin bek cu e veredicto y nan a declara mi culpabel. Hues a sentencia mi na cinco aña den prizon na Ashland (Kentucky).

JEHOVA A PROTEHA MI DEN PRIZON

Mi a pasa e prome dos simannan den prizon na Columbus (Ohio). Y e prome dia, mi a keda henter dia den mi cel. Mi a bisa Jehova den oracion: “Mi no por keda cinco aña cera den prizon. Kico mi haci?”

E siguiente dia, e wardadornan di preso a laga mi sali for di mi cel. Mi a mira un prizonero halto y hancra, y mi a cana bay cerca dje. Su nomber ta Paul. Mientras cu nos tabata wak for di bentana, el a puntra mi: “Pakico bo ta akiden, chikitin?” Mi a bis’e: “Mi ta un testigo di Jehova.”  El a bisa mi: “Den serio? Dicon bo ta akiden anto?” Mi a contest’e: “Testigonan di Jehova no ta bay guera pa mata hende.” El a bisa: “Nan a cera bo den prizon pasobra bo no ta mata hende. Y nan ta cera otro hende den prizon pasobra nan ta mata hende. Esey no ta logico, toch?” Ami a bis’e: “Bo tin rason, esey no ta logico.”

E ora ey Paul a bisa mi: “Mi tabata den un otro prizon pa 15 aña. Eynan mi a lesa algun di boso bukinan.” Na e momento ey, mi a pidi Jehova: “Yuda mi pa e homber aki ta na mi banda.” E ora ey Paul a bisa mi: “Si un di e prizoneronan mester pone un dede riba bo, djis dal un grito, y ami lo regla cuenta cu nan.” Y mi por bisa cu tur e tempo cu mi tabata den prizon, mi no tabatin problema cu niun di e 50 prizoneronan cu tabatin den e seccion ey.

Mi tabata entre e Testigonan cu a ser encarcela na Ashland (Kentucky) debi cu mi a keda neutral

Ora nan a traslada mi pa e prizon na Ashland, mi a haya sa cu tabatin hopi ruman maduro eynan. Nan a yuda tanto ami como otro rumannan pa keda spiritualmente fuerte. Nan a pidi nos pa lesa un porcion di Bijbel y pa nos prepara varios pregunta y nan contesta pa nos trata durante nos reunionnan semanal. Ademas, tabatin un ruman cu a organisa nos teritorio. E teritorio tabata nos cel cu tabatin yen di cama cant’i muraya. E ruman a bisa mi: “Robison, bo ta responsabel pa tal y tal cama. E prizoneronan cu drumi riba e camanan ey ta bo teritorio. Percura pa predica na nan prome cu nan sali for di prizon.” Pues, nos tabata bon organisa pa predica.

MI BIDA DESPUES CU MI A SALI FOR DI PRIZON

Despues cu Segundo Guera Mundial a termina, mi a keda den prizon pa un poco tempo mas. Mi tabata preocupa pa mi famia pasobra mi tata a bisa mi: “Si mi logra libra di bo, e ora ey lo ta mas facil pa mi stop e resto di e famia di bay reunion.” Despues cu mi a sali for di prizon, mi a haya un sorpresa. A pesar di e oposicion di mi tata, shete miembro di mi famia tabata asisti na reunion, y un di mi ruman muhernan a batisa.

Cla pa bay predica hunto cu Demetrius Papageorge, un ruman ungi cu a cuminsa sirbi Jehova na 1913

Na aña 1950, un guera na Korea a cuminsa y Merca tambe tabata envolvi. Nan a bolbe yama mi pa drenta ehercito, y mi a presenta na Fort Hayes. Despues cu mi a pasa un examen, un oficial di ehercito a bisa mi: “Abo a haya un di e puntonan di mas halto di henter bo grupo.” Mi a bis’e: “Esey ta bon, pero ami no ta bay drenta ehercito.” Mi a cita 2 Timoteo 2:3 y mi a bis’e: “Mi ta  un soldaat di Cristo caba.” El a keda keto pa basta rato, y despues el a bisa mi: “Bo por bay.”

No mucho tempo despues, mi a asisti na un congreso na Cincinnati (Ohio). Eynan mi a bay e reunion pa esnan cu ta interesa pa bay Betel. Ruman Milton Henschel a bisa nos cu si un ruman kier traha duro pa e Reino, lo e ta util na Betel. Mi a aplica pa Betel, y nan a acepta mi. Na augustus 1954, mi a cuminsa traha na Brooklyn, y for di e tempo ey padilanti mi a traha eynan.

Semper mi tabatin hopi trabou na Betel. Pa un par di aña mi a traha cu e boilernan di e drukkerij y di e oficinanan. Ademas, mi a drecha mashin, auto y lock. Tambe mi a traha na Salonnan di Asamblea na e stad di New York.

Para banda di e boilernan den edificio di e oficinanan na Brooklyn

Mi stima e rutina spiritual cu nos tin na Betel, manera por ehempel e programa di Adoracion di Mainta, e Estudio di E Toren di Vigilancia cu e famia di Betel. Ademas, mi ta gusta sali den sirbishi cu e congregacion. Eigenlijk, e actividadnan aki mester ta parti di e rutina spiritual di tur famia cu ta testigo di Jehova. Si mayor- y yiunan lesa e texto di dia hunto, tene Adoracion Como Famia regularmente, participa den e reunionnan di congregacion y predica e bon noticia, lo ta mas facil pa henter e famia haya un bon relacion cu Jehova.

Mi tin hopi amigo tanto na Betel como den congregacion. Algun di nan tabata ungi y a haya nan recompensa celestial caba, mientras cu otronan tabatin e speransa terenal. Pero tur sirbidor di Jehova, hasta betelita, ta hende imperfecto y ta posibel cu nos por haya un desacuerdo cu un ruman. Si acaso esey sosode, semper mi ta purba di haci paz cu mi rumannan. Mi ta corda riba Mateo 5:23 y 24 y ta pensa kico Jehova kier pa nos haci ora nos haya un desacuerdo. No ta facil pa pidi despensa, pero ora mi haci esey, mayoria di biaha e problema ta ser resolvi.

MI A HAYA BON RESULTADO DEN SIRBISHI

Debi na mi edad, ta dificil pa mi bay di cas pa cas, pero mi no ta entrega. Mi a siña papia un  tiki Chines Mandarin, y mi ta gusta papia cu hende di habla Chines riba caya. Tin biaha, mi ta laga 30 pa 40 revista riba un mainta.

Compartiendo e mensahe cu hende di habla Chines na Brooklyn (New York)

Mi a hasta haya un rebishita di un hende cu ta biba na China. Riba un dia, un mucha muher cu tabata parti flyer pa haci propaganda pa un negoshi di fruta a smile cu mi. Mi a smile bek cu ne, y mi a ofrec’e E Toren di Vigilancia y Spierta! na Chines. El a tuma nan y a bisa mi cu e yama Katie. Despues di esey, e tabata bin papia cu mi cada biaha cu e mira mi. Mi a siñ’e nomber di algun fruta y berdura na Ingles y e tabata ripiti nan. Tambe mi tabata splic’e algun texto di Bijbel y a dun’e e buki Bijbel Ta Siña. Pero despues di algun siman, mi no a mir’e mas.

Algun luna despues, un otro mucha muher cu tabata parti flyer a tuma algun revista cerca mi. E siguiente siman, el a duna mi su telefon y a bisa mi: “Papia cu China.” Mi a contest’e: “Mi no conoce niun hende na China.” Pero, ora el a insisti, mi a tuma e telefon y bisa: “Halo, cu Robison.” E stem a bisa mi: “Robby, t’ami, Katie. Mi a bay China bek.” Mi di: “China?” Katie a bisa: “Si. E mucha muher cu a duna Robby e telefon ta mi ruman. Robby a siña mi hopi cos bon. Robby por siñ’e loke Robby a siña mi?” Mi a bis’e: “Mi ta bay haci mi best. Danki pa laga mi sa unda bo ta.” Poco tempo despues, mi no a mira e ruman di Katie mas. Mi no sa unda e mucha muhernan ey ta aworaki, pero mi ta spera cu nan a sigui studia Bijbel.

Mi tin 73 aña ta sirbi Jehova. Mi ta contento cu el a yuda mi keda neutral den tempo di guera y fiel den prizon. Ademas, mi rumannan a bisa mi cu e echo cu mi a keda fiel ora nos tata tabata opone mi a duna nan curashi. Mi mama y seis di mi rumannan a batisa. Hasta mi tata a cambia su actitud y a asisti na algun reunion prome cu el a fayece.

Si ta e boluntad di Jehova, mi famia y amigonan cu a muri lo resucita den e mundo nobo. Ki un alegria nos lo sinti ora nos sirbi Jehova hunto cu nos sernan keri pa semper! *

^ par. 6 E traduccion di Bijbel na Ingles cu Corwin Robison a uza ta bisa cu Dios su nomber ta Jehova.

^ par. 14 Na Merca, e ministernan religioso no mester a cumpli cu servicio militar.

^ par. 32 Mientras nos tabata prepara e articulo aki, Corwin Robison a fayece. El a keda fiel na Jehova.