Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  February 2016

Keda Leal na Jehova

Keda Leal na Jehova

“SEÑOR lo ta entre ami y abo, y entre mi descendientenan y bo descendientenan pa semper.”—1 SAM. 20:42.

CANTICA: 125, 62

1, 2. Dicon e amistad entre Jonatan y David ta un bunita ehempel di lealtad?

JONATAN lo mester a keda hopi impresiona ora el a wak cuanto curashi e hoben David tabatin. David a mata e gigante Goliat y a trece “e Filisteo su cabes den su man” pa Rey Saul di Israel, Jonatan su tata. (1 Sam. 17:57) Jonatan no tabatin duda cu Dios tabata cu David. Y for di e tempo ey, Jonatan y David a bira bon amigo. Jonatan hasta “a cera un alianza cu David, pasobra e tabata stim’e manera su mes.” (1 Sam. 18:1-3) Y Jonatan a keda leal na David pa resto di su bida.

2 Hasta ora Jehova a scoge David pa bira e siguiente rey di Israel, Jonatan a keda leal na David. Y ora Saul a purba di mata David, Jonatan tabata preocupa p’e. Jonatan a bay Hores, cu ta keda den un desierto di Judea, pa anima su amigo pa sigui confia den Jehova. Jonatan a bis’e: “No tene miedo, ... lo bo ta rey di Israel, y net despues di bo t’ami.”—1 Sam. 23:16, 17.

3. Kico tabata e cos di mas importante den Jonatan su bida, y con nos por sa esey? (Wak e prome plachi.)

 3 Hopi biaha nos ta admira hende leal. Pero nos ta admira Jonatan solamente pasobra e tabata leal na David? No, nos ta admir’e tambe pasobra e tabata leal na Dios. Esaki tabata e cos di mas importante den Jonatan su bida. En realidad, esey ta e motibo pakico e tabata leal na David y no a bira jaloers riba dje ora cu el a haya sa cu David lo bira rey na su luga. No lubida cu Jonatan hasta a yuda David pa sigui confia den Jehova. Nan tur dos a keda leal na Jehova y tambe na otro. Ambos a cumpli cu e promesa cu nan a haci: “SEÑOR lo ta entre ami y abo, y entre mi descendientenan y bo descendientenan pa semper.”—1 Sam. 20:42.

4. (a) Kico lo duna nos berdadero felicidad y satisfaccion? (b) Kico nos lo trata den e articulo aki?

4 Como cristian, nos tambe mester ta leal na nos famia, nos amigonan y nos rumannan den congregacion. (1 Tes. 2:10, 11) Pero mas importante ainda, nos mester ta leal na Jehova, pasobra e ta Esun cu a duna nos bida. (Rev. 4:11) Ora nos keda leal na dje, nos ta haya berdadero felicidad y satisfaccion. Pero pa nos por mustra cu nos ta leal na Dios, nos mester keda fiel na dje hasta den tempo dificil. Den e articulo aki nos lo considera con Jonatan su ehempel por yuda nos keda leal na Jehova den cuater situacion dificil: (1) ora nos ta sinti cu un hende cu tin autoridad no ta merece nos respet, (2) ora nos tin cu scoge na ken nos mester keda leal, (3) ora un ruman compronde nos robes of trata nos inhustamente y (4) ora ta hopi dificil pa nos cumpli cu un promesa.

ORA NOS TA SINTI CU UN HENDE CU TIN AUTORIDAD NO TA MERECE NOS RESPET

5. Pakico tabata dificil pa e pueblo di Israel mustra lealtad na Dios tempo cu Saul tabata Rey?

5 Jonatan y e pueblo di Israel tabata den un situacion dificil. Rey Saul a desobedece Dios y pesey Dios a rechas’e. (1 Sam. 15:17-23) Pero toch Jehova a permiti Saul sigui reina pa hopi aña. Pesey tabata hopi duro pa e pueblo keda leal na Dios siendo cu esun cu tabata “sinta riba e trono” di Jehova tabata haci malo.—1 Cro. 29:23.

6. Dicon nos por bisa cu Jonatan a keda fiel na Jehova?

6 Jonatan semper a keda leal na Jehova. Laga nos ban wak kico Jonatan a haci ora Saul a cuminsa desobedec’e Dios. (1 Sam. 13:13, 14) E tempo ey, un ehercito grandi di Filisteo a bin cu 30.000 garoshi di guera pa ataca Israel. Saul tabatin solamente 600 soldaat, y ta e cu Jonatan so tabatin arma. Pero Jonatan no tabatin miedo pasobra el a corda riba e palabranan di profeta Samuel: “SEÑOR lo no bandona su pueblo pa motibo di su gran nomber.” (1 Sam. 12:22) Jonatan a bisa e soldaat cu tabata carga su arma: “Nada no por stroba SEÑOR di salba, tanto pa medio di hopi como pa medio di poco.” E cu e soldaat a ataca un grupo di Filisteo y a mata mas o menos 20 di nan. Despues, Jehova a causa un temblor y e Filisteonan a haya miedo y nan a cuminsa mata otro. Pues, Jonatan tabatin fe den Jehova, y pesey nan a gana e bataya.—1 Sam. 13:5, 15, 22; 14:1, 2, 6, 14, 15, 20.

7. Con Jonatan a trata su tata?

7 Aunke cu Saul a sigui desobedece Jehova, toch Jonatan a sigui obedece su  tata ora esey tabata posibel. Por ehempel, nan a bringa hunto den bataya pa defende Jehova su pueblo.—1 Sam. 31:1, 2.

8, 9. Dicon nos mester respeta esnan cu tin autoridad?

8 Mescos cu Jonatan, nos por keda leal na Jehova door di obedece e gobierno di nos pais ora esey ta posibel. Por ehempel, un ambtenaar kisas ta corupto, pero toch nos mester mustra respet na dje. Dicon? Pasobra Bijbel ta bisa cu nos mester respeta “autoridadnan superior.” (Lesa Romanonan 13:1, 2.) En realidad, cada un di nos mester respeta tur esnan cu a haya autoridad for di Jehova, entre otro, cabesnan di famia y esnan cu ta dirigi e congregacion.—1 Cor. 11:3; Heb. 13:17.

Un manera cu nos por mustra lealtad na Jehova ta door di trata nos casa cu respet, hasta si e no ta sirbi Jehova (Wak paragraf 9)

9 Olga, [1] un ruman muher di Sur America, a mustra lealtad na Jehova. Con? Aunke su esposo tabata trat’e malo pa hopi aña pasobra e ta un testigo di Jehova, Olga a sigui respet’e. Tin biaha e tabata insult’e, keda sin papia cu ne y hasta el a menas’e cu e lo bay lag’e y hiba e muchanan hunto cu ne. Pero Olga no a “paga malo cu malo.” El a haci tur su esfuerso pa cumpli cu su deber como esposa. Olga tabata cushina p’e, laba su pañanan y a percura pa e otro miembronan di su famia. (Rom. 12:17) Y ora tabata posibel, e tabata bay cu su esposo pa bishita su famia y amigonan. Por ehempel, ora su esposo kier a bay un otro stad pa e entiero di su tata, Olga a prepara tur loke nan tabatin mester pa e biahe. Despues, ora nan tabata na e entiero, el a keda warda su esposo pafo te ora misa a caba. Despues di hopi aña, Olga su esposo a cuminsa trat’e mas mihor pasobra Olga a mustr’e respet y tabatin hopi pasenshi cu ne. Awor su esposo hasta ta anim’e pa bay reunion y ta hib’e Salon di Reino. Y tin biaha e ta bay reunion cu ne.—1 Ped. 3:1.

ORA NOS TIN CU SCOGE NA KEN NOS MESTER KEDA LEAL

10. Dicon Jonatan tabata sa cu e mester a keda leal na David?

10 Ora Saul a bisa cu e kier a mata David, Jonatan mester a tuma un decision  hopi dificil. E mester a scoge si e ta keda leal na David of na su tata. Pero Jonatan tabata sa cu Dios ta cu David y no cu Saul. Pesey el a scoge pa keda leal na David. Jonatan a spierta David cu su tata kier a mat’e, y pesey el a bis’e p’e bay sconde. Ademas, el a splica Saul pakico e no mester mata David.—Lesa 1 Samuel 19:1-6.

11, 12. Con nos amor pa Dios ta yuda nos keda leal na dje?

11 Alice, un ruman muher di Australia, tambe mester a dicidi na ken e ta keda leal. Ora el a cuminsa studia Bijbel, e tabata conta su famia tocante e cosnan bon cu el a siña. Cu tempo, el a splica nan pakico e lo no celebra Pasco mas. Prome nan a keda decepciona, pero despues nan a rabia masha hopi cu ne. Nan a sinti cu el a bira lomba pa nan. Y finalmente su mama a bis’e cu e no kier a wak e nunca mas. Alice a bisa: “Mi no por a kere loke el a bisa mi. Mi a sinti un dolor inmenso pasobra mi ta echt stima mi famia. Pero mi tabata determina pa pone Jehova y Hesus na prome luga den mi bida. Y mi a batisa na e siguiente asamblea.”—Mat. 10:37.

12 Nos no mester laga nada bira mas importante pa nos cu nos lealtad na Jehova, ni un pais ni un deporte ni scol. Por ehempel, Henry tabata gusta hunga schaak (ahedrez) cu su team di scol y nan kier a gana e campeonato. Pero door cu e tabata hunga schaak tur weekend, e no tabatin tempo pa bay sirbishi ni reunion. Henry a bisa cu lealtad na su scol a bira mas importante cu su lealtad na Dios. Pesey el a dicidi di stop di hunga schaak pa su scol.—Mat. 6:33.

13. Con lealtad na Dios por yuda nos trata cu problema di famia?

13 Tin biaha ta dificil pa nos keda leal na varios miembro di famia na e mesun tempo. Por ehempel, Kenny a bisa: “Mi tabata kier a bishita mi mama, kende ta grandi caba, regularmente. Tambe mi tabata kier pa e keda cerca nos de bes en cuando. Pero mi mama cu mi casa no tabata bay bon cu otro.” El a sigui bisa: “Mi no por a complace tur dos.” Kenny a pensa riba loke Bijbel ta bisa y a realisa cu den e situacion aki e mester agrada su esposa y mustra lealtad na dje. Pues el a haya un solucion cu su esposa a gusta. Lealtad na Dios y respet pa su Palabra a duna Kenny curashi pa splica su esposa pakico e mester a trata su mama na un manera bondadoso. Y tambe el a splica su mama pakico e mester mustra respet na su esposa.—Lesa Genesis 2:24; 1 Corintionan 13:4, 5.

ORA UN RUMAN COMPRONDE NOS ROBES OF TRATA NOS INHUSTAMENTE

14. Con Saul a trata Jonatan?

14 Un otro situacion den cua nos por mustra lealtad na Jehova ta ora un ruman cu ta dirigi e congregacion trata nos inhustamente. Jonatan a pasa den un situacion asina. Aunke Saul tabata un rey nombra pa Dios, toch el a trata su yiu malo. Saul tabata sa cu Jonatan y David tabata amigo di otro pero e no por a compronde pakico Jonatan tabata stima David asina hopi. Ora cu Jonatan a purba di yuda David, Saul a rabia masha hopi cu ne y a humili’e dilanti tur hende. Toch Jonatan a sigui mustra respet na su tata. Pero na mes momento, el a keda leal tanto na Jehova como na David, kende mas despues lo a bira rey di Israel.—1 Sam. 20:30-41.

15. Si un ruman trata bo inhustamente, con bo mester reacciona?

15 Den nos congregacionnan, rumannan  homber cu ta dirigi ta haci nan best pa trata tur hende bon. Pero e rumannan aki ta imperfecto, y nan por compronde bo robes of trata bo inhustamente. (1 Sam. 1:13-17) Si esey sosode cu bo, keda leal na Jehova!

ORA TA HOPI DIFICIL PA NOS CUMPLI CU UN PROMESA

16. Den ki situacionnan nos mester keda leal na Jehova y demostra cu nos no ta egoista?

16 Saul tabata kier pa Jonatan bira rey en bes di David. (1 Sam. 20:31) Pero, Jonatan no tabata egoista; e no a busca manera pa bira rey. El a cumpli cu e promesa cu el a haci su amigo, David, y el a keda leal na Jehova. En realidad, tur hende cu ta leal na Dios, lo cumpli cu nan promesanan, hasta ora esey no ta cumbini nan. (Sal. 15:4) Por ehempel, si nos cera un contract cu un hende, nos mester cumpli cu loke nos a priminti, hasta si esaki resulta di ta mas dificil di loke nos a pensa. Y si nos tin problema den nos matrimonio, nos mester keda leal na nos casa. Ora nos haci esey, nos ta demostra cu nos ta stima Jehova.—Lesa Malakias 2:13-16.

Si nos cera un contract cu un hende, nos mester ta leal na Dios y cumpli cu loke nos a priminti (Wak paragraf 16)

17. Kico abo a siña for di e articulo aki?

17 Nos tur kier ta leal manera Jonatan, no ta berdad? Wel, laga nos keda leal na nos rumannan si nan decepciona nos. Y laga nos no sigui tras di metanan egoista. Ademas, laga nos keda leal na Jehova pase loke pase. Si nos keda leal, nos lo haci Jehova su curason contento y nos tambe lo ta feliz. (Prov. 27:11) Nos por ta sigur cu Jehova semper lo cuida nos y lo haci loke ta mihor pa nos. Den e siguiente articulo, nos lo bay wak kico nos por siña for di algun hende cu a biba den tempo di David; tin di nan tabata leal y otronan no.

^ [1] (paragraf 9) A cambia algun nomber.