Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  February 2016

 FOR DI NOS ARCHIVO

E Auto cu Loudspeaker Cu Miyones di Hende Tabata Conoce

E Auto cu Loudspeaker Cu Miyones di Hende Tabata Conoce

“Tin solamente un auto cu loudspeaker den sirbishi di Señor na Brazil, y miyones di hende conoc’e. E ta ‘e auto cu loudspeaker di Watch Tower.’”—Nathaniel Yuille, na 1938.

NA COMIENSO di e decada di 1930, e predicacion di Reino na Brazil tabata bay pocopoco. Pero na 1935, e pioneronan Nathaniel cu Maud Yuille a manda un carta pa Joseph Rutherford, kende tabata dirigi e trabou di predica e tempo ey. Den e carta aki nan a bisa Ruman Rutherford cu nan tabata dispuesto pa bay yuda caminda tabatin mester di mas yudansa.

Nathaniel tabata un ingeniero civil y, e tempo ey, e tabatin 62 aña. E tabata director di sirbishi di un congregacion di testigonan di Jehova na San Francisco, California. Eynan, el a organisa e trabou di predica y a yega di uza ekipo di zonido pa predica e bon noticia. El a ser nombra como sirbidor di sucursal di Brazil, y su experencia y deseo di traha a resulta di ta un bendicion pa su asignacion nobo den un teritorio multilingue.

Na 1936, Nathaniel, Maud y Antonio Andrade, un pionero cu a fungi como interprete, a yega Brazil. Nan a trece un cargamento di gran balor: 35 tocadisco portatil y un auto cu loudspeaker. Aunke Brazil ta e di cinco pais mas grandi na mundo, e tempo ey tabatin solamente 60 publicador di Reino. Pero e ekiponan di zonido ey lo a yuda nan predica na miyones di hende den apenas un par di aña.

Un luna despues cu famia Yuille a yega Brazil, a tene e prome congreso di predicacion na São Paulo, Brazil. * Aparentemente, Maud tabata stuur e auto y a toca e discurso publico cu 110 hende a scucha. E congreso ey a anima e publicadornan hopi, y nan a ser motiva pa haci mas den sirbishi. Nan a siña predica cu literatura, carchi di testimonio y  tocadisco cu discursonan na Aleman, Hungaro, Ingles, Polaco, Spaño y mas despues na Portugues.

E auto cu loudspeaker aki a yuda miyones di hende na Brazil scucha e bon noticia

Ademas, e tres congresonan di predicacion cu a ser teni na São Paulo, Rio de Janeiro y Curitiba na 1937 a duna un enorme empuhe na e trabou di predica. Durante e congresonan aki, e rumannan tabata bay predica di cas pa cas cu e auto cu loudspeaker. José Maglovsky, kende e tempo ey tabata basta jong, a skirbi despues: “Nos tabata pone literatura biblico na un stand, y mientras cu e auto cu loudspeaker tabata toca un mensahe graba, nos tabata papia cu e hendenan cu tabata sali for di nan cas pa bin wak ta kico tabata pasando.”

Bautismo tabata tuma luga den riu mientras cu otro hende tabata landa den bisindario. Esey tabata net un bon chens pa predica e bon noticia cu e auto cu loudspeaker. E discurso di Ruman Rutherford tabata resona for di e loudspeakernan, y hende curioso tabata bay para rond di e auto pa scucha mientras cu e discurso tabata ser traduci na Portugues. Despues di e discurso, nan tabata toca canticanan di Reino na Polaco mientras cu e candidatonan pa bautismo tabata batisa. E rumannan tabata canta na diferente idioma. E 1938 Yearbook (Anuario di 1938) a bisa: “Esaki a pone nos corda con na Pentecoste cada persona a compronde e mensahe den nan mes idioma.”

Despues di congreso, sea cu awa yobe of no, tur diadomingo hende den parke, areanan residencial y cu tabata traha den fabricanan den centro di São Paulo y e pueblonan den bisindario por a scucha e discursonan biblico for di e auto cu loudspeaker. Un biaha pa luna, e auto ey tabata core 97 kilometer pa toca un programa biblico pa e 3.000 habitantenan di un colonia di hende cu lepra noordwest di São Paulo. Cu tempo, nan a establece un congregacion eynan cu a haci bon progreso. A pesar di nan maleza teribel, e publicadornan di Reino ey a haya permit pa bishita otro colonianan di hende leproso pa papia cu nan tocante e mensahe consolador di Bijbel.

Na 1938, porfin grabacion di discursonan na Portugues a bira disponibel. Riba Dia di Tur Difunto, e auto cu loudspeaker tabata bay diferente santana y mas cu 40.000 hende por a scucha e discursonan titula “Unda e Mortonan Ta?”, “Jehova” y “Rikesa.”

Lidernan religioso no tabata gusta e forma di predica aki niun tiki, y hopi biaha nan tabata pone presion riba autoridadnan local pa “cera boca” di e auto cu loudspeaker. Ruman Maud ta corda un ocasion ora cu pastoornan local a instiga un multitud di hende pa rondona e auto. Pero, e alcalde y polis a yega na e sitio y a scucha henter e programa. E alcalde a hasta bay cu algun literatura. E dia ey a bay sin problema. A pesar di tal oposicion, e 1940 Yearbook (Anuario di 1940) a bisa cu aña 1939 tabata “e mihor tempo pa sirbi e Gran Gobernante Divino y proclama su nomber” na Brazil.

Sin duda, “e auto cu loudspeaker di Watch Tower” a trece un cambio grandi den e trabou di predica na Brazil. El a yuda miyones di hende scucha e mensahe di Reino. Aunke a bende e auto famoso ey na 1941, tin cientos di miles di testigo di Jehova cu ta predica e bon noticia na hende cu curason sincero den e teritorio inmenso di Brazil.—For di nos archivo na Brazil.

^ par. 7 E rumannan tabata bay predica durante e congresonan aki.