Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2016

Keda Neutral den un Mundo Dividi

Keda Neutral den un Mundo Dividi

“Duna ... Dios loke ta di Dios.”—MAT. 22:21.

CANTICA: 33, 137

1. Con nos por obedece tanto Dios como gobierno humano?

BIJBEL ta bisa cu nos tin cu obedece gobiernonan humano. Pero, tambe e ta siña nos cu semper nos tin cu obedece Dios. (Echo. 5:29; Tito 3:1) Con nos por obedece tanto Dios como gobierno humano? Hesus a duna nos un principio cu ta siña nos ken nos mester obedece. El a bisa: “Duna Cesar loke ta di Cesar, ma Dios loke ta di Dios.” [1] (Mat. 22:21) Con nos por “duna Cesar loke ta di Cesar”? Wel, nos tin cu obedece e leynan di gobierno, respeta su funcionarionan y paga belasting. (Rom. 13:7) Pero si gobierno manda nos desobedece Dios, na un manera respetuoso nos ta nenga di obedece.

2. Con nos ta mustra cu nos no ta participa den asuntonan politico di mundo?

2 Un manera cu nos ta duna Dios loke e tin derecho riba dje ta ora nos keda neutral den asuntonan politico di mundo. (Isa. 2:4) Pues, nos no ta bay contra gobiernonan humano ya cu ta Jehova ta permiti nan existi, ni nos no ta apoya actividadnan patriotico of nacionalista. (Rom. 13:1, 2) Tampoco nos no ta purba di influencia politiconan, vota den eleccion, bay riba lista di partido of purba di trece cambio den gobernacion.

3. Dicon nos tin cu keda neutral?

 3 Bijbel ta duna varios motibo pakico Dios kier pa nos keda neutral. Na prome luga, di e manera ey nos ta sigui e siñansanan y ehempel di su Yiu, Hesucristo. Mescos cu ne, nos “no ta parti di mundo”, pues nos no ta participa den politica ni apoya guera. (Juan 6:15; 17:16) Na di dos luga, nos mester keda neutral pasobra nos kier apoya e Reino di Dios. Si nos apoya un gobierno humano, con nos lo por keda cu un consenshi limpi y predica e bon noticia cu e Reino di Dios so por soluciona e problemanan di humanidad? Y na di tres luga, nos no kier ta manera religion falso cu ta mete den politica y asina dividi su miembronan. Como cu nos ta keda neutral, nos ta uni cu nos rumannan rond mundo.—1 Ped. 2:17.

4. (a) Con nos por sa cu lo bira mas dificil pa keda neutral? (b) Dicon nos tin cu prepara nos mes pa keda neutral for di awor?

4 Kisas nos ta biba den un pais caminda e situacion politico ta basta trankil y gobierno ta tolera adoracion berdadero. Sinembargo, segun cu e sistema di Satanas ta yega su fin, nos por verwacht cu por bira mas dificil pa keda neutral. Mundo ta yen di hende “cabesura” cu “no ta dispuesto pa cera ningun acuerdo”, pues nos por spera cu nan lo bira mas y mas dividi. (2 Tim. 3:3, 4) Den algun pais, nos rumannan ya caba a enfrenta e reto di keda neutral debi cu e situacion politico a cambia diripiente. Bo ta mira pakico nos tin cu fortalece nos determinacion pa keda neutral for di awor? Si nos warda te ora nos haya nos den un situacion dificil, nos lo por haya nos ta cede y compromete nos posicion. Pues, con nos por prepara nos mes pa keda neutral den un mundo dividi? Ban considera cuater manera cu por yuda nos logra esey.

MIRA GOBIERNO HUMANO MANERA JEHOVA TA MIRA NAN

5. Kico Jehova ta pensa di gobierno humano?

5 E prome manera pa keda neutral ta door di mira sistemanan politico manera Jehova ta mira nan. Aunke algun gobierno por parce husto, nunca no tabata e proposito di Jehova pa hende goberna otro hende. (Jer. 10:23) Gobierno di hende ta promove nacionalismo, y esaki ta loke ta dividi e famia humano. Ademas, ni e mihor lidernan humano no ta capaz pa soluciona tur problema. Fuera di esey, desde 1914, gobiernonan humano a bira enemigo di e Reino di Dios. Pronto e Reino aki lo ehecuta huicio contra e nacionnan y destrui nan.—Lesa Salmo 2:2, 7-9.

6. Con nos mester trata hende cu tin autoridad den gobierno?

6 Jehova ta permiti e sistema politico di e mundo aki existi pasobra e ta trece un grado di stabilidad cu, na su turno, ta yuda nos predica e bon noticia di Reino. (Rom. 13:3, 4) Dios ta hasta pidi nos pa resa pa esnan cu tin un puesto di autoridad, specialmente ora nan tin cu tuma decision cu por stroba nos di sirbi Dios libremente. (1 Tim. 2:1, 2) Mescos cu apostel Pablo, nos ta apela na autoridadnan gubernamental pa nos haya un trato husto. (Echo. 25:11) A pesar cu Bijbel ta bisa cu ta Dios su adversario, Satanas, tin autoridad riba e sistema politico, e no ta bisa cu ta Satanas ta controla directamente cada lider of funcionario. (Luc. 4:5, 6) Pesey, nos tin cu evita di insinua cu ta Diabel ta controla un cierto funcionario. Bijbel ta bisa nos cu nos no mester insulta hende cu tin autoridad den gobierno.—Tito 3:1, 2.

7. Ki manera di pensa nos mester evita?

7 Nos ta obedece Dios y no ta faborece  ningun candidato of partido politico, sea cu nan ta parce di ta na nos fabor of no. Relaciona cu esaki, con nos posicion neutral por ser poni na prueba? Supone cu un movemento popular ta purba di core cu un gobierno cu ta oprimi e pueblo y cu ta pone sirbidornan di Dios tambe sufri. Aunke nos lo no bay marcha cu e manifestantenan, nos ta apoya nan den nos curason? (Efe. 2:2) Nos mester keda neutral no solamente cu palabra y accion sino tambe den nos curason.

SEA “CAUTELOSO” Y TOCH “INOCENTE”

8. Ora ta dificil pa keda neutral, con nos por ta “cauteloso” y toch “inocente”?

8 Un di dos manera pa keda neutral ta door di ser “cauteloso manera colebra y toch inocente manera paloma” ora nos haya nos den situacion dificil. (Lesa Mateo 10:16, 17.) Nos ta cauteloso ora nos ta reconoce e peligernan for di trempan, y nos ta keda inocente ora nos ta keda neutral den e situacionnan dificil ey. Ban considera algun situacion cu nos por haya nos aden y con nos por keda neutral.

9. Cu kico nos tin cu tene cuidou ora nos ta papia cu otro hende?

9 Den combersacion. Nos mester ta cauteloso ora hende ta papia tocante politica. Por ehempel, ora nos ta papia tocante e mensahe di Reino, evita di elogia of critica e ideanan di un partido of lider politico. Purba di papia tocante un topico cu boso tin en comun y enfoca riba e problema fundamental en bes di papia tocante un posibel solucion politico. Despues, mustra e persona den Bijbel con e gobierno di Dios lo soluciona e problema completamente y permanentemente. Si topiconan delicado manera matrimonio di mesun sexo of abortus presenta, defende e normanan di Dios y splica con nos ta aplica nan den nos bida. Durante e combersacion, keda completamente neutral den tur loke tin di haber cu politica. Nos no ta duna opinion tocante cua leynan mester pasa, anula of cambia, y nos no ta purba di convence otro hende pa bay di acuerdo cu nos.

10. Con nos por haci sigur pa no laga medionan di comunicacion influencia nos?

10 Medionan di comunicacion. Hopi biaha, un “noticia” ta ser presenta na un manera cu ta faborece un opinion mas cu un otro. Den algun pais, ta gobierno ta controla medionan di comunicacion. Den e paisnan ey, hopi biaha noticia ta ser presenta den un forma cu ta faborece e gobierno abiertamente. Pero hasta den paisnan caminda tin mas libertad di expresion, cristiannan mester tene cuidou pa no bay tras di e ideanan di cierto periodista. Puntra bo mes: Mi ta gusta scucha un cierto periodista pasobra mi ta di acuerdo cu su opinionnan politico? Si ta asina, lo ta mihor pa bo scucha di un fuente cu ta mas neutral. En todo caso, lo ta sabi pa evita di scucha y lesa informacion cu ta promove cierto ideanan politico. Ademas, ta bon pa compara loke bo ta tende cu “e patronchi di palabra sano” cu tin den Bijbel.—2 Tim. 1:13.

11. Dicon lo ta dificil pa keda neutral ora nos pertenencianan ta hopi importante pa nos?

11 Materialismo. Si nos pertenencianan ta hopi importante pa nos, lo bira mas dificil pa keda neutral ora nos haya nos cu prueba. Ruth, na Malawi, a mira esey pasa cu varios Testigo ora nan a ser persigui den e decada di 1970. E ta corda: “Nan no por a bandona nan bida comodo. Algun a huy cu nos, pero mas  despues nan a join e partido politico y a bay cas bek pasobra nan no por a soporta di hiba un bida incomodo den un campo di refugiado.” Na contraste, e gran mayoria di sirbidor di Dios si a keda neutral a pesar di problema economico of hasta ora nan a perde tur loke nan tabatin.—Heb. 10:34.

12, 13. (a) Kico Jehova ta pensa di hende? (b) Con nos por sa si nos ta birando demasiado orguyoso di nos pais?

12 Orguyo. Hopi biaha hende ta gaba nan rasa, tribu, cultura, stad of nacion. Pero si nos bira demasiado orguyoso di nos rasa, cultura of nacion, nos ta bayendo contra di Jehova su punto di bista di gobierno di mundo y di e famia humano. Claro cu Dios no kier pa nos rechasa nos cultura. Eigenlijk, diferencia di cultura ta mustra cuanto variedad tin den e famia humano. Pero nos mester corda cu pa Dios tur hende ta igual.—Rom. 10:12.

13 En realidad, un hende cu ta demasiado orguyoso di su pais ta manifestando nacionalismo, y ya e no ta neutral mas. Si nos ta sinti asina, lo ta dificil pa nos keda neutral. Hasta algun cristian di e congregacion di prome siglo a discrimina nan rumannan debi na nan nacionalidad. (Echo. 6:1) Con nos por sa si e orguyo aki a saca raiz den nos curason? Supone cu un ruman di un otro pais ta duna bo un sugerencia. Lo bo rechasa su sugerencia di biaha y pensa: Aki nos ta haci esey mihor? Na luga di esey, nos tur mester aplica e siguiente conseho inspira: “Cu humildad, considera cu otro hende ta superior na boso.”—Flp. 2:3.

JEHOVA LO FORTALECE BO

14. Con oracion por yuda nos, y ki ehempel biblico ta proba esaki?

14 Un di tres manera pa keda neutral ta door di pidi Jehova pa forsa. Pidie pa spirito santo, loke por duna bo pasenshi y dominio propio. E cualidadnan aki lo por yuda bo ora bo mester trata cu un gobierno cu ta corupto of inhusto. Tambe bo por pidi Jehova p’e duna bo sabiduria pa bo ripara ki situacionnan por pone bo posicion neutral como cristian na peliger y con pa trata cu esakinan. (Sant. 1:5) Si bo ta den prizon of a haya cualkier otro castigo debi na bo determinacion pa para firme pa adoracion berdadero, pidi Jehova p’e duna bo forsa pa bo defende bo fe cu curashi y wanta cualkier persecucion cu por presenta.—Lesa Echonan 4:27-31.

15. Con Bijbel por yuda nos keda neutral? (Wak tambe e cuadro “Bijbel A Yuda Nan Keda Neutral.”)

15 Jehova por fortalece nos mediante su Palabra. Medita riba textonan cu lo por yuda bo keda neutral bou di prueba. Graba nan den bo mente pa nan por yuda bo si algun dia bo no por tin un Bijbel. Ademas, e Palabra di Dios por haci bo speransa den e futuro bendicionnan di e Reino mas fuerte. Sin e speransa aki ta bira dificil pa wanta persecucion. (Rom. 8:25) Scoge algun relato di Bijbel cu ta describi e bendicionnan cu abo lo kier mira cumpli y imagina con lo bo disfruta di e bendicionnan ey den Paradijs.

SIÑA FOR DI SIRBIDORNAN DI DIOS CU A MANTENE NAN INTEGRIDAD

16, 17. Kico nos por siña for di e ehempel di fiel sirbidornan di Dios cu a keda neutral? (Wak e prome plachi.)

16 Un di cuater manera pa keda neutral ta door di pensa riba e ehempel di fiel sirbidornan di Jehova cu a mantene nan integridad. Nan ehempel por duna nos e sabiduria y forsa pa persevera. Por  ehempel, Sadrak, Mesak y Abed-nego a nenga di adora un imagen cu a representa e gobierno di Babilonia. (Lesa Daniel 3:16-18.) Awe, ora Testigonan lesa tocante e determinacion di e hobennan aki, nan ta haya e curashi pa nenga di saluda bandera di e nacion caminda nan ta biba. Hesus tambe a keda completamente neutral den conflictonan social y politico di mundo. Ya cu e tabata sa ki efecto su ehempel por tin riba otro hende, el a urgi su discipelnan: “Tene curashi! Mi a vence mundo.”—Juan 16:33.

17 Hopi Testigo den nos tempo a keda neutral. Tin di nan a sufri maltrato fisico, bay cera y a hasta muri pa motibo di nan fe. Nan ehempel por yuda nos mescos cu el a yuda Barış, di Turkia, kende a bisa: “Franz Reiter tabata un Testigo jong cu a ser ehecuta pasobra el a nenga di join e ehercito di Hitler. E carta cu el a skirbi pa su mama e anochi prome cu el a muri a mustra cuanto fe y confianza e tabatin den Jehova, y mi kier sigui su ehempel si acaso mi mester enfrenta un prueba asina.” [2]

18, 19. (a) Con e miembronan di bo congregacion por yuda bo keda neutral? (b) Kico bo ta determina pa haci?

18 Tambe bo por haya sosten di e rumannan di bo congregacion. Si na e momento aki bo ta enfrentando un situacion cu ta pone bo posicion neutral na prueba, laga e ancianonan sa esey y pidi nan conseho biblico. Otro miembronan di e congregacion tambe lo anima bo si nan sa di e pruebanan cu bo ta enfrentando. Pidi nan haci oracion pa bo. Claro cu si bo kier pa e rumannan sostene bo y resa pa bo, bo tambe tin cu haci mescos. (Mat. 7:12) E articulo riba jw.org “Testigos de Jehová presos por sus creencias (por países)” bou di PRENSA > ASUNTOS LEGALES por yuda bo ser specifico den bo oracionnan. E articulo aki ta contene un lista di Testigo cu na e momentonan aki ta encarcela pa motibo di nan fe. Scoge algun nomber y haci oracion pa nan por mantene nan integridad cu curashi.—Efe. 6:19, 20.

19 Segun cu gobiernonan humano ta yega na nan fin, nan lo presiona nos mas y mas pa nos no keda leal na Jehova y su Reino. Pues, ta awor nos tin cu fortalece nos determinacion pa keda neutral den un mundo dividi.

^ [1] (paragraf 1) Aki Hesus a uza Cesar, e gobernante humano di mas halto den e tempo ey, como simbolo di autoridad civil of estado.

^ [2] (paragraf 17) Wak Los testigos de Jehová, proclamadores del Reino de Dios, pag. 662, y e cuadro “El A Muri pa e Honor di Dios” den cap. 14 di e buki E Reino di Dios Ya Ta Goberna.