Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2016

Bo Ta Haci Bon Uzo di Bo Imaginacion?

Bo Ta Haci Bon Uzo di Bo Imaginacion?

KICO ta pisa apenas 1,4 kilo pero cu a ser describi como “e cos di mas complica cu nos a yega di descubri den universo”? Esey ta e celebro humano. E celebro ta algo sumamente asombroso. Y mas nos siña di dje, mas aprecio nos lo haya pa Jehova su obranan “maraviyoso.” (Sal. 139:14) Ban considera djis un di e tantisimo cosnan cu nos mente por haci: imagina.

Kico ta imaginacion? Un diccionario ta definie como “e capacidad cu bo tin pa forma imagen- of ideanan di cosnan cu ta nobo y emocionante, of cosnan cu bo no a experencia ainda.” Esey ta algo cu bo ta haci tur ora, no ta berdad? Por ehempel, bo a yega di lesa of tende di un luga cu nunca bo a yega di bay? Esey lo no a stroba bo di imagina con e luga ta. En realidad, cada biaha cu nos pensa riba algo cu nos no por mira, tende, purba, sinti of hole, nos ta uzando nos imaginacion.

Bijbel ta bisa cu Dios a diseña y crea hende den su imagen. (Gen. 1:26, 27) Pues, bo no ta kere cu, den un sentido, Jehova tambe tin un imaginacion? Ya cu el a crea nos cu e capacidad ey, ta logico cu e ta verwacht pa nos uz’e pa compronde kico ta su boluntad. (Ecl. 3:11) Con nos por uza nos imaginacion pa logra esey, y pa ki proposito nos no mester uz’e?

MAL UZO DI NOS IMAGINACION

(1) Laga bo mente drif bay na e momento robes of fantasia riba cos inapropia.

Soña lanta riba su mes no ta malo. En realidad, tin prueba cu ta mustra cu e por ta hasta beneficioso. Pero Eclesiastes 3:1 ta yuda nos compronde cu “tin un tempo stipula pa tur cos.” Pues, por sosode cu nos ta ocupa nos mes cu cierto actividad na e momento robes. Por ehempel, si nos ta laga nos mente drif bay durante reunion of estudio personal, nos imaginacion lo yuda nos of stroba nos? Hesus a duna un spiertamento serio tocante e peliger di pensa riba cos robes, manera fantasia inmoral. (Mat. 5:28) Jehova lo keda decepciona si nos permiti nos mes pensa riba cosnan cu e no ta gusta. Fantasia inmoral por pone nos comete inmoralidad. Sea determina pa nunca laga bo imaginacion aleha bo for di Jehova.

(2) Supone cu cos material por duna bo siguridad berdadero.

Cosnan material ta necesario y util. Pero nos lo keda desapunta si nos cuminsa pensa cu nan por duna nos felicidad y siguridad. E homber sabi Salomon a bisa: “E rikesa di un hende rico ta su stad fortifica, y manera muraya halto den su mes imaginacion.” (Prov. 18:11) Tuma por ehempel loke  a pasa na Manila, Filipinas. Na september 2009, awasero pisa a inunda mas cu 80 porciento di e stad. Acaso hende cu tabatin hopi cos material a scapa di e inundacion? Un homber rico cu a perde hopi propiedad a bisa: “E desaster aki a afecta tur hende; el a causa dificultad y sufrimento pa tanto rico como pober.” Ta facil pa imagina cu cos material por duna nos proteccion y siguridad. Pero esey ta leu di ta berdad.

(3) Preocupa cu cosnan cu kisas lo no sosode nunca.

Hesus a conseha nos pa no bira demasiado “ansha” pa futuro. (Mat. 6:34) Nos lo mester tin hopi imaginacion pa preocupa asina tanto. Facilmente nos por haya nos ta gasta hopi energia na preocupa tocante problemanan imaginario, esta, problemanan cu no ta existi ainda of cu lo no bin nunca. E Scritura ta indica cu e tipo di ansiedad ey por hiba na desanimacion y hasta depresion. (Prov. 12:25) Pues, ta masha importante pa aplica e conseho di Hesus pa no preocupa demasiado pa futuro y trata cu e problemanan di tur dia segun cu nan ta presenta.

BON UZO DI NOS IMAGINACION

(1) Mira un situacion peligroso di antemano y evit’e.

E Scritura ta anima nos pa nos ta prudente y pensa di antemano. (Prov. 22:3) Nos por uza nos imaginacion pa pensa riba e consecuencianan di un decision prome cu nos tum’e. Por ehempel, si bo a haya un invitacion pa bay un evento social, con bo imaginacion por yuda bo dicidi si bo mester bay of no? Despues di considera algun factor manera ken mas ta invita, cuanto hende ta invita y na unda y ki ora e evento lo tuma luga, puntra bo mes: Kico tin chens di sosode eynan? Bo ta kere cu lo bay tin un ambiente saludabel cu lo ta na harmonia cu principio di Bijbel? E preguntanan ey por yuda bo visualisa e evento. Ora bo uza bo imaginacion pa tuma bon decision, lo bo evita situacionnan cu por ta un peliger pa bo spiritualidad.

(2) Prepara bo mes mentalmente pa trata cu problema.

Imaginacion ta encera tambe e “capacidad pa confronta un problema y resolv’e.” Imagina cu bo ta haya bo cu un mal comprondemento cu un ruman den congregacion. Con lo bo acerca bo ruman pa purba di haci paz cu ne? Tin hopi factor pa tene cuenta cu ne. Con su manera di comunica ta? Na ki momento lo ta mas apropia pa papia tocante e  problema? Kico mi tin cu bisa y cu ki tono mi tin cu papia? Ora bo uza bo imaginacion, bo por pensa riba diferente manera pa trata cu e situacion y scoge esun cu bo ta sinti lo ta mas eficaz y cu lo cay den bon tera. (Prov. 15:28) Ora bo pensa bon con pa trata cu un situacion dificil, lo bo por promove paz den congregacion. Esey sigur ta un bon manera pa uza nos imaginacion.

(3) Duna bida na bo lesamento di Bijbel y estudio personal.

Ta esencial pa nos lesa Bijbel tur dia. Pero nos no mester djis lesa pa lesa. Nos mester compronde e lesnan practico cu tin den Bijbel y sinti nos motiva pa aplica nan den nos bida. Lesamento di Bijbel mester duna nos mas aprecio pa e camindanan di Jehova. Nos imaginacion por yuda den esaki. Con? Wel, tuma como ehempel e buki Imita Nan Fe. E relatonan den e buki ey ta stimula nos imaginacion y ta yuda nos visualisa e escenanan y circunstancianan cu cada un di e personahenan di Bijbel a haya nan mes aden. Den nos imaginacion nos ta mira e paisahenan, tende e zonidonan, hole e aromanan y purba di saca afo ki sintimento e homber- y muhernan fiel ey tabatin. Esey lo yuda nos saca lesnan maraviyoso y edificante for di e relatonan di Bijbel cu kisas nos a pensa cu nos tabata conoce bon caba. Ora nos uza nos imaginacion di e manera ey, nos lesamento di Bijbel y estudio personal ta haya mas bida.

(4) Mustra empatia.

Empatia ta un bunita cualidad cu ta encera cu nos curason ta sinti e dolor cu un otro persona ta sinti. Ya cu tanto Jehova como Hesus ta mustra empatia, ta bon pa nos imita nan. (Exo. 3:7; Sal. 72:13) Con nos por cultiva e cualidad aki? Un di e mihor maneranan pa haci esey ta ora nos ta uza nos imaginacion. Kisas nunca nos no a yega di experencia loke un cierto ruman ta pasando aden. Pero bo por puntra bo mes: Si ta ami ta den e situacion ey, con lo mi sinti mi? Kico lo mi tin mester di dje? Ora nos uza nos imaginacion pa contesta e preguntanan ey, nos lo por mustra mas empatia. En realidad, ora nos mustra empatia, nos ta mehora den tur aspecto di nos bida cristian, incluso nos sirbishi y nos relacion cu nos rumannan.

(5) Imagina con bida lo ta den e mundo nobo.

E Scritura ta describi na un manera masha real con bida lo ta den e mundo nobo cu Dios a priminti. (Isa. 35:5-7; 65:21-25; Rev. 21:3, 4) Den nos publicacionnan tin varios plachi bunita cu ta stimula nos imaginacion y yuda nos mira con nos lo bay disfruta di e bendicionnan cu Jehova a priminti nos. Jehova, e Creador di imaginacion, sa mihor cu cualkier hende cuanto poder nos imaginacion tin. Ora nos uza nos imaginacion pa medita riba su promesanan, nos ta haya mas confianza cu nan lo cumpli y nos lo keda fiel, hasta ora nos ta pasando den dificultad.

Jehova a demostra su amor ora el a duna nos e capacidad maraviyoso pa imagina cosnan. Esey por echt yuda nos sirbie mihor. Laga nos mustra Jehova cu nos ta aprecia e regalo aki y haci bon uzo di dje.