Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2016

Esnan Cu Tin Fe den Jehova Lo Haya Su Aprobacion

Esnan Cu Tin Fe den Jehova Lo Haya Su Aprobacion

“Imita esnan cu pa medio di fe y pasenshi ta ricibi loke Dios a priminti.”—HEB. 6:12.

CANTICA: 86, 54

1, 2. Ki reto Jefte y su yiu muher a enfrenta?

UN MUCHA muher hoben a core bay topa cu su tata. E tabata balia di alegria pasobra su tata a bolbe bek sano y salvo y a gana e bataya. Pero su tata si no a balia y canta hunto cu ne. Al contrario, e tata a sker su paña y a bis’e: “Ay, mi yiu! Bo a kibra mi curason.” E ora ey e tata a splic’e cu el a haci un promesa na Jehova cu lo cambia su bida pa semper. E promesa aki a nifica cu su yiu muher lo no por casa ni haya yiu. Pero con su yiu muher a reacciona? Mesora el a anima su tata pa cumpli cu e promesa cu el a haci na Jehova. Su reaccion a mustra cu e tabatin hopi fe. E tabatin confianza cu tur loke Jehova pidie ta pa su mes bon. (Hues. 11:34-37) Ora e tata a mira cuanto fe su yiu tabatin, el a sintie orguyoso di dje. E tabata sa cu e echo cu su yiu tabata dispuesto pa cumpli cu su promesa a haci Jehova hopi contento.

2 Jefte y su yiu muher tabatin pleno confianza den Jehova y den Su manera di haci cosnan. Y nan a demostra fe hasta  ora esey tabata dificil. Nan tabata kier a haya Jehova su aprobacion, y pesey nan tabata dispuesto pa haci cualkier sacrificio.

3. Dicon e ehempel di Jefte y su yiu muher por yuda nos?

3 Nos sa cu no ta tur ora ta facil pa sigui mustra fe den Jehova. Nos mester “lucha duro pa e fe.” (Judas 3) Pa yuda nos haci esey, laga nos trata e retonan cu Jefte y su yiu muher a enfrenta cu exito. Kico a yuda nan pa sigui mustra fe den Jehova?

SIGUI MUSTRA FE A PESAR DI MAL INFLUENCIA

4, 5. (a) Ki mandato Jehova a duna e Israelitanan ora nan a drenta e Tera Priminti? (b) Segun Salmo 106, kico a pasa cu e Israelitanan pa motibo di nan desobediencia?

4 Tur dia, Jefte y su yiu muher por a mira kico tabata e consecuencianan di desobediencia. Casi 300 aña prome, Jehova a manda e Israelitanan pa caba cu tur adorador di dios falso cu tabata biba den e Tera Priminti. (Deu. 7:1-4) Pero e Israelitanan no a obedece Jehova. Y como consecuencia, nan a cuminsa imita e Cananeonan, kendenan tabata adora dios falso y hiba un bida inmoral.—Lesa Salmo 106:34-39.

5 Como cu e Israelitanan a desobedece Jehova, nan a perde su aprobacion y e no a proteha nan mas for di nan enemigonan. (Hues. 2:1-3, 11-15; Sal. 106:40-43) Lo tabata hopi duro pa e famianan cu a stima Jehova keda fiel durante e añanan dificil ey. Sinembargo, Bijbel ta bisa cu toch tabatin hende cu a keda fiel na Jehova, manera entre otro, Jefte cu su yiu muher, y tambe Elcana, Ana y Samuel. Nan tabata determina pa haya Dios su aprobacion.—1 Sam. 1:20-28; 2:26.

6. Ki mal influencia nos ta enfrenta tur dia, pero kico nos mester haci?

6 Den nos tempo, hende ta pensa y actua mescos cu e Cananeonan. Nan bida ta draai rond di sex, violencia, placa y cos material. Mescos cu Jehova a spierta e Israelitanan contra e mal influencianan ey, e ta spierta nos tambe pasobra e kier proteha nos. Acaso nos lo siña for di nan eror? (1 Cor. 10:6-11) Nos mester haci tur nos esfuerso pa evita e mundo su manera di pensa. (Rom. 12:2) Abo ta haciendo tur bo esfuerso pa evita esey?

SIGUI MUSTRA FE A PESAR DI DECEPCION

7. (a) Kico Jefte su mesun hendenan a haci cu ne? (b) Con Jefte a reacciona?

7 Den tempo di Jefte, Jehova a permiti e Filisteonan y e Amonitanan pa oprimi e Israelitanan pasobra nan a desobedec’e. (Hues. 10:7, 8) Pero e pruebanan cu Jefte a pasa aden no a bin solamente di e nacionnan ey sino tambe di su mes rumannan y e lidernan di Israel. Como cu su mitar rumannan tabata jaloers riba dje y tabata odi’e, nan a kita e tereno cu legalmente tabata pertenece na dje y a oblig’e pa sali for di su cas. (Hues. 11:1-3) Pero a pesar cu el a ser trata na un manera cruel, Jefte no a laga esaki afecta su actitud. Con nos por sa esey? Pasobra ora e ancianonan di e nacion a rog’e pa yuda nan, el a haci esey di biaha. (Hues. 11:4-11) Kico por a motiva Jefte pa reacciona di e manera ey?

8, 9. (a) Ki principionan den e Ley di Moises a yuda Jefte? (b) Kico tabata e cos di mas importante pa Jefte?

8 Jefte tabata un guerero yen di curashi. Ademas, e tabata conoce e historia di Israel y e Ley di Moises hopi bon.  E manera cu Jehova a trata su pueblo a siña Jefte kico ta bon y kico ta malo. (Hues. 11:12-27) Y ora e mester a tuma decision, el a haci bon uzo di e conocemento ey. Jefte tabata sa cu Jehova no tabata kier pa su sirbidornan carga rencor contra otro. Mas bien, Jehova tabata kier pa nan stima otro. Ademas, e Ley a siña Jefte con pa trata otro hende, hasta esnan cu tabata odi’e.—Lesa Exodo 23:5; Levitico 19:17, 18.

9 Probablemente e ehempel di Jozef tambe a yuda Jefte. Dicon? Pasobra Jozef a mustra misericordia na su rumannan maske “nan a odi’e.” (Gen. 37:4; 45:4, 5) Ora Jefte a medita riba ehempelnan asina, esey por a yud’e reacciona na un manera cu ta agrada Jehova. Sin duda e conducta di su rumannan a hurt e masha hopi mes, pero toch e no a stop di sirbi Jehova y Su pueblo. (Hues. 11:9) Pa Jefte, defende e nomber di Jehova tabata mas importante cu su propio sintimentonan. E tabata determina pa keda fiel na Jehova. Y como resultado, Jehova a bendiciona tanto Jefte como e pueblo.—Heb. 11:32, 33.

10. Con Bijbel por yuda nos ora un ruman trata nos malo of decepciona nos?

10 Kico nos lo haci si un ruman trata nos malo of decepciona nos? Lo ta bon pa nos sigui e ehempel di Jefte y obedece Jehova. Nunca nos mester laga nos sintimentonan stroba nos di bay nos reunionnan y pasa tempo cu nos rumannan di congregacion. Si nos imita e ehempel di Jefte, esey lo por yuda nos enfrenta situacionnan dificil cu exito y yuda nos pa nos tambe por ta un bon ehempel.—Rom. 12:20, 21; Col. 3:13.

E SACRIFICIONAN CU NOS TA HACI TA MUSTRA CON GRANDI NOS FE TA

11, 12. Ki promesa Jefte a haci, y kico e tabata kiermen?

11 Jefte a realisa cu e tabatin mester di Dios su yudansa pa libera e pueblo di Israel for di e Amonitanan. Pesey el a priminti cu si Jehova lag’e gana e bataya, e lo ofrece Jehova e prome hende cu sali for di su cas ora e bolbe bek for di bataya. Jefte a bisa cu e lo ofrece e persona aki como “un ofrenda kima.” (Hues. 11:30, 31) Pero ta kico Jefte tabata kiermen?

12 Jefte no tabata kiermen cu e tabata bay mata e prome persona cu sali for di su cas. Dicon nos sa esey? Pasobra e tabata sa cu Jehova ta odia sacrificio di hende. (Deu. 18:9, 10) Segun e Ley di Moises, un ofrenda kima tabata un regalo special cu un hende tabata duna completamente na Jehova. Pues, loke Jefte tabata kiermen ta cu e persona cu e entrega na Jehova lo sirbi na e tabernakel pa resto di su bida. Jehova a acepta Jefte su sacrificio grandi y a yud’e gana e bataya. (Hues. 11:32, 33) Pero ken tabata e persona cu el a duna como “un ofrenda kima”?

13, 14. Kico e palabranan na Huesnan 11:35 ta siña nos tocante Jefte su fe?

13 Bo ta corda e escena cu nos a menciona na principio di e articulo aki? Ken ta e prome hende cu a bin topa cu Jefte ora el a yega for di bataya? Su unico yiu stima. Acaso Jefte a cumpli cu su promesa? El a entrega su yiu muher na Jehova pa sirbi na e tabernakel pa resto di su bida?

14 Un biaha mas, Dios su principionan siguramente lo a yuda Jefte pa haci loke ta corecto. Kisas el a corda riba  Exodo 23:19 cu ta bisa cu e pueblo di Dios mester a duna lo mihor na Jehova. Ademas, e Ley a bisa cu ora un hende haci un promesa, e mester cumpli cu ne. E Ley a bisa tambe cu “ora cu un homber haci un promesa na SEÑOR, ... e no mester kibra su palabra; e mester haci conforme tur loke sali for di su boca.” (Num. 30:2) Ana y Jefte a biba den e mesun tempo. Y mescos cu Ana, Jefte tambe mester a cumpli cu su promesa maske e tabata sa kico esey lo a nifica pa su yiu muher y pa su mes. Como cu su yiu muher mester a sirbi na e tabernakel, nunca e lo no haya yiu. Pues, no tabatin niun hende cu por a carga Jefte su fam ni haya su herencia. (Hues. 11:34) A pesar di tur esey, Jefte a bisa: “Mi a duna SEÑOR mi palabra, y mi no por hala esaki atras.” (Hues. 11:35) Jehova a acepta e sacrificio grandi cu Jefte a haci y a bendicion’e. Abo lo a tuma e mesun decision?

15. Ki promesa mayoria di nos a haci, y con nos por demostra cu nos tin fe?

15 Ora nos a dedica nos bida na Jehova, nos a priminti cu nos lo sirbie pase loke pase. Nos tabata sa cu lo no ta facil pa nos cumpli cu e promesa cu nos a haci. Pero awor kico nos lo haci si nos ser pidi pa haci algo cu nos no ta gusta? Un cos ta sigur, si nos vence nos temornan y obedece Jehova di buena gana, nos lo demostra cu nos tin fe. Ta berdad cu e sacrificionan cu nos ta haci kisas por causa dolor, pero e bendicionnan di Jehova lo ta hopi mas grandi. (Mal. 3:10) Pero kico di e yiu muher di Jefte? Con el a reacciona ora el a haya sa kico su tata a priminti Jehova?

Con nos por imita e fe di Jefte y su yiu muher? (Wak paragraf 16, 17)

16. Con e yiu muher di Jefte a reacciona ora el a haya sa kico su tata a priminti Jehova? (Wak e prome plachi.)

16 Probablemente lo no tabata facil pa e yiu muher di Jefte cumpli cu e promesa cu su tata a haci. Jefte su promesa no  tabata mescos cu e promesa di Ana. Ana a entrega su yiu Samuel pa sirbi den tabernakel como nazareo. (1 Sam. 1:11) Un nazareo por a casa y haya yiu. Pero Jefte a ofrece su yiu muher como un “ofrenda kima”, esey kiermen cu e lo no por a experencia e goso di bira un esposa ni mama. (Hues. 11:37-40) Pensa un rato riba lo siguiente: Como yiu di un lider di Israel, probablemente e lo por a casa cu e mihor yoncuman di e pais. Pero en bes di esey, el a sirbi humildemente na e tabernakel. El a demostra cu Jehova su sirbishi ta na prome luga den su bida, pasobra el a bisa su tata: “Bo a duna SEÑOR bo palabra; haci cu mi manera bo a bisa.” (Hues. 11:36) El a pone su deseo pa casa y haya yiu un banda pa e por a sirbi Jehova. Con nos por imita su spirito di sacrificio propio?

17. (a) Con nos por imita e fe di Jefte y su yiu muher? (b) Dicon e palabranan di Hebreonan 6:10 pa 12 ta anima nos pa haci sacrificio pa Jehova?

17 Miles di hoben cristian tambe ta dispuesto pa keda sin casa y haya yiu, por lo menos pa aworaki. Dicon? Pasobra nan kier dedica nan mes completamente na Jehova su sirbishi. Tin rumannan di edad cu tambe ta sacrifica e tempo cu nan por a pasa cu nan yiunan y nan nietonan pa nan por traha riba proyectonan di construccion of asisti na e Scol pa Predicador di Reino y sirbi den teritorionan caminda tin necesidad di mas publicador. Tin otronan cu ta laga asuntonan personal un banda pa nan por haci mas den sirbishi durante e temporada di Conmemoracion. Jehova nunca lo lubida tur e sacrificio cu nan ta haci p’e y e amor cu nan ta mustr’e. (Lesa Hebreonan 6:10-12.) Kico di abo? Lo bo por haci mas sacrificio pa sirbi Jehova?

KI LESNAN NOS A SIÑA?

18, 19. Kico nos a siña for di Jefte y su yiu muher, y con nos por imita nan?

18 Aunke cu Jefte su bida tabata yen di reto, el a laga Jehova su pensamento gui’e ora e mester a tuma decision. E no a laga hende rond di dje influenci’e. Y ora otro hende a decepcion’e, e no a laga esey debilita su fe. Como cu Jefte y su yiu muher tabata dispuesto pa haci sacrificio, Jehova a bendiciona nan. Y el a duna nan e privilegio pa promove adoracion berdadero. Anto hasta ora otro sirbidornan di Jehova a stop di haci loke ta bon, Jefte y su yiu muher a keda fiel na Jehova.

19 Bijbel ta bisa cu nos mester “imita esnan cu pa medio di fe y pasenshi ta ricibi loke Dios a priminti.” (Heb. 6:12) Pues, laga nos imita Jefte y su yiu muher, pasobra manera nos a siña: Esnan cu tin fe den Jehova lo haya su aprobacion.