Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2016

 STORIA DI BIDA

Algun Soeur Cu A Bira Berdadero Ruman Spiritual

Algun Soeur Cu A Bira Berdadero Ruman Spiritual

“NO PAPIA cu mi! Mi n’ kier tende nada mas di bo religion. Bo ta cansa mi. Mi ta odia bo.” Asina Araceli, mi ruman muher mas chikito cu mi, a grita mi. Te awe, cu mi 91 aña di edad, ainda mi ta corda cuanto e palabranan ey a hurt mi. Pero Eclesiastes 7:8 ta bisa: “Fin di un asunto ta mihor cu su principio.” Y esey ta conta den nos caso tambe.—Felisa.

Felisa: Nos famia tabata masha devoto. En realidad, 13 miembro di nos famia tabata pastoor of miembro di clero catolico. Papa Juan Pablo II a hasta declara primo di mi mama como santo. E primo aki tabata un pastoor cu a duna les na scol catolico. Nos famia tabata pober. Mi tata tabata un plate (smid) y mi mama tabata traha den cunucu. Nos ta ocho ruman y ami ta esun mayo.

Tempo mi tabatin 12 aña, un guera civil a cuminsa na Spaña. Despues di guera, mi tata a bay cera pasobra gobierno no tabata gusta su ideanan liberal. Mi mama tabatin cu traha duro pa pone pan riba mesa, pesey un amiga di dje a sugerie pa manda mi tres ruman muhernan mas chikito, Araceli, Lauri y Ramoni, na un convento na Bilbao, Spaña. Sikiera asina nan lo no a muri di hamber.

Araceli: Nos tabatin solamente 14, 12 y 10 aña di edad e tempo ey y tabata masha dificil pa bay laga nos famia. Na Bilbao, nos tabata haci trabou di limpieza. Dos aña despues, e soeurnan a manda nos na un convento grandi na Zaragoza, caminda nan tabata cuida hende grandi. Eynan, nos mester a limpia e cushina y nos tabata keda morto cansa.

Felisa: Tempo mi ruman muhernan a bay Zaragoza, mi mama y un pastoor local, kende tabata mi omo, a dicidi cu mi mester a bay traha na e mesun convento. Nan a pensa cu esey lo a yuda mi keda leu for di un yoncuman cu tabata interesa den mi. Ya cu mi tabata un mucha muher masha religioso, m’a gusta e idea di keda na un convento pa un tempo. Mi tabata bay misa tur dia, y  na un dado momento, m’a hasta pensa di bira un misionero manera mi primo cu tabata un frère na Africa.

Convento na Zaragoza, Spaña (na man robes) Traduccion di Bijbel Nácar-Colunga (na man drechi)

E soeurnan no a haci nada pa motiva mi pa sirbi Dios na otro pais, y mi a sinti comosifuera mi ta den prizon. Un aña despues, mi a dicidi di bay cas bek pa cuida mi omo cu tabata pastoor. Mi tabata haci trabou di cas y tur anochi mi tabata resa rosario cu ne. Tambe mi tabata gusta drecha e areglonan floral den misa y pone adorno riba imagen di e birgen y di e “santonan.”

Araceli: Mientrastanto, nos bida na e convento a cambia. Despues cu mi a haci mi prome voto, e soeurnan a dicidi di separa nos. Ramoni a keda na Zaragoza, Lauri a bay Valencia y ami a bay Madrid, caminda mi a renoba mi voto. Eynan tabatin masha hopi trabou pa haci pasobra e convento a aloha studiante, hende grandi y otro bishitantenan. Ami mester a traha den hospital di e convento.

Francamente bisa, mi a verwacht cu e bida di un soeur lo a duna mi mas satisfaccion. Mi tabatin gana di lesa Bijbel y comprond’e. Pero niun hende no tabata papia di Dios of Hesus, y nos no tabata uza Bijbel. Mi tabata djis siña un tiki Latin, studia bida di e “santonan” y venera Maria. Fuera di esey, ta trabou duro so nos tabata haci.

M’a cuminsa sinti ansiedad, y pesey m’a bay papia cu e madre superiora. M’a bis’e cu no tabatin sentido pa mi traha asina duro pa otronan por yena nan saco mientras cu mi famia mes tabatin mester di mi yudansa. El a cera mi den un cel y a pensa cu esey lo a pone mi cambia di idea pa mi keda den e convento.

Na tres ocasion, e soeurnan a saca mi for di e cel djis pa wak si mi kier a bay ainda. Como cu mi tabata determina pa bay, nan a bisa mi pa skirbi lo siguiente: “Mi ta bay pasobra mi ta prefera di sirbi Satanas en bes di Dios.” Esey a shock mi, pero maske mi tabata desespera pa sali for di e convento, mi no por a skirbi e palabranan ey. Finalmente, m’a pidi si mi por a papia cu un otro persona tocante mi sintimentonan, y m’a cont’e kico a pasa. El a haci areglo pa e obispado manda mi na e convento caminda mi tabata anteriormente, esta, na Zaragoza. Despues di a pasa algun luna eynan, mi a haya permit pa sali. Un poco despues, Lauri y Ramoni tambe a sali for di convento.

UN BUKI “PROHIBI” A DIVIDI NOS

Felisa

Felisa: Cu tempo, mi a casa y a muda bay Cantabria. M’a sigui bay misa regularmente, pero riba un diadomingo mi a tende un anuncio sorprendente for di preekstoel. Bon rabia e pastoor a grita:  “Wak e buki aki!” Anto el a mustra nos e buki E berdad cu ta hiba na bida eterna. El a agrega: “Si un hende a duna bo e buki aki, trec’e pa mi of tir’e afo.”

Mi n’ tabatin e buki ey, pero mi tabata kier un mesora. Pa colmo, un par di dia despues dos Testigo a bati na mi porta y a ofrece mi e buki “prohibi.” E mesun anochi ey m’a les’e, y ora nan a bin bek, m’a acepta un estudio di Bijbel.

E buki “prohibi”

E berdad di biaha a touch mi curason, y mi a haya un amor profundo pa Jehova y celo pa su sirbishi. Mi a batisa na 1973. Aunke mi no tabatin hopi oportunidad pa comparti e berdad cu mi famia, m’a probecha si di tur chens cu mi a haya. Manera mi a menciona na comienso, nan a opone mi creencianan fuertemente, vooral mi ruman Araceli.

Araceli: E mal experencianan cu mi a pasa aden ora mi tabata den e convento a haci mi un persona amarga. Pero toch m’a sigui bay misa riba diadomingo y resa rosario tur dia. Ainda mi tabatin masha gana di compronde Bijbel, y m’a pidi Dios yuda mi cu esey. Pero ora mi ruman Felisa a papia cu mi tocante su creencianan nobo, e tabata zona asina entusiasma cu m’a pensa cu e tabata un fanatico. Mi n’ tabata niun tiki di acuerdo cu ne.

Araceli

Despues di algun aña, mi a regresa Madrid pa trabou, y mi a casa. Cu tempo, cierto cos a cuminsa molestia mi. M’a ripara cu hende cu tabata bay misa regularmente no tabata aplica e siñansa di e Evangelionan. Pesey, m’a stop di bay misa y stop di kere den “santo”, den confesion y den fierno di candela. Y m’a hasta deshaci di tur imagen cu mi tabatin. Pero mi n’ tabata sigur si mi a haci loke ta corecto. Mi tabata decepciona, pero a pesar di esey, m’a sigui pidi Dios: “Mi kier conoce bo. Yuda mi.” Mi ta corda cu testigonan di Jehova a bati na mi porta na varios ocasion, pero nunca m’a habri porta pa nan. Mi no tabata confia niun religion.

Na comienso di e decada di 1980, mi ruman Lauri, cu tabata biba na Francia, y Ramoni, cu tabata biba na Spaña, a cuminsa studia Bijbel cu e Testigonan. M’a pensa cu nan a ser engaña mescos  cu Felisa. Despues, mi a conoce Angelines, un bisiña cu a bira un bon amiga di mi. E tambe tabata un testigo di Jehova, y bes tras bes, e cu su esposo tabata ofrece mi un estudio di Bijbel. Nan a realisa cu maske mi a bisa cu mi no ta kere den niun religion, mi tabatin sed pa e berdad. Un dia mi a bisa nan: “Okay, ta bon. Mi ta studia Bijbel cu boso pero solamente si mi por uza mi mes Bijbel.” Mi tabata referi na e traduccion di Bijbel Nácar-Colunga.

BIJBEL A UNI NOS

Felisa: Tempo cu mi a batisa na 1973, tabatin mas o menos 70 Testigo den e stad di Santander, capital di e provincia di Cantabria, Spaña. Nos teritorio tabata inmenso. Pues, nos tabata biaha den bus pa nos por a predica den henter e provincia, y despues nos tabata biaha cu auto tambe. Nos tabata bay di pueblito pa pueblito te ora nos a bishita tur e pueblitonan den e region ey.

A traves di aña, mi tabatin e privilegio di dirigi hopi estudio di Bijbel, y 11 di mi studiantenan a batisa. Mayoria di nan tabata catolico, pero como cu un tempo mi mes tabata un catolico devoto, mi tabata sa cu mi mester a compronde pa nan y tene pasenshi cu nan. M’a realisa cu nan tabatin mester di tempo pa laga creencianan cu nan tabata hopi pega na dje un banda. Mi a realisa tambe cu Bijbel y Jehova su spirito santo mester a touch nan curason pa nan por a mira e berdad. (Heb. 4:12) Bienvenido, mi esposo cu tabata polis, a batisa na 1979, y mi mama a cuminsa studia Bijbel un poco tempo prome cu el a fayece.

Araceli: Ora m’a cuminsa studia Bijbel cu e Testigonan, mi no tabata confia nan. Pero segun simannan tabata pasa, m’a ripara cu mi no tabata sinti asina mas. Loke mas a impresiona mi di e Testigonan ta cu nan ta practica loke nan ta predica. Mi fe den Jehova y den Bijbel a cuminsa crece, y mi a cuminsa sinti mi mas feliz. Hasta algun bisiña a bisa mi: “Araceli, sigui riba e caminda cu bo a scoge.”

Mi ta corda con mi a bisa Jehova: “Danki cu bo no a mira mi como un caso perdi y cu bo a duna mi asina tanto oportunidad pa haya loke mi tabata busca, esta, e berdadero conocemento di Bijbel.” M’a pidi mi ruman Felisa pa pordona mi pa mi palabranan cu a hurt e. Na luga di discuti cu otro, nos ta papia riba topiconan interesante di Bijbel. Mi a batisa na 1989 cu 61 aña di edad.

Felisa: Awor cu mi tin 91 aña, mi ta viuda y no tin e forsa cu mi tabatin antes. Pero mi ta lesa Bijbel tur dia, asisti na reunion ora e curpa ta duna y predica mas tanto cu mi por.

Araceli: Mi ta gusta predica na tur pastoor y soeur cu mi topa den sirbishi kisas pasobra antes mi mes tabata un soeur. M’a yega di laga hopi publicacion cu nan y tabatin e placer di tin varios combersacion interesante cu nan. Despues cu mi a bishita un pastoor varios biaha, el a bisa mi: “Araceli, mi ta duna bo tur rason, pero kico mi por haci na e edad aki? Kico mi parokianonan y famia lo bisa?” M’a responde: “Y kico Dios lo bisa?” El a sintie tristo; pero na e momento ey, e no tabatin e curashi pa sigui busca pa sa mas tocante e berdad.

Mi ta corda un momento special den mi bida. Esey tabata e prome biaha cu mi esposo a bisa mi cu e kier a bay reunion cu mi. E tabatin mas cu 80 aña di edad ora el a bay su prome reunion. Despues di esey, nunca mas el a falta reunion. El a studia Bijbel y a bira un publicador no-batisa. Mi tin grato recuerdo di tempo nos tabata bay hunto den sirbishi. El a fayece dos luna prome cu su bautismo.

Felisa: Un di e gosonan di mas grandi den mi bida ta cu mi por a mira mi tres ruman muhernan, kendenan un tempo tabata opone mi, bira mi rumannan spiritual. Nos a pasa momentonan masha dushi hunto papiando tocante nos Dios stima, Jehova, y su Palabra. Porfin ami cu mi rumannan ta adora Jehova hunto. *

^ par. 29 Araceli, di 87 aña, Felisa, di 91 aña y Ramoni, di 83 aña, ta sigui sirbi Jehova yen di celo te awe. Lauri a fayece na 1990 y a keda fiel na Jehova.