Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 13

Predicadornan di Reino Ta Bay Corte

Predicadornan di Reino Ta Bay Corte

ENFOKE DI E CAPITULO

Autoridadnan ta purba di stop e trabou di predica, manera Hesus a profetisa

1, 2. (a) Kico e lidernan religioso a logra haci cu e trabou di predica, pero con e apostelnan a reacciona? (b) Dicon e apostelnan no a stop di predica?

TABATA algun siman despues di Pentecoste di aña 33, y e congregacion cristian na Jerusalem a caba di ser forma. Pa Satanas, esaki tabata net un bon momento pa ataca e congregacion y purba di caba cu ne prome cu e bira fuerte. Rapidamente, Satanas a manipula e asunto di tal manera cu e lidernan religioso a prohibi e trabou di predica e Reino. Pero e apostelnan a sigui predica cu curashi, y gruponan grandi di tanto homber como muher a bira “creyentenan den Señor.”—Echo. 4:18, 33; 5:14.

E apostelnan a keda masha contento “pasobra Dios a considera nan digno di ser deshonra pa causa di Hesus su nomber”

2 Furioso, e opositornan a bolbe ataca. E biaha aki nan a encarcela tur e apostelnan. Pero durante anochi, un angel di Jehova a habri e portanan di prizon. Ora dia a habri, ya e apostelnan tabata den tempel ta predica atrobe. Nan a bolbe aresta nan y hiba nan dilanti di e gobernantenan, kendenan a acusa e apostelnan di ignora e ley cu a prohibi nan di predica. Con e apostelnan a reacciona? Cu curashi nan a declara: “Nos tin cu obedece Dios na prome luga, y no hende.” E gobernantenan a bira asina furioso cu nan “kier a mata e apostelnan.” Pero net na e momento critico ey, Gamaliel, un maestro di Ley masha respeta, a sali na defensa di e apostelnan y a spierta e gobernantenan: “Tene cuidou ... No mete cu e hendenan aki, ma laga nan na paz.” Sorprendentemente, e gobernantenan a tuma su conseho y a laga e apostelnan bay. Kico e hombernan fiel aki a haci e ora ey? Sin miedo, “nan a sigui siña hende y declara e bon noticia tocante Hesus, cu ta e Cristo.”—Echo. 5:17-21, 27-42; Prov. 21:1, 30.

3, 4. (a) Ki metodo, cu pa hopi tempo tabata masha efectivo, Satanas a uza pa ataca e pueblo di Dios? (b) Kico nos lo considera den e capitulo aki y e dosnan cu ta sigui?

3 E caso den corte ey na aña 33 tabata e prome biaha cu gobierno a opone e congregacion cristian, pero sigur no e ultimo. (Echo. 4:5-8; 16:20; 17:6, 7) Te awe, Satanas a sigui manipula esnan cu ta opone adoracion berdadero pa instiga autoridadnan pa prohibi nos trabou di predica. Opositornan a lanta tur tipo di acusacion contra e pueblo di Dios. Un di nan ta cu nos ta stroba ordo publico, es decir, cu nos ta causa problema. Un otro acusacion ta cu nos ta instiga rebelion contra gobierno, y tambe nan ta bisa cu nos ta cana bende buki. Na e momentonan apropia, nos rumannan a bay corte pa proba cu e acusacionnan ey ta falso. Kico tabata e resultado di e casonan aki? Kico veredictonan  di corte di decadanan pasa tin di haber cu abo personalmente? Laga nos analisa algun caso cu a bay dilanti di corte pa wak con nan a yuda “defende e bon noticia y establece e derecho legal di predic’e.”—Flp. 1:7.

4 Den e capitulo aki nos lo concentra riba e manera cu nos a defende nos derecho di libertad di predica. Anto den e dos capitulonan cu ta sigui, nos lo analisa algun di e batayanan legal cu nos a hiba den corte pa nos keda separa for di e mundo aki y pa biba segun e normanan di Reino.

Hende Cu Ta Causa Problema of Defensor Leal di e Reino di Dios?

5. Na final di decada di 1930, dicon polis tabata aresta predicadornan di Reino, y kico e rumannan cu tabata dirigi e organisacion tabatin pensa di haci?

5 Na final di decada di 1930, stadnan y estadonan rond Merca a purba di obliga testigonan di Jehova pa busca un permiso legal pa nan por predica e bon noticia publicamente. Pero nos rumannan no a bay busca un permiso, ya cu un permiso por ser kita. Ademas, e rumannan tabata di opinion cu gobierno no tin e autoridad di stroba nan di cumpli cu e mandato cu Hesus a duna cristiannan pa predica e mensahe di Reino. (Mar. 13:10) Pues, como resultado autoridadnan a aresta cientos di predicador di Reino. Esey a pone cu e rumannan cu tabata dirigi e organisacion a cuminsa pensa di bay corte. Nan kier a demostra cu e decision cu gobierno a tuma pa stroba testigonan di Jehova di practica nan religion libremente tabata ilegal. Anto un incidente cu a tuma luga na 1938 a hiba na un caso historico den corte. Kico a pasa?

6, 7. Kico a pasa cu famia Cantwell?

6 Diamars mainta 26 di april 1938, Newton Cantwell (di 60 aña), hunto cu su casa Esther y nan yiu hombernan, Henry, Russell y Jesse, a bay e stad New Haven, na Connecticut, pa pasa e dia ey den e trabou di predica. Nan tur cinco tabata pionero special, y en realidad nan tabata prepara pa keda mas cu un dia for di cas. Dicon? Polis a yega di aresta famia Cantwell na diferente ocasion, pues nan tabata sa cu polis lo por a bolbe aresta nan. Pero esey no a desanima nan di predica e mensahe di Reino. Nan a yega New Haven den dos auto. Newton a core e auto di famia, cu tabata yen di literatura biblico y tocadisco portatil, mientras cu Henry (di 22 aña) a core un auto cu loudspeaker. Anto manera nan a pensa, despues di un par di ora polis a para nan.

7 Prome, nan a aresta Russell (di 18 aña), despues Newton cu Esther. Di leu, Jesse (di 16 aña) a mira polis bay cu su mayornan y cu su ruman homber. Y Henry tabata predicando na un otro parti di e stad, pues Jesse a keda su so. Asina mes, el a coy su tocadisco y a sigui predica. Dos homber catolico a laga Jesse toca un disco cu un discurso di Ruman Rutherford titula “Enemigo.” Pero mientras cu e hombernan tabata scucha e discurso, nan a  rabia asina hopi cu nan kier a dal Jesse. Jesse a keda calmo y a cana bay, pero despues di un rato un polis a para Jesse, y e tambe a bay cera. Polis no a acusa Ruman Esther Cantwell, pero Ruman Newton cu su dos yiunan si. Pero riba e mesun dia ey, nan a laga nan den libertad bou fianza.

8. Dicon Corte a haya Jesse Cantwell culpabel di stroba ordo publico?

8 Un par di luna despues, na september 1938, famia Cantwell a presenta dilanti di Corte di Prome Instancia di New Haven. Newton, Russell y Jesse a keda condena pasobra nan a cana pidi donacion sin un permiso y tambe a bay contra ordo publico, es decir, a causa problema. Nan a apela na Corte Supremo di Connecticut, y Corte a absolve Newton y Russell di e acusacion di a bay contra ordo publico pero Jesse si nan a haya culpabel. Dicon? Pasobra e dos hombernan catolico cu a scucha e grabacion a testifica den corte cu e discurso a insulta nan religion y a pone nan rabia. E rumannan responsabel den nos organisacion a apela e sentencia na Corte Supremo di Merca, e corte mas halto di e pais.

9, 10. (a) Kico tabata e veredicto di Corte Supremo di Merca den e caso di famia Cantwell? (b) Con nos ta beneficia di e veredicto ey te awe?

9 Cuminsando 29 di maart 1940, Presidente di Corte Supremo, Charles E. Hughes, hunto cu ocho hues a scucha e argumentonan presenta pa Ruman Hayden Covington, un abogado di testigonan di Jehova. * Ora e fiscal di Estado di Connecticut a presenta su argumentonan den un intento pa proba cu testigonan di Jehova tabata causa problema, un di e huesnan a puntr’e:  “No ta asina cu e mensahe cu Cristo Hesus a predica tabata impopular den su tempo?” E fiscal a contest’e: “Ta berdad, y si mi no ta ekiboca, Bijbel ta bisa tambe kico a pasa cu Hesus pa motibo cu el a predica e mensahe ey.” Cu e palabranan ey el a bisa tur cos. Sin cu e fiscal a ripara, el a relaciona testigonan di Jehova cu Hesus, anto Estado cu esnan cu a condena Hesus. Dia 20 di mei 1940, Corte Supremo unanimamente a dicta fayo na fabor di testigonan di Jehova.

Hayden Covington (prome rij, meymey) y Glen How (banda robes), hunto cu algun ruman, saliendo for di sala di corte despues di un victoria legal

10 Dicon e veredicto ey di Corte tabata importante? Wel, e veredicto a proteha hende su derecho di practica nan religion di tal manera cu ningun gobierno, ni na nivel federal, ni na nivel di estado y ni na nivel local no por a uza medionan legal pa kita libertad di religion. Ademas, Corte a haya cu e comportacion di Jesse “no a forma niun ... menasa pa paz y ordo publico.” Pues, e veredicto a mustra bon cla cu testigonan di Jehova no ta bay contra ordo publico. Esta un tremendo victoria legal pa e sirbidornan di Dios! Con nos ta beneficia di esey te awe? Un abogado cu ta testigo di Jehova a bisa: “E derecho di practica nos religion libremente, sin miedo di restriccionnan inhusto, ta permiti cu awendia nos, como testigo di Jehova, por comparti e mensahe di speransa cu otro hende den nos comunidad.”

Instigador di Rebelion Contra Gobierno of Predicador di e Berdad?

E tratado cu nan a distribui na Canada

11. Ki campaña nos rumannan na Canada a tene, y dicon?

11 Den decada di 1940, testigonan di Jehova na Canada a confronta oposicion feroz. Pesey, na 1946, nos rumannan a tene un campaña di 16 dia pa informa publico tocante e falta di respet cu Estado a mustra pa e derecho di libertad di religion cu hende tin. Durante e periodo ey, e rumannan a parti un tratado titula Quebec’s Burning Hate for God and Christ and Freedom Is the Shame of All Canada. E tratado aki di cuater pagina a denuncia den un manera detaya e casonan di disturbio di ordo publico instiga pa clero, abuso policial y atake di multitudnan violento cu tabata tuma luga contra nos rumannan den e provincia di Quebec. E tratado a bisa: “Arestonan ilegal di testigonan di Jehova ta sigui. Tin mas o menos 800 acusacion contra testigonan di Jehova na Montreal y su bisindario.”

12. (a) Con opositornan a reacciona riba e campaña cu e tratado? (b) Nos rumannan a ser acusa di ki crimen? (Wak tambe e nota.)

12 Con Prome Minister di Quebec, Maurice Duplessis, den estrecho cooperacion cu cardinal Catolico Romano Villeneuve, a reacciona riba e informacion di e tratado? Wel, el a declara un “guera sin piedad” contra testigonan di Jehova. E cantidad di caso contra nos a bira dobel, el a aumenta di 800 te na 1.600 caso. Un ruman muher pionero a bisa: “Polis a aresta nos asina tanto biaha cu nos a perde conteo.” Di ki crimen nan a acusa e Testigonan cu tabata distribui e tratado? Nan a ser acusa di “instiga rebelion contra gobierno.” *

13. Ken tabata e promenan cu autoridadnan a acusa di ta instiga rebelion contra gobierno, y kico tabata e veredicto di corte?

 13 Na 1947, Aimé Boucher, un ruman homber, cu su yiu muhernan Gisèle (di 18 aña) y Lucille (di 11 aña) tabata e prome Testigonan cu a ser acusa di a instiga rebelion contra gobierno. Nan a parti e tratado Quebec’s Burning Hate den e area pega cu nan cunucu, den e seronan pazuid di Ciudad Quebec. Pero e rumannan aki sigur no a duna e impresion di ta hende cu ta causa problema y cu no ta respeta ley. Ruman Boucher tabata un homber humilde y suave cu tabata atende su cunucu chikito sin molestia niun hende y de bes en cuando e tabata bay den stad cu su kitrin. Pero toch, su famia mester a soporta algun di e maltratonan menciona den e tratado. E hues cu a presidi e caso den Corte di Prome Instancia tabatin masha rabia riba testigonan di Jehova, y e no a permiti e rumannan presenta evidencia cu ta mustra cu famia Boucher tabata inocente. Na luga di esey, el a acepta e ponencia di fiscal cu e tratado a instiga rabia of agresion y cu pa e motibo ey mester a declara famia Boucher culpabel. Cu otro palabra, pa e hues, tabata un crimen pa papia e berdad. Aimé y Gisèle a keda condena di a instiga rebelion contra gobierno, y hasta e mucha chikito, Lucille, a pasa dos dia cera den prizon. E rumannan a apela na Corte Supremo di Canada, e corte di mas halto di e pais, y esaki a bay di acuerdo pa trata e caso.

14. Kico e rumannan na Quebec a haci durante e añanan cu nan a enfrenta persecucion?

14 Mientrastanto, cu curashi nos rumannan di Quebec a sigui predica e mensahe di Reino a pesar di e atakenan violento y implacabel, y hopi biaha cu resultadonan excelente. Durante e cuater añanan despues cu nan a cuminsa cu e campaña pa distribui e tratado na 1946, e cantidad di testigo di Jehova na Quebec a aumenta di 300 pa 1.000. *

15, 16. (a) Kico tabata e veredicto di Corte Supremo di Canada den e caso di famia Boucher? (b) Ki efecto e victoria aki tabatin riba nos rumannan y otro hende?

15 Na juni 1950, full Corte Supremo di Canada, cu a consisti di nuebe hues, a trata e caso di Aimé Boucher. Seis luna despues, dia 18 di december 1950, Corte a dicta fayo na nos fabor. Dicon? Ruman Glen How, un abogado di testigonan di Jehova, a splica cu Corte a bay di acuerdo cu e argumento cu defensa a presenta, esta, cu por papia di “instiga rebelion contra gobierno” si esey ta hiba na violencia of na lantamento contra gobierno. Pero den e tratado “no tabatin niun di e tipo di instigacionnan ey; pues el a ser considera legalmente como libertad di expresion.” Ruman How a agrega: “Mi a mira personalmente con Jehova a duna nos e victoria.” *

16 E decision di Corte Supremo tabata en berdad un victoria rotundo pa e Reino di Dios. Pues tur e otro 122 casonan pendiente den cua a acusa e Testigonan na Quebec di ta instiga rebelion contra gobierno no tabatin base mas. Ademas, e veredicto di Corte a nifica cu djey pa dilanti tur ciudadano di Canada y di e Comunidad di Nacionnan Britanico tabatin libertad di  expresa kico nan ta pensa di e manera cu gobernantenan ta dirigi nan pais. Ademas, e victoria aki a pone cu e Iglesia y Estado di Quebec a stop cu e atakenan contra e testigonan di Jehova. *

Hende Cu Ta Bende Buki of Predicador Celoso di e Reino di Dios?

17. Con algun gobierno ta purba di controla nos trabou di predica?

17 Mescos cu e cristiannan di prome siglo, e sirbidornan di Jehova awe “no ta haci negoshi cu e palabra di Dios.” (Lesa 2 Corintionan 2:17.) Toch tin gobierno ta purba di controla nos trabou di predica via di leynan cu ta regula comercio. Laga nos considera dos caso den cua corte a duna un veredicto riba e pregunta si testigonan di Jehova ta haci negoshi of ta hiba un mensahe di Dios.

18, 19. Con autoridadnan na Dinamarca a purba di stroba e trabou di predica?

18 Dinamarca. Dia 1 di october 1932 a drenta na vigor un ley cu a bisa cu tabata ilegal pa bende material imprimi sin un permiso pa haci negoshi of pa bende cos riba caya. Pero nos rumannan no a pidi niun permiso. E siguiente dia, cinco publicador a pasa henter dia ta predica na Roskilde, un pueblito cu ta keda un 30 kilometer for di e capital, Kopenhagen. Na final di e dia, nan no por a haya August Lehmann, un di e publicadornan. Ta kico a pasa? Wel, el a ser aresta, acusa di tabata bende cos sin permiso.

19 Dia 19 di december 1932, August Lehmann a presenta den corte. El a conta cu e tabata bishita cas di hende pa ofrece nan literatura biblico, pero el a bisa cu e no tabata haci negoshi. E Corte di Prome Instancia a bay di acuerdo cu ne y a declara: “E acusado ... ta den posicion di mantene su mes financieramente y no a haya niun beneficio economico ni tabatin intencion di haya esey. Al contrario, su actividadnan a caus’e perdida financiero.” Corte a dicta na fabor di e Testigonan y a bisa cu loke ruman Lehmann a haci no ta “negoshi.” Pero e opositornan di e pueblo di Dios tabata determina pa stroba e trabou di predica den henter e pais. (Isa. 10:1) E fiscal a apela e caso na Corte Supremo di e pais. Con nos rumannan a reacciona?

20. Kico tabata e veredicto di Corte Supremo di Dinamarca, y con nos rumannan a reacciona?

20 E siman prome cu e audiencia di Corte Supremo, testigonan di Jehova den henter Dinamarca a aumenta nan actividad di predica. Diamars 3 di october 1933, Corte Supremo a anuncia su decision. Nan a bay di acuerdo cu Corte di Prome Instancia, esta, cu August Lehmann no a kibra ley. E veredicto aki a nifica cu testigonan di Jehova por a sigui predica libremente. Pa expresa nan gratitud na Jehova pa e victoria legal aki cu el a duna nan, e rumannan a aumenta nan actividad di predica mas ainda. Despues di e decision ey di Corte, nos rumannan na Dinamarca por a sigui cumpli cu nan sirbishi sin interferencia di gobierno.

Testigonan di Jehova na Dinamarca a mustra curashi den decada di 1930

21, 22. Kico tabata e decision di Corte Supremo di Merca den e caso di Ruman Murdock?

 21 Merca. Riba diadomingo, 25 di februari 1940, polis a aresta un ruman homber pionero, Robert Murdock, Jr., hunto cu shete otro testigo di Jehova, mientras nan tabata predica den e stad Jeannette, cerca di Pittsburgh, Pennsylvania. Nan a ser declara culpabel pasobra nan no a paga pa un permiso pa ofrece literatura. Ora nan a apela, Corte Supremo di Merca a bay di acuerdo pa trata e caso.

22 Dia 3 di mei 1943, Corte Supremo a anuncia su veredicto cu tabata na fabor di e Testigonan. Corte no tabata di acuerdo cu e exigencia cu e Testigonan mester a busca un permiso, pasobra esey lo a nifica cu nan tabatin cu “paga pa un derecho cu Constitucion Federal ta duna nan.” Corte a anula e ley cu e stad a introduci pasobra esey a “kita libertad di prensa y libertad di religion.” Ora cu hues William O. Douglas a presenta e opinion di mayoria di e huesnan, el a declara cu e actividad di testigonan di Jehova “ta mas cu predica; esaki ta mas cu partimento di literatura religioso. Esaki ta un combinacion di nan dos.” El a agrega: “E tipo di actividad religioso ey ta mes importante ... cu adoracion den iglesia y predicashi for di preekstoel.”

23. Dicon e casonan cu nos rumannan a gana den corte na 1943 ta importante pa nos awe?

23 E veredicto aki di Corte Supremo tabata un victoria legal sumamente importante pa e pueblo di Dios, pasobra esaki a  confirma loke nos realmente ta: predicadornan cristian y no hende cu ta bende buki. Riba e dia memorabel ey na 1943, testigonan di Jehova a gana 12 di nan 13 casonan dilanti di Corte Supremo, incluso e caso di Murdock. E decisionnan aki di corte a crea un precedente poderoso pa casonan hudicial mas recien den cua nos opositornan a bolbe cuestiona nos derecho di predica e mensahe di Reino publicamente y di cas pa cas.

“Nos Tin cu Obedece Dios na Prome Luga, y No Hende”

24. Kico nos ta haci ora gobierno prohibi nos trabou di predica?

24 Como sirbidornan di Jehova, nos ta aprecia masha hopi ora gobiernonan ta duna nos e derecho legal di predica e mensahe di Reino libremente. Pero ora nan prohibi nos trabou di predica, nos ta simplemente ahusta nos metodonan, y sigui predica den cualkier otro manera posibel. Mescos cu e apostelnan, “nos tin cu obedece Dios na prome luga, y no hende.” (Echo. 5:29; Mat. 28:19, 20) Pero tambe nos ta bay corte pa kita e prohibicion riba nos trabou di predica. Laga nos considera dos ehempel.

25, 26. Ki sucesonan a hiba na un caso den Corte Supremo na Nicaragua, y kico tabata e resultado?

25 Nicaragua. Dia 19 di november 1952, Donovan Munsterman, kende ta un misionero y sirbidor di sucursal, a bay na e Departamento di Inmigracion na e capital, Managua. Nan a manda yam’e p’e presenta dilanti di hefe di e departamento, comandante Arnoldo García. E comandante a bisa Donovan cu “ta prohibi [testigo di Jehova] na Nicaragua di sigui predica nan doctrinanan y di promove nan actividadnan religioso.” Ora cu Donovan a puntr’e dicon, comandante García a splic’e cu testigonan di Jehova no tabatin permiso di e minister pa haci esey y cu nan ta ser acusa di ta comunista. Ta ken a acusa nos? Clero catolico.

Rumannan na Nicaragua durante e prohibicion

 26 Di biaha Ruman Munsterman a apela e caso na e Ministerio di Gobernacion y Religion y tambe na Presidente Anastasio Somoza García, pero sin resultado. Pues, e rumannan a ahusta nan metodonan di predica. Nan a cera e Salon di Reino, cuminsa reuni den gruponan mas chikito y a stop di predica riba caya, pero nan a sigui predica e mensahe di Reino. Na e mesun tempo, nan a entrega un peticion na Corte Supremo di Nicaragua pa anula e prohibicion. Casi tur corant a papia di e prohibicion y di e contenido di e peticion cu e Testigonan a entrega, y Corte Supremo a bay di acuerdo pa trata e caso. Kico tabata e resultado? Dia 19 di juni 1953, Corte Supremo a publica su decision unanime cu tabata na fabor di testigonan di Jehova. Corte a haya cu e prohibicion a viola e derecho constitucional cu un hende tin di libertad di expresion, di consenshi y di religion. Ademas, Corte a duna ordo pa drecha e relacion entre e gobierno di Nicaragua y testigonan di Jehova pa e bira manera e tabata anteriormente.

27. Dicon e hendenan di Nicaragua a keda asombra cu e decision di Corte Supremo, y con e rumannan a mira e victoria ey?

27 E hendenan di Nicaragua a keda asombra cu Corte Supremo a dicta fayo na fabor di testigonan di Jehova. Te cu e tempo ey, e influencia di clero tabata asina fuerte cu Corte tabata evita conflicto cu nan. Ademas, funcionarionan di gobierno tabatin asina tanto poder cu masha poco biaha Corte tabata bay contra di nan decisionnan. Nos rumannan tabata convenci cu nan a haya e victoria aki pasobra nan Rey a proteha nan y pasobra nan a sigui predica.—Echo. 1:8.

28, 29. Ki cambio inespera a tuma luga na Zaire meymey di decada di 1980?

28 Zaire. Meymey di decada di 1980, tabatin rond di 35.000 testigo di Jehova na Zaire, cu awor yama Republica Democratico di Congo. Sucursal tabata construyendo un facilidad nobo pa por a atende e aumento continuo den actividadnan di Reino. Na december 1985, nan a tene un congreso internacional na e capital, Kinshasa, y tabatin delegado for di hopi parti di mundo. Un cantidad di 32.000 hende a yena e stadion di e stad. Despues di esey, e situacion a cuminsa cambia pa testigonan di Jehova. Kico a sosode?

29 Ruman Marcel Filteau, un misionero di Quebec, Canada, kende a pasa den e persecucion na man di e regimen di Duplessis, tabata sirbi na Zaire e tempo ey. El a conta kico a pasa: “Dia 12 di maart 1986, e rumannan responsabel a ricibi un carta cu a declara e asociacion di testigonan di Jehova di Zaire ilegal.” E prohibicion tabata firma pa e presidente di e pais, Mobutu Sese Seko.

30. Ki decision importante e Comite di Sucursal mester a tuma, y kico nan a dicidi di haci?

30 E siguiente dia, e emisora di radio nacional a anuncia: “Nunca mas nos lo tende di testigonan di Jehova na [Zaire].” Mesora persecucion a cuminsa. E hendenan a destrui Salonnan di Reino, y nan a horta e pertenencianan di nos rumannan, aresta nan, encarcela nan y bati nan. Hasta mucha nan a cera. Dia 12 di october 1988, gobierno a confisca e pertenencianan di nos  organisacion, y Guardia Civil (un unidad di ehercito) a ocupa e propiedad di sucursal. E rumannan responsabel a entrega un apelacion na Presidente Mobutu, pero nan no a haya contesta. E ora ey e Comite di Sucursal mester a tuma un decision importante: Apela na Corte Supremo of warda? Timothy Holmes, kende tabata un misionero y e tempo ey coordinador di e Comite di Sucursal di e pais, ta corda: “Nos a haci oracion na Jehova y a pidie duna nos sabiduria y guia.” Despues cu e comite a delibera, nan a yega na e conclusion cu no tabata e momento oportuno pa tuma accion legal. Na luga di esey, nan a concentra riba cuida e rumannan y busca maneranan pa sigui cu e trabou di predica.

“Durante e periodo di e caso, nos a mira con Jehova por cambia situacion”

31, 32. Ki decision remarcabel Corte Supremo di Zaire a tuma, y ki efecto esey tabatin riba nos rumannan?

31 Varios aña a pasa. E presion riba testigonan di Jehova a mengua y tabatin mas respet pa derechonan humano den e pais. E Comite di Sucursal a conclui cu awor si tabata tempo pa apela e prohibicion na e Corte Supremo di Husticia di Zaire. Sorprendentemente, Corte Supremo a bay di acuerdo pa trata e caso. Anto dia 8 di januari 1993, casi shete aña despues di e prohibicion cu e presidente a emiti, Corte a dicta cu e accion di gobierno contra di testigonan di Jehova tabata ilegal, y nan a kita e prohibicion. Figura bo! E huesnan ey a risca nan bida anulando un decision di e presidente di e pais. Ruman Holmes a bisa: “Durante e periodo di e caso, nos a mira con Jehova por cambia situacion.” (Dan. 2:21) E victoria ey a fortalece e fe di nos rumannan. Nan a sinti cu ta nos Rey Hesus a dirigi su pueblo pa sa ki ora y con pa actua.

Rumannan na Republica Democratico di Congo ta contento cu nan por adora Jehova libremente

 32 Unabes cu nan a kita e prohibicion, sucursal tabatin mag di trece misionero den e pais, traha un oficina di sucursal nobo y ricibi literatura biblico. * Esta contento sirbidornan di Dios rond mundo ta keda ora nan mira con Jehova ta proteha e bienestar spiritual di su pueblo!—Isa. 52:10.

“Jehova Ta Mi Ayudante”

33. Kico nos ta siña for di e repaso breve aki di algun caso den corte?

33 Nos repaso di algun bataya legal ta proba cu Hesus a cumpli cu su promesa: “Lo mi duna boso palabra y sabiduria cu tur boso opositornan hunto lo no por resisti ni contradeci.” (Lesa Lucas 21:12-15.) Algun biaha tabata bisto cu den nos tempo tambe Jehova a lanta hende manera Gamaliel pa proteha su pueblo of a motiva hues- y abogadonan cu curashi pa defende husticia. Jehova ta pone cu e armanan di nos opositornan no ta funciona. (Lesa Isaias 54:17.) Oposicion no por stop e trabou di Dios.

34. Dicon nos victorianan legal ta asina remarcabel, y kico nan ta proba? (Wak tambe e cuadro “ Victorianan Importante den Corte Supremo Cu A Beneficia e Predicacion di Reino.”)

34 Dicon nos victorianan legal ta asina remarcabel? Pensa un rato riba esaki: Testigonan di Jehova no ta hende cu tin hopi influencia ni ta hende prominente. Nos no ta vota ni sostene campañanan politico ni purba di influencia politiconan. Ademas, esnan entre nos cu ta haya nan mes dilanti di corte supremo por lo general ta ser considera “hende gewoon cu no [tin] mucho educacion.” (Echo. 4:13) Pues, for di un punto di bista humano, un corte di husticia no tin hopi motibo pa yuda nos y duna un veredicto cu ta bay contra nos opositornan religioso y politico. A pesar di tur esey, bes tras bes cortenan a dicidi na nos fabor. Nos victorianan legal ta proba cu nos ta cana “den compania di Cristo, si, como personanan manda pa Dios, den bista di Dios.” (2 Cor. 2:17) Pues, hunto cu apostel Pablo, nos ta declara: “Jehova ta mi ayudante; lo mi no tin miedo.”—Heb. 13:6.

^ par. 9 E caso aki, Cantwell Contra Estado di Connecticut, tabata e prome di 43 caso den cua Ruman Hayden Covington a defende e Testigonan dilanti Corte Supremo di Merca. El a muri na 1978. Su esposa, Dorothy, a sirbi fielmente como pionero te na su morto na 2015 na edad di 92 aña.

^ par. 12 E acusacion tabata basa riba un ley cu a drenta na vigor na aña 1606. E ley ey a permiti e miembronan di hurado declara un persona culpabel si nan ta haya cu loke e persona ey a bisa a fomenta rabia of agresion contra gobierno, maske loke el a bisa tabata berdad.

^ par. 14 Na 1950 tabatin 164 ruman den sirbishi di tempo completo na Quebec, incluso 63 graduado di Galaad cu boluntariamente a acepta un asignacion eynan a pesar cu nan tabata sa cu nan lo enfrenta oposicion feroz.

^ par. 15 Ruman W. Glen How tabata un bon abogado yen di curashi, kende a bringa cientos di caso pa testigonan di Jehova na Canada y den exterior di 1943 pa 2003.

^ par. 16 Pa mas detaye di e caso aki, wak e articulo “E Bataya No Ta di Boso, Sino di Dios” den e ¡Despertad! di 22 di april 2000, pagina 18-24.

^ par. 32 Cu tempo, e Guardia Civil a bandona e propiedad di sucursal; pero e rumannan a construi un sucursal nobo na un otro sitio.