Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 14

E Pueblo di Dios Ta Apoya e Gobierno di Dios So

E Pueblo di Dios Ta Apoya e Gobierno di Dios So

ENFOKE DI E CAPITULO

Lealtad na e Reino ta pone cu e pueblo di Dios ta sigui haci esfuerso pa no ta parti di mundo

1, 2. (a) Ki principio a guia e siguidornan di Hesus te den nos tempo? (b) Con nos enemigonan a purba di caba cu nos, pero cu ki resultado?

HESUS tabata para dilanti di Gobernador Pilato, e hues di mas poderoso di e nacion Hudiu, y a declara un principio cu te awe ta guia Su berdadero siguidornan. Hesus a bisa: “Mi reino no ta parti di e mundo aki. Si mi reino tabata parti di e mundo aki, mi sirbidornan lo a bringa pa mi no ser entrega den man di e Hudiunan. Ma echo ta cu mi reino no ta djaki.” (Juan 18:36) Pilato a laga mata Hesus, pero e victoria ey no a dura largo pasobra Dios a resucita Hesus. Emperadornan di e poderoso Imperio Romano a trata di caba cu e siguidornan di Cristo, pero nan no a logra pasobra cristiannan a plama e mensahe di Reino den henter e mundo di antiguedad.—Col. 1:23.

2 Despues cu e Reino a keda estableci na 1914, algun di e potencianan militar di mas poderoso den historia a purba di caba cu e pueblo di Dios. Pero niun di nan no a logra. Hopi gobierno y partido politico a purba di obliga nos pa tuma parti pa nan den nan conflictonan. Pero nan no a logra dividi nos. Actualmente tin ciudadano di e Reino ta biba den casi tur nacion. Pero toch nos ta uni den un berdadero hermandad mundial, y nos ta keda estrictamente neutral den asuntonan politico di mundo. Nos union ta un prueba convencente cu e Reino di Dios ta goberna y cu nos Rey Hesucristo ta sigui dirigi, refina y proteha su ciudadanonan. Ban wak con el a haci esey, y tuma nota di djis algun di e victorianan legal cu el a duna nos segun cu nos ta sigui haci esfuerso pa “no ta parti di mundo.”—Juan 17:14.

E Cuestion di Neutralidad

3, 4. (a) Kico a tuma luga ora e Reino a ser estableci? (b) Acaso e pueblo di Dios semper a compronde claramente kico e cuestion di neutralidad a encera? Splica.

3 Despues cu e Reino a ser estableci, guera a cuminsa den cielo, y Satanas a ser benta abou riba Tera. (Lesa Revelacion 12:7-10, 12.) Riba Tera tambe tabatin un guera, y esaki a pone e fe di e pueblo di Dios na prueba. Nan tabata determina pa sigui e ehempel di Hesus y no ser parti di mundo. Pero na prome instante, nan no a compronde claramente cuanto esfuerso nan lo mester a haci pa keda leu for di tur asunto politico.

 4 Por ehempel, Volumen VI di e serie Millennial Dawn, * cu nan a publica na 1904, a anima cristiannan pa no participa den guera. Pero e buki a rasona cu si autoridadnan obliga un cristian pa drenta servicio militar, e cristian mester haci esfuerso pa haya un tipo di servicio cu no ta encera combate. Si e no logra esey, y nan mand’e bay guera toch, e mester percura pa no mata niun hende. Herbert Senior, un cristian cu a batisa na 1905 y cu tabata biba na Gran Britania, a comenta lo siguiente riba e situacion ey: “Tabata reina bastante confusion entre e rumannan y no tabatin un conseho cla cu a mustra si tabata corecto pa drenta servicio militar aunke tabata solamente pa trabou cu no a encera combate.”

5. Con E Toren di Vigilancia di 1 di september 1915 a corigi nos punto di bista?

5 Pero E Toren di Vigilancia di 1 di september 1915 a cuminsa corigi nos punto di bista relaciona cu e cuestion aki. Segun e recomendacion cu tabatin den e buki Studies in the Scriptures encuanto servicio militar y trabou cu no ta encera combate, e revista a bisa: “Nos ta puntra nos mes si un accion asina no ta un violacion di principionan cristian.” Pero kico si autoridadnan menasa di tira un cristian mata pasobra e ta nenga di bisti uniform y drenta servicio militar? E articulo a rasona: “Kico ta mas pio? Laga nan tira bo mata pasobra bo ta leal na e Prins di Paz y ta nenga di desobedece Su ordo? Of, ser tira mata mientras bo ta den servicio di e reynan terenal aki y aparentemente ta apoya nan y ta viola—por lo menos pa bista di hende—e siñansanan di nos Rey Celestial? Di e dos opcionnan ey, nos ta prefera e prome: Nos ta prefera di muri door cu nos ta fiel na nos Rey Celestial.” A pesar di e declaracion fuerte ey, e articulo a conclui: “Nos no ta manda boso haci esey. Simplemente, nos ta sugeri boso pa haci esey.”

6. Kico bo a siña for di e ehempel di Ruman Herbert Senior?

6 Tabatin ruman cu a mira claramente cu no tabata corecto pa drenta servicio militar, y nan tabata cla pa carga e consecuencia. Herbert Senior, cita anteriormente, a bisa: “Pa mi, no tabatin niun diferencia entre descarga municion for di un barco [cu ta servicio cu no a encera combate] y arma un scopet cu e municion ey pa nan bay tira cu ne.” (Luc. 16:10) Ruman Senior a ser encarcela pasobra el a nenga di drenta servicio militar pa motibo di su principionan religioso. E cu cuater otro ruman homber tabata den un grupo di 16 persona cu a nenga di drenta servicio militar pa motibo di consenshi—incluyendo algun homber di otro religion—y cu a sinta parti di nan castigo na e prizon di Richmond na Gran Britania. Dado momento, den secreto, autoridadnan a manda Herbert y e 15 otro presonan bringa den e bataya na Francia. Ey, nan a keda sentencia na morto. Autoridadnan a pone Herbert y varios di e presonan ey dilanti di e peloton di  fusilamento, pero toch no a tira nan mata. En bes di esey, nan a condena nan na dies aña di prizon.

“M’a bin compronde cu e pueblo di Dios mester ta na paz cu tur hende, hasta ora tin menasa di guera.”—Simon Kraker (Wak paragraf 7)

7. Na cuminsamento di Segundo Guera Mundial, kico e pueblo di Dios a bin compronde?

7 Ora Segundo Guera Mundial a cuminsa, e pueblo di Jehova completo ya tabatin un mihor comprondemento di kico ser neutral ta nifica y kico nan mester a haci si nan kier a sigui e ehempel di Hesus. (Mat. 26:51-53; Juan 17:14-16; 1 Ped. 2:21) Por ehempel, E Toren di Vigilancia di 1 di november 1939 tabatin un articulo masha importante, titula “Neutralidad”, cu a bisa: “E principio cu e pueblo di Jehova [cu kende Jehova a cera un pacto] mester sigui awor ta cu nan tin cu keda completamente neutral entre e nacionnan cu ta den guera.” Simon Kraker, kende despues a sirbi na e oficina principal na Brooklyn, New York, a bisa tocante e articulo: “M’a bin compronde cu e pueblo di Dios mester ta na paz cu tur hende, hasta ora tin menasa di guera.” E cuminda spiritual ey a yega net na ora y a prepara e pueblo di Dios pa un atake sin precedente contra nan lealtad na e Reino.

Un “Riu” di Oposicion Ta Menasa e Pueblo di Dios

8, 9. Con e profecia di apostel Juan a cumpli?

8 Apostel Juan a profetisa cu despues cu e Reino ser estableci na 1914, e dragon, Satanas e Diabel, lo a purba di caba cu e apoyadonan di e Reino di Dios door di scupi un riu simbolico for  di su boca. * (Lesa Revelacion 12:9, 15.) Con e profecia di Juan a cumpli? Di decada di 1920 en adelante tabatin un avalancha di oposicion contra e pueblo di Dios. Ruman Kraker, mescos cu hopi otro ruman homber cu tabata biba na Noord America durante Segundo Guera Mundial, a haya castigo di prizon pa motibo di su lealtad na e Reino di Dios. Durante e guera ey, esnan cu a nenga di drenta servicio militar pa motibo religioso a ser encarcela den prizonnan federal na Merca. Mas cu dos tercera parti di tur e prizoneronan ey tabata testigo di Jehova.

9 Diabel cu su compinchinan tabata determina pa kibra integridad di ciudadanonan di Reino, sin importa unda nan tabata biba. Na Africa, Europa y Merca nan a hiba e rumannan dilanti di corte y dilanti di comisionnan pa wak si nan por haya libertad condicional. Como cu e rumannan tabata firmemente determina pa keda neutral, nan a ser encarcela, maltrata y mutila. Na Alemania, e pueblo di Dios a confronta un presion enorme pasobra nan a nenga di bisa “heil Hitler” of di apoya e guera. Segun calculo, rond di 6.000 ruman tabata deteni den campamentonan pa preso durante e era nazi, y mas cu 1.600 testigo di Jehova Aleman y no Aleman a muri na man di e hendenan cu a tortura nan. Toch Diabel no a logra causa daño permanente na e pueblo di Dios.—Mar. 8:34, 35.

“Tera” Ta Guli “e Riu”

10. Kico “tera” a simbolisa, y con el a interveni na fabor di e pueblo di Dios?

10 E profecia cu apostel Juan a skirbi a revela cu “tera”—algun hende of grupo poderoso di e mundo aki cu ta mas rasonabel—lo a guli “e riu” di persecucion, y asina yuda e pueblo di Dios. Con e parti ey di e profecia a cumpli? Den e decadanan despues di Segundo Guera Mundial, “tera” hopi biaha a interveni na fabor di e fiel apoyadonan di e Reino Mesianico. (Lesa Revelacion 12:16.) Por ehempel, varios corte importante a proteha e derecho di testigonan di Jehova di nenga di drenta servicio militar y participa den ceremonia nacionalista. Pero prome, laga nos considera djis algun di e victorianan principal cu Jehova a duna su pueblo relaciona cu servicio militar.—Sal. 68:20.

11, 12. Ki situacion Ruman Sicurella y Ruman Thlimmenos a confronta, y cu ki resultado?

11 Merca. Anthony Sicurella y su cinco rumannan a lanta den un famia testigo di Jehova. El a batisa cu 15 aña. Ora el a haci 21 aña, el a bay cerca e comision di servicio militar obligatorio y a registra su mes como un sirbidor religioso. Dos aña despues, na 1950, el a yena un peticion pa haci un cambio. E no kier a ser registra mas como un sirbidor religioso sino como un persona cu ta nenga servicio militar a base di consenshi. Aunke e rapport di FBI a haya cu Ruman Sicurella no a haci nada malo, Departamento di Husticia a rechasa su peticion. Despues di varios audiencia, Corte Supremo Mericano a trata e caso di  Ruman Sicurella y a anula e decision cu e corte anterior a tuma y a dicta fayo na fabor di Ruman Sicurella. E veredicto aki a yuda crea un precedente pa otro ciudadanonan Mericano cu nenga servicio militar a base di nan consenshi.

12 Grecia. Na 1983, Iakovos Thlimmenos a nenga di bisti uniform militar. Nan a conden’e pa desobediencia na autoridad y a sentenci’e na castigo di prizon. Despues cu el a haya su libertad, el a pidi permiso pa traha como accountant, pero nan a rechasa su peticion pasobra awor e tabatin un carchi di castigo, of, strafblad. El a hiba e asunto corte. Despues cu el a perde su caso den e cortenan di Grecia, el a hiba su caso Corte Europeo di Derechonan Humano. Na aña 2000, e Grote Kamer (Gran Sala) di Corte Europeo di Derechonan Humano, un panel cu a consisti di 17 hues, a dicta fayo na su fabor y asina a crea un precedente contra discriminacion. Prome cu e veredicto aki, mas cu 3.500 ruman na Grecia tabatin carchi di castigo pasobra nan a bay cera pa nan posicion neutral. Despues di e decision faborabel aki di Corte Europeo di Derechonan Humano, Grecia a pasa un ley pa libra e rumannan ey di tur acusacion. Ademas, ora cu nan a revisa e Constitucion di Grecia, nan a ratifica (confirma) un otro ley cu nan a pasa un par di aña prome cu a duna tur ciudadano di Grecia e derecho di haci servicio civil alternativo.

“Prome cu m’a drenta sala di corte, m’a haci oracion ferviente na Jehova, y m’a sinti con el a duna mi trankilidad.”—Ivailo Stefanov (Wak paragraf 13)

13, 14. Ki les anos por siña for di e casonan di Ivailo Stefanov y Vahan Bayatyan?

13 Bulgaria. Ivailo Stefanov tabatin 19 aña ora nan a manda yam’e pa servicio militar obligatorio. El a nenga di drenta ehercito of di haci trabou cu no a exigi pa bay den combate pero cu toch a cay bou di encargo di militarnan. Nan a sentenci’e na 18 luna di prizon. Pero el a apela e sentencia, a base di su derecho di rechasa servicio militar pa motibo di consenshi. Cu tempo, su caso a bay Corte Europeo di Derechonan Humano. Na 2001, prome cu e caso por a bay dilanti, autoridadnan a yega na un acuerdo amical cu Ruman Stefanov. Gobierno di Bulgaria a duna amnistia no solamente na Ruman Stefanov, sino na tur ciudadano di Bulgaria cu tabata dispuesto pa haci servicio civil alternativo. *

14 Armenia. Vahan Bayatyan a yega edad legal pa drenta servicio militar obligatorio na 2001. * El a nenga di haci esey pa motibo di su consenshi. Pero el a perde tur caso di apelacion den e cortenan di Armenia. Na september 2002, el a cuminsa sinta su castigo di dos aña y mey den prizon, pero nan a lag’e sali despues di dies luna y mey. Den e periodo ey, el a apela na Corte Europeo di Derechonan Humano, y nan a trata su caso. Pero dia 27 di october 2009, e Corte ey tambe a dicta fayo contra dje. E veredicto tabata un golpi duro pa e rumannan na Armenia cu tabata confronta e mesun cuestion aki. Pero, Grote Kamer—e autoridad maximo—di Corte Europeo di Derechonan Humano a bolbe analisa e veredicto. Dia 7 di juli 2011, Corte a saca un veredicto  na fabor di Vahan Bayatyan. Tabata prome biaha cu Corte Europeo di Derechonan Humano a reconoce cu un hende tin mag di nenga di drenta servicio militar pa motibo di su creencianan religioso. Ademas, nan a reconoce cu mester proteha e derecho ey ya cu e ta cay bou di e derecho di libertad di pensamento, di consenshi y di religion. E veredicto ey ta proteha no solamente e derechonan di testigonan di Jehova sino tambe di cientos di miyones di hende den paisnan cu ta miembro di e Conseho di Europa. *

Rumannan na Armenia a haya nan libertad despues cu Corte Europeo di Derechonan Humano a dicta sentencia na nan fabor

E Cuestion di Ceremonianan Nacionalista

15. Dicon e pueblo di Jehova ta nenga di participa den ceremonianan nacionalista?

15 E pueblo di Jehova ta keda leal na e Reino Mesianico no solamente door di nenga di drenta servicio militar sino tambe door di nenga respetuosamente di participa den ceremonianan nacionalista. Specialmente desde comienso di Segundo Guera Mundial, un ola di fanatismo patriotico a asota henter mundo.  Den hopi pais ciudadanonan mester a hura lealtad na nan patria; door di recita un huramento, canta himno nacional of saluda bandera. Pero den nos caso, nos ta adora Jehova so. (Exo. 20:4, 5NW) Como resultado, nos a bira victima di un ola di persecucion. Pero Jehova a bolbe uza “tera” pa guli un parti di e oposicion ey. Tuma nota di algun victoria remarcabel cu Jehova a duna nos via Cristo.—Sal. 3:8.

16, 17. Ki situacion Lillian y William Gobitas a confronta, y kico bo ta siña for di nan caso?

16 Merca. Na 1940, den e caso conoci como Scol di Districto di Minersville Contra Gobitis, Corte Supremo Mericano a dicta fayo contra di testigonan di Jehova; e decision tabata ocho contra y un na fabor. Lillian Gobitas * (di 12 aña) y su ruman homber William (di 10 aña) kier a keda leal na Jehova, pues nan a nenga di saluda bandera y di recita e huramento di lealtad. Como consecuencia, autoridadnan a kita nan for di scol. Nan caso a bay dilanti di Corte Supremo, y Corte a conclui cu e accion di e scol tabata na harmonia cu constitucion Mericano, ya cu esey tabata na interes di “union nacional.” E veredicto ey a causa un periodo intenso di persecucion contra testigonan di Jehova. Autoridadnan a kita mas mucha for di scol, adultonan a perde trabou y hopi di nan a sufri atake cruel na man di multitudnan razo. E buki The Lustre of Our Country a declara cu “persecucion contra Testigonan durante e periodo di 1941 pa 1943 tabata e ola di mas grandi di intolerancia religioso na Merca den siglo 20.”

17 E victoria di e enemigonan di Dios no a dura largo. Na 1943, Corte Supremo a trata un otro caso similar na esun di Gobitis. E tabata conoci como Directiva di Scol di Estado di West Virginia Contra Barnette. E biaha aki Corte Supremo a duna testigonan di Jehova e victoria. Tabata prome biaha den historia Mericano cu Corte Supremo a revoca su mes decision den un periodo di tempo asina cortico. Despues di e veredicto ey, e persecucion abierto contra e pueblo di Jehova na Merca a mengua drasticamente. Den e proceso ey, a mustra respet pa e derechonan di tur ciudadano di Merca.

18, 19. Segun Pablo Barros, kico a yud’e keda firme, y con otro sirbidornan di Jehova por imita su ehempel?

18 Argentina. Na 1976, autoridadnan a kita Pablo Barros (di 8 aña) y Hugo Barros (di 7 aña) for di scol, pasobra nan no kier a participa den un ceremonia di hisa bandera. Na un ocasion, e cabesante di scol a pusha Pablo y dal e riba su cabes. E cabesante a laga tur dos mucha keda un ora despues di scol, mientras cu e tabata purba di obliga nan pa participa den ceremonianan patriotico. Tocante e experencia traumatico ey, Pablo a bisa: “Si Jehova no a yuda mi, lo mi no a logra mantene mi integridad bou di e circunstancianan ey.”

19 Ora a hiba e caso dilanti di corte, e hues a sostene e decision di e scol pa kita Pablo y Hugo for di scol. Sinembargo,  e rumannan a apela e caso na Corte Supremo di Argentina. Na 1979, e Corte ey a anula e decision di e corte mas abou, bisando: “E castigo ey [di kita e muchanan for di scol] ta bay tanto contra e derecho constitucional di ricibi educacion (Articulo 14) como e deber di Estado pa percura pa e muchanan haya educacion basico (Articulo 5).” E victoria ey a beneficia rond di 1.000 mucha testigo di Jehova. Den caso di algun mucha, autoridadnan a para e proceso di kita nan for di scol, y otro muchanan, manera Pablo y Hugo, nan a tuma bek na scol publico.

Hopi mucha testigo di Jehova a keda fiel bou di prueba

20, 21. Con e caso di Roel y Emily Embralinag ta fortalece bo fe?

20 Filipinas. Na 1990, autoridadnan a kita Roel Embralinag * (di 9 aña) y su ruman muher Emily (di 10 aña), hunto cu mas cu 65 alumno testigo di Jehova, for di scol pasobra nan no a saluda bandera. Leonardo, tata di Roel y Emily, a purba di rasona cu e directiva di scol, pero sin resultado. Ora e situacion a bay for di man, Leonardo a entrega un peticion na Corte Supremo. Leonardo no tabatin placa ni abogado pa represent’e. E famia a haci  oracion ferviente na Jehova pa guia nan. Mientrastanto, hende tabata tenta e muchanan y haci bofon di nan. Leonardo a sinti cu e no tabatin niun posibilidad di gana e caso, ya cu e no a studia ley.

21 Finalmente, e famia a bin haya un abogado pa representa nan, Felino Ganal, kende anteriormente tabata traha na un di e oficinanan di abogado mas renombra di e pais. Tempo cu e caso a tuma luga, Felino Ganal a bira un testigo di Jehova y e no tabata traha mas pa e oficina di abogado. Ora a hiba e caso dilanti di Corte Supremo, Corte a dicidi unanimamente na fabor di e Testigonan y a anula e decision di kita e muchanan for di scol. Un biaha mas, hende cu a purba di kibra e integridad di e pueblo di Dios no a logra.

Nos Posicion Neutral Ta Uni Nos

22, 23. (a) Dicon nos a gana asina tanto caso historico? (b) Kico e echo cu tin paz entre nos rond mundo ta comproba?

22 Dicon e pueblo di Jehova a gana asina tanto caso historico? Maske nos no tin niun influencia politico, toch, den pais tras di pais y den corte tras di corte, huesnan imparcial a proteha nos di e atake tenaz di opositornan y, den e proceso, nan a crea precedente den nan constitucion. Nos no tin duda cu ta Cristo a apoya nos esfuerso pa gana e casonan ey. (Lesa Revelacion 6:2.) Pakico nos ta bringa e casonan ey den corte? Nos intencion no ta pa trece reformanan legal. Mas bien, nos meta ta pa haci sigur cu nos por sigui sirbi nos Rey Hesucristo sin problema.—Echo. 4:29.

23 Den un mundo dividi pa conflicto politico y afecta pa odio profundo, nos Rey, Hesucristo, a bendiciona e esfuersonan cu su siguidornan rond mundo ta haci pa mantene nan posicion neutral. Satanas su intentonan pa dividi nos y vence nos a fracasa. E Reino a uni miyones di hende cu ta nenga di “prepará nan mes pa guera.” E solo echo cu tin paz entre nos rond mundo ta un milager; esaki ta un prueba irefutabel cu e Reino di Dios ya ta goberna.—Isa. 2:4, BPK.

^ par. 4 E volumen aki ta conoci tambe pa e titulo The New Creation. Mas despues, nan a cambia e nomber di e serie Millennial Dawn pa Studies in the Scriptures.

^ par. 8 Pa un consideracion di e profecia aki, wak e buki Revelacion—su gran culminacion ta cerca!, capitulo 27, pagina 184 pa 186.

^ par. 13 E acuerdo aki a rekeri tambe pa gobierno di Bulgaria ofrece servicio civil alternativo bou di maneho di un administracion civil na tur persona cu nenga servicio militar pa motibo di consenshi.

^ par. 14 Pa e relato completo, wak e articulo, “E Corte Europeo di Derechonan Humano Ta Reconoce e Derecho di Nenga Servicio Militar” den La Atalaya di 1 di november 2012.

^ par. 14 Durante un periodo di 20 aña, gobierno di Armenia a encarcela mas cu 450 hoben testigo di Jehova. Na november 2013, nan a laga e ultimo rumannan den libertad.

^ par. 16 Den e registronan di corte nan a spel e fam robes.

^ par. 20 Den e registronan di corte nan a spel e fam robes y a skirbi Ebralinag.