Sigui pa e contenido

Sigui pa e index

 CAPITULO 21

E Reino di Dios Ta Elimina Su Enemigonan

E Reino di Dios Ta Elimina Su Enemigonan

ENFOKE DI E CAPITULO

E sucesonan cu ta hiba na e guera di Armagedon

1, 2. (a) Kico ta proba cu nos Rey ta gobernando for di aña 1914? (b) Kico nos lo analisa den e capitulo aki?

NOS fe a bira mas fuerte despues cu nos a repasa tur loke e Reino di Dios a logra meymey di su enemigonan. (Sal. 110:2) Nos Rey a forma un ehercito di predicador boluntario. El a limpia y purifica su siguidornan den sentido spiritual y moral. Anto a pesar di tur e esfuerso cu enemigonan di e Reino ta haci pa causa division entre nos, nos ta gosa awe di un hermandad uni mundialmente. E logronan aki di e Reino, hunto cu hopi otro logro mas cu nos a analisa caba, ta duna prueba convencente cu for di 1914 nos Rey ta gobernando meymey di enemigonan di e Reino.

2 E Reino lo haci cosnan hasta mas asombroso ainda den futuro cercano. E lo “bin” pa “garna y pone un fin” na tur su enemigonan. (Mat. 6:10; Dan. 2:44) Pero prome cu e tempo ey yega, tin mas suceso importante cu tin cu tuma luga. Kico nan ta? Varios profecia di Bijbel ta contesta e pregunta ey. Laga nos analisa algun di nan pa wak cua ta e sucesonan cu ainda mester tuma luga.

Kico Lo Sosode Prome Cu e Destruccion Diripiente?

3. Kico ta e prome suceso cu lo tuma luga?

3 Anuncio di paz. Ora apostel Pablo a skirbi e Tesalonicensenan, el a describi e prome suceso cu lo tuma luga. (Lesa 1 Tesalonicensenan 5:2, 3.) Den e carta aki Pablo ta menciona “e dia di Jehova”; esaki lo cuminsa cu e atake contra “Babilonia e Grandi.” (Rev. 17:5) Pero un poco prome cu e dia di Jehova cuminsa, e lidernan mundial lo ta bisando: “Paz y siguridad!” E expresion aki por ta referi na un anuncio specifico of na un serie di declaracion. Acaso lidernan religioso lo ta envolvi den esey? Ya cu nan ta parti di mundo, ta posibel cu nan lo join lidernan politico den bisa “Paz, paz.” (Jer. 6:14; 23:16, 17; Rev. 17:1, 2) E proclamacion aki di paz y siguridad lo ta e señal cu e dia di Jehova ta a punto di cuminsa. Enemigonan di e Reino di Dios “lo no scapa di ningun manera.”

4. Con nos ta beneficia di e echo cu nos ta compronde kico Pablo su profecia tocante e anuncio di paz y siguridad ta nifica?

 4 Con nos ta beneficia di e echo cu nos ta compronde kico e profecia aki ta nifica? Pablo a bisa: “Boso no ta den scuridad; pues e dia ey no mester coy boso di sorpresa manera luz di dia ta coy ladron di sorpresa.” (1 Tes. 5:3, 4) Distinto for di hende en general, nos si ta compronde den ki direccion cos ta bayendo ora nos wak e sucesonan cu ta tumando luga. Pero den ki manera precies e profecia aki tocante paz y siguridad lo cumpli? Nos no sa. Nos tin cu warda y wak kico ta bay pasa. Pesey, “laga nos keda lanta y mantene nos sano huicio.”—1 Tes. 5:6; Sof. 3:8.

E Tribulacion Grandi Ta Cuminsa

5. Kico lo ta e prome fase di e “tribulacion grandi”?

5 Religion ta ser ataca. Corda cu Pablo a skirbi: “Ora nan ta bisa: ‘Paz y siguridad!’, e ora ey diripiente destruccion lo bin riba nan instantaneamente.” Mescos cu ora lamper corta, strena ta zona net su tras, asina tambe ora e nacionnan ta bisa “Paz y siguridad!”, “diripiente destruccion” lo bin instantaneamente. Kico lo ser destrui? Di prome, “Babilonia e Grandi”, e imperio mundial di religion falso, conoci tambe como “e prostituta.” (Rev. 17:5, 6, 15) E destruccion aki di cristiandad y di tur otro organisacion religioso falso ta e prome fase di e “tribulacion grandi.” (Mat. 24:21; 2 Tes. 2:8) Pa hopi hende, e suceso aki lo ta un sorpresa. Dicon? Pasobra te na e momento ey, e prostituta ta considera su mes “un reina” cu “hamas lo ... mira tristeza.” Pero diripiente lo e descubri cu e tabata full fout. Lo e ser elimina rapidamente, comosifuera den “un dia.”—Rev. 18:7, 8.

6. Ken of kico lo lansa e atake contra “Babilonia e Grandi”?

6 Ken of kico lo lansa e atake contra “Babilonia e Grandi”? Un “bestia salbahe color cora [cora]” cu tin “dies cacho.” E buki di Revelacion ta indica cu e bestia salbahe aki ta simbolisa Nacionnan Uni. E dies cachonan ta representa tur poder politico actual cu ta apoya e “bestia salbahe” aki. (Rev. 17:3, 5, 11, 12) Con destructivo e atake lo ta? E nacionnan ey lo plunder e rikesa di e prostituta, despues nan ta habrac’e y “kim’e completamente cu candela.”—Lesa Revelacion 17:16. *

7. Con e palabranan di Hesus na Mateo 24:21 y 22 a cumpli den e prome siglo, y con nan lo cumpli den futuro?

7 Dios lo haci e dianan cortico. Nos Rey a revela kico lo sosode na e momento ey durante e tribulacion grandi. Hesus a bisa: “Pa motibo di e scoginan, [Dios lo] haci e dianan ey cortico.” (Lesa Mateo 24:21, 22.) E palabranan di Hesus a cumpli na un escala chikito na aña 66 di e prome siglo ora cu Jehova a pone e atake di e ehercito Romano contra Jerusalem dura mas “cortico.” (Mar. 13:20) Pa e motibo ey, e cristiannan na Jerusalem y Judea por a scapa. Con e palabranan di Hesus lo cumpli na escala mundial durante e  binidero tribulacion grandi? Ora Nacionnan Uni ataca religion, Jehova, mediante nos Rey, lo pone cu e atake ey lo dura mas cortico pa nan no destrui e religion berdadero hunto cu e religionnan falso. Pues, ora nan destrui tur organisacion religioso falso, e unico religion berdadero so lo permanece. (Sal. 96:5) Laga nos ban wak awor kico lo sosode despues cu e parti aki di e tribulacion grandi pasa.

Sucesonan Cu Ta Hiba na Armagedon

8, 9. Kico e fenomenonan celestial cu Hesus a referi na dje lo por ta, y con hende lo reacciona riba loke nan mira?

8 Hesus su profecia tocante e ultimo dianan ta indica cu varios suceso importante lo tuma luga durante e periodo cu ta hiba na Armagedon. E prome dos sucesonan cu nos lo trata ta ser menciona den e Evangelionan di Mateo, Marco y Lucas.—Lesa Mateo 24:29-31; Mar. 13:23-27; Luc. 21:25-28.

9 Fenomenonan celestial. Hesus a profetisa: “Solo lo bira scur, luna lo no duna su [claridad], strea lo cay for di cielo.” Hende sigur lo no acudi mas na lidernan religioso pa haya iluminacion of guia. Kisas Hesus tabata referi tambe na fenomenonan sobrenatural den cielo. (Isa. 13:9-11; Joel 2:1, 30, 31) Con hende lo reacciona riba loke nan mira? Nan lo ta “den angustia, sin sa kico pa haci.” (Luc. 21:25; Sof. 1:17) Si, enemigonan di e Reino di Dios—di rey te esclavo—lo “desmaya di miedo y di ansha pa e cosnan cu lo bin” y lo core busca caminda pa sconde. Pero nan lo no haya niun luga cu por proteha nan contra e rabia di nos Rey.—Luc. 21:26; 23:30; Rev. 6:15-17.

10. Ki sentencia Hesus lo dicta, y con apoyador y opositor di e Reino di Dios lo reacciona riba esey?

10 Separacion di carne for di cabrito. E ora ey tur enemigo di e Reino di Dios lo haya nan obliga di bira testigo di un suceso cu lo pone nan sufri mas ainda. Hesus a declara: “Nan lo mira e Yiu di hende bin den nubia cu gran poder y gloria.” (Mar. 13:26) E muestra sobrenatural aki di poder lo ta e señal cu Hesus a bin pa husga. Den un otro parti di e mesun profecia aki tocante e ultimo dianan, Hesus a duna mas detaye tocante e sentencia cu lo e dicta na e momento ey. Nos ta haya e informacion aki den e comparacion di carne y cabrito. (Lesa Mateo 25:31-33, 46.) Hende cu lealmente ta apoya e Reino di Dios lo ser husga pa Hesus como “carne”, y nan lo “lanta [nan] cabes”, pasobra nan ta realisa cu nan “liberacion ta yegando cerca.” (Luc. 21:28) Pero opositornan di e Reino lo ser husga pa Hesus como “cabrito”, y nan lo “bati nan pecho di tristeza”, pasobra nan ta realisa cu ta “morto eterno” ta warda nan.—Mat. 24:30; Rev. 1:7.

11. Kico nos tin cu corda segun cu nos ta analisa e sucesonan cu lo bay tuma luga?

11 Despues cu Hesus dicta sentencia contra “tur e nacionnan”, ainda varios suceso importante mester tuma luga prome cu e guera di Armagedon cuminsa. (Mat. 25:32) Nos  lo analisa dos di e sucesonan ey: e atake di Gog y e recogemento di e unginan. Segun cu nos ta analisa e dos sucesonan ey, nos tin cu corda cu e Palabra di Dios no ta revela e momento exacto cu e sucesonan aki lo tuma luga ni con largo esakinan lo dura. Na dado momento, probablemente e sucesonan ey lo tuma luga na e mesun tempo.

12. Kico Satanas lo haci ora e ataca e Reino pa ultimo biaha?

12 E Atake Final. Gog di Magog lo ataca e resto di e unginan y nan compañeronan, e otro carnenan. (Lesa Ezekiel 38:2, 11.) E atake aki contra gobernacion di e Reino, cu ya tin basta tempo estableci, lo ta Satanas su ultimo bataya den e guera cu e ta hibando contra e resto ungi for di tempo cu a sac’e for di cielo. (Rev. 12:7-9, 17) Vooral desde cu a cuminsa recoge e unginan den e congregacion cristian purifica, Satanas a purba di kibra e bon relacion cu nan tabatin cu Dios, pero e no a logra. (Mat. 13:30) Ora cu no tin niun religion falso mas y ta parce cu e pueblo di Dios ta indefenso, esta, “sin muraya ..., [sin] grendel ni porta”, Satanas lo mira esaki como un bon oportunidad pa caba cu nan. E lo instiga su compinchinan malbado pa lansa un atake sin misericordia contra e sirbidornan di e Reino.

13. Con Jehova lo proteha su pueblo?

13 Ezekiel a describi kico lo pasa. E profecia ey ta bisa relaciona cu Gog: “Lo bo bin for di bo luga, for di e partinan mas aleha di noord, abo y hopi pueblo hunto cu bo, nan tur riba cabay, un multitud grandi y un ehercito poderoso; lo bo lanta bin contra mi pueblo.” (Eze. 38:15, 16) Con Jehova lo reacciona riba e invasion aparentemente imparabel aki? Jehova ta declara: “Mi furia lo subi den mi nanishi.” El a bisa tambe: “Lo mi yama un spada contra Gog.” (Eze. 38:18, 21; lesa Zacarias 2:8.) Jehova lo proteha su sirbidornan riba Tera mediante e guera di Armagedon.

14, 15. Despues cu e atake di Satanas cuminsa, ki otro suceso lo tuma luga na un dado momento?

14 Prome cu nos bay wak con Jehova lo defende su pueblo durante e guera di Armagedon, laga nos analisa un rato un otro suceso importante. Esaki lo tuma luga despues cu Satanas su atake cuminsa, pero prome cu Jehova interveni na Armagedon. Manera nos a menciona na paragraf 11, e di dos suceso aki ta e recogemento di e unginan cu ainda ta riba Tera.

15 Recogemento di e unginan. Tanto Mateo como Marco a mustra cu loke Hesus a declara tocante “e scoginan”—cristiannan ungi pa spirito santo—tin di haber cu un serie di suceso cu lo tuma luga prome cu Armagedon cuminsa. (Wak paragraf 7.) Hesus tabata referi na su mes como Rey ora el a profetisa: “Anto lo e manda e angelnan y lo reuni su scoginan for di e cuater skinanan di mundo, for di e punta di  mas leu di Tera te na e punta di mas leu di cielo.” (Mar. 13:27; Mat. 24:31) Ora Hesus a papia di “reuni”, of recoge, kico e tabata kiermen? E no tabata papia tocante e seyamento final di e resto di cristiannan ungi, ya cu esey ta sosode net prome cu e tribulacion grandi cuminsa. (Rev. 7:1-3) Mas bien, Hesus a referi na un suceso cu lo tuma luga durante e binidero tribulacion grandi. Pues, aparentemente na un dado momento despues cu Satanas cuminsa cu su atake sin misericordia contra e pueblo di Dios, e unginan cu ainda ta riba Tera lo ser recogi pa bay cielo.

16. Kico e unginan resucita lo haci durante e guera di Armagedon?

16 Acaso lo termina di recoge e resto ungi prome cu e siguiente suceso, esta, Armagedon? Parce cu si, ya cu e tempo di e recogemento ta indica cu tur ungi lo ta den cielo prome cu Dios su guera di Armagedon cuminsa. Den cielo, e 144.000 cogobernantenan di Cristo lo ricibi autoridad pa hunto cu Hesus haci uzo di un “bara di hero” di destruccion contra tur e enemigonan di e Reino di Dios. (Rev. 2:26, 27) E ora ey, hunto cu angelnan poderoso, e unginan resucita lo sigui tras di Cristo, e Rey Guerero, na momento cu e sali pa bay confronta e “ehercito poderoso” di enemigo cu ta cla pa ataca e pueblo di Jehova. (Eze. 38:15) Ora cu e confrontacion ey tuma luga, e guera di Armagedon ta cuminsa.—Rev. 16:16.

E Gran Final di e Tribulacion Grandi

E guera di Armagedon ta cuminsa

17. Kico lo pasa cu “e cabritonan” durante Armagedon?

17 Hesus ta ehecuta sentencia. E guera di Armagedon lo ta e gran final di e tribulacion grandi. Na e momento ey, Hesus lo cumpli cu un tarea adicional. Fuera di ta Hues di “tur e nacionnan”, lo e bira tambe Esun cu ta ehecuta sentencia contra e nacionnan, esta, contra tur e hendenan cu anteriormente a ser husga pa Hesus como “cabrito.” (Mat. 25:32, 33) Cu “un spada largo y skerpi”, nos Rey lo “[mata, BPK] e nacionnan.” Si, tur hende cu ta manera cabrito—di “rey” te “esclavo”—“lo haya morto eterno.”—Rev. 19:15, 18; Mat. 25:46.

18. (a) Con situacion lo cambia pa “e carnenan”? (b) Kico Hesus lo haci pa logra un victoria total contra su enemigonan?

18 Wak con situacion a cambia pa e hendenan cu Hesus a considera “carne.” En bes cu Satanas su ehercito inmenso di “cabrito” trapa nan mata, “un multitud grandi” di “carne” aparentemente indefenso lo sobrevivi e atake di enemigo y lo sali bibo for di “e tribulacion grandi.” (Rev. 7:9, 14) E ora ey, despues cu Hesus a vence y elimina tur enemigo humano di e Reino di Dios, lo e benta Satanas cu su demoñonan den un abismo. Lo tene nan eynan den un estado inactivo, manera morto, pa 1.000 aña.—Lesa Revelacion 6:2; 20:1-3.

 Con Nos Por Prepara Nos Mes?

19, 20. Con nos por pone na practica e les cu nos ta siña for di e palabranan na Isaias 26:20 y 30:21?

19 Con nos por prepara nos mes pa e sucesonan cu pronto lo cambia mundo? Algun aña pasa E Toren di Vigilancia a bisa: “Sobrevivencia lo depende di obediencia.” Dicon? Nos ta haya e contesta den e spiertamento cu Jehova a duna e Hudiunan cu tabata preso na Babilonia di antiguedad. Jehova a profetisa cu Babilonia lo a ser conkista pa un otro nacion, pero kico e pueblo di Dios mester a haci pa prepara nan mes pa e suceso ey? Jehova a declara: “Bin, mi pueblo, drenta den bo cambernan y cera bo portanan bo tras; sconde pa un poco tempo, te ora indignacion pasa.” (Isa. 26:20) Tuma nota di e verbonan den e versiculo aki: “bin”, “drenta”, “cera”, “sconde”; tur ta den forma imperativo; ta ordo nan ta. E Hudiunan cu a obedece e ordonan ey lo a keda den cas, leu for di e soldaatnan enemigo cu tabata cana pafo riba caya. Pues, pa nan a sobrevivi, nan mester a obedece e instruccionnan di Jehova. *

20 Ki les nos ta siña for di esaki? Wel, mescos cu den caso di e sirbidornan di Dios di antiguedad, nos mester obedece e instruccionnan di Jehova pa nos por sobrevivi e sucesonan cu lo tuma luga pronto. (Isa. 30:21) Nos ta ricibi e instruccionnan ey via e congregacion. Pues, nos kier tin e custumber di obedece cu henter nos curason e instruccionnan cu nos ta ricibi. (1 Juan 5:3) Si for di awor nos ta haci esey, nos lo ta mas inclina den futuro pa obedece di buena gana y asina ricibi e proteccion di nos Tata, Jehova, y di nos Rey, Hesus. (Sof. 2:3) E proteccion divino ey lo duna nos e oportunidad di mira cu nos propio wowo con e Reino di Dios lo elimina su enemigonan completamente. Esey si lo ta algo inolvidabel.

^ par. 6 Ta parce rasonabel cu e destruccion di “Babilonia e Grandi” ta referi principalmente na destruccion di religion falso, no na un matanza general di tur hende religioso. Pues, mayoria di e ex-siguidornan di Babilonia lo sobrevivi e destruccion aki y lo trata e ora ey, a lo menos publicamente, di distancia nan mes for di religion, manera Zacarias 13:4 pa 6 ta indica.

^ par. 19 Pa mas informacion, wak e buki E Profecia di Isaías—Lus pa Henter Humanidad I, pagina 282 pa 283.