Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 6

Un Pueblo Cu Ta Predica—E Predicadornan Ta Ofrece Nan Mes Boluntariamente

Un Pueblo Cu Ta Predica—E Predicadornan Ta Ofrece Nan Mes Boluntariamente

ENFOKE DI E CAPITULO

E Rey tin un ehercito di predicador

1, 2. Ki trabou grandi Hesus a profetisa cu lo tuma luga, y ki pregunta importante esey ta lanta?

GOBERNANTENAN hopi biaha ta haci promesa cu nan no ta cumpli cu ne. Hasta esnan cu tin bon intencion kisas no por cumpli cu loke nan ta priminti. Pero menos mal cu e Rey Mesianico Hesucristo si ta diferente. Semper e ta cumpli cu su palabra.

2 Despues cu Hesus a bira Rey na 1914, e tabata cla pa cumpli cu un profecia cu el a duna casi 1.900 aña prome. Poco prome cu el a muri, el a profetisa cu “e bon noticia ... di e Reino lo ser predica den henter e Tera habita.” (Mat. 24:14) Cumplimento di e palabranan ey lo tabata parti di e señal di su presencia como Rey di e Reino di Dios. Pero un caracteristica di e ultimo dianan lo tabata cu mayoria di hende lo ta egoista, sin amor y sin respet pa religion. Esey ta lanta un pregunta importante: Con e Rey lo a logra haya un ehercito di predicador cu ta ofrece nan mes boluntariamente den e tempo aki? (Mat. 24:12; 2 Tim. 3:1-5) Nos tin cu haya sa e contesta, pasobra esey tin efecto riba cada un di nos como cristian.

3. Ki confianza Hesus tabatin, y dicon?

3 Laga nos bolbe wak e palabranan profetico di Hesus. E palabranan “lo ser predica” ta indica cu Hesus tabatin confianza cu den e ultimo dianan lo tin hende cu ta apoy’e boluntariamente. Pero ken a dun’e e confianza ey? Su Tata. (Juan 12:45; 14:9) Prome cu Hesus a bin na Tera como hende, el a tuma nota cu Jehova tabatin confianza cu Su sirbidornan lo a ofrece nan mes boluntariamente. Laga nos wak con Jehova a expresa e confianza ey.

“Bo Pueblo Lo Pone Su Mes Disponibel”

4. Jehova a invita e Israelitanan pa apoya ki trabou, y con nan a reacciona?

4 Corda kico a pasa ora Jehova a manda Moises traha e tabernakel, of tent, cu mester a bira e centro di adoracion pa e nacion di Israel. Via Moises, Jehova a invita henter e pueblo pa apoya e trabou di construccion ey. Moises a bisa nan: “Esun cu su curason ta dispuesto, lag’e hiba [un] ofrenda pa SEÑOR.” Kico tabata e resultado? “E pueblo tabata sigui hiba ofrendanan  boluntario p’e tur mainta.” Nan a hiba asina tanto cos cu mester “a stop e pueblo di hiba mas.” (Exo. 35:5; 36:3, 6) E reaccion di e Israelitanan a mustra cu Jehova tabatin rason ora el a pone confianza den nan.

5, 6. Segun Salmo 110:1 pa 3, ki actitud tanto Jehova como Hesus ta verwacht pa nan sirbidornan tin den e tempo di fin?

5 Jehova ta verwacht pa su pueblo tin e mesun actitud cu e Israelitanan ey den e ultimo dianan? Si! Mas cu mil aña prome cu Hesus a nace riba Tera, Jehova a inspira David pa skirbi tocante e tempo ora cu e Mesias lo a cuminsa goberna. (Lesa Salmo 110:1-3.) Hesus, e Rey recien corona, lo tabatin enemigo cu lo opon’e, pero tambe lo e tabatin un ehercito di hende cu lo apoy’e. Lo no tabatin nodi obliga nan pa sirbi e Rey. E hobennan den e ehercito ey tambe lo a ofrece nan mes boluntariamente y lo a bira un multitud masha grandi. Ta pesey mes Bijbel a compara nan cu e cantidad incontabel di gota di serena cu sa cubri tur cos ora dia habri. *

Cristiannan cu ta apoya e Reino boluntariamente ta hopi; nan ta manera gota di serena (Wak paragraf 5)

6 Hesus tabata sa cu e profecia di Salmo 110 ta referi na dje. (Mat. 22:42-45) Pesey e tabata sigur cu lo tin hende leal cu lo apoy’e como Rey y pone nan mes disponibel pa predica e bon noticia den henter e Tera. Kico historia ta mustra? E Rey a logra haya un ehercito di predicador cu boluntariamente ta pone nan mes disponibel den e ultimo dianan aki?

“Mi Tin e Privilegio y Deber di Anuncia e Mensahe Ey”

7. Despues cu Hesus a ser corona como Rey, cua ta e pasonan cu el a dal pa prepara su siguidornan pa e trabou cu tabata spera nan?

7 Poco despues cu Hesus a ser corona como Rey, el a dal paso pa prepara su siguidornan pa e trabou inmenso cu tabata spera nan. Manera nos a mira den Capitulo 2, el a haci un inspeccion y un trabou di limpieza for di 1914 te na principio di 1919. (Mal. 3:1-4) Na final di aña 1919, el a nombra e esclavo fiel pa guia su siguidornan. (Mat. 24:45) Djey padilanti, e esclavo aki a cuminsa distribui cuminda spiritual—via  discursonan na congreso y publicacionnan imprimi—cu bes tras bes a enfatisa e responsabilidad cu tur cristian tin di participa personalmente den e trabou di predica.

8-10. Con congresonan a duna un empuhe na e trabou di predica? Duna un ehempel. (Wak tambe e cuadro “ Congresonan Cu A Duna un Empuhe na e Trabou di Predica.”)

8 Discursonan na congreso. Despues di Prome Guera Mundial, e Studiantenan di Bijbel tabata ansioso pa sa kico nan tabatin cu haci. Pesey nan a bin hunto pa nan prome congreso grandi na Cedar Point, Ohio, di 1 pa 8 di september 1919. Riba e di dos dia, Ruman Rutherford a duna un discurso den cua el a bisa esnan presente bon cla: “Un cristian su mision riba Tera ta pa proclama e mensahe di e Reino di Señor.”

9 E momento mas emocionante di e congreso tabata riba e di cinco dia ora Ruman Rutherford a duna e discurso titula “Discurso pa Colaboradornan.” Despues a publica e discurso ey den E Toren di Vigilancia bou di e tema “Anunciando e Reino.” Ruman Rutherford a declara: “Durante momentonan di reflexion, un cristian di mes ta puntra su mes: Pakico mi ta na mundo? Y su contesta lo mester ta: Señor, den su bondad, a haci mi su embahador pa mi duna mundo e mensahe divino di reconciliacion. Y mi tin e privilegio y deber di anuncia e mensahe ey.”

10 Den e discurso historico ey, Ruman Rutherford a anuncia cu lo cuminsa publica un revista nobo—The Golden Age (cu awor yama Spierta!). Meta di e revista ta pa hende haya sa cu e Reino ta e unico speransa pa humanidad. Despues el a puntra cuanto ruman presente lo kier yuda distribui e revista aki. Segun un informe di e congreso: “E reaccion di e publico tabata emocionante. Tur 6.000 hende a lanta para hunto.” * Tabata bisto cu e hendenan cu a apoya e Rey tabata dispuesto y ansioso pa proclama su Reino.

11, 12. Segun un Toren di Vigilancia di 1920, den ki periodo e trabou cu Hesus a profetisa di dje lo a tuma luga?

11 Publicacionnan imprimi. E paginanan di E Toren di Vigilancia tabata enfatisa mas y mas con importante e obra cu Hesus a profetisa di dje ta, esta, predicacion di e bon noticia. Ban wak algun ehempel di e decada di 1920.

12 Segun Mateo 24:14, ki mensahe lo a ser proclama? Y na ki tempo e obra ey lo a tuma luga? E Toren di Vigilancia di 1 di juli 1920 a splica e mensahe ey den e articulo titula “Evangelio di e Reino”, bisando: “E bon noticia ta tocante e fin di e sistema bieu di cosnan y tocante e Reino Mesianico cu a ser estableci.” E articulo a mustra tambe bon cla na ki tempo lo a predica e mensahe aki, bisando: “Mester predica e mensahe aki den e periodo entre e gran guera mundial [Prome Guera Mundial] y e ‘tribulacion grandi.’” Pesey, segun e articulo, “awor ta e tempo ... pa predica e bon noticia na tur hende den cristiandad.”

13. Con un Toren di Vigilancia di 1921 a anima cristiannan ungi pa demostra kico tabata motiva nan pa predica?

 13 Acaso lo a pone presion riba e pueblo di Dios pa haci e trabou cu Hesus a profetisa di dje? No. E articulo “Sea Yen di Animo”, cu a sali den E Toren di Vigilancia di 15 di maart 1921, a anima cristiannan ungi pa demostra kico tabata motiva nan pa predica. Cada ruman mester a puntra su mes: E trabou di predica no ta e privilegio di mas grandi cu mi tin y alabes mi deber? E articulo a sigui bisa: “Nos ta sigur cu ora bo ta mira e trabou di predica asina, lo bo ta manera Jeremias. E palabra di Señor tabata ‘manera candela den su curason, cera den su wesonan’, y a keda urgie te cu e no por a keda sin papia.” (Jer. 20:9) E bunita animacion ey a refleha e confianza cu Jehova y Hesus tin den e rumannan fiel cu ta apoya e Reino.

14, 15. Segun un Toren di Vigilancia di 1922, den ki manera cristiannan ungi mester a haci esfuerso pa hiba e mensahe di Reino pa otro hende?

14 Con cristiannan berdadero lo mester a hiba e mensahe di Reino pa otro hende? E articulo cortico pero potente titula “Sirbishi Ta Esencial”, cu a sali den E Toren di Vigilancia di 15 di augustus 1922, a urgi cristiannan ungi pa participa “den e obra di hiba e mensahe imprimi pa e hendenan y papia cu nan na nan cas, dunando testimonio cu e Reino di cielo ta cerca.”

15 Pues, ta bisto cu di 1919 en adelante, Cristo a laga su esclavo fiel y prudente enfatisa bes tras bes cu un cristian su privilegio y deber riba Tera ta pa proclama e mensahe di Reino. Pero con e Studiantenan di Bijbel di e tempo ey a reacciona riba e animacion cu nan a haya pa participa den e trabou di proclama e Reino?

“Sirbidornan di Dios Lo Pone Nan Mes Disponibel”

16. Con algun di e ancianonan eligi a reacciona riba e pensamento cu tur cristian mester participa den sirbishi?

16 Den decada di 1920 y di 1930, algun ruman no kier a acepta e idea cu tur cristian ungi mester participa den sirbishi. E Toren di Vigilancia di 1 di november 1927 a splica kico tabata pasando: “Actualmente tin rumannan den congregacion cu ta ocupa e puesto di anciano ... cu no ta anima nan rumannan pa participa den sirbishi, y kende nan mes tambe no ta participa den sirbishi ... Nan ta mustra abiertamente cu nan no ta di acuerdo cu e idea cu nan mester bay di cas pa cas pa hiba e mensahe di Dios, di su Rey y di su Reino na e hendenan.” E articulo a bisa francamente: “A yega ora pa e sirbidornan di Dios identifica e hendenan ey, evita nan y pa laga e tipo di hombernan ey sa cu nan no por sigui mas den nan funcion como anciano.” *

17, 18. Con mayoria di ruman den e congregacionnan a reacciona riba e guia di e esclavo fiel, y con miyones di hende a reacciona durante e ultimo 100 añanan?

17 Danki Dios cu mayoria di ruman den e congregacionnan a reacciona cu entusiasmo riba e guia di e esclavo fiel. Pa nan, tabata un privilegio di por comparti e mensahe di Reino cu otro hende. E Toren di Vigilancia di 15 di maart 1926 a expresa esey asin’aki: “Sirbidornan di Dios lo pone nan mes  disponibel ... pa conta e hendenan e mensahe aki.” E rumannan fiel ey a cumpli cu e palabranan profetico di Salmo 110:3 y a demostra cu nan ta dispuesto pa apoya e Rey Mesianico cu henter nan curason.

18 Durante e ultimo 100 añanan, miyones di hende a ofrece nan mes boluntariamente pa cumpli cu e trabou di proclama e Reino. Den algun di e capitulonan cu ta sigui, nos lo bay considera con nan a predica—e metodonan y materialnan cu nan a uza—y ki resultado nan tabatin. Pero prome, laga nos considera pakico miyones di hende a participa boluntariamente den e trabou di predica e Reino, a pesar cu nos ta biba den un mundo egoista cu ta promove e actitud di “ami prome.” Segun cu nos ta considera e motibonan, ta bon pa nos puntra nos mes: Kico ta motiva mi pa comparti e bon noticia cu otro hende?

“Sigui Busca ... Prome e Reino”

19. Dicon nos ta sigui e conseho cu Hesus a duna pa “sigui busca ... prome e Reino”?

19 Hesus a conseha su siguidornan pa “sigui busca ... prome e Reino.” (Mat. 6:33) Dicon nos ta sigui e conseho ey? Basicamente, pasobra nos sa con importante e Reino ta; e ta hunga un rol hopi grandi den cumplimento di Dios su proposito. Manera nos a mira den e capitulo anterior, spirito santo gradualmente a revela berdadnan emocionante tocante e Reino. Ora e berdad precioso di e Reino touch nos curason, nos ta sinti nos motiva pa busca prome e Reino.

Mescos cu un homber cu haya un tesoro scondi ta bira supercontento, asina cristiannan tambe ta masha contento cu nan a haya e berdad di Reino (Wak paragraf 20)

20. Segun e ilustracion di e tesoro scondi, con Hesus su discipelnan lo a reacciona riba e conseho pa sigui busca prome e Reino?

20 Hesus tabata sa con su discipelnan lo a reacciona riba e conseho pa sigui busca prome e Reino. Wak e ilustracion cu el a duna di e tesoro scondi. (Lesa Mateo 13:44.) Den e ilustracion ey, un campesino pa casualidad ta haya un tesoro scondi y di biaha ta reconoce su balor. Kico e ta haci? “E ta asina contento cu el a hay’e cu e ta bay, bende tur loke e tin y cumpra e tereno ey.” Ki les esaki ta siña nos? Wel, ora nos haya e berdad di Reino y ta reconoce su balor, gustosamente nos lo haci cualkier sacrificio necesario pa nos por mantene asuntonan di Reino caminda nan mester ta: na prome luga den nos bida. *

21, 22. Con cristiannan leal cu ta apoya e Reino ta demostra cu nan ta buscando prome e Reino? Duna un ehempel.

21 Cristiannan leal cu ta apoya e Reino ta demostra cu obra, no solamente cu palabra, cu nan ta buscando prome e Reino. Nan ta dedica nan bida, nan habilidadnan y nan recursonan na e trabou di predica e Reino. Hopi ruman a haci sacrificio grandi pa nan por a drenta sirbishi di tempo completo. Tur e predicadornan boluntario ey a mira personalmente cu Jehova ta bendiciona esnan cu pone e Reino prome. Laga nos wak un ehempel di siglo pasa.

 22 Avery cu Lovenia Bristow a cuminsa sirbi hunto como colporteur (pionero) den e parti zuid di Merca na final di decada di 1920. Añanan despues, Lovenia a conta: “Ami cu Avery a pasa hopi aña dushi den e trabou di pionero. Hopi biaha, nos no tabata sa di unda nos lo a haya placa pa gasolin of pa cumpra comestibel. Pero di un manera of otro, Jehova semper a percura pa esey. Nunca nos no a stop di traha pionero. Semper nos a haya loke realmente nos tabatin mester.” Lovenia ta corda cu tempo nan tabata sirbi na Pensacola, Florida, un biaha nan placa y comestibelnan tabata cabando. Ora nan a yega na e trailer caminda nan tabata biba, nan a haya dos saco grandi cu comestibel y un carchi cu a bisa: “Cu hopi cariño, di parti di Congregacion Pensacola.” Lovenia, pensando riba e decadanan cu el a traha den sirbishi di tempo completo, a bisa: “Jehova nunca ta bandona nos. Nunca e ta traiciona e confianza cu nos ta pone den dje.”

23. Kico bo ta pensa di e berdad di Reino cu bo a haya, y kico bo ta determina pa haci?

23 Nos tur no por dedica e mesun cantidad di ora na e predicacion, pasobra nos circunstancia ta varia. Pero nos tur tin e privilegio di predica e bon noticia cu henter nos alma. (Col. 3:23) Nos ta aprecia e berdad precioso di Reino cu nos a haya, y pesey anos ta dispuesto—si, ansioso—pa haci cualkier sacrificio necesario pa nos por sirbi Dios mas tanto posibel. Abo tambe ta determina pa haci esey?

24. Kico ta un di e logronan di mas grandi di e Reino den e ultimo dianan?

24 Durante e ultimo 100 añanan, en berdad e Rey a cumpli cu su palabranan profetico cu nos ta haya na Mateo 24:14. Y el a haci esey sin forsa ningun hende. Despues cu su siguidornan a sali for di e mundo egoista aki, nan a ofrece nan mes boluntariamente pa predica. Nan ta predicando e bon noticia rond mundo. Esey ta parti di e señal di Hesus su presencia como Rey y alabes un di e logronan di mas grandi di e Reino den e ultimo dianan.

^ par. 5 Bijbel ta conecta serena cu abundancia.—Gen. 27:28; Mik. 5:7.

^ par. 10 E pamfleta titula To Whom the Work Is Entrusted a splica: “Meta di e campaña cu e revista The Golden Age ta pa predica e mensahe di Reino di cas pa cas ... Despues di presenta e mensahe, mester laga un ehemplar di The Golden Age na cada cas, sea cu e hendenan abona of no.” Pa añanan largo despues di esey, e esclavo fiel a keda anima e rumannan pa ofrece e hendenan pa abona riba The Golden Age y tambe riba E Toren di Vigilancia. Cuminsando dia 1 di februari 1940, e pueblo di Jehova a ser anima pa laga ehemplarnan los di e revistanan y pa informa e cantidad cu nan a laga.

^ par. 16 E tempo ey tabata tene eleccion democratico den congregacion pa scoge anciano. Pues, un congregacion por a keda sin vota pa ruman homber cu tabata contra di sirbishi. Den Capitulo 12, nos lo trata con esey a cambia y con nan a cuminsa nombra anciano teocraticamente.

^ par. 20 Hesus a presenta e mesun punto ey den su ilustracion di e comerciante cu tabata biaha en busca di un perla di gran balor. Ora e comerciante a haya e perla, el a bende tur cos y cumpr’e. (Mat. 13:45, 46) E dos ilustracionnan ey ta siña nos tambe cu hende por siña e berdad di Reino na diferente manera. Tin ta hay’e pa casualidad; otronan ta busc’e. Pero un cos ta sigur, sin importa con nos a haya e berdad, nos ta dispuesto pa haci sacrificio pa nos por pone e Reino na prome luga den nos bida.