Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 7

Algun Metodo di Predica—Nan Ta Uza Tur Medio Posibel

Algun Metodo di Predica—Nan Ta Uza Tur Medio Posibel

ENFOKE DI E CAPITULO

E pueblo di Dios ta uza varios metodo pa predica na mas tanto hende posibel

1, 2. (a) Ki metodo Hesus a uza pa papia cu un publico grandi? (b) Con e discipelnan fiel di Cristo a sigui su ehempel, y cu ki meta?

UN GRAN cantidad di hende a aglomera rond di Hesus canto di un lago pa scuch’e, pero el a bay sinta den un boto y a hala un poco for di canto. Dicon? Pasobra e tabata sa cu e awa lo a pone su stem zona mas duro y henter e multitud grandi ey lo por a tende su mensahe mas mihor.—Lesa Marco 4:1, 2.

2 Rond di tempo cu e Reino a ser estableci, e discipelnan fiel di Cristo a sigui su ehempel. Nan a uza metodonan innovativo pa predica e bon noticia di Reino na un publico grandi. Bou di guia di e Rey, e pueblo di Dios ta sigui bin cu ideanan nobo y ta adapta nan mes na circunstancianan nobo y tecnologia nobo. Nos kier predica na mas tanto hende posibel prome cu e fin yega. (Mat. 24:14) Laga nos trata algun di e metodonan cu nos a yega di uza of ta uzando pa predica na hende, sin importa unda nan ta biba. Pensa tambe riba maneranan cu abo por imita e fe di e rumannan cu a predica e bon noticia rond di tempo cu e Reino a ser estableci.

Algun Metodo Cu A Uza pa Predica na un Publico Grandi

3. Kico a pone cu e enemigonan di e berdad no a keda niun tiki contento cu nos a publica discursonan di Ruman Russell den corant?

3 Corant. For di 1879, Ruman Russell cu su colaboradornan a cuminsa publica E Toren di Vigilancia y asina a hiba e mensahe di Reino na hopi hende. Pero den e decada prome cu 1914, Cristo aparentemente a dirigi asuntonan di tal manera cu e bon noticia por a yega na un publico hopi mas grandi. E serie di suceso cu a hiba na esey a cuminsa na 1903. E aña ey, dr. E. L. Eaton, vocero di un grupo di pastoor protestant na Pennsylvania, a invita Ruman Charles Taze Russell na un serie di debate riba doctrina biblico. Eaton a bisa den un carta dirigi na Russell: “Mi ta kere cu un debate publico riba algun di e cuestionnan di cua ami cu bo ta diferencia di opinion ... lo ta di gran interes pa e publico.” Russell cu su colaboradornan tambe a pensa cu e publico lo ta interesa den esey. Pues, nan a laga publica e debatenan ey den un corant  importante, The Pittsburgh Gazette. E articulonan den corant a bira asina popular y Russell su splicacion di berdadnan biblico tabata asina convencente cu e corant a ofrece pa sigui publica e discursonan di Russell tur siman. Sin duda, e enemigonan di e berdad lo no a keda niun tiki contento cu esey.

Na aña 1914, mas cu 2.000 corant tabata publica e sermonnan di Russell

4, 5. Ki cualidad Russell a desplega, y con rumannan cu tin cierto autoridad den e organisacion por imita su ehempel?

4 No a dura hopi cu mas corant kier a publica e discursonan di Russell. Na aña 1908, E Toren di Vigilancia a informa cu e sermonnan tabata sali den “diesun corant regularmente.” Sinembargo, rumannan cu tabata bon na altura di e mundo editorial a bisa Russell cu si e oficina di Sociedad muda for di Pittsburgh pa un stad cu tabata mas conoci, mas corant lo a publica e articulonan basa riba Bijbel. Despues di a evalua e conseho ey y otro factornan, Russell a dicidi cu e oficina lo bay Brooklyn, New York, na 1909. Cu ki resultado? Apenas algun luna despues cu nan a muda, rond di 400 corant tabata publica e discursonan, y constantemente tabata bin mas acerca. Figura bo, pa ora cu e Reino a ser estableci na 1914, mas cu 2.000 corant na cuater idioma tabata publica e sermonnan y articulonan di Russell.

5 Ki les importante nos ta siña for di esey? Wel, rumannan cu tin cierto autoridad den e organisacion di Dios ta haci bon di imita e humildad di Ruman Russell. Den ki manera? Ora di tuma decision importante, ta bon pa tene cuenta cu conseho di otro hende.—Lesa Proverbionan 15:22.

6. Con e berdadnan publica den corant a yuda un persona?

6 E berdadnan di Reino cu tabata sali den corant a cambia bida di hopi hende. (Heb. 4:12) Por ehempel, un ruman muher cu yama Ora Hetzel, kende a batisa na 1917, tabata un di e tantisimonan cu a tende di e berdad via di e articulonan ey. Ruman Hetzel a conta: “Despues cu mi a casa, mi a bay bishita mi mama na Rochester, Minnesota. Ora m’a yega, m’a hay’e ta corta articulonan for di corant. Nan tabata e sermonnan di Russell. Mi mama a splica mi e cosnan cu el a siña for di e articulonan.” Ruman Hetzel a acepta e berdad, y pa casi 60 aña e tabata un fiel proclamador di e Reino di Dios.

7. Dicon e rumannan cu tabata dirigi e organisacion a dicidi di stop di publica e discursonan den corant?

7 Na 1916, dos suceso clave a pone e rumannan cu tabata dirigi e organisacion reconsidera si mester sigui publica e discursonan den corant pa hende por haya e bon noticia. Pa cuminsa, e Guera Mundial cu tabata tumando luga a causa un scarsedad di entre otro papel. Un informe na 1916 for di nos departamento di corant na Inglatera a hala atencion na esaki, bisando: “Actualmente, tin apenas 30 corant ta publica e sermonnan. Y muy probablemente e cantidad aki lo baha considerablemente debi na e prijs di papel cu ta subiendo keto bay.” E di dos suceso tabata e morto di Ruman Russell dia 31 di october 1916. Pues, E Toren di Vigilancia di 15 di  december 1916 a anuncia: “Awor cu Ruman Russell a fayece, nos lo stop di publica e sermonnan [den corant].” Maske e forma di predica ey a yega na un fin, otro metodonan si a sigui cu hopi exito. Un di metodonan ey tabata e “Foto-Drama di Creacion.”

8. Cuanto trabou tabata envolvi den produccion di e “Foto-Drama di Creacion”?

8 Un programa audiovisual. Russell cu su colaboradornan a traha mas o menos tres aña pa produci e “Foto-Drama di Creacion”, y nan a estren’e na 1914. (Prov. 21:5) E Drama, manera nan a yam’e, tabata un produccion innovativo cu a consisti di un combinacion di pelicula, zonido sincronisa y slides na color. Cientos di hende a participa den e escenanan di Bijbel cu nan a filma y cu a inclui hasta bestia. Segun un informe di 1913, pa nan por a filma escenanan di e bida di Noe, nan a uza casi tur e bestianan di un dierentuin grandi.  Ademas, artistanan na Filadelfia, London, New York y Paris a duna color na cada un di e cientos di slides.

9. Dicon nan a hinca asina tanto tempo y placa den produccion di e “Foto-Drama”?

9 Dicon nan a hinca asina tanto tempo y placa den produccion di e “Foto-Drama”? Un resolucion cu nan a presenta na e serie di congreso di 1913 ta splica esey: “E exito grandi cu corantnan Mericano a logra uzando plachi y comics ... y e exito grandi cu pelicula tabatin, a mustra claramente con efectivo e metodonan aki ta. Como cu nos kier mehora como predicador y maestro di Bijbel, nos ta pensa cu ta bale la pena pa uza pelicula y slides cu ta un metodo efectivo cu predicadornan y maestronan por uza pa atrae hende.”

Ariba: Un projector di “Foto-Drama”; abou: Slides di “Foto-Drama” na color

10. Con extenso presentacion di e “Foto-Drama” tabata?

10 Durante 1914, nan tabata pasa e “Foto-Drama” tur dia den 80 stad. Casi 8 miyon hende na Merca y Canada a mira e presentacion. E mesun aña ey, nan a pasa e “Foto-Drama” na Alemania, Australia, Dinamarca, Finlandia, Gran Britania, Noruega, Nueva Zelandia, Suecia y Suisa. Un version simplifica di e produccion, cu no a inclui pelicula, a ser hinca den otro pa uza den stadnan mas chikito. E version ey, “Drama Eureka”, tabata mas barata pa produci y mas facil pa transporta. Na 1916, ya e “Foto-Drama” of e “Drama Eureka” tabata traduci na Aleman, Armenio, Danes, Frances, Griego, Italiano, Noruechi, Polaco, Spaño y Sueco.

Durante 1914, nan a pasa e “Foto-Drama” pa un gran cantidad di hende

11, 12. Ki impacto e “Foto-Drama” tabatin riba un mucha homber, y ki ehempel e mucha homber ey a pone?

11 E traduccion Frances di e “Foto-Drama” tabatin un gran impacto riba Charles Rohner, un mucha homber di 18 aña. El a conta: “Nan a present’e den mi stad Colmar, na Alsace, Francia. For di cuminsamento mi tabata impresiona cu e manera cla cu e drama a presenta e berdad di Bijbel.”

12 Como resultado, Charles a batisa y na 1922 el a drenta sirbishi di tempo completo. Un di su prome asignacionnan tabata pa yuda presenta e “Foto-Drama” na gruponan grandi di hende na Francia. Tocante e trabou aki, Charles a conta: “Mi tabatin varios asignacion: toca violin, fungi como sirbidor di cuenta y tambe como sirbidor di literatura. Ademas, prome cu e programa cuminsa, mi mester a pidi na un manera respetuoso si e publico por a keda keto. Durante pauze, nos tabata ofrece literatura. Nos a asigna sea un ruman homber of ruman muher na cada seccion di e sala. Cada un di nan tabata cana cu yen di literatura den nan brasa y tabata acerca tur hende. Ademas, na entrada di e sala nos tabatin mesanan cu hopi literatura.” Na 1925, Charles a haya invitacion pa sirbi na Betel di Brooklyn, New York. Eynan el a haya e tarea di dirigi un orkesta pa e radioemisora nobo, WBBR, cu e rumannan a habri. Despues cu nos a considera e ehempel aki di Ruman Rohner, ta bon pa puntra nos mes: Ami ta dispuesto pa acepta cualkier asignacion cu mi haya pa yuda plama e mensahe di Reino?—Lesa Isaias 6:8.

13, 14. Con e rumannan a uza radio pa transmiti e bon noticia? (Wak tambe e cuadronan “ Programacion di WBBR” y “ Un Congreso Hopi Importante.”)

 13 Radio. Den decada di 1920, e rumannan no tabata pasa e “Foto-Drama” hopi mas. Na luga di esey, radio a cuminsa bira un medio eficaz pa transmiti e bon noticia di Reino. Dia 16 di april 1922, Ruman Rutherford a duna su prome discurso transmiti via radio for di e Metropolitan Opera House na Filadelfia, Pennsylvania. Segun calculo, 50.000 hende a tende e discurso ey titula “Miyones di Hende na Bida Awor Lo No Muri Nunca.” Anto na 1923, tur hende por a scucha un parti di e programa di congreso pa prome biaha na radio. Ademas di uza emisoranan comercial, e rumannan cu tabata dirigi e organisacion a dicidi cu lo ta mihor pa nos tin nos mes radioemisora. Nan a trah’e na Staten Island, New York, y nan a yam’e WBBR. E prome transmision a bay den aire dia 24 di februari 1924.

Nan ta calcula cu 50.000 hende a tende e discurso “Miyones di Hende na Bida Awor Lo No Muri Nunca” na radio, na 1922

14 E Toren di Vigilancia di 1 di december 1924 a splica kico tabata e proposito di WBBR: “Nos ta kere cu te aworaki radio ta e manera mas economico y efectivo pa transmiti e mensahe di e berdad.” E articulo a sigui bisa: “Si Señor ta haya cu ta necesario pa nos tin mas radioemisora pa transmiti e berdad, e lo percura di un manera of otro pa nos haya e placa pa esey.” (Sal. 127:1) Na 1926, e pueblo di Jehova tabata doño di seis radioemisora. Dos di nan tabata na Merca: WBBR na New York y WORD den bisindario di Chicago. E otro cuaternan tabata na Canada: Alberta, British Columbia, Ontario y Saskatchewan.

15, 16. (a) Con clero na Canada a reacciona riba nos programanan na radio? (b) Con e discursonan na radio y e trabou di cas pa cas a complementa otro?

15 Di mes, clero di cristiandad no por a keda sin ripara con eficaz e rumannan tabata den transmiti e berdad biblico via radio. Albert Hoffman, kende tabata sa hopi di e trabou cu nan tabata haci na e radioemisora na Saskatchewan, Canada, a conta: “Cada bes e Studiantenan di Bijbel [manera tabata yama testigonan di Jehova e tempo ey] tabata bira mas conoci. Te cu 1928, e rumannan a logra duna un bon testimonio. Pero e aña ey clero a pone asina tanto presion riba funcionarionan di gobierno cu tur radioemisora na Canada di e Studiantenan di Bijbel a perde nan permit pa transmiti.”

16 A pesar cu nan a cera nos radionan na Canada, e emisoranan comercial si a sigui transmiti e discursonan biblico. (Mat. 10:23) Pa e programanan ey por a alcansa mas hende, E Toren di Vigilancia y The Golden Age (cu awor yama Spierta!) tabatin un lista di e emisoranan comercial cu tabata transmiti berdad biblico. Di e manera ey e publicadornan cu tabata bay di cas pa cas por a anima e hendenan pa scucha e discursonan na nan emisora local. Ki impacto esey tabatin? E Bulletin di januari 1931 a  bisa: “E transmision di radio tabata un berdadero estimulo pa e rumannan cu tabata predica di cas pa cas. Na oficina, nos tabata ricibi hopi informe tocante hende cu tabata scucha e transmision di e discursonan di Ruman Rutherford y pesey nan tabata cla pa acepta e bukinan cu e rumannan a ofrece nan.” E Bulletin a describi e transmisionnan di radio y e trabou di cas pa cas como “e dos metodonan mas importante di e organisacion di Señor pa predica.”

17, 18. Aunke circunstancia a cambia, con radio a sigui hunga un papel den transmiti e mensahe di Reino?

17 Den decada di 1930, oposicion contra nos uzo di radio comercial a bira mas intenso. Pues, na final di 1937, e pueblo di Jehova a adapta nan mes na e cambio aki. Nan a stop cu transmision comercial y a cuminsa concentra mas y mas riba sirbishi di cas pa cas. * Pero toch radio a sigui hunga un papel importante den transmiti e mensahe di Reino na algun luga aisla y den areanan caminda tabata dificil pa predica. Por ehempel, di 1951 pa 1991, un emisora na West Berlin, Alemania, tabata transmiti discursonan biblico regularmente. Di e manera aki e rumannan cu tabata biba den e parti cu e tempo ey tabata conoci como Alemania Oriental por a tende e mensahe di Reino. Cuminsando na 1961, y pa mas cu 30 aña, un radioemisora nacional na Surnam tabata pasa un programa semanal di 15 minuut cu a transmiti berdadnan biblico. Di 1969 pa 1977, e organisacion a graba mas cu 350 programa pa e serie titula “Henter e Scritura Ta Probechoso.” Dos shen y nobentiun radioemisora tabata pasa e programanan aki den 48 estado na Merca. Na 1996, un radioemisora na Apia, ciudad capital di Samoa, un nacion den Ocean Sur Pacifico, tabata transmiti un programa semanal titula “Contesta Riba Bo Preguntanan di Bijbel.”

18 Segun cu siglo 20 tabata yega na su final, radio no tabata hunga un papel importante mas den transmiti e bon noticia. Pero avance den tecnologia a haci posibel cu e rumannan por logra predica na un publico mas grandi cu nunca prome.

19, 20. Dicon e pueblo di Jehova a traha e website jw.org, y con efectivo esaki ta? (Wak tambe e cuadro “ JW.ORG.”)

19 Internet. Na 2013, mas cu 2,7 mil miyon hende, casi 40 porciento di e poblacion di mundo, tabata conecta cu Internet. Segun algun calculo, rond di 2 mil miyon hende ta subi Internet via aparatonan mobil, manera telefon y tablet. Mundialmente, e cifra ey ta creciendo keto bay, specialmente na Africa, caminda actualmente tin mas cu 90 miyon abonament di Internet pa aparatonan mobil. E desaroyonan ey a trece un cambio drastico den e manera cu hende ta ricibi informacion.

20 Na 1997, e pueblo di Jehova a cuminsa uza e medio di comunicacion masal aki. Na 2013, e website jw.org a bira  disponibel na mas o menos 300 idioma, y e tabatin informacion basa riba Bijbel pa download na mas cu 520 idioma. Tur dia, e website ta haya mas cu 750.000 bishitante. Tur luna, fuera di wak video, hende ta download mas cu 3 miyon buki, 4 miyon revista y 22 miyon grabacion audio.

21. Kico bo a siña for di e experencia di Sina?

21 E website a bira un medio poderoso pa hende por haya e bon noticia di e Reino di Dios, hasta na paisnan caminda nos trabou di predica ta bou di restriccion. Por ehempel, na principio di 2013, un homber cu yama Sina a topa cu e website jw.org y a yama e oficina principal di nos organisacion mundial na Merca, pidiendo mas informacion tocante Bijbel. Dicon e yamada aki a capta atencion? Wel, Sina ta bin di antecedente musulman y ta biba den un pueblito aisla den un pais caminda e obra di testigonan di Jehova ta bou di restriccion severo. Como resultado di e yamada aki, e rumannan a haci areglo pa Sina por studia Bijbel dos biaha pa siman cu un testigo di Jehova na Merca. Nan tabata tene e estudio via di Internet, uzando camera pa nan por wak otro.

Siñando Hende Individual

22, 23. (a) Pakico e metodonan pa yega na mas tanto hende no a reemplasa e sirbishi di cas pa cas? (b) Con e Rey a bendiciona nos esfuerso?

22 Na ningun momento no tabata e intencion pa un di e metodonan cu nos a uza pa yega na mas tanto hende—manera corant, e “Foto-Drama”, programanan di radio y e website—reemplasa e sirbishi di cas pa cas. Dicon no? Pasobra e pueblo di Jehova ta sigui e ehempel di Hesus. El a haci mas  cu djis predica na multitudnan grandi di hende; el a concentra tambe riba yuda personanan individual. (Luc. 19:1-5) Ademas, Hesus a siña su discipelnan pa haci mescos, y el a duna nan un mensahe pa predica na e hendenan. (Lesa Lucas 10:1, 8-11.) Manera nos a considera den Capitulo 6, e rumannan cu tabata dirigi e organisacion semper a anima cada sirbidor di Jehova pa papia cu hende personalmente.—Echo. 5:42; 20:20.

23 Shen aña despues cu e Reino a ser estableci, casi 8 miyon publicador ta participa activamente den e trabou di siña otro hende tocante e proposito di Dios. Pues, no tin duda cu e Rey a bendiciona e metodonan cu nos a uza pa anuncia e Reino. Manera e siguiente capitulo lo mustra, el a hasta duna nos e materialnan cu nos tin mester pa predica e bon noticia na tur nacion, tribu y lenga.—Rev. 14:6.

^ par. 17 Na 1957, e rumannan cu tabata dirigi e organisacion a dicidi di cera e ultimo radioemisora cu nos tabatin, esta, WBBR na New York.

Mas Informacion

E TOREN DI VIGILANCIA (EDICION DI ESTUDIO)

Con Nos Mester “Contesta Cada Persona”?

Con nos por uza Bijbel pa rasona na un manera eficaz ora nos haya nos cu pregunta dificil? E articulo aki ta analisa tres metodo cu nos por uza pa duna contesta convencente.