Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 9

Resultado di e Obra di Predica—“E Cunucunan ... Ta Cla pa Cosecha”

Resultado di e Obra di Predica—“E Cunucunan ... Ta Cla pa Cosecha”

ENFOKE DI E CAPITULO

Jehova a pone e simianan di e berdad di Reino crece

1, 2. (a) Kico e discipelnan no por a compronde? (b) Di ki tipo di cosecha Hesus tabata papiando?

E DISCIPELNAN no por a compronde kico Hesus tabata kiermen ora el a bisa nan: “Hisa boso cara wak e cunucunan; nan ta cla pa cosecha.” Nan a wak den e direccion cu Hesus a mustra, pero e unico cos cu nan a mira ta cunucunan berde berde, color di puspas of cebada cu a caba di spruit. Podise e discipelnan a pensa: Cla pa cosecha? Ainda falta varios luna prome cu e tempo di cosecha yega.—Juan 4:35.

2 Pero Hesus no tabata papiando di cosecha literal. Mas bien, el a uza e ocasion ey pa siña su discipelnan dos les importante relaciona cu un cosecha spiritual, esta, un recogemento di hende pa forma parti di e congregacion cristian. Kico e dos lesnan ey ta? Wel, laga nos analisa e relato.

Pone Man na Obra y Cosecha Alegria

3. (a) Kico kisas a pone Hesus bisa cu “e cunucunan ... ta cla pa cosecha”? (Wak e nota.) (b) Con Hesus a aclaria kico e tabata kiermen?

3 E combersacion cu Hesus tabatin cu su discipelnan a tuma luga na cabamento di aña 30, pega cu un stad di Samaria cu yama Sicar. Mientras cu e discipelnan di Hesus a bay cumpra cos den e stad, Hesus a keda warda nan na un pos. Eynan el a comparti berdadnan spiritual cu un señora cu a capta mesora e importancia di loke Hesus a siñ’e. Ora e discipelnan a bin bek, e muher a core bay Sicar pa conta su bisiñanan e cosnan maraviyoso cu el a siña. Loke el a conta nan a lanta nan interes, y hopi di su bisiñanan a core bay na e pos pa topa cu Hesus. Kisas tabata na e momento ey cu Hesus a mira di leu, mas leu cu e cunucunan, un grupo grandi di Samaritano biniendo cerca dje y pesey el a bisa: “Wak e cunucunan; nan ta cla pa cosecha.” * Anto pa aclaria cu e tabata referi na un cosecha spiritual, y no uno literal, el a agrega: “Esun cu ta cosecha ... ta recoge fruta pa bida eterno.”—Juan 4:5-30, 36.

4. (a) Kico ta e dos lesnan cu Hesus a siña su discipelnan tocante e cosecha? (b) Cua ta e preguntanan cu nos ta bay analisa?

4 Kico ta e dos lesnan importante cu Hesus a siña su discipelnan tocante e cosecha spiritual? E prome les ta cu e trabou ta  urgente. Ora el a bisa cu “e cunucunan ... ta cla pa cosecha”, esey tabata eigenlijk, un yamada pa su siguidornan pone man na obra. Pa laga nan mira con urgente esey tabata, el a agrega: “Ya caba esun cu ta cosecha ta ricibi pago.” Si, e cosecha ya a cuminsa caba. No tabatin tempo pa perde. E di dos les ta cu e trahadornan ta contento. Hesus a bisa cu tanto esun cu ta sembra como esun cu ta cosecha lo “alegra hunto.” (Juan 4:35b, 36) “Hopi di e Samaritanonan ... a pone fe den Hesus”, y esey sin duda a alegra Hesus su curason. Asina tambe su discipelnan lo a sinti un goso profundo segun cu nan a traha cu henter nan alma den e trabou di cosecha. (Juan 4:39-42) E relato aki di e prome siglo ta masha importante pa nos pasobra e ta ilustra bon loke ta tumando luga durante e cosecha spiritual di mas grandi den historia. Ki tempo e cosecha aki a cuminsa? Ken ta participando den dje? Kico ta e resultado?

Nos Rey Ta Dirigi e Cosecha di Mas Grandi den Historia

5. Ken ta dirigi e trabou di cosecha cu ta tuma luga rond mundo, y con e vision di Juan ta indica cu e trabou ta urgente?

5 Den un vision cu apostel Juan a haya, Jehova a revela cu el a apunta Hesus pa dirigi e trabou di cosecha, esta, recogemento di un multitud di hende rond mundo. (Lesa Revelacion 14:14-16.) Den e vision aki, Juan a mira Hesus cu un corona y cu un machete. E “corona di oro riba [Hesus] su cabes” a confirma su posicion como e Rey na mando, y e “machete skerpi den su man” a confirma su papel di Cosechador. Jehova a enfatisa cu e trabou ta urgente, ya cu el a declara via un angel cu “e cosecha di tera ta hecho hecho.” Si, “e ora pa cosecha a yega.” No tin tempo di perde. Ora Jehova a bisa Hesus “zwaai bo machete”, el a zwaai su machete y a recoge e cosecha di tera, es decir, el a recoge hende rond mundo y trece nan den e congregacion cristian. E vision emocionante aki ta bolbe recorda nos cu “e cunucunan ... ta cla pa cosecha.” Y e por yuda nos determina na ki tempo e trabou di e cosecha aki a cuminsa. Con asina? Laga nos ban wak.

6. (a) Ki ora “e tempo di cosecha” a cuminsa? (b) Ki ora e “cosecha di tera” a cuminsa? Splica.

6 E vision di Juan den Revelacion capitulo 14 ta describi Hesus, e Cosechador, cu un corona riba su cabes (versiculo 14). Esey ta indica cu su nombramento como Rey na 1914 ya a tuma luga caba. (Dan. 7:13, 14) Poco despues di esey, Hesus a haya instruccion pa cuminsa cu e trabou di cosecha (versiculo 15). Den e ilustracion di Hesus tocante e cosecha di e trigo, nos ta haya cu e suceso a tuma luga den e mesun secuencia. Eynan, Hesus a bisa: “E cosecha ta conclusion di un era.” Pues, e tempo di cosecha y e conclusion di e era aki a cuminsa pareu, na 1914. (Mat. 13:30, 39) Awe, nos por wak bek y mira cu e trabou mes di cosecha e trigo a cuminsa algun aña despues cu Hesus a ser corona como Rey. Prome, di 1914 pa cuminsamento di 1919, Hesus a efectua un trabou di limpieza—un purificacion—entre su siguidornan ungi.  (Mal. 3:1-3; 1 Ped. 4:17) Despues, na 1919, “e cosecha di tera” a cuminsa. Anto Hesus no a perde tempo; mesora el a uza e esclavo fiel—cu el a caba di nombra—pa yuda nos rumannan mira e urgencia di e trabou di predica. Laga nos wak kico a pasa.

7. (a) Kico a yuda e rumannan mira e urgencia di e trabou di predica? (b) E esclavo fiel a anima nos rumannan pa haci kico?

7 Na juli 1920, E Toren di Vigilancia a comenta: “Nos por mira claramente for di un analisis di e Scritura cu e congregacion a ricibi e privilegio di anuncia na e hendenan un mensahe tocante e Reino.” Por ehempel, e buki profetico di Isaias a yuda e rumannan mira cu mester a predica e bon noticia di Reino rond mundo. (Isa. 49:6; 52:7; 61:1-3) Nan no tabatin niun idea con nan lo a logra haci e trabou ey, pero nan a confia cu Jehova lo a habri e caminda pa nan. (Lesa Isaias 59:1.) Como cu nan a bin compronde e urgencia di e trabou di predica, e esclavo fiel a anima e rumannan pa haci mas den e trabou di predica. Con e rumannan a reacciona?

8. Kico ta e dos puntonan tocante e trabou di predica cu e rumannan a compronde na 1921?

8 Na december 1921, E Toren di Vigilancia a comenta: “E aña aki tabata e mihor cu nos tabatin. Ademas durante 1921, e cantidad di hende cu a tende e mensahe di e berdad tabata mas tanto cu cualkier aña prome cu esey.” E revista a agrega: “Ainda tin hopi cos di haci ... Laga nos haci e cosnan aki cu un curason contento.” Tuma nota cu e rumannan a compronde cu e trabou di predica ta urgente y cu e trahadornan ta contento. Esaki ta e mesun dos puntonan importante cu Hesus a siña su apostelnan.

9. (a) Kico E Toren di Vigilancia a comenta na 1954 tocante e trabou di cosecha, y dicon? (b) Durante e ultimo 50 añanan, ki aumento mundial tabatin den e cantidad di publicador? (Wak e diagram “ Aumento Mundial.”)

9 Den decada di 1930, despues cu e rumannan a compronde cu un multitud grandi di otro carne lo reacciona bon riba e mensahe di Reino, e trabou di predica a bira mas intensivo ainda. (Isa. 55:5; Juan 10:16; Rev. 7:9) Cu ki resultado? E cantidad di publicador di e mensahe di Reino a subi di 41.000 na 1934 pa 500.000 na 1953. E Toren di Vigilancia di 1 di december 1954 a conclui corectamente: “Ta e spirito di Jehova y e poder di su Palabra a logra e tremendo cosecha mundial aki.” *Zac. 4:6.

Aumento Mundial

Country

1962

1987

2013

Australia

15.927

46.170

66.023

Brazil

26.390

216.216

756.455

Francia

18.452

96.954

124.029

Italia

6.929

149.870

247.251

Japon

2.491

120.722

217.154

Mexico

27.054

222.168

772.628

Nigeria

33.956

133.899

344.342

Filipinas

36.829

101.735

181.236

Merca

289.135

780.676

1,203.642

Zambia

30.129

67.144

 162.370

CANTIDAD DI ESTUDIO DI BIJBEL TA AUMENTA

1950

234.952

1960

646.108

1970

1.146.378

1980

1.371.584

1990

3.624.091

2000

4.766.631

2010

8.058.359

 Ilustracionnan Impactante Cu A Mustra Kico Lo Ta Resultado di e Cosecha

10, 11. E ilustracion di e simia di mosterd ta enfatisa ki tres aspecto di e crecemento di e simia?

10 Hesus a duna algun ilustracion impactante cu ta crea un imagen mental bibo tocante e Reino, y mediante e ilustracionnan aki el a profetisa e resultado di e trabou di cosecha. Por ehempel, laga nos analisa e ilustracion di e simia di mosterd y esun di zuurdeeg. Nos lo concentra specialmente riba e manera cu nan a cumpli den e tempo di fin.

11 E ilustracion di e simia di mosterd. Un homber ta planta un simia di mosterd. E simia ey ta crece y bira un mata grandi caminda parha ta haya refugio. (Lesa Mateo 13:31, 32.) Ki aspectonan di e crecemento di e simia e ilustracion aki ta enfatisa? (1) E grado di crecemento ta asombroso. “E simia di mas chikito” ta bira un mata cu “taki grandi.” (Mar. 4:31, 32) (2) Crecemento ta garantisa. “Despues cu sembr’e, e ta spruit.” Hesus no a bisa cu “kisas e ta spruit.” No, el a bisa: “E ta spruit.” Pues, niun hende no por stroba su crecemento. (3) E mata cu ta sigui crece ta atrae bishitante y ta duna nan luga di biba. “E parhanan di cielo ta bin” y ta “haya luga di biba den su sombra.” Con e tres aspectonan aki ta aplica na e cosecha spiritual di nos tempo?

12. Con e ilustracion di e simia di mosterd ta aplica na e cosecha di nos tempo? (Wak tambe e diagram “ Cantidad di Estudio di Bijbel Ta Aumenta.”)

12 (1) Grado di crecemento: E ilustracion ta resalta crecemento di e congregacion cristian y con e mensahe di Reino a plama. E simia di mosterd ta representa e trahadornan di e cosecha. Desde 1919, Hesus a recoge e trahadornan diligente aki y trece nan den e congregacion cristian purifica. Na e tempo ey, e cantidad di trahador tabata tiki, pero esey a aumenta rapidamente. En realidad, e crecemento na cuminsamento di decada di 1900 te cu awe tabata fenomenal. (Isa. 60:22) (2) Crecemento ta garantisa: Niun hende no por stroba e crecemento di e congregacion cristian. Ni maske cuanto e enemigonan di Dios a opone e simia chikito ey, toch el a vence tur obstaculo y a sigui crece. (Isa. 54:17) (3) Luga di biba: “E parhanan di cielo” cu ta haya luga di biba den e mata ta representa e miyones di personanan di curason sincero cu a bira parti di e congregacion cristian. Nan ta bin for di mas o menos 240 pais y a reacciona faborablemente riba e mensahe di Reino. (Eze. 17:23) Den e congregacion, nan ta ricibi cuminda spiritual, animacion y proteccion.—Isa. 32:1, 2; 54:13.

E ilustracion di e simia di mosterd ta mustra cu personanan den e congregacion cristian ta haya proteccion y un luga di biba (Wak paragraf 11, 12)

13. E ilustracion di zuurdeeg ta enfatisa ki dos aspecto di crecemento?

13 E ilustracion di zuurdeeg. Un muher ta agrega un poco zuurdeeg na un mansa di hariña, y e zuurdeeg ta fermenta henter e mansa. (Lesa Mateo 13:33.) Ki aspecto di crecemento e ilustracion aki ta enfatisa? Laga nos considera dos. (1) Crecemento ta causa transformacion. E zuurdeeg a pone cu “henter e mansa a fermenta.” (2) Crecemento ta penetra tur caminda. E zuurdeeg ta fermenta tur “tres midi di hariña”, si, henter e mansa. Con e dos aspectonan aki ta aplica na e cosecha spiritual di nos tempo?

14. Con e ilustracion di zuurdeeg ta aplica na e cosecha di awe?

 14 (1) Transformacion: E zuurdeeg ta representa e mensahe di Reino, y e mansa di hariña ta representa humanidad. Mescos cu zuurdeeg ta causa un cambio den e hariña ora bo mescla nan dos hunto, asina e mensahe di Reino ta causa un transformacion den curason di hende ora nan acepta e mensahe. (Rom. 12:2) (2) Ta penetra tur caminda: E proceso di fermentacion ta representa e plamamento di e bon noticia di Reino. Mescos cu e zuurdeeg ta penetra den henter e mansa, asina tambe e mensahe di Reino ta penetra “te na e parti mas leu di Tera.” (Echo. 1:8) E aspecto aki di e ilustracion ta indica tambe cu e mensahe di Reino lo yega hasta na paisnan caminda nos trabou di predica ta prohibi, maske kisas mayoria di hende no sa mes di nos actividadnan di predica den e partinan ey di mundo.

15. Con e palabranan di Isaias 60:5 y 22 a cumpli? (Wak tambe pagina 93, “ Ta Jehova A Haci Esey Posibel”, y pagina 96-97 “‘ Esun di Mas Menos’ A Bira ‘un Nacion Poderoso.’”)

15 Un 800 aña prome cu Hesus a conta e ilustracionnan ey, Jehova tambe, via Isaias, a uza ilustracionnan impactante pa profetisa con extenso e cosecha spiritual di nos tempo lo ta y e goso  cu e cosecha aki lo trece. * Jehova a describi cu un gran cantidad di hende “for di leu” ta sigui drenta den su organisacion. Anto Jehova a dirigi su mes na un muher, cu awe ta ser representa pa e resto ungi riba Tera, y a bis’e: “Lo bo mira y keda radiante, y bo curason lo ta yen yen di goso, pasobra e abundancia di lama lo wordo entrega na bo, e rikesa di e nacionnan lo bin cerca bo.” * (Isa. 60:1, 4, 5, 9) E palabranan ey a resulta berdad. Awe, rumannan cu tin hopi tempo ta sirbi Jehova en berdad ta briya di felicidad segun cu nan ta mira con e cantidad di publicador di Reino den nan pais a aumenta for di djis un par di hende te na miles di publicador.

Tur Sirbidor di Jehova Tin Bon Motibo pa Alegra

16, 17. Menciona un motibo pakico “tanto esun cu ta sembra como esun cu ta cosecha [ta] alegra hunto.” (Wak tambe e cuadro “ Dos Tratado A Touch Dos Curason na Amazona.”)

16 Kisas bo ta corda cu Hesus a bisa su apostelnan: “Esun cu ta cosecha ... ta recoge fruta pa bida eterno, di manera cu tanto esun cu ta sembra como esun cu ta cosecha por alegra hunto.” (Juan 4:36) Con nos ta “alegra hunto” den e cosecha mundial? Tin varios manera, pero laga nos considera tres.

17 Na prome luga, nos ta alegra ora nos ta mira e papel cu Jehova ta hunga den e trabou di cosecha. Con asina? Wel, nos ta sembra simia ora nos ta predica e mensahe di Reino. (Mat. 13:18, 19) Nos ta cosecha fruta ora nos ta yuda un hende bira discipel di Cristo. Y nos tur ta sinti un goso profundo y ta keda masha impresiona ora nos observa con Jehova ta pone e simia di Reino “spruit y crece bira grandi.” (Mar. 4:27, 28) Algun simia cu nos sembra ta spruit despues di tempo y ta otro hende ta cosecha e fruta. Kisas loke a pasa cu Joan, un ruman muher di Gran Britania cu a batisa 60 aña pasa, a pasa cu bo tambe. El a conta: “Mi a yega di topa rumannan cu a bisa mi cu hopi aña pasa m’a planta un simia den nan curason ora mi a predica na nan. Sin cu mi tabata sa, otro Testigo a studia cu nan despues y a yuda nan bira sirbidor di Jehova. Mi ta masha contento cu e simia cu mi a planta a crece y cu su fruta a ser cosecha.”—Lesa 1 Corintionan 3:6, 7.

 

18. Segun 1 Corintionan 3:8, ki bon motibo nos tin pa alegra?

18 Na di dos luga, nos lo sigui traha den e cosecha cu goso si nos keda corda loke Pablo a bisa: “Cada un lo ricibi su recompensa di acuerdo cu su trabou.” (1 Cor. 3:8) Pues, un hende ta ser recompensa di acuerdo cu e trabou cu e haci, y no di acuerdo cu e resultadonan di e trabou, esta, no a base di cuanto hende nos a yuda acepta e berdad. Esey ta un pensamento hopi animante pa e rumannan cu ta predica den teritorionan caminda masha poco hende ta acepta e mensahe. Den bista di Dios, tur Testigo cu ta participa cu henter nan curason den e trabou di sembra simia ta “duna hopi fruta” y pesey nan tin motibo pa alegra.—Juan 15:8; Mat. 13:23.

19. (a) Con e profecia di Hesus na Mateo 24:14 ta contribui na nos goso? (b) Kico nos mester keda corda maske nos mes no logra yuda niun hende acepta e berdad?

 19 Na di tres luga, nos ta alegra pasobra nos trabou ta cumpli cu profecia. Laga nos considera un rato loke Hesus a contesta su apostelnan ora nan a puntr’e: “Kico lo ta e señal di bo presencia y di conclusion di e era aki?” El a bisa nan cu un aspecto di e señal ey lo ta un trabou di predica cu lo tuma luga rond mundo. Acaso e tabata kiermen e trabou di haci discipel? No. El a bisa: “E bon noticia aki di e Reino lo ser predica den henter e Tera habita, como testimonio.” (Mat. 24:3, 14) Pues, ta e obra di predicacion di Reino—sembramento di simia—ta un aspecto di e señal. Pesey, segun cu nos ta predica e bon noticia di Reino, nos tin cu keda corda cu maske nos no logra yuda niun hende acepta e berdad, sikiera nos a logra duna un “testimonio.” * Pues, sin importa con hende reacciona, nos di nos parti ta yuda cumpli cu e profecia di Hesus y tin e honor di sirbi como “compañero di trabou di Dios.” (1 Cor. 3:9) Nos tin bon motibo anto pa alegra.

“For di Ora Solo Sali te Ora cu E Drenta”

20, 21. (a) Con e palabranan di Malakias 1:11 ta cumpliendo awe? (b) Pa loke ta e trabou di cosecha, kico bo ta determina pa haci, y dicon?

20 Den e prome siglo, Hesus a yuda su apostelnan mira cu e trabou di cosecha tabata urgente. Di 1919 padilanti, Hesus a yuda su discipelnan den e tempo aki compronde e mesun berdad ey. Como resultado, e pueblo di Dios a intensifica nan actividadnan. En realidad, niun hende no por a para e trabou di cosecha. Manera Malakias a profetisa, e trabou di predica ta tuma luga awe “for di ora solo sali te ora cu e drenta.” (Mal. 1:11) Si, for di pariba te pabou—di oost pa west—tanto esun cu ta sembra como esun cu ta cosecha ta traha hunto y alegra hunto. Anto cu un sentido di urgencia, nos ta traha for di ora solo sali te ora solo baha, si, henter dia, for di mainta te anochi.

21 Awe, ora nos wak bek riba e ultimo 100 añanan y mira con un grupo chikito di sirbidor di Dios a crece bira “un nacion poderoso”, nos curason en berdad ta yena “yen yen di goso.” (Isa. 60:5, 22) Laga e goso ey y nos amor pa Jehova, e “Doño di e cosecha”, motiva cada un di nos pa sigui yuda pa caba e trabou di cosecha di mas grandi den historia.—Luc. 10:2.

^ par. 3 Algun traduccion di Bijbel ta traduci e expresion “cla pa cosecha” como “blanco pa wordo cosecha”, Hesus probablemente a referi na e paña blanco cu e grupo grandi di Samaritano tabatin bisti ora cu nan tabata bin den su direccion.

^ par. 9 Pa haya sa mas tocante e añanan ey y e decadanan cu a sigui, nos kier anima bo pa lesa pagina 425 pa 520 di e buki Los testigos de Jehová, —proclamadores del Reino de Dios, cu ta conta kico e trabou di cosecha a logra durante e periodo di 1919 pa 1992.

^ par. 15 Pa mas detaye tocante e profecia aki, cu tin ilustracionnan impactante, wak e buki E Profesia di Isaías—Lus pa Henter Humanidat II, pagina 303 pa 320.

^ par. 15 Den e texto Hebreo, tanto e pronomber “bo” como e verbonan ta femenino singular. Pues, esun cu Jehova a dirigi su mes na dje tabata un muher.

^ par. 19 E prome Studiantenan di Bijbel tambe a compronde e berdad importante ey. E Toren di Vigilancia di 15 di november 1895 a bisa: “Si ta un tiki trigo so nos por recoge, toch nos por duna un gran testimonio di e berdad ... Tur ruman por predica e evangelio.”