Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 10

E Rey Ta Refina Su Pueblo Spiritualmente

E Rey Ta Refina Su Pueblo Spiritualmente

ENFOKE DI E CAPITULO

Dicon Hesus a refina y purifica su siguidornan spiritualmente y con el a haci esey

1-3. Kico Hesus a haci ora el a mira cu cierto hende tabata mustra falta di respet pa e tempel?

HESUS tabatin hopi respet pa e tempel na Jerusalem pasobra e tabata sa cu e tempel pa hopi tempo tabata e centro di adoracion berdadero riba Tera. Pero adoracion berdadero—adoracion na Jehova, e Dios santo—mester ta limpi y puro. Pues, nos por imagina nos mes con Hesus a sintie ora cu dia 10 di nisan di aña 33, el a bay na e tempel y a haya hende ta mustra falta di respet pa e tempel. Kico tabata e problema?—Lesa Mateo 21:12, 13.

2 Wel, den un patio di e tempel (Plenchi pa Pagano), comerciante- y cambiadonan di placa cu tabata haragan pa placa tabata probecha di e Hudiunan cu a bin eynan pa presenta ofrenda na Jehova. * Ora Hesus a mira esey, el a “core cu tur hende cu tabata bende y cumpra cos den tempel, y el a bolter mesa di e cambiadonan di placa.” (Compara cu Nehemias 13:7-9.) El a condena e hombernan egoista ey pasobra nan a haci e cas di su Tata “un cueba di ladron.” Asina Hesus a demostra cu e tabatin respet pa e tempel y pa Esun cu a ser adora eynan. E adoracion di su Tata ta algo cu mester a keda limpi.

3 Siglonan despues, ora cu Hesus a ser corona como Rey Mesianico, el a bolbe limpia—of purifica—un tempel, uno cu ta envolve tur hende cu awe kier adora Jehova na e manera cu ta aceptabel p’e. Ta cua tempel el a purifica?

Hesus Ta Purifica “e Yiu Hombernan di Levi”

4, 5. (a) Con e siguidornan ungi di Hesus a ser refina y purifica di 1914 pa cuminsamento di 1919? (b) Acaso esey tabata final di e proceso di refina y purifica e pueblo di Dios? Splica.

4 Manera nos a mira den Capitulo 2 di e buki aki, despues cu Hesus a ser corona como Rey na 1914, e cu su Tata a bin inspecciona e tempel spiritual, esta, Dios su areglo pa adoracion puro. * Debi na e inspeccion ey, e Rey a mira cu mester a refina y purifica cristiannan ungi, “e yiu hombernan di Levi.” (Mal. 3:1-3) Di 1914 pa cuminsamento di 1919, Jehova, e Purificador, a permiti su pueblo pasa, na moda di papia, door di candela, esta, door di varios prueba y dificultad cu a sirbi pa refina nan y purifica nan. Nos ta contento cu e pruebanan ey a logra refina e  cristiannan ungi aki mas ainda. Pesey, nan tabata ansioso pa demostra cu nan ta apoya e Rey Mesianico.

5 Acaso esey tabata final di e proceso di refina y purifica e pueblo di Dios? No. Durante di e ultimo dianan, Jehova, via e Rey Mesianico, a sigui yuda su siguidornan pa nan ta limpi pa nan por keda den e tempel spiritual. Den e siguiente dos capitulonan, nos lo mira con el a refina nan den sentido moral y hasta pa loke ta trata e parti organisatorio. Pero prome, laga nos analisa e purificacion spiritual cu a tuma luga. Nos fe ta bira mas firme ora nos considera loke Hesus a haci—tanto e cosnan bisto como esnan cu a tuma luga tras di cortina—pa yuda su siguidornan keda spiritualmente limpi.

“Purifica Boso Mes”

6. Con e mandamentonan cu Jehova a duna e exiliadonan Hudiu ta yuda nos compronde kico pureza spiritual ta encera?

6 Kico ta pureza spiritual? Pa contesta esey, laga nos analisa loke Jehova a bisa e exiliadonan Hudiu ora nan tabata a punto di bandona Babilonia na aña 537 prome cu Cristo. (Lesa Isaias 52:11.) E motibo principal pakico e Hudiunan ey tabata bayendo Jerusalem bek tabata pa reconstrui e tempel y reestablece adoracion berdadero. (Esd. 1:2-4) Pues, Jehova tabata kier pa su pueblo laga atras tur loke tabatin di haber cu e religion di Babilonia. Tuma nota cu el a duna nan tres mandamento: “No mishi cu nada impuro”, “sali for di meymey di dje” y “purifica boso mes.” Nan no mester a mancha adoracion puro di Jehova cu nada di adoracion falso. Kico nos por conclui for di esaki? Pureza spiritual ta encera keda liber di e siñansa- y practicanan di religion falso.

7. Ken Hesus a uza pa yuda su siguidornan pa nan por ta limpi den sentido spiritual?

7 Na 1919, un poco despues cu Hesus a ser corona como Rey, el a nombra e esclavo fiel y prudente. Mediante e grupo aki cu ta facil pa reconoce el a yuda su siguidornan keda spiritualmente limpi. (Mat. 24:45) Ya pa e aña ey, e Studiantenan di Bijbel a purifica nan mes caba di hopi siñansa religioso falso. Pero ainda nan tabata falta mas purificacion spiritual. Via e esclavo fiel, Cristo a siña su siguidornan gradualmente cua tabata e celebracionnan y practicanan cu nan no por a participa den dje mas. (Prov. 4:18) Laga nos considera algun ehempel.

Cristiannan Mester Celebra Pasco di Nacemento?

8. Kico e Studiantenan di Bijbel a reconoce pa hopi tempo caba tocante Pasco di Nacemento, pero kico nan no a mira claramente?

8 Pa hopi tempo e Studiantenan di Bijbel a reconoce cu Pasco tabatin origen pagano y cu Hesus no a nace dia 25 di december. E Toren di Vigilancia di december 1881 a bisa: “Miyones di pagano a bira cristian. Pero pa un gran parti nan a bira cristian djis pa nomber: E sacerdotenan pagano a bira sacerdotenan cristian y e fiestanan pagano a haya nomber di fiestanan cristian. Y Pasco di Nacemento tabata un di e fiestanan aki.” Na 1883, bou di  e tema “Ki Tempo Hesus A Nace?”, E Toren di Vigilancia a rasona cu Hesus a nace na cuminsamento di october. * Pero, e tempo ey e Studiantenan di Bijbel no a mira claramente ainda cu nan mester a stop di celebra Pasco. Hasta e famia di Betel di Brooklyn a sigui celebr’e. Pero despues di 1926 cos a cuminsa cambia. Dicon?

9. Kico e Studiantenan di Bijbel a realisa tocante Pasco di Nacemento?

9 Ora cu e Studiantenan di Bijbel a analisa e topico ey mas a fondo, nan a realisa cu, eigenlijk, e origen di Pasco y e practicanan conecta cu ne ta ofende Dios. E articulo “E Origen di Pasco”, cu a sali den The Golden Age di 14 di december 1927, a bisa cu Pasco ta un celebracion pagano cu ta pone hende enfoca riba placer y e ta encera adoracion di dios falso. E articulo a splica bon cla cu Cristo no a manda hende celebra e fiesta ey y a conclui bisando lo siguiente tocante Pasco: “E echo cu mundo, nos carni pecaminoso y Diabel ta di acuerdo pa sigui celebr’e ... ta mustra claramente cu hende cu ta dedica na e sirbishi di Jehova no mester celebr’e.” Pues, no tabata un sorpresa cu e famia di Betel no a celebra Pasco e aña ey, y cu nan no a celebr’e nunca mas tampoco.

10. (a) Ki splicacion detaya di e berdad tocante Pasco a ser presenta na december 1928? (Wak tambe e cuadro “ E Origen di Pasco y e Motibo Pakico Nan Ta Celebr’e.”) (b) Con e pueblo di Dios a ser spierta pa otro dianan di fiesta y celebracionnan cu nan mester a evita? (Wak e cuadro “ E Berdad Tocante Otro Celebracion- y Dianan di Fiesta.”)

10 E siguiente aña, e Studiantenan di Bijbel a haya un splicacion mas detaya ainda di e berdad tocante Pasco. Dia 12 di december 1928, Ruman Richard H. Barber, un miembro di staf di e oficina principal, a duna un discurso na radio cu a mustra bon cla e origen impuro di e celebracion aki. Con e pueblo di  Dios a reacciona ora nan a haya e guia cla aki for di e oficina principal? Ruman Charles Brandlein, cordando tempo cu e cu su famia a stop di celebra Pasco, a bisa: “Tabata un problema pa nos laga e cosnan pagano ey atras? Absolutamente cu no! ... Pa nos, esey tabata mescos cu kita un paña sushi y bent’e afo.” Un otro ruman cu a refleha un actitud similar tabata Ruman Henry A. Cantwell, kende despues a sirbi como superintendente biahero. El a conta: “Nos tabata contento cu nos por a stop di haci algo pa demostra nos amor pa Jehova.” Pues, e siguidornan leal di Cristo tabata dispuesto pa haci e cambionan necesario y stop di celebra un fiesta cu a origina di adoracion impuro. *Juan 15:19; 17:14.

11. Con nos por demostra cu nos ta apoya e Rey Mesianico?

11 Esta un bon ehempel e Studiantenan di Bijbel fiel ey a pone pa nos! Ora nos ta medita riba nan ehempel, ta bon pa nos puntra nos mes: Con ami ta mira e guia cu nos ta haya for di e esclavo fiel? Mi ta acept’e cu gratitud y ta pone na practica loke mi ta siña? Si nos ta cla pa obedece, nos ta demostra cu nos ta apoya e Rey Mesianico, kende ta duna nos cuminda spiritual na e debido tempo mediante e esclavo fiel.—Echo. 16:4, 5.

Cristiannan Mester Uza Cruz?

E emblema di cruz cu corona (Wak paragraf 12, 13)

12. Pa hopi aña, con e Studiantenan di Bijbel a considera e cruz?

12 Pa hopi aña, e Studiantenan di Bijbel a considera e cruz como un simbolo aceptabel pa representa cristianismo. Pero un cos si, nan no a kere cu mester adora e cruz, ya cu nan a siña for  di Bijbel cu idolatria ta algo malo. (1 Cor. 10:14; 1 Juan 5:21) For di 1883 caba E Toren di Vigilancia a declara francamente cu “Dios ta odia tur sorto di idolatria.” Pero toch na principio e Studiantenan di Bijbel no a mira nada malo den e manera cu nan tabata uza e cruz. Por ehempel, cu orguyo nan tabata bisti un borstspeld cu e emblema di cruz cu corona pa identifica nan mes. Segun nan, esey a nifica cu si nan keda fiel te na morto, nan lo ricibi e corona di bida. Cuminsando na 1891, E Toren di Vigilancia tabatin e simbolo di un cruz y corona riba su portada.

13. Ki clarificacion e siguidornan di Cristo a haya tocante uzo di cruz? (Wak tambe e cuadro “ Clarificacion Gradual Tocante Uzo di Cruz.”)

13 E Studiantenan di Bijbel tabata stima e emblema di cruz cu corona. Pero na final di decada di 1920, e siguidornan di Cristo gradualmente a cuminsa haya clarificacion tocante uzo di cruz. Reflexionando riba e asamblea di 1928 cu a tuma luga na Detroit, Michigan, Ruman Grant Suiter, kende despues a sirbi como miembro di e Cuerpo Gobernante, a bisa: “Na e asamblea ey a bin dilanti cu e emblema di cruz cu corona no solamente tabata innecesario sino hasta cuestionabel.” Den transcurso di e añanan cu a sigui a bin mas clarificacion. Tabata bisto cu cruz tabata algo inaceptabel den adoracion cu ta puro y limpi den bista di Dios.

14. Con e pueblo di Dios a reacciona riba e clarificacion gradual cu nan a haya tocante e cruz?

14 Con e pueblo di Dios a reacciona riba e clarificacion gradual cu nan a haya tocante e cruz? Acaso nan a sigui uza e emblema di cruz cu corona cu nan tabata stima asina hopi? No. Lela Roberts, un sirbidor di Jehova pa hopi tempo, a bisa: “Unabes nos a realisa kico el a representa, nos a stop di uz’e di biaha.” Ursula Serenco, un otro ruman muher fiel, a expresa loke hopi otro ruman tambe a sinti, bisando: “Nos a bin realisa cu loke un tempo nos tabata balora como simbolo di e morto di nos Señor y di nos devocion cristian tabata en realidad un simbolo pagano. Na harmonia cu Proverbionan 4:18, nos a keda masha agradecido cu e caminda di e husto a sigui bira mas cla.” Pues, e siguidornan leal di Cristo no tabata kier tin nada di haber cu e practicanan impuro di religion falso.

15, 16. Con nos por demostra cu nos ta determina pa tene e pationan terenal di Jehova su tempel spiritual limpi?

15 Awe nos tin e mesun determinacion. Ta bisto cu Cristo ta yuda su pueblo keda spiritualmente limpi mediante e esclavo fiel y prudente. Pesey, ora nan ta yuda nos compronde cu un celebracion, practica of custumber ta contamina pa religion falso, nos ta haci caso di biaha. Mescos cu nos rumannan cu a biba na comienso di e presencia di Cristo, nos tambe ta determina pa tene e pationan terenal di Jehova su tempel spiritual limpi.

16 Durante e ultimo dianan, Cristo a traha tambe tras di cortina pa proteha e congregacionnan di Jehova contra personanan cu lo por a causa contaminacion spiritual. Con el a haci esey? Laga nos wak.

 Hesus Ta “Separa e Malbadonan for di e Hustonan”

17, 18. Den e ilustracion di e reda: (a) Kico baha e reda na lama ta nifica? (b) Kico “coy tur sorto di pisca” ta nifica? (c) Kico saca e piscanan bon hinca den macutu ta nifica? y (d) Kico tira e piscanan cu no ta sirbi afo ta nifica?

17 Nos Rey Hesucristo ta masha pendiente di e congregacionnan di Dios rond mundo. Na maneranan cu nos no por compronde completamente, e cu e angelnan ta haciendo un trabou di separacion. Hesus a describi e trabou aki den su ilustracion di e reda. (Lesa Mateo 13:47-50.) Kico e ilustracion ey ta nifica?

E reda ta representa e trabou di predica e Reino cu ta tumando luga den henter e “lama” di humanidad (Wak paragraf 18)

18 Nan a baha “un reda ... na lama.” E reda ta representa e trabou di predica e Reino cu ta tumando luga den henter e “lama” di humanidad. E reda aki ta “coy tur sorto di pisca.” E bon noticia ta atrae tur tipo di hende: esnan cu ta dal paso pa bira cristian berdadero, y tambe hopi otro hende cu kisas na prome instante ta mustra interes pero cu en realidad no ta tuma un posicion firme pa adoracion puro. * Ta “saca esnan bon hinca den macutu.” Personanan dispuesto pa siña e berdad ta ser hinca den macutu, esta, den congregacion, caminda nan por rindi adoracion puro na Jehova. Ta tira pisca “cu no [ta] sirbi” afo. Durante e ultimo dianan, Cristo y e angelnan ta separando “e malbadonan for di e hustonan.” * Pues, Cristo no ta permiti personanan cu no tin un curason sincero—kendenan kisas no ta dispuesto pa bandona nan creencia- y practicanan robes—contamina e congregacionnan. *

19. Kico bo ta pensa di loke Cristo ta haciendo pa proteha e pureza di e pueblo di Dios y e pureza di adoracion berdadero?

19 Nos ta sinti nos bon sabiendo cu nos Rey, Hesucristo, ta proteha esnan cu ta bou di su cuido, no ta berdad? Ademas, ta un consuelo pa sa cu awe e ta purifica y proteha adoracion berdadero—y adoradornan berdadero—cu e mesun fervor cu el a haci e tempel den e prome siglo limpi. Nos ta masha agradecido cu Cristo ta trahando duro pa proteha e pureza spiritual di e pueblo di Dios y e pureza di adoracion berdadero. Pesey nos ta evita tur contacto cu religion falso pa asina demostra cu nos ta apoya e Rey y su Reino.

^ par. 2 Hudiunan cu a bin di afo pa bishita Jerusalem mester a paga e belasting anual di tempel cu un tipo di moneda specifico. E cambiadonan di placa tabata cobra un comision pa cambia e placa di e bishitantenan na e moneda ey. Ademas, e bishitantenan kisas mester a cumpra bestia pa haci ofrenda. Hesus a yama e comerciantenan ey “ladron”, pasobra nan lo tabata cobra comisionnan exorbitante pa nan servicio.

^ par. 4 E pueblo di Jehova riba Tera ta rindi adoracion na dje den e pationan terenal di su gran tempel spiritual.

^ par. 8 Segun e articulo ey, si Hesus a nace den winter, esey “no ta cuadra cu e relato tocante e wardadornan di carne cu tabata biba pafo den cunucu cu nan tounan.”—Luc. 2:8.

^ par. 10 Den un carta personal, fecha 14 di november 1927, Ruman Frederick W. Franz a skirbi: “Nos lo no celebra Pasco e aña aki. E famia di Betel a dicidi di no celebr’e mas.” Un par di luna despues, den un carta fecha 6 di februari 1928, Ruman Franz a skirbi: “Pocopoco Señor ta purifica nos di e erornan di Diabel su organisacion babilonico.”

^ par. 18 Por ehempel, tuma nota cu na 2013 tabatin un maximo di 7.965.954 publicador, y tabatin 19.241.252 hende a asisti na e Conmemoracion anual di e morto di Cristo.

^ par. 18 E trabou di separa pisca bon for di pisca cu no ta sirbi no ta mescos cu e trabou di separa carne for di cabrito. (Mat. 25:31-46) E separacion, of huicio final, di carne y cabrito lo tuma luga durante e binidero tribulacion grandi. Tanten esey no sosode, hende cu ta manera pisca cu no ta sirbi por bolbe ainda cerca Jehova y, na moda di papia, ser recogi den macutu, esta, den congregacion.—Mal. 3:7.

^ par. 18 Cu tempo, lo tira e piscanan cu no ta sirbi den un forno di candela simbolico. Esey ta nifica cu nan lo ser destrui pa semper.

Mas Informacion

E TOREN DI VIGILANCIA (EDICION DI ESTUDIO)

Bo Ta “Capta Nificacion di e Scritura”?

Kico ta e splicacion di e ilustracionnan di Hesus tocante e sembrador cu ta drumi, e reda y e yiu perdi?