Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 1

“Laga Bo Reino Bin”

“Laga Bo Reino Bin”

ENFOKE DI E CAPITULO

Analisa loke Hesus a siña hende tocante e Reino di Dios

1, 2. Kico tres apostel di Hesus a tende Jehova mes bisa, y con nan a reacciona?

SI Jehova Dios manda bo haci algo, con lo bo reacciona? Lo bo no ta ansioso pa haci esey, sin importa kico e ta? Claro cu si!

2 Esey ta net loke a pasa den e prome siglo cu tres apostel di Hesus—Pedro, Santiago y Juan—poco despues di e Pasco Hudiu di aña 32. (Lesa Mateo 17:1-5.) Nan tabata riba “un sero halto” hunto cu nan Maestro, Hesus. Eynan, den un vision, nan a mira Hesus den su futuro puesto como glorioso Rey celestial. E vision tabata asina real cu Pedro a purba di participa den dje. Segun cu Pedro tabata papia, un nubia a forma riba nan cabes. Anto Pedro cu su compañeronan a haya un privilegio unico, algo cu ta un par di hende so a yega di experencia: Nan a tende e stem di Jehova. Prome, Jehova a confirma cu Hesus ta su Yiu, despues el a bisa bon cla: “Scuch’e.” E apostelnan a obedece e instruccion divino ey. Nan a scucha loke Hesus a siña nan, y nan a urgi otro hende pa haci mescos.—Echo. 3:19-23; 4:18-20.

Hesus a papia mas di e Reino di Dios cu di cualkier otro cos

3. Dicon Jehova kier pa nos scucha su Yiu, y ki tema ta bon pa nos analisa?

3 E instruccion ey di Dios, esta “scuch’e”, ta den Bijbel pa nos beneficio. (Rom. 15:4) Con asina? Wel, Hesus ta e vocero di Jehova y cada biaha cu Hesus a papia cu hende pa e siña nan, el a comparti loke su Tata tabata kier pa nos haya sa. (Juan 1:1, 14) E cos cu mas Hesus a papia di dje tabata e Reino di Dios, esta, e gobierno Mesianico celestial cu ta consisti di Cristo Hesus mes cu su 144.000 cogobernantenan. Pues, lo ta bon pa nos analisa e topico importante aki mas a fondo. (Rev. 5:9, 10; 14:1-3; 20:6) Pero prome, laga nos wak dicon Hesus a papia asina tanto tocante e Reino di Dios.

“For di Abundancia di Curason . . .”

4. Con Hesus a indica cu e Reino tabata sumamente importante p’e?

4 Pa Hesus, e Reino tabata sumamente importante. Dicon nos por bisa esey? Pasobra loke nos ta papia ta revela kico tin den nos curason. Kiermen, nos palabranan ta mustra kico ta realmente importante pa nos. Hesus mes a bisa:  “For di abundancia di curason boca ta papia.” (Mat. 12:34, BS) Wel, ki ora cu Hesus a haya oportunidad, el a papia tocante e Reino. E cuater Evangelionan ta menciona e Reino mas cu 100 biaha, y mayoria di biaha ta ora Hesus tabata papia. E Reino tabata e tema di su predicacion; pesey el a bisa: “Mi tin cu declara e bon noticia di e Reino di Dios na e otro stadnan tambe, pasobra ta pa esaki Dios a manda mi.” (Luc. 4:43) Hasta despues cu Hesus a resucita, el a sigui papia tocante e Reino cu su discipelnan. (Echo. 1:3) No tin duda anto cu Hesus su curason tabata yen di aprecio pa e Reino, y esey a motiv’e pa papia tocante dje.

5-7. (a) Con nos por sa cu e Reino ta sumamente importante pa Jehova? Duna un ehempel. (b) Con nos por mustra cu e Reino ta sumamente importante pa nos?

5 Pa Jehova tambe e Reino ta sumamente importante. Con nos por sa esey? Wel, corda cu ta Jehova a manda su Yiu unigenito na mundo; Jehova ta e fuente di tur loke e Yiu a bisa y siña hende. (Juan 7:16; 12:49, 50) Ademas, Jehova ta e fuente di tur loke e cuater Evangelionan ta bisa di e bida y sirbishi di Hesus. Pensa un rato kico esey ta nifica.

Ta bon pa cada un di nos puntra nos mes: E Reino di Dios ta sumamente importante pa mi?

6 Supone cu bo ta trahando riba un album cu potret di famia. Bo tin masha hopi potret cu bo kier hinca den e album, pero ta un cierto cantidad so e por carga. Kico bo ta haci? Bo ta scoge cua potret bo ta pone aden. Den un sentido, e Evangelionan ta manera un album cu ta duna nos un idea bon cla ken Hesus ta. Jehova no a inspira e escritornan di Evangelio pa skirbi tur loke Hesus a bisa y haci tempo cu e tabata riba Tera. (Juan 20:30; 21:25) Mas bien, e spirito di Jehova a guia nan pa skirbi loke Hesus a bisa y haci cu ta yuda nos compronde e proposito di su sirbishi y kico ta e cosnan mas importante pa Jehova. (2 Tim. 3:16, 17; 2 Ped. 1:21) Ya cu e Evangelionan ta papia principalmente di loke Hesus a siña hende relaciona cu e Reino di Dios, nos por conclui sigur sigur cu pa Jehova tambe e Reino ta sumamente importante. Figura bo! Jehova kier pa nos sa kico su Reino ta.

7 Pero ta bon pa cada un di nos puntra nos mes: E Reino di Dios ta sumamente importante pa mi? Si esey ta e caso, nos lo ta ansioso pa scucha kico Hesus a bisa y siña hende tocante e Reino ey. Por ehempel, con importante e Reino ta? Con y ki dia e Reino lo bin?

Con e Reino di Dios Lo Bin?

8. Con Hesus a indica den poco palabra con importante e Reino ta?

8 Laga nos analisa e oracion modelo. Cu algun palabra simpel pero convencente, Hesus a indica con importante e Reino ta y kico esaki lo logra. E oracion ey ta consisti di shete peticion. E prome tresnan ta relaciona cu e proposito di Jehova, esta, santificacion di su nomber, binimento di su  Reino y cumplimento di su boluntad riba Tera mescos cu den cielo. (Lesa Mateo 6:9, 10.) E tres peticionnan ey ta estrechamente liga cu otro, ya cu e Reino Mesianico ta e medio cu Jehova lo uza pa santifica su nomber y cumpli cu su boluntad.

9, 10. (a) Kico e Reino di Dios lo haci ora e bin? (b) Ki promesa di Bijbel abo ta anhela pa cumpli?

9 Con e Reino di Dios lo bin? Kico precies nos ta pidi p’e ora nos ta bisa den oracion: “Laga bo Reino bin”? Wel, nos ta pidi pa e Reino tuma accion decisivo. Ora e Reino bin, lo e eherce pleno poder riba Tera. Lo e elimina e mundo malbado aki, incluso tur gobierno di hende, y lo e trece un mundo nobo di husticia. (Dan. 2:44; 2 Ped. 3:13) E ora ey, bou di gobernacion di e Reino, henter e Tera lo bira un paradijs. (Luc. 23:43) E hendenan cu ta den e memoria di Dios lo resucita y bin bek cerca nan sernan keri. (Juan 5:28, 29) Hende obedecido lo bira perfecto y disfruta di bida pa semper. (Rev. 21:3-5) Despues di esey, e boluntad di Jehova Dios lo a cumpli riba Tera mescos cu den cielo. Bo no ta anhela pa mira e promesanan ey di Bijbel cumpli? Corda cu cada biaha cu bo pidi den oracion pa e Reino di Dios bin, bo ta pidiendo pa e promesanan maraviyoso ey cumpli.

10 Ta bisto cu ainda e Reino di Dios no a “bin” pa cumpli cu e oracion modelo. Gobiernonan humano ainda ta na poder y e mundo nobo di husticia no a yega ainda. Pero tin bon noticia: E Reino di Dios a cuminsa goberna caba. Den e siguiente capitulo nos lo bay den mas detaye riba esey, pero prome, laga nos analisa loke Hesus a bisa tocante ki dia e Reino lo cuminsa goberna y ki dia lo e “bin.”

Ki Dia e Reino di Dios Lo A Cuminsa Goberna?

11. Kico Hesus a indica tocante e tempo cu e Reino di Dios lo a cuminsa goberna?

11 Hesus a indica cu e Reino lo no a cuminsa goberna den su tempo maske algun di su discipelnan a verwacht esey. (Echo. 1:6) Tuma nota di loke el a bisa den dos ilustracion cu el a duna den un periodo di menos cu dos aña.

12. Con e ilustracion di e trigo y e mal yerba ta indica cu e Reino no a cuminsa goberna den tempo di Hesus?

12 E ilustracion di e trigo y e mal yerba. (Lesa Mateo 13:24-30.) Hesus a duna e ilustracion aki probablemente na cuminsamento di aña 31. Despues el a splica su discipelnan kico e ilustracion a nifica. (Mat. 13:36-43) Laga nos repasa e ilustracion y su nificacion: Despues di morto di e apostelnan, Diabel lo a sembra mal yerba (cristiannan falso) entre e trigo (“e yiunan di Reino”, es decir, cristiannan ungi). Lo a laga e trigo cu e mal yerba crece hunto te na e cosecha, cu ta “conclusion di un era.” Ora cu e tempo di cosecha cuminsa, lo a separa e mal yerba y lo a recoge e trigo pa warda den mangashina. Pues, e ilustracion ta indica cu e Reino lo no a cuminsa goberna den tempo di Hesus, sino despues  cu e periodo di crecemento termina. Manera cosnan a cana, e temporada di crecemento a termina na 1914, y e ora ey e tempo di cosecha a cuminsa.

13. Ki ilustracion Hesus a uza pa mustra cu lo e no a ser corona di biaha como Rey Mesianico ora cu e bolbe na cielo?

13 E ilustracion di e minanan. (Lesa Lucas 19:11-13.) Hesus a duna e ilustracion aki na aña 33, ora e tabata riba caminda pa Jerusalem pa ultimo biaha. Algun di Hesus su oyentenan a kere cu lo el a establece su Reino asina cu nan yega Jerusalem. Pa corigi e idea robes ey y pa mustra cu tabata falta basta ainda pa e Reino cuminsa goberna, Hesus a compara su mes cu “un homber di nacemento noble [cu] a biaha bay un tera leu pa keda corona como rey.” * Den caso di Hesus, e “tera leu” tabata cielo, caminda lo el a ricibi poder como Rey cerca su Tata. Pero Hesus tabata sa cu lo e no a ser corona di biaha como Rey Mesianico ora cu lo el a bolbe na cielo. Mas bien, lo el a sinta na man drechi di Dios y warda te na e tempo stipula. Manera a resulta despues, e mester a warda basta siglo.—Sal. 110:1, 2; Mat. 22:43, 44; Heb. 10:12, 13.

Ki Dia e Reino di Dios Lo “Bin”?

14. (a) Con Hesus a contesta e pregunta cu cuater di su apostelnan a hacie? (b) E echo cu e profecia di Hesus ta cumpliendo ta laga nos compronde kico tocante su presencia y e Reino?

14 Un par di dia prome cu nan a mata Hesus, cuater di su apostelnan a puntr’e: “Ki dia e cosnan aki lo sosode, y kico lo ta e señal di bo presencia y di conclusion di e era aki?” (Mat. 24:3; Mar. 13:4) Como contesta, Hesus a duna nan e  profecia extenso cu nos ta haya na Mateo capitulo 2425. Hesus a duna detaye di varios suceso mundial cu lo a sirbi como un señal pa identifica un periodo di tempo cu el a yama su “presencia.” E periodo aki lo a cuminsa ora e Reino ser estableci y lo termina ora e Reino bin. Nos tin basta prueba cu ta mustra cu e profecia di Hesus ta cumpliendo for di aña 1914. * Pues, e aña ey a marca e comienso di su presencia y cu e Reino a cuminsa goberna.

15, 16. Na ken e expresion “e generacion aki” ta referi?

15 Pero ki dia e Reino di Dios lo bin porfin? Hesus no a bisa ki dia precies esey lo sosode. (Mat. 24:36) Pero un otro cos cu el a bisa ta sigura nos cu e dia ey ta hopi cerca. Hesus a indica cu e Reino lo bin despues cu “e generacion aki” mira e señal profetico cumpli. (Lesa Mateo 24:32-34.) Na ken e expresion “e generacion aki” ta referi? Ban analisa loke Hesus a bisa.

16 “E generacion aki.” Acaso Hesus tabata referi na hende cu no ta creyente? No. Na prome luga, wak ta cu ken e tabata papiando. El a conta e profecia aki na algun apostel cu “a bin nan so cerca dje.” (Mat. 24:3) Un poco tempo despues e apostelnan lo a ser ungi cu spirito santo. Wak tambe e contexto. Prome cu Hesus a papia tocante “e generacion aki”, el a bisa: “Tuma por ehempel e palo di figo: Asina cu su taki nobo spruit y saca blachi, boso sa cu zomer ta cerca. Asina tambe, ora boso mira tur e cosnan aki, boso por ta sigur cu e Yiu di hende ta cerca, si, djis tras di porta.” Ta Hesus su siguidornan ungi—no hende cu no ta creyente—lo a mira cumplimento di e cosnan cu el a profetisa y compronde nan nificacion, esta, cu Hesus ta “djis tras di porta.” Pesey, ora Hesus a papia di “e generacion aki”, e tabata kiermen su siguidornan ungi.

17. Kico e palabra “generacion” y e expresion “tur e cosnan aki” ta nifica?

17 “E generacion aki lo no caba na nada prome cu tur e cosnan aki tuma luga.” Con e palabranan aki lo cumpli? Pa contesta esey, nos tin cu sa dos cos: Kico e palabra “generacion” y e expresion “tur e cosnan aki” ta nifica. Den Bijbel, hopi biaha e palabra “generacion” ta referi na un grupo di hende di varios edad cu ta biba den e mesun periodo di tempo. Un generacion no ta demasiado largo y e ta yega na un fin. (Exo. 1:6) E expresion “tur e cosnan aki” ta encera tur e sucesonan profetisa cu ta tuma luga durante e presencia di Hesus, esta, for di 1914 te na e “tribulacion grandi.”—Mat. 24:21.

18, 19. Con nos mester compronde loke Hesus a bisa tocante “e generacion aki”, y kico nos por conclui for di esaki?

18 Pues, con nos mester compronde e palabranan di Hesus tocante “e generacion aki”? E generacion ta consisti di dos grupo di ungi cu na un dado momento a biba den e mesun periodo: E prome grupo ta consisti di e unginan cu a  mira e señal cuminsa cumpli na 1914; e di dos grupo ta e unginan cu pa un tempo tabata contemporaneo di e prome grupo. Por lo menos algun di esnan di e di dos grupo lo ta na bida pa mira e cuminsamento di e binidero tribulacion. E dos gruponan ey ta forma un generacion pasobra pa un periodo nan a biba den e mesun tempo. *

19 Kico nos por conclui for di esaki? Wel, nos sa cu e señal di Hesus su presencia como Rey corona ta bisto rond mundo. Tambe nos ta mira cu e unginan cu ta na bida ainda y cu ta forma parti di “e generacion aki” ta birando mas bieu; pero nan tur lo no muri prome cu e tribulacion grandi cuminsa. Pesey nos por conclui cu pronto e Reino di Dios lo bin y cuminsa goberna mundo. Lo ta masha emocionante pa mira cumplimento di e oracion cu Hesus a siña nos: “Laga bo Reino bin.”

20. Ki topico importante nos lo analisa den e buki aki, y kico nos lo trata den e siguiente capitulo?

20 Laga nos no lubida cu Jehova mes a bisa for di cielo en conexion cu su Yiu: “Scuch’e.” Como cristian berdadero, nos ta ansioso pa obedece e instruccion divino ey. Nos ta hopi interesa den tur loke Hesus a bisa y siña hende tocante e Reino di Dios. Loke e Reino ey a logra caba y loke e lo haci den futuro ta un topico importante cu merece un estudio profundo, y ta net riba esey e buki aki lo enfoca. E siguiente capitulo lo trata e desaroyonan emocionante cu a tuma luga rond di e tempo cu e Reino di Dios a nace den cielo.

^ par. 13 Kisas e ilustracion di Hesus a pone su oyentenan corda riba Arkelao, un yiu homber di Herodes e Grandi. Prome cu Herodes a muri, el a scoge Arkelao como heredero pa goberna riba Judea y otro areanan. Pero prome cu Arkelao por a cuminsa goberna, e mester a haci un biahe largo pa Roma p’e haya aprobacion di Cesar Augusto.

^ par. 18 Ken cu a ser ungi despues cu e ultimo ungi di e prome grupo a muri—es decir, despues di e unginan cu na 1914 a mira e “cuminsamento di calamidad, manera dolor di parto”—lo no ta parti di “e generacion aki.”—Mat. 24:8.