Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 17

Sirbidornan di e Reino Ta Haya Entrenamento

Sirbidornan di e Reino Ta Haya Entrenamento

ENFOKE DI E CAPITULO

Scolnan teocratico ta prepara sirbidornan di e Reino pa cumpli cu nan asignacion

1-3. Ki paso Hesus a tuma pa expande e trabou di predica, y ki preguntanan esey ta lanta?

DOS aña largo Hesus a predica den henter Galilea. (Lesa Mateo 9:35-38.) El a bishita hopi stad y pueblito, y el a siña e hendenan den sinagoga y a predica e bon noticia di Reino. Tur caminda cu el a bay predica, un gran cantidad di hende tabata bin cerca dje. Pesey el a bisa cu “e cosecha ta grandi” y cu tabatin mester di mas trahador.

2 Hesus a dal paso pa expande e trabou di predica. Con? Wel, el a manda su 12 apostelnan pa “bay predica e Reino di Dios.” (Luc. 9:1, 2) Pero probablemente e apostelnan tabata kier sa con nan mester a haci e trabou aki. Pesey, prome cu Hesus a laga nan bay, el a duna nan entrenamento mescos cu su Tata a dun’e entrenamento.

3 Esaki ta lanta varios pregunta: Ki entrenamento Hesus a haya cerca su Tata? Ki entrenamento Hesus a duna su apostelnan? Y kico di awe? E Rey Mesianico a entrena su siguidornan pa cumpli cu nan sirbishi? Si ta asina, con el a haci esey?

“Loke e Tata A Siña Mi, Mi Ta Papia”

4. Ki ora Hesus su Tata a siñ’e y na unda?

4 Hesus a bisa bon cla cu ta su Tata a siñ’e. Durante su sirbishi riba Tera, el a bisa: “Loke e Tata a siña mi, mi ta papia.” (Juan 8:28) Ki ora e Tata a siña Hesus y na unda? Wel, Hesus ta e prome Yiu di Dios, y evidentemente su entrenamento a cuminsa un poco despues cu Dios a cre’e. (Col. 1:15) Hesus tabata den cielo cerca su Tata y a pasa miles di aña scuchando y observando Jehova, e Magnifico Instructor. (Isa. 30:20) Debi na esey, e Yiu a ricibi un educacion unico pa loke ta trata e cualidadnan, obranan y propositonan di su Tata.

5. Ki instruccion e Tata a duna e Yiu tocante e sirbishi cu lo el a haci riba Tera?

5 Na e debido tempo, Jehova a siña su Yiu tocante e sirbishi cu lo e mester a cumpli cu ne riba Tera. Laga nos analisa un profecia cu a describi e relacion entre e Magnifico Instructor y su prome Yiu. (Lesa Isaias 50:4, 5.) Segun e profecia,  Jehova tabata spierta su Yiu “mainta tras mainta.” E palabranan aki ta duna e idea di un maestro cu ta lanta su alumno mainta trempan pa e por cuminsa siñ’e. Un buki di consulta biblico ta bisa: “Ta comosifuera Jehova ... a tum’e na scol como alumno y a siñ’e kico pa predica y con e mester predica.” Na e “scol” celestial ey, Jehova a siña su Yiu “kico pa bisa y kico pa siña hende.” (Juan 12:49) Tambe e Tata a instrui su Yiu con pa siña hende. * Anto ora Hesus tabata riba Tera, el a haci bon uzo di e entrenamento cu el a haya, no solamente door di cumpli cu su sirbishi, sino tambe door di entrena su siguidornan pa cumpli cu nan sirbishi.

6, 7. (a) Ki entrenamento Hesus a duna su apostelnan, y esey a prepara nan pa haci kico? (b) Hesus a percura pa su siguidornan den nos tempo haya ki tipo di entrenamento?

6 Ki entrenamento Hesus a duna su apostelnan? Segun Mateo capitulo 10, el a duna nan instruccionnan specifico pa sirbishi di veld, entre otro, unda pa predica (versiculo 5, 6), ki mensahe pa predica (versiculo 7), e importancia di pone confianza den Jehova (versiculo 9, 10), con pa acerca hende (versiculo 11-13), kico pa haci ora hende rechasa nan (versiculo 14, 15) y con pa reacciona ora nan enfrenta persecucion (versiculo 16-23). * E bon entrenamento cu Hesus a duna su apostelnan a prepara nan pa dirigi e trabou di predica e bon noticia den e prome siglo.

7 Kico di nos tempo? Hesus, e Rey di e Reino di Dios, a duna su siguidornan e asignacion di mas importante cu nan por a yega di haya, esta, predica “e bon noticia ... di e Reino ... den henter e Tera habita, como testimonio pa tur nacion.” (Mat. 24:14) Pero e Rey a entrena nos pa cumpli cu e trabou sumamente importante aki? Claro cu si! For di cielo e Rey a percura pa su siguidornan haya e entrenamento pa sa con pa predica pafo di e congregacion y con pa cumpli cu responsabilidadnan special den e congregacion.

Sirbidornan di Dios Ta Haya Entrenamento pa Predica e Bon Noticia

8, 9. (a) Kico tabata e proposito principal di e Scol di Ministerio Teocratico? (b) Con e reunion den ­siman ta yuda bo?

8 Pa hopi tempo e organisacion di Jehova a uza asamblea-, congreso- y reunionnan di congregacion—manera e Reunion di Sirbishi—pa entrena e pueblo di Dios pa sirbishi di veld. Pero den decada di 1940, e esclavo fiel a cuminsa haci areglo pa entrena e pueblo di Dios mediante varios scol.

9 Scol di Ministerio Teocratico. Manera nos a mira den e capitulo anterior, nan a cuminsa tene e scol aki na 1943. Acaso e meta di e scol aki tabata pa djis entrena e studiantenan pa duna bon parti na reunionnan di congregacion? No. E proposito principal di e scol tabata pa entrena e pueblo di Dios pa uza nan don di papia pa alaba Jehova den sirbishi di veld. (Sal. 150:6) E scol a prepara tur ruman cu  tabata inscribi den dje pa nan ta mas efectivo como predicador di Reino. Awor nos ta sigui haya e tipo di entrenamento ey na nos reunion den siman.

10, 11. Ken por bay e Scol di Galaad awor, y kico ta meta di e scol ey?

10 Scol Biblico di Galaad di Watchtower. E scol aki a cuminsa dialuna 1 di februari 1943. E proposito original di e scol tabata pa entrena pionero y otro ruman cu ta den e trabou di tempo completo pa sirbi como misionero na diferente parti di mundo. Pero desde october 2011 a cambia e rekisitonan pa bay e scol aki. Awor e scol ta solamente pa rumannan cu ya caba ta den un of otro forma di sirbishi special di tempo completo, manera pionero special, superintendente di circuito y nan esposa, betelita y misionero cu ta traha den sirbishi di veld pero cu no a bay e scol ainda.

11 Kico ta meta di e Scol di Galaad? Un instructor di hopi tempo a contesta: “Haci e fe di e studiantenan mas fuerte mediante un estudio profundo di e Palabra di Dios y yuda nan desaroya e cualidadnan spiritual necesario pa nan por enfrenta cu exito e retonan di nan asignacion. Un otro meta fundamental di e programa ta pa inculca den e studiantenan un deseo mas intenso pa participa den e trabou di predica.”—Efe. 4:11.

12, 13. Ki efecto e Scol di Galaad tabatin riba e trabou mundial di predica? Duna un ehempel.

12 Ki efecto e Scol di Galaad tabatin riba e trabou mundial di predica? For di 1943 te cu awor, mas cu 8.500 ruman a bay e scol ey, * y e misioneronan entrena na Galaad a sirbi den mas cu 170 pais rond mundo. E misioneronan a haci bon uzo di nan entrenamento; nan a predica cu hopi entusiasmo y a entrena otro rumannan pa haci mescos. Den hopi caso e misioneronan a organisa e trabou den areanan caminda tabatin masha tiki of niun publicador di Reino.

13 Tuma por ehempel loke a pasa na Japon, caminda e predicacion organisa a para casi completamente durante Prome Guera Mundial. Na augustus 1949 tabatin menos cu 10 publicador local na Japon. Pero, pa fin di e aña ey tabatin 13 misionero, cu a haya entrenamento na Galaad, ta predica na Japon. Despues, hopi misionero mas a yega Japon. Prome, e misioneronan a concentra riba stadnan grandi; despues, nan a muda pa otro stadnan. Cu entusiasmo e misioneronan tabata anima nan studiantenan pa join nan den e sirbishi di pionero. E esfuerso y entusiasmo di e misioneronan a duna bon resultado. Awor tin mas cu 216.000 proclamador di Reino na Japon, y casi 40 porciento di nan ta sirbi como pionero. *

14. Scolnan teocratico ta prueba convencente di kico? (Wak tambe e cuadro “ Scolnan Cu Ta Entrena Sirbidornan di Reino.”)

14 Otro scolnan teocratico. E Scol di Sirbishi di Pionero, e Scol Biblico pa Pareha Cristian y e Scol Biblico pa Ruman Homber Soltero a yuda e rumannan cu a asisti crece spiritualmente y a motiva nan pa dirigi e trabou di predica cu entusiasmo. * Tur e scolnan teocratico aki ta prueba convencente cu  nos Rey ta prepara su siguidornan plenamente pa cumpli cu nan sirbishi.—2 Tim. 4:5.

Ruman Hombernan Ta Haya Entrenamento pa Atende Responsabilidadnan Special

15. Den ki aspecto ruman hombernan den puesto di responsabilidad kier imita Hesus?

15 Corda cu e profecia di Isaias ta bisa cu Hesus a haya les di Jehova. Na e “scol” celestial ey, e Yiu a siña “con pa sostene cu palabra esun cu ta cansa.” (Isa. 50:4) Hesus a pone e les ey na practica; tempo cu e tabata riba Tera, el a refresca “tur cu ta traha duro y cu ta carga.” (Mat. 11:28-30) Mescos cu Hesus, ruman hombernan cu ta sirbi den puesto di responsabilidad kier ta un animacion pa nan rumannan. Pa logra esey, e esclavo fiel a establece varios scol pa yuda ruman hombernan bira mas efectivo den sirbi nan rumannan.

16, 17. Kico ta meta di e Scol di Ministerio di Reino? (Wak tambe e nota.)

16 Scol di Ministerio di Reino. E prome klas di e scol aki a cuminsa dia 9 di maart 1959 na South Lansing, New York. Superintendentenan biahero y tambe sirbidornan di congregacion (cu awor yama coordinador di cuerpo di anciano) a haya  invitacion pa asisti na un curso di un luna. Prome e curso aki tabata na Ingles. Despues a traduci e curso na otro idioma, y gradualmente e scol a cuminsa entrena ruman hombernan rond mundo. *

Ruman Lloyd Barry ta duna les na e Scol di Ministerio di Reino na Japon, 1970

17 Kico ta meta di e scol aki? Wel, e Anuario di 1962 a bisa lo siguiente: “Den e mundo hopi druk aki, un superintendente di e congregacion di testigonan di Jehova mester ta un hende cu por organisa su bida di tal manera cu e por duna e debido atencion na tur ruman di su congregacion. Di e manera ey lo e por ta un bendicion pa nan. Na e mesun momento, e no por ta un homber cu ta neglisha su propio famia pa yuda e congregacion; mas bien e mester uza sano huicio. Esta un oportunidad maraviyoso e sirbidornan di congregacion na tur parti di mundo a ricibi! Nan por asisti na e Scol di Ministerio di Reino pa haya un entrenamento cu lo yuda nan haci net loke Bijbel ta bisa cu un superintendente mester haci.”—1 Tim. 3:1-7; Tito 1:5-9.

18. Con henter e pueblo di Dios ta beneficia di e Scol di Ministerio di Reino?

 18 Henter e pueblo di Dios ta beneficia di e Scol di Ministerio di Reino. Con asina? Wel, ora anciano- y sirbidornan ministerial ta pone na practica loke nan a siña na e scol, nan lo ta un animacion pa nan rumannan, mescos cu Hesus tabata pa su discipelnan. Kisas un anciano of sirbidor ministerial a bisa bo algo cu a encurasha bo, a scucha bo cu atencion of a bishita bo pa anima bo. Abo no ta aprecia ora nan haci esey? (1 Tes. 5:11) Esta un bendicion e hombernan capacita ey ta pa nan congregacion!

19. Ki otro scol mas e Comite di Siñansa ta supervisa, y kico ta e proposito di e scolnan ey?

19 Otro scolnan teocratico. E Comite di Siñansa di Cuerpo Gobernante ta supervisa tambe otro scolnan cu ta entrena ruman hombernan cu ta sirbi den puesto di responsabilidad den e organisacion. E proposito di e scolnan ey ta pa yuda rumannan responsabel—anciano di congregacion, superintendente di circuito y miembro di Comite di Sucursal—cumpli na un manera mas efectivo cu e tantisimo responsabilidadnan cu nan tin. E cursonan ey cu ta basa riba Bijbel ta anima e ruman hombernan pa keda spiritualmente fuerte y pa aplica principionan di Bijbel den nan trato cu e carnenan precioso cu Jehova a confia nan cu ne.—1 Ped. 5:1-3.

E prome klas di Scol di Entrenamento Ministerial cu nan a tene na Malawi, 2007

20. Dicon Hesus por a bisa cu ta “Jehova [a] siña [nos] tur”, y kico abo ta determina pa haci?

20 Nos por mira claramente cu e Rey Mesianico a percura pa su siguidornan ta bon entrena. Tur e entrenamento aki a bin di un fuente superior: Jehova a entrena su Yiu, y e Yiu a entrena su siguidornan. Pesey Hesus por a bisa cu ta “Jehova [a] siña [nos] tur.” (Juan 6:45; Isa. 54:13) Laga nos ta determina pa saca pleno probecho di e entrenamento cu nos Rey ta duna nos. Anto no lubida cu e proposito principal di e entrenamento aki ta pa yuda nos keda spiritualmente fuerte pa nos por cumpli cu nos sirbishi cabalmente.

^ par. 5 Con nos por sa cu e Tata a siña e Yiu con pa siña hende? Wel, pensa riba esaki: E echo cu Hesus a uza masha hopi ilustracion, of parabola, ora e tabata siña hende a cumpli cu un profecia cu a ser skirbi siglonan prome cu el a nace. (Sal. 78:2; Mat. 13:34, 35) Esey ta indica bon cla cu Jehova, e Autor di e profecia ey, a dicidi hopi tempo di antemano cu su Yiu lo a uza ilustracion pa siña hende.—2 Tim. 3:16, 17.

^ par. 6 Varios luna despues, Hesus “a nombra 70 otro discipel y a manda nan dos dos” pa bay predica. Nan tambe el a entrena.—Luc. 10:1-16.

^ par. 12 Algun ruman a asisti mas cu un biaha na e Scol di Galaad.

^ par. 13 Pa mas detaye tocante e impacto cu e misioneronan entrena na Galaad tabatin riba e trabou di predica rond mundo, wak capitulo 23 di e buki Los testigos de Jehová, proclamadores del Reino de Dios.

^ par. 14 Awor e Scol pa Predicador di Reino a reemplasa e ultimo dos scolnan ey.

^ par. 16 Awor tur anciano ta beneficia di e Scol di Ministerio di Reino; duracion di e entrenamento aki ta varia, y ta tene nan cada tanto aña. For di 1984, sirbidornan ministerial tambe ta haya entrenamento na e scol aki.

Mas Informacion

E TOREN DI VIGILANCIA (EDICION DI ESTUDIO)

Wak Caminda Bo Ta Cana pa Bo Por Progresa

Con bo por kita obstaculo for di den bo caminda y logra bo metanan spiritual?

E TOREN DI VIGILANCIA (EDICION DI ESTUDIO)

Yuda Nos Ruman Hombernan Alcansa Nan Pleno Potencial

Con nos por yuda nos ruman hombernan hoben y esnan recien batisa alcansa nan pleno potencial?