Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 5

E Rey Ta Revela Mas Detaye Tocante e Reino

E Rey Ta Revela Mas Detaye Tocante e Reino

ENFOKE DI E CAPITULO

E pueblo di Dios ta compronde mihor e berdadnan importante tocante e Reino cu su gobernantenan y ciudadanonan, y tambe tocante kico lealtad na e Reino ta encera

1, 2. Con Hesus a demostra cu e ta un guia sabi?

IMAGINA bo cu un guia turistico cu tin hopi experencia ta dunando abo cu un grupo di turista un tour den un stad impresionante y bunita. Ta prome biaha cu boso ta bishita e stad, pues boso ta presta bon atencion na tur loke e guia ta bisa. De bes en cuando, boso ta ansioso pa haya sa cierto cos di e stad cu ainda boso no a mira. Ora boso puntra e guia tocante e cosnan ey, e no ta bisa nada sino te na e momento oportuno. Anto, hopi biaha, esey ta net ora cu boso ta yegando na un di e sitionan interesante ey. Segun cu e tour ta sigui, boso ta keda mas y mas impresiona cu e sabiduria di e guia, pasobra e ta conta boso e cosnan cu boso mester sa net na e momento cu boso mester sa nan.

2 Cristiannan berdadero ta casi den e mesun situacion cu e turistanan ey. Nos ta ansioso pa siña mas tocante e stad di mas maraviyoso cu ta existi, “e stad cu tin berdadero fundeshi”, esta, e Reino di Dios. (Heb. 11:10) Tempo Hesus tabata riba Tera, e mes a guia su siguidornan pa nan adkiri conocemento mas profundo di e Reino. Pero acaso el a contesta tur nan preguntanan y a conta nan tur cos tocante e Reino ey den un solo shot? No. El a bisa nan: “Mi tin hopi cos mas di bisa boso, ma boso no por compronde nan aworaki.” (Juan 16:12) Como e guia di mas sabi cu a yega di biba, Hesus nunca a pone un peso riba su discipelnan door di duna nan informacion cu nan no tabata prepara pa compronde.

3, 4. (a) Con Hesus a sigui siña su siguidornan fiel tocante e Reino di Dios? (b) Kico nos lo trata den e capitulo aki?

3 Hesus a expresa e palabranan na Juan 16:12 riba e ultimo anochi di su bida como hende riba Tera. Pero despues di su morto, con lo el a sigui siña su siguidornan fiel tocante e Reino di Dios? El a sigura su apostelnan: “E spirito di e berdad ... lo ... guia boso pa compronde e berdad plenamente.” * (Juan 16:13) Nos por considera spirito santo manera un guia cu tin hopi pasenshi. Pues, spirito santo ta e medio cu Hesus ta uza pa siña su siguidornan tur loke nan mester sa tocante e Reino di Dios; anto net na e momento cu nan mester sa e cosnan ey.

 4 Laga nos wak con Jehova su spirito santo a guia cristiannan sincero pa haya mas conocemento tocante e Reino. Prome nos lo wak con nos a haya sa ta na ki tempo e Reino di Dios a cuminsa goberna. Despues nos lo analisa ken ta e gobernantenan y e ciudadanonan di e Reino y ki speransa cada grupo tin. Y por ultimo nos lo mira con e siguidornan di Cristo a haya un comprondemento mas cla di kico lealtad na e Reino ta encera.

Un Aña Crucial

5, 6. (a) Ki punto di bista robes e Studiantenan di Bijbel tabatin tocante e tempo cu e Reino lo a ser estableci y tocante e cosecha? (b) Dicon e ideanan robes ey no mester pone nos duda cu Hesus tabata guia su siguidornan?

5 Manera nos a mira den Capitulo 2 di e buki aki, pa varios decada e Studiantenan di Bijbel a señala cu na 1914 profecia importante di Bijbel lo a cumpli. Pero e tempo ey nan tabata kere cu Cristo su presencia a cuminsa na 1874, cu el a cuminsa goberna den cielo na 1878 y cu ta te na october 1914 e Reino lo a haya tur autoridad. E cosecha lo a tuma luga di 1874 pa 1914 y lo a termina ora Hesus caba di reuni nan den cielo. Acaso e ideanan robes ey mester pone nos duda cu Hesus tabata guia e rumannan fiel ey pa medio di spirito santo? Claro cu no!

6 Pensa atrobe riba e ilustracion cu nos a uza na principio di e capitulo aki. Si e turistanan saca conclusion robes, acaso esey ta pone nos duda cu e guia ta confiabel? No! Asina tambe, tin biaha e pueblo di Dios ta purba di haya sa cierto detaye di e proposito di Jehova prome cu ta tempo pa spirito santo guia nan na e berdadnan ey. Pero esey no kiermen cu Hesus no ta guiando nan. Pues, rumannan fiel ta demostra cu nan ta dispuesto pa acepta coreccion y humildemente ta ahusta nan punto di bista.—Sant. 4:6.

7. Dios a bendiciona su pueblo cu cua luz spiritual?

7 Durante e añanan despues di 1919, Dios a bendiciona su pueblo cu mas y mas luz spiritual. (Lesa Salmo 97:11.) Na 1925 a sali un articulo importante den E Toren di Vigilancia, titula “Nacemento di e Nacion.” E articulo ey a presenta evidencia biblico convencente cu e Reino Mesianico a nace na 1914. Di e manera ey e vision profetico cu nos ta haya na Revelacion capitulo 12, den cua e muher celestial ta duna luz, a cumpli. * E articulo a sigui mustra cu e persecucion y dificultadnan cu e pueblo di Jehova a confronta durante e añanan di Prome Guera Mundial a indica claramente cu Satanas a ser saca for di cielo y a baha riba Tera “yen di rabia, pasobra e sa cu a ked’e masha poco tempo.”—Rev. 12:12.

8, 9. (a) Con e importancia di e Reino di Dios a ser enfatisa? (b) Cua ta e preguntanan cu nos lo bay trata?

8 Con importante e Reino ta? Na 1928, E Toren di Vigilancia a cuminsa enfatisa cu e Reino tabata mas importante cu hende su salbacion personal mediante e rescate. Dicon? Pasobra ta pa medio di e Reino Mesianico Jehova lo santifica su nomber, vindica su derecho di goberna como Soberano di universo y cumpli cu tur su proposito relaciona cu humanidad.

9 Ken lo goberna hunto cu Cristo den e Reino ey? Ken lo ta e Reino su ciudadanonan riba Tera? Y na ki trabou e siguidornan di Cristo lo dedica nan mes?

 E Trabou di Cosecha Ta Concentra Riba e Unginan

10. Kico e pueblo di Dios tabata compronde for di hopi tempo caba tocante e 144.000?

10 Decadanan prome cu 1914, cristiannan berdadero tabata compronde caba cu 144.000 siguidor fiel di Cristo lo a goberna hunto cu ne den cielo. * E Studiantenan di Bijbel a realisa cu esaki tabata un cantidad literal y cu for di e prome siglo a cuminsa scoge esnan cu lo forma parti di e grupo ey.

11. Kico e futuro miembronan di e bruid di Cristo a bin compronde tocante nan asignacion riba Tera?

11 Pero kico e futuro miembronan di e bruid di Cristo tabatin cu haci mientras nan ta riba Tera? Nan a ripara cu Hesus a pone enfasis riba e trabou di predica y cu el a conect’e cu un periodo di cosecha. (Mat. 9:37; Juan 4:35) Manera nos a menciona den Capitulo 2, pa un tempo e Studiantenan di Bijbel a kere cu e periodo di cosecha lo a dura 40 aña y cu esaki lo a termina ora e unginan bay cielo. Pero, como cu e trabou a sigui despues cu e 40 añanan a pasa, e rumannan tabatin mester di mas clarificacion. Awe nos sa cu e temporada di cosecha—e tempo pa separa trigo for di mal yerba, esta, cristiannan ungi fiel for di cristiannan falso—a cuminsa na 1914. Pues, tabata tempo pa concentra riba e trabou di recoge esnan cu tin speransa pa bay cielo.

Na aña 1914 e tempo di cosecha a cuminsa (Wak paragraf 11)

12, 13. Con e ilustracion cu Hesus a duna di e dies birgennan y esun di e talentonan a cumpli den e ultimo dianan?

12 Di 1919 en adelante, Cristo a sigui guia e esclavo fiel y prudente pa enfoca riba e trabou di predica. Desde prome siglo Hesus a duna su siguidornan e asignacion ey. (Mat. 28:19, 20) El a indica tambe cua ta e cualidadnan cu su siguidornan ungi lo tabatin mester pa cumpli cu e asignacion di predica. Por ehempel, den su ilustracion di e dies birgennan, el a mustra cu e unginan lo tin cu keda vigila, es decir, keda spiritualmente alerta, si nan kier alcansa nan meta final di participa den e gran fiesta di casamento den cielo. Unabes cu e 144.000 unginan fiel ta den cielo, nan ta ser presenta na un otro manera, esta, como e “bruid” di Cristo. (Rev. 21:2) Anto den e ilustracion di e talentonan, Hesus a indica cu su sirbidornan ungi lo cumpli diligentemente cu e trabou di predica.—Mat. 25:1-30.

 13 Durante e ultimo 100 añanan, e unginan a keda vigila y a traha diligentemente den e trabou di predica. Sin duda, nan lo ser recompensa. Pero acaso e gran trabou di cosecha lo a keda limita na recogemento di e resto di e 144.000 cogobernantenan di Cristo?

E Reino Ta Recoge Su Ciudadanonan pa Biba Riba Tera

14, 15. Menciona e cuater gruponan cu e buki The Finished Mystery a papia di dje.

14 Pa hopi tempo, e rumannan fiel tabata sumamente curioso pa sa ken tabata e “multitud grandi” menciona na Revelacion 7:9 pa 14. Pero ainda no tabata tempo pa Cristo revela e identidad di e grupo grandi aki. Pesey no ta un sorpresa cu gran parti di loke e rumannan a bisa e tempo ey tocante e multitud grandi tabata leu for di e berdadnan cla y simpel cu awe nos conoce y ta stima.

15 Por ehempel, na 1917, e buki The Finished Mystery a declara cu tin “dos grado of tipo di salbacion celestial y dos grado of tipo di salbacion terenal.” Di ken e cuater gruponan di hende ey tabata consisti? Den e prome grupo tabatin e 144.000 cu lo goberna cu Cristo. Den e di dos grupo tabatin e multitud grandi. E tempo ey e rumannan tabata kere cu e multitud grandi tabata consisti di hende cu ta cristian pa nomber y cu ainda tabata den e iglesianan di cristiandad. Nan tabatin un grado di fe pero no suficiente pa tuma un posicion firme na fabor di adoracion berdadero. Pesey nan lo a ricibi un puesto inferior den cielo. Pa loke ta esnan cu lo biba riba Tera, nan a kere cu un di tres grupo—hendenan fiel manera Abraham, Moises y otronan—lo a haya autoridad riba e di cuater grupo, esta, e resto di humanidad.

16. Ki iluminacion spiritual e siguidornan di Cristo a haya na 1923 y na 1932?

16 Con spirito santo a guia e siguidornan di Cristo pa yega na e comprondemento cu nos tin awe tocante e multitud grandi? Esey a sosode gradualmente, mediante un serie di iluminacion spiritual. Cuminsando for di 1923, E Toren di Vigilancia a hala atencion na un grupo cu no tabatin speransa pa bay cielo y cu lo a biba riba Tera bou di e reinado di Cristo. Na 1932, E Toren di Vigilancia a analisa e relato di Jonadab, kende a join Jehu, Dios su Rey ungi di Israel, pa apoy’e den e guera contra adoracion falso. (2 Rey. 10:15-17) Segun e articulo, tabatin un grupo di hende den tempo moderno cu tabata manera Jonadab y cu Jehova lo a laga e grupo aki sobrevivi e tribulacion di Armagedon pa biba aki riba Tera.

17. (a) Ki luz spiritual a bira mas briyante na 1935? (b) Ki efecto e comprondemento nobo tocante e multitud grandi tabatin riba cristiannan fiel? (Wak e cuadro “ Hopi Ruman A Sinti un Gran Alivio.”)

17 Na 1935 e luz spiritual aki a bira mas briyante ainda. Na e congreso cu nan a tene na Washington, D.C., e multitud grandi a keda identifica como un grupo cu lo biba riba Tera; esaki ta e mesun grupo cu ta representa e carnenan den e comparacion cu Hesus a duna di carne y cabrito. (Mat. 25:33-40) E multitud grandi lo ta parti di e “otro carne[nan]” di cua Hesus a bisa cu “nan tambe” e tin cu trece den e “tou.” (Juan 10:16) Ora e orador, J. F. Rutherford, a pidi: “Tur esnan cu tin e speransa di biba pa semper riba Tera, lanta para”, mas cu mitar di e auditorio a lanta  para. E ora ey el a declara: “Ata e multitud grandi!” Hopi ruman a keda profundamente conmovi cu porfin nan a compronde kico tabata nan speransa pa futuro.

18. Riba kico e siguidornan di Cristo a concentra den sirbishi di veld, y cu ki resultado?

18 Desde e tempo ey en adelante, Cristo a guia su siguidornan pa concentra riba e trabou di recoge e futuro miembronan di e multitud grandi aki cu lo sali sano y salvo for di e tribulacion grandi. Na prome instante, e cantidad cu nan a recoge no tabata parce dje hopi ey. Un biaha, Ruman Rutherford hasta a bisa: “Al fin y al cabo, ta parce cu e ‘multitud grandi’ no ta bay ta dje grandi ey toch.” Claro cu, mientrastanto, nos a mira con Jehova a bendiciona e cosecha. Bou di guia di Hesus y di spirito santo, e unginan y nan compañeronan di e “otro carne[nan]” a bira “un tou”, precies manera Hesus a profetisa, sirbiendo hunto bou di “un wardador.”

Ruman Rutherford no por a imagina con inmenso e multitud grandi lo a bira (Di man robes pa man drechi: Nathan H. Knorr, Joseph F. Rutherford y Hayden C. Covington)

19. Kico anos por haci pa yuda e multitud grandi sigui crece?

19 E gran mayoria di hende fiel lo biba pa semper den un paradijs riba Tera, bou di e reinado di Cristo cu su 144.000 cogobernantenan. No ta un placer pa mira con Cristo a guia e pueblo di Dios pa compronde e berdad aki cu ta asina cla? Nos tin e gran privilegio di por comparti e speransa ey cu e hendenan cu nos ta topa den sirbishi di veld. Pues, te caminda nos circunstancia ta permiti, laga nos ta mas activo posibel. Asina e multitud grandi lo sigui crece, y nan lo uni nan bos cu nos pa alaba cu alegria e nomber di Jehova.—Lesa Lucas 10:2.

E multitud grandi ta sigui crece

Kico Lealtad na e Reino Ta Encera?

20. E organisacion di Satanas ta consisti di ki partinan, y ki efecto esey por tin riba lealtad cristian?

20 Segun cu e pueblo di Dios a sigui siña tocante e Reino, nan mester a compronde tambe mas mihor kico lealtad na e gobierno celestial ey ta encera. Relaciona cu e punto aki, un Toren di Vigilancia di 1922 a señala cu tin dos organisacion ta existi: di Jehova y di Satanas. Esun di Satanas ta consisti di e parti comercial, religioso y politico di mundo. Hende leal na e Reino di Dios den man di Cristo mester tene cuidou pa nan no mete cu cierto partinan inapropia di e organisacion di Satanas y asina bira desleal. (2 Cor. 6:17) Kico esaki ta nifica?

21. (a) Con e esclavo fiel a spierta e pueblo di Dios pa e mundo di negoshi? (b) Kico un Toren di Vigilancia di 1963 a revela tocante “Babilonia e Grandi”?

21 E cuminda spiritual di e esclavo fiel consistentemente a denuncia e corupcion cu ta reina den e mundo di negoshi y a spierta e pueblo di Dios pa tene cuidou pa nan no cay den gara di materialismo cu comercio ta promove. (Mat. 6:24) Tambe nos publicacionnan a keda hala atencion na e parti religioso di e organisacion di Satanas. Na 1963, E Toren di Vigilancia a mustra bon cla cu “Babilonia e Grandi” a representa no solamente cristiandad sino tambe henter e imperio mundial di religion falso. Pues, manera nos lo mira mas cla den Capitulo 10 di e buki aki, e pueblo di Dios den tur pais y cultura a haya yudansa pa “sali for di dje”, y asina libra nan mes for di tur practica religioso falso.—Rev. 18:2, 4.

22. Durante Prome Guera Mundial, con hopi ruman a compronde e instruccion di Romanonan 13:1?

 22 Pero kico di e parti politico di e organisacion di Satanas? Acaso cristiannan berdadero por participa den guera- y conflictonan di e nacionnan? Durante Prome Guera Mundial, mayoria di Studiante di Bijbel a compronde cu siguidornan di Cristo no tin mag di mata nan prohimo. (Mat. 26:52) Pero pa hopi ruman, e instruccion di Romanonan 13:1—sea “sumiso na autoridadnan superior”—a nifica cu nan lo mester a drenta servicio militar, bisti uniform di soldaat y hasta carga arma; pero ora nan superiornan lo a pidi nan pa mata e enemigo, nan lo mester a tira den laira.

23, 24. Con e rumannan a compronde Romanonan 13:1 durante Segundo Guera Mundial, y con e siguidornan di Cristo a bin compronde e versiculo ey mas mihor?

23 Net ora cu Segundo Guera Mundial a cuminsa na 1939, E Toren di Vigilancia a presenta un analisis profundo di nos posicion neutral como cristian. E articulo a mustra bon cla cu cristiannan no mester tin nada di haber cu guera- y conflictonan di e nacionnan di e mundo di Satanas. E instruccion ey a yega net na ora, pasobra esaki a proteha e siguidornan di Cristo di bira culpabel di e dramamento di sanger horibel cu a tuma luga durante e guera ey. Sinembargo, cuminsando for di 1929, nos publicacionnan a splica tambe cu e autoridadnan superior di Romanonan 13:1 no tabata e gobernantenan di mundo sino Jehova cu Hesus. Pero, ainda e rumannan tabatin mester di un comprondemento mas exacto.

 24 Na 1962, spirito santo a guia e siguidornan di Cristo pa nan haya un punto di bista mas exacto di Romanonan 13:1 pa 7. Algun articulo cu a sali den E Toren di Vigilancia di 15 di november y di 1 di december di e aña ey a analisa e versiculonan aki. Porfin e pueblo di Dios a compronde e principio di sumision relativo cu Hesus a revela den su palabranan famoso: “Duna Cesar loke ta di Cesar, ma Dios loke ta di Dios.” (Luc. 20:25) E cristiannan berdadero a compronde cu e autoridadnan superior ta e gobernantenan di e mundo aki y cu cristiannan mester ta sumiso na nan. Pero, esey ta un sumision relativo. Es decir, ora autoridadnan pidi nos desobedece Jehova Dios, nos ta contesta nan mescos cu e apostelnan di pasado: “Nos tin cu obedece Dios na prome luga, y no hende.” (Echo. 5:29) Den Capitulo 14 di e buki aki, nos ta siña mas tocante e diferente maneranan cu den practica e pueblo di Dios a sigui e principio di keda neutral den asuntonan politico.

Nos tin e gran privilegio di por comparti e speransa di bida eterno

25. Dicon bo ta aprecia e guia cu spirito santo a duna nos pa compronde mihor e berdadnan tocante e Reino di Dios?

25 Pensa un rato riba tur e cosnan cu e siguidornan di Cristo a siña tocante e Reino di Dios durante e ultimo 100 añanan. Nos a haya sa na ki aña e Reino a ser estableci den cielo y con importante esaki ta. Nos a compronde mas mihor di e dos speransanan cu Dios ta ofrece hende fiel: e speransa di biba den cielo y e speransa pa biba riba Tera. Tambe nos sa con pa demostra nos lealtad na e Reino di Dios mientras cu nos ta demostra sumision relativo na autoridadnan di mundo. Awor, puntra bo mes: Lo mi por a haya sa cualkier un di e berdadnan precioso aki si Hesucristo no a guia su esclavo fiel riba Tera pa compronde eseynan y despues siña nan na otro hende? Esta bendiciona nos ta cu Cristo y spirito santo ta guia nos!

^ par. 3 Segun un buki di consulta, den e versiculo ey e palabra Griego pa “guia” ta nifica “mustra e caminda.”

^ par. 7 Prome cu esey, nan tabata kere cu e vision a referi na un guera entre e religion pagano di e Imperio Romano y Iglesia Catolico Romano.

^ par. 10 Na juni 1880, E Toren di Vigilancia a bisa cu e 144.000 lo tabata hudiunan cu lo a bira cristian berdadero prome cu 1914. Pero na final di 1880, nan a publica un splicacion cu ta cuadra mas cu loke nos ta kere awe.