Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Reino di Dios Ya Ta Goberna

 CAPITULO 18

Con e Actividadnan di Reino Ta Ser Financia?

Con e Actividadnan di Reino Ta Ser Financia?

ENFOKE DI E CAPITULO

E motibo pakico testigonan di Jehova ta apoya e obra di Reino financieramente y e manera cu nan ta haci esey

1, 2. (a) Con Ruman Russell a contesta un pastoor cu kier a sa con e actividadnan di e Studiantenan di Bijbel ta ser financia? (b) Kico nos lo analisa den e capitulo aki?

UN BIAHA un pastoor di Iglesia Reforma a acerca Ruman Charles T. Russell y a puntr’e con nan ta financia e actividadnan di e Studiantenan di Bijbel.

Ruman Russell a splic’e: “Nunca nos no ta pasa collect.”

E pastoor a puntr’e: “Con boso ta yega na fondo anto?”

Ruman Russell a contest’e: “Si mi bisa bo e berdad, lo bo no kere mi. Ora hende bin nos reunionnan, nos no ta pasa un scalchi pa pidi placa. Nan mes ta mira cu tin gasto. Anto nan ta bisa den nan mes: E luga aki no por ta pornada ... Con mi por contribui pa cubri e gastonan?”

En berdad e pastoor no por a kere Ruman Russell.

Ruman Russell a sigui bis’e: “Mi ta bisando bo e berdad. Precies asina nan ta puntra mi: ‘Con mi por contribui pa cubri e gastonan?’ Ora un hende haya un bendicion y e tin moda, e kier uza esaki pa Señor. Si e no tin placa, pakico nos mester force pa duna algo?” *

2 Ruman Russell realmente a bis’e “e berdad.” Semper e pueblo di Dios a duna contribucionnan boluntario pa apoya adoracion berdadero. Den e capitulo aki nos lo wak con nan tabata haci esey den tempo biblico y con nan ta haci esey den nos tempo. Segun cu nos ta analisa con e actividadnan di Reino ta ser financia awe, lo ta bon pa cada un di nos puntra nos mes: Con ami por demostra cu mi ta apoya e Reino?

“Esun Cu Su Curason Ta Dispuesto, Lag’e Hiba ... Ofrenda”

3, 4. (a) Kico Jehova sa cu su sirbidornan lo haci? (b) Con e Israelitanan a apoya e construccion di e tabernakel?

3 Jehova tin confianza den su sirbidornan. E sa cu ora nan haya e oportunidad, gustosamente nan ta demostra nan devocion na dje pa medio di nan contribucionnan boluntario. Laga nos wak dos ehempel di e historia di Israel.

4 Despues cu Jehova a saca e Israelitanan for di Egipto, el a manda nan traha un tabernakel, un tent portatil, pa rindi  adoracion na dje. Nan tabatin mester di basta recurso pa por a traha e tent ey cu su acesorionan. Jehova a instrui Moises pa duna e pueblo oportunidad di apoya e proyecto, bisando: “Esun cu su curason ta dispuesto, lag’e hiba ... [un] ofrenda pa SEÑOR.” (Exo. 35:5) Con e pueblo aki, cu poco tempo prome “tabata amarga nan bida cu trabou pisa”, a reacciona? (Exo. 1:14) Wel, nan a apoya e proyecto plenamente y a contribui boluntariamente cu oro, plata y otro cosnan valioso. Probablemente nan a haya gran parti di e cosnan valioso ey di nan doñonan anterior, e Egipcionan. (Exo. 12:35, 36) E Israelitanan a duna mas di loke tabata necesario y dado momento mester “a stop e pueblo di hiba mas.”—Exo. 36:4-7.

5. Con e Israelitanan a reacciona ora David a duna nan oportunidad di contribui pa yuda cu construccion di e tempel?

5 Un 475 aña despues, David a duna contribucion for di su “propiedad personal” pa financia construccion di e tempel, e prome centro permanente di adoracion berdadero riba Tera. Despues, el a duna e otro Israelitanan tambe oportunidad di duna, puntrando nan: “Ken mas ta dispuesto pa haci un donacion boluntario pa SEÑOR awe?” Con e pueblo a reacciona? “Nan a duna na SEÑOR boluntariamente i di henter nan kurason.” (1 Cro. 29:3-9BPK) David a reconoce e berdadero fuente di e contribucionnan ey, pasobra el a bisa Jehova den oracion: “Tur cos ta bin for di bo y ta for di bo man nos a duna bo.”—1 Cro. 29:14.

6. Dicon tin mester di fondo pa cumpli cu e trabou di Reino awe, y ki pregunta esey ta lanta?

6 Ni Moises ni David no tabatin nodi pone presion riba e pueblo di Dios pa nan duna. Al contrario, Dios su sirbidornan a duna di curason. Kico di awe? Nos ta bon consciente di e echo cu mester di placa pa apoya e Reino di Dios. Mester di basta fondo pa publica y distribui Bijbel y literatura biblico, pa traha y mantene luganan di reuni y sucursalnan y pa duna ayudo na rumannan ora di calamidad. Esey ta lanta algun pregunta importante: Con nos ta yega na e fondonan necesario? Mester presiona siguidornan di e Rey pa nan duna?

“Hamas Nos Lo Roga ni Pidi Hende Sosten”

7, 8. Dicon e pueblo di Jehova no ta cana pidi placa?

7 Ruman Russell cu su compañeronan a nenga di uza e tacticanan pa recauda fondo cu tabata asina comun den e iglesianan di cristiandad. Den e di dos edicion di E Toren di Vigilancia, bou di e subtema “Bo Kier e ‘Toren di Vigilancia’?” Russell a bisa: “Nos ta kere cu ta JEHOVA ta esun cu ta sostene e ‘Toren di Vigilancia’, y mientras cu esey ta e caso, hamas nos lo roga ni pidi hende sosten. Ora Esun cu ta bisa: ‘Tur oro y plata di e seronan ta di mi’, stop di percura e fondonan necesario, nos lo compronde cu ta tempo pa  stop cu e publicacion.” (Hag. 2:7-9) Mas cu 130 aña despues, E Toren di Vigilancia y e organisacion cu ta public’e t’ey keto bay.

8 E pueblo di Jehova no ta cana pidi placa. Nan no ta pasa collect ni ta manda carta pa pidi donacion. Tampoco nan no ta organisa wega di bingo, bazar of bende rifa pa recauda fondo. Nan ta tene nan na loke E Toren di Vigilancia a bisa hopi tempo pasa: “Nunca nos no a haya cu ta apropia pa cana pidi placa pa apoya e trabou di Señor, manera otro misanan tin custumber di haci ... Nos ta di opinion cu e diferente maneranan di pidi placa den nomber di Señor pa recauda fondo ta ofensivo y inaceptabel den su bista; e no ta bendiciona ni e hendenan cu ta duna placa ni loke ta ser haci cu e placa ey.” *

“Laga Cada Hende Haci Manera El A Dicidi den Su Curason”

9, 10. Menciona un motibo pakico nos ta duna contribucion boluntario.

9 Como ciudadano di Reino, niun hende no tin nodi forsa nos pa duna. Al contrario, gustosamente nos ta uza nos placa y otro recursonan pa apoya actividadnan di Reino. Dicon nos ta asina dispuesto pa duna? Pa e siguiente tres motibonan.

10 Di prome, nos ta duna contribucion boluntario pasobra nos ta stima Jehova y kier “haci loke ta agradabel den su bista.” (1 Juan 3:22) Anto un cos ta sigur, Jehova ta keda masha contento cu un sirbidor di dje cu ta duna di curason. Laga nos analisa loke apostel Pablo a skirbi tocante e manera cu un cristian tin cu duna. (Lesa 2 Corintionan 9:7.) Un cristian berdadero no ta duna na un manera forsa ni contra su boluntad. Mas bien, e ta duna pasobra “el a dicidi den su curason” di haci esey. * Es decir, e ta duna despues cu el a reflexiona riba un necesidad cu tin y riba con e por satisface esey. Jehova ta aprecia un dunado asina, pasobra “Dios ta stima hende cu ta duna cu alegria.” Un otro traduccion di Bijbel ta bisa: “Dios stima hende cu gusta duna.”

Nos chikitinnan na Mozambique tambe gusta duna

11. Kico ta motiva nos pa duna Jehova e mihor cu nos tin?

11 Di dos, nos ta duna contribucion material como muestra di nos gratitud na Jehova pa e tantisimo bendicionnan cu nos tin. Laga nos analisa un principio den e Ley di Moises cu ta anima hende pa samina nan curason. (Lesa Deuteronomio 16:16, 17.) Tur homber Israelita mester a asisti na e tres fiestanan anual, y nan mester a duna un regalo “conforme e bendicion [cu Jehova]” a duna nan. Pues, prome cu cada homber a bay e fiesta, e mester a conta cuanto bendicion el a haya y samina su curason pa asina dicidi kico ta e mihor regalo cu e por a hiba pa Jehova. Mescos ta conta pa nos. Ora nos reflexiona riba e tantisimo maneranan cu  Jehova a bendiciona nos, nos ta sinti nos motiva pa dun’e lo mihor cu nos tin. Nos regalo ta un refleho di cuanto nos ta aprecia e bendicionnan cu Jehova a drama riba nos. Nos ta dun’e di curason y esey ta inclui nos contribucionnan material.—2 Cor. 8:12-15.

12, 13. Con nos contribucionnan boluntario ta demostra nos amor pa nos Rey, y cuanto cada un di nos ta contribui?

12 Di tres, via nos contribucionnan boluntario nos ta demostra nos amor pa nos Rey Hesucristo. Con asina? Tuma nota di loke Hesus a bisa su discipelnan e ultimo anochi di su bida riba Tera. (Lesa Juan 14:23.) El a bisa: “Si un hende ta stima mi, lo e cumpli cu mi palabra.” E “palabra” di Hesus ta inclui e mandato pa predica e bon noticia di Reino den henter e Tera. (Mat. 24:14; 28:19, 20) Nos ta cumpli cu e “palabra” ey door di haci tur loke ta na nos alcance—uzando nos tempo, energia y recursonan material—pa promove e trabou di Reino. Asina nos ta demostra nos amor pa e Rey Mesianico.

 13 Pues, como ciudadano leal di e Reino, nos kier demostra di henter nos curason cu nos ta apoya e Reino door di duna contribucion financiero. Cuanto cada un di nos ta contribui? Esey ta un decision personal. Cada un di nos ta duna lo mihor cu nos por. Pero hopi di nos rumannan tin masha poco recurso. (Mat. 19:23, 24; Sant. 2:5) Un cos cu por consola e rumannan ey ta cu Jehova y su Yiu ta aprecia hasta e tiki cu hende ta duna di nan curason.—Mar. 12:41-44.

Con Nos Ta Yega na e Fondonan Necesario?

14. Pa hopi aña, kico testigonan di Jehova tabata pidi hende ora nan tabata ofrece literatura?

14 Pa hopi aña, testigonan di Jehova tabata ofrece literatura biblico a base di un contribucion cu nan tabata tene mas abou posibel, ya asina hasta hende cu no tabatin hopi placa por a haya nos literatura. Claro cu si un doño di cas a mustra interes pero no por a contribui, e publicadornan di Reino tabata dispuesto pa dun’e e literatura. Nan deseo tabata pa literatura yega den man di hende sincero cu por a les’e y beneficia di dje.

15, 16. (a) Ki ahuste Cuerpo Gobernante a haci na 1990 na e manera cu nos ta ofrece nos literatura? (b) Con hende ta haci donacion boluntario? (Wak tambe e cuadro “ Kico Nan Ta Haci cu Nos Donacionnan?”)

15 Na 1990, Cuerpo Gobernante a haci un ahuste na e manera cu nos ta ofrece nos literatura. E aña ey na Merca, e rumannan a cuminsa ofrece tur literatura a base di donacion so. Un carta dirigi na tur congregacion den e pais a splica: “Nos lo duna revista y literatura na publicadornan y na e publico interesa sin pidi y sin duna indicacion cu e persona mester duna un contribucion specifico pa ricibi un publicacion ... Ken cu kier haci un donacion pa cubri e gastonan di nos obra educativo por haci esey, pero nan por haya e literatura sea cu nan haci un donacion of no.” E areglo ey a yuda clarifica cu nos obra ta di caracter boluntario y religioso. Ademas, esaki a mustra bon cla cu “nos no ta haci negoshi cu e palabra di Dios.” (2 Cor. 2:17) Cu tempo a implementa e areglo di donacion boluntario rond mundo.

16 Con hende por haci donacion boluntario? Den cada Salon di Reino di testigonan di Jehova tin caha di contribucion poni discretamente. Un persona por tira su donacion eyden of mand’e directamente na un di e entidadnan legal cu testigonan di Jehova ta uza. Tur aña ta sali un articulo den E Toren di Vigilancia cu ta splica con un hende por haci e tipo di donacionnan boluntario ey.

Con Nos Ta Uza e Placa Cu Nos Haya?

17-19. Splica con nos ta uza e placa cu nos haya (a) pa e obra mundial, (b) pa construccion mundial di Salon di Reino y (c) pa cubri e gastonan di e congregacion local.

17 Obra mundial. Nos ta uza e fondonan pa cubri e gastonan relaciona cu e trabou di predica mundialmente. E gastonan aki ta encera entre otro, e costo pa produci literatura pa distribucion mundial, pa traha y mantene sucursalnan y  pa tene varios scol biblico. Ademas, nos ta uza e fondonan pa percura pa e misioneronan, superintendentenan di circuito y pioneronan special. Tambe nos ta uza nos donacionnan pa duna ayudo na rumannan ora di calamidad. *

18 Construccion mundial di Salon di Reino. Nos ta uza fondo pa yuda e congregacionnan traha of renoba Salon di Reino. Segun cu e contribucionnan ta drenta, por pone mas fondo disponibel pa yuda otro congregacionnan. *

19 Gastonan di e congregacion local. Nos ta uza fondo pa cubri e gastonan local di e congregacion y di mantencion di e Salon di Reino. E ancianonan lo por recomenda pa manda algun fondo pa sucursal pa e obra mundial. Den casonan asina, e ancianonan ta presenta un resolucion na e congregacion. Si e congregacion aprob’e, nan lo manda e suma cu nan a recomenda. Tur luna, e ruman cu ta atende cu cuenta di congregacion ta prepara un informe financiero cu ta ser lesa pa e congregacion.

20. Con bo por honra Jehova cu bo “rikesa”?

20 Ora nos reflexiona riba tur loke e trabou mundial di predica e Reino y di haci discipel ta encera, nos ta sinti nos motiva pa “honra [Jehova] cu [nos] rikesa.” (Prov. 3:9, 10) Nos rikesa ta encera nos capacidad fisico, mental y nos cualidadnan spiritual. Definitivamente nos kier uza nan plenamente den e obra di Reino. Pero corda cu nos rikesa ta inclui tambe nos recursonan material. Laga nos ta determina pa duna loke nos por y ora nos por. Nos donacionnan boluntario ta trece honor pa Jehova y ta demostra cu nos ta apoya e Reino Mesianico.

^ par. 1 E Toren di Vigilancia di 15 di juli 1915, pagina 218 pa 219.

^ par. 8 E Toren di Vigilancia di 1 di augustus 1899, pagina 201.

^ par. 10 Un comentarista a bisa cu e palabra Griego traduci como “dicidi” ta transmiti e idea “di determina algo di antemano.” Anto el a agrega: “Aunke den dunamento tin goso espontaneo, toch e mester ta algo plania y sistematico.”—1 Cor. 16:2.

^ par. 17 Wak Capitulo 20 pa mas informacion tocante dunamento di yudansa ora di desaster natural.

^ par. 18 Wak Capitulo 19 pa mas detaye tocante construccion di Salon di Reino.