Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Contesta pa 10 Pregunta Cu Hobennan Sa Haci

 PREGUNTA 9

Mi Mester Kere den Evolucion?

Mi Mester Kere den Evolucion?

DICON TA BON PA BO SA?

Si e teoria di evolucion tin base, e ora ey bida no tin proposito. Pero, si ta den creacion nos tin cu kere, e ora ey nos por haya contestanan satisfactorio pa preguntanan tocante bida y futuro.

KICO ABO LO HACI?

Imagina bo e siguiente escena: Alex ta tur confundi. Semper el a kere den Dios y den creacion. Pero, awe su meneer di biologia ta insisti cu e teoria di evolucion ta un echo, cu e ta basa riba investigacion cientifico confiabel. Alex no kier pa otro hende pensa cu e ta bobo. E ta bisa den su mes: Con cu bay bin, si cientificonan a proba cu tin base pa kere den evolucion, ken ami ta pa cuestiona nan?

Si ta abo ta Alex, lo bo acepta e teoria di evolucion djis pasobra cientificonan ta bisa cu e ta un echo?

PARA KETO Y PENSA

E hendenan na tur dos banda di e debate ta hopi lihe pa bisa kico nan ta kere sin sa precies dicon nan ta kere loke nan ta kere.

  • Tin hende ta kere den creacion djis pasobra ta esey nan a siña den nan misa.

  • Tin hende ta kere den evolucion djis pasobra ta esey nan a siña na scol.

 SEIS PREGUNTA PA PENSA ARIBA

Bijbel ta bisa: “Ta hende a traha tur cas, ma esun cu a traha tur cos ta Dios.” (Hebreonan 3:4) Esey ta parce rasonabel?

E idea cu bida no tin un Creador ta mes ilogico cu e idea cu no ta un hende a traha e cas aki

LOKE HENDE SA BISA: Tur cos den universo ta existi pa puro casualidad como resultado di un asina yama big bang.

1. Ken of kico a causa e explosion aki?

2. Kico tin mas sentido: bisa cu tur cos a bin di nada of cu tur cos a origina di un persona?

LOKE HENDE SA BISA: Hende a bin di bestia.

3. Si hende a bin di bestia, por ehempel di macaco, dicon nos ta hopi mas inteligente cu nan anto?

4. Dicon hasta e forma di bida di mas simpel ta asina complica?

LOKE HENDE SA BISA: Evolucion ta un echo comproba.

5. E persona cu ta bisa esaki tin evidencia di loke e ta bisa?

6. Cuanto hende ta kere den evolucion djis pasobra otronan ta bisa cu tur hende inteligente ta kere esey?

“Si bo ta cana den mondi y bo ta mira un cas di palo hopi bunita, lo bo bisa: Waw, hopi zuiver! E palonan aki mester a cay net den e manera corecto pa forma e cas aki? Claro cu no! No ta rasonabel pa pensa asina. Dicon nos mester kere anto cu tur cos den universo a djis bay para na nan luga pa casualidad?”—Julia.

“Imagina bo cu un hende ta bisa bo cu un explosion den un luga di imprenta a pone inkt spart riba muraya y plafon y forma e texto di un diccionario completo. Lo bo kere esey?”—Gwen.

 DICON MI POR KERE DEN DIOS?

Bijbel ta bisa cu nos mester uza nos mente, esta, nos “capacidad di pensa.” (Romanonan 12:1) Esaki ta nifica cu nos fe den Dios no mester ta basa riba djis:

  • EMOCION (Mi ta sinti cu mester tin un poder mas aya)

  • INFLUENCIA DI OTRO HENDE (Hende rond di mi ta kere den Dios)

  • PRESION (Mi a lanta den un cas caminda mi mester a kere den Dios)

Na luga di esey, bo mes mester tin bon motibo pa kere cu Dios ta existi.

“Ora mi scucha mi docente splica con nos curpa ta hinca den otro, mi no tin niun duda cu Dios ta existi. Cada parti di nos curpa, hasta e organo di mas chikito, tin su propio funcion. Y hopi biaha e funcionnan aki ta tuma luga sin cu nos sa mes. En berdad e curpa humano ta hopi fascinante.”—Teresa.

“Ora mi mira edificio halto, barco crucero of auto, mi ta puntra mi mes: Ken a traha tur e cosnan aki? Por ehempel, pa traha un auto mester di hende inteligente pasobra tur pieza, pa chikito cu nan ta, tin cu funciona bon pa asina henter e auto por traha bon. Pues, si ta hende a diseña auto, ta logico cu mester tin un persona cu a diseña hende tambe.”—Richard.

“Mas mi a studia ciencia, menos real e idea di evolucion a bira . . . Ami ta pensa cu bo mester tin mas fe pa kere den evolucion cu kere den un Creador.”—Anthony.

ALGO PA PENSA ARIBA

Despues di hopi decada di investigacion, ainda cientificonan no a haya un splicacion pa e teoria di evolucion cu nan tur ta di acuerdo cu ne. Si cientificonan mes—cu ta supose di ta e expertonan—no por bay di acuerdo cu otro riba tereno di evolucion, lo ta malo anto pa duda den e teoria ey?