Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Contesta pa 10 Pregunta Cu Hobennan Sa Haci

 PREGUNTA 1

Ken Mi Ta Realmente?

Ken Mi Ta Realmente?

DICON TA BON PA BO SA?

Si bo sa ken bo ta y kico bo kier, lo bo por tuma decision sabi ora bo ta bou di presion.

KICO ABO LO HACI?

Imagina bo e siguiente escena: Karen ta na un fiesta pa mas o menos dies minuut, diripiente e ta tende un stem conoci su tras ta bisa:

“Dicon bo ta para bo so eynan?”

Karen ta bira wak y ta mira su amiga Jessica cu dos boter di cerbes habri den su man. Jessica kier duna Karen un di nan y ta bis’e: “Bo no ta mucho jong pa pasa dushi, toch?”

Karen kier bisa no, pero Jessica ta su amiga. Y Karen no kier pa su amiga pensa cu e ta laf. Ademas, Jessica ta bon mucha. Si Jessica mes ta bebe, e ora ey un cerbes no por ta dje malo ey. Karen ta bisa den su mes: Ta djis un cerbes. No ta droga mi ta uza.

Si abo haya bo mes den un situacion asina, kico lo bo haci?

PARA KETO Y PENSA

Pa bo por tuma un decision sabi den un situacion asina, bo mester di un identidad, es decir, sa ki sorto di persona bo ta. Esey ta encera sa kico bo norma- y balornan ta y kico bo ta kere aden. Si bo sa esey, ta abo ta dicidi kico bo ta haci den bo bida y no otro hende.—1 Corintionan 9:26, 27.

Con bo por haya e forsa pa logra esey? Bo por cuminsa na contesta e siguiente preguntanan.

 1 KICO TA MI PUNTONAN FUERTE?

Si bo sa kico ta bo habilidadnan y cualidadnan positivo, bo por tin mas confianza den bo mes.

EHEMPEL DI BIJBEL: Apostel Pablo a skirbi: “Hasta si mi no ta mucho habil den mi forma di papia, un cos ta sigur: conocemento si mi tin.” (2 Corintionan 11:6) Pablo tabatin un comprondemento profundo di e Scritura, y esey a yud’e pa e para firme ora otronan tabata cuestion’e. E no a laga comentario negativo di otro hende pon’e perde confianza den su mes.—2 Corintionan 10:10; 11:5.

ANALISA BO MES: Skirbi akibou un habilidad of algo cu bo ta bon den dje.

Awor, skirbi un cualidad fuerte cu bo tin. (Por ehempel, bo ta mustra interes den otro hende? Bo ta generoso? Bo ta confiabel? Bo ta puntual?)

2 KICO TA MI PUNTONAN DEBIL?

Si bo no traha riba bo puntonan debil y si bo laga esakinan domina bo bida, bo por perde bo norma- y balornan.

EHEMPEL DI BIJBEL: Pablo tabata consciente di su debilidadnan. El a skirbi: “Realmente, mi tin placer den e ley di Dios segun e hende cu mi ta di paden, pero mi ta mira den mi curpa un otro ley cu ta bringa contra e ley di mi mente. Y e ley di pica aki tin mi preso.”—Romanonan 7:22, 23.

ANALISA BO MES: Cua ta bo debilidadnan cu bo mester siña domina?

 3 KICO TA MI METANAN?

Lo bo drenta un taxi y bisa e chauffeur pa e keda dal ronchi te ora cu su gasolin caba? Esey lo ta bobo di bo parti y lo sali bo hopi caro.

Kico ta e les? Pa evita cu, na moda di papia, bo ta keda dal ronchi den bida, bo mester pone meta. E ora ey bo sa unda bo ta bay, y bo tin un plan con pa yega eynan.

EHEMPEL DI BIJBEL: Pablo a skirbi: “E forma cu mi ta core no ta manera cos cu mi no sa unda mi ta bay.” (1 Corintionan 9:26) Pablo no a biba pa biba; el a pone meta y a biba segun e metanan ey.—Filipensenan 3:12-14.

ANALISA BO MES: Skirbi akibou tres meta cu bo kier logra e aña aki.

4 KICO BO TA KERE ADEN?

Si bo ta determina pa pega na bo norma- y balornan, bo ta mescos cu un palo bon planta cu por soporta tormentanan fuerte

Si bo no sa kico bo ta kere aden, lo bo ta un persona indeciso. Lo bo ta mescos cu un camaleon; lo bo keda cambia color pa adapta bo mes na bo pareunan. Esey ta un señal cu bo no tin bo mes identidad.

Di otro banda, ora bo accionnan ta basa riba loke bo ta kere aden, bo ta mantene bo identidad, sin importa kico otro hende ta haci.

EHEMPEL DI BIJBEL: Aunke Daniel lo tabata un teenager ainda, e tabata “determina den su curason” pa obedece e leynan di Dios, maske e no tabata hunto cu su famia. (Daniel 1:8, NW) Asina ey Daniel a proteha su identidad. El a para pa loke el a kere aden.

ANALISA BO MES: Kico abo ta kere aden? Por ehempel: Bo ta kere den Dios? Si ta asina, kico ta pone bo kere den dje? Kico ta convence abo cu e ta existi?

Bo ta kere cu e normanan moral di Dios ta pa bo mes bon? Si ta asina, kico ta pone bo kere esey?

Finalmente, manera kico bo kier ta? Manera un blachi cu ta cay y cu biento ta supla p’aki y p’aya, of manera un palo cu por wanta hasta un tormenta fuerte? Para firme pa loke bo ta kere aden, y e ora ey lo bo ta manera e palo ey. Esey lo yuda bo contesta e pregunta: Ken mi ta realmente?