Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Contesta pa 10 Pregunta Cu Hobennan Sa Haci

 PREGUNTA 3

Con Mi Por Papia cu Mi Mayornan?

Con Mi Por Papia cu Mi Mayornan?

DICON TA BON PA BO SA?

Mas mihor bo relacion cu bo mayornan ta, mas trankil bo bida lo ta.

KICO ABO LO HACI?

Imagina bo e siguiente escena: Ta diaranson atardi. Jeff, di 17 aña, a caba di haci trabou di cas, y awor e merece un tiki tempo pa e sosega un rato. E ta cende e television y benta su curpa riba su stoel faborito.

Net e ora ey su tata ta bin para den porta, no mucho contento.

“Jeffrey! Dicon bo ta sinta perde bo tempo ta wak television? Bo ta supose di yuda bo ruman chikito cu su huiswerk, toch? Dicon nunca bo no ta tende?”

Jeff ta gruña algo net pa su tata tende: “Ay no! Atrobe?”

Tata ta hala cerca y ta puntr’e: “Ablif, kico b’a bisa?”

Jeff ta hala un rosea profundo, wak den otro direccion y bisa: “Nada Tata.”

Awor si su tata a rabia y e ta bisa: “Wak bon con bo ta papia cu mi.”

Si ta abo ta Jeff, kico lo bo a haci pa evita e situacion aki?

PARA KETO Y PENSA

Comunicacion cu bo mayornan ta mescos cu coremento di auto. Si bo haya bo cu un obstaculo den caminda, bo por scoge un otro ruta.

 POR EHEMPEL:

Un mucha muher cu yama Leah ta bisa: “Mi ta haya cu ta dificil pa papia cu mi tata. Tin biaha mi ta papia cu ne y despues di un rato e ta bisa mi, ‘Sorry, ta cu mi bo tabata papiando?’”

LEAH TIN POR LO MENOS TRES OPCION.

  1. Grita su tata.

    Leah ta grita su tata y bis’e: “Ban serio Papi; e cos aki ta importante. Scucha mi no!”

  2. Stop di papia riba e tema.

    Leah no ta purba di papia cu su tata mas tocante su problema.

  3. Busca un otro momento pa papia.

    Leah ta papia cu su tata cara cara na un otro ocasion, of e ta skirbie un carta tocante su problema.

Cua opcion abo lo recomenda Leah?

ANALISA LO SIGUIENTE: E tata di Leah tin otro cos ta preocup’e y na e momento ey e no tin atencion pa Leah su problema. Pues, si Leah scoge Opcion A, su tata lo no compronde dicon e ta grit’e. Anto, su tata lo no ta habri tampoco pa loke Leah kier bis’e, y Leah lo no ta mustrando honor y respet na su tata. (Efesionan 6:2) En realidad, e opcion aki lo no beneficia niun di nan dos.

Mescos cu bo no ta laga e obstaculonan den caminda stroba bo di sigui core, asina tambe bo por busca un otro manera pa comunica cu bo mayornan

Opcion B por parce esun di mas facil, pero e no ta esun di mas sabi. Dicon no? Pasobra si Leah kier soluciona su problemanan, e mester papia cu su tata. E tata mester sa kico ta pasando cu Leah pa e por yud’e. Den e caso aki, silencio lo no yuda cu nada.

Pero si Leah scoge Opcion C, e no ta laga e obstaculo aki stop e di sigui purba. Na luga di esey, e ta trata di papia cu su tata na un otro momento. Anto, si e scoge pa skirbi su tata un carta, mesora e por cuminsa sintie mas mihor.

Si Leah dicidi di skirbi su tata un carta, e por skirbi precies loke e kier bisa. Ora e tata lesa e carta, e lo haya sa kico Leah kier a bis’e y esaki lo yud’e compronde Leah su problema mihor tambe. Pues, opcion C lo beneficia tanto Leah como su tata. Sea Leah papia cara cara cu su tata of skirbie un carta, e opcion aki ta basa riba e conseho di Bijbel pa “busca e cosnan cu ta promove paz.”—Romanonan 14:19.

Ki otro opcion Leah lo por tin?

Wak si bo por pensa un otro opcion y skirbie akibou. Anto, skirbi kico lo por ta e resultado di e opcion ey.

 CON PA EVITA MALCOMPRONDEMENTO

Corda cu loke bo bisa y loke bo mayornan ta kere cu bo ta bisa no ta semper mescos.

POR EHEMPEL:

Bo mayornan ta puntra bo dicon bo tin mal beis. Bo ta bisa nan: “Mi no kier papia over di esey.”

Pero, kisas loke bo mayornan ta compronde ta: “Mi no ta confia boso suficiente pa mi papia cu boso. Mi ta prefera di papia cu mi amigonan tocante mi problema, pero no cu boso.”

Imagina bo cu bo tin un problema serio y bo mayornan kier yuda bo. Pero bo ta bisa: “No worry. Mi mes por solucion’e.”

  • Kico bo mayornan lo por compronde?

  • Kico lo ta un mihor manera pa contesta?