Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Lesa cu Bo Yiunan

 LES 1

Un Secreto Cu Nos Ta Contento di Sa

Un Secreto Cu Nos Ta Contento di Sa

Un hende a yega di conta bo algo anto bisa bo pa no conta niun hende?— * Un cos asina yama un “secreto.” Bijbel ta conta nos di un secreto special cu yama “e secreto sagrado.” Bijbel ta yam’e un secreto pasobra hende no tabata sa kico e ta. Y e secreto ta sagrado pasobra e ta un cos di Dios. Hasta e angelnan tabatin gana di sa mas tocante e secreto ey. Abo kier sa kico e ta?—

Kico bo ta kere cu e angelnan ey tabata purba di haya sa?

Hopi hopi tempo pasa, Dios a traha e prome hende homber y e prome hende muher. Nan nomber ta Adam cu Eva. Dios a pone nan biba na un luga hopi bunita mes cu yama e Hofi di Eden. Si Adam cu Eva a haci loke Dios a bisa nan, esta, obedece, e ora ey nan lo por a traha hunto cu nan yiunan y haci henter mundo bira un paradijs mescos cu e hofi ey. Anto nan por a keda biba den Paradijs sin muri nunca. Pero, bo ta corda kico Adam cu Eva a haci?—

Adam cu Eva no a obedece Dios, y ta pesey awe nos mundo cu nos ta biba aden no ta un paradijs. Pero Dios a bisa cu e ta bay haci henter nos mundo bira bunita y cu tur hende lo biba feliz pa semper. Con Dios ta bay haci esey? Pa masha hopi tempo, niun hende no tabata sa precies. E tabata un secreto.

Ora Hesus a bin na mundo, el a siña hende mas cos di e secreto ey. El a bisa nan cu e secreto ey ta tocante e Reino di Dios. Hesus a siña hende pidi Dios pa e Reino ey bin. Dios ta bay uza e Reino ey pa haci mundo un paradijs hopi bunita mes.

Bo ta contento di sa e secreto aki?— Corda cu ta hende cu ta obedece Jehova so ta bay biba den Paradijs. Bijbel ta conta nos di hopi hende cu a obedece Jehova. Bo kier tende nan storia?— Ban siña tocante un par di e hendenan ey y mira con nos por ta manera nan.

BAN LESA DEN BO BIJBEL

  • Marco 4:11

  • 1 Pedro 1:12

  • Genesis 1:26-28; 2:8, 9; 3:6, 23

  • Mateo 6:9, 10

  • Salmo 37:11, 29

^ par. 3 Na diferente luga den e storianan aki, lo bo topa un strepi manera esaki (—) tras di un pregunta. Lo ta bon si bo pausa un rato na e strepi y laga bo yiu contesta.