Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Lesa cu Bo Yiunan

 LES 5

Samuel A Sigui Haci Cos Cu Jehova Gusta

Samuel A Sigui Haci Cos Cu Jehova Gusta

Samuel a bay biba y traha na e tabernakel for di tempo cu e tabata mucha chikito. E tabernakel ta caminda hende tabata bay pa adora Jehova. Bo sa dicon Samuel a bay biba na e luga ey? Prome, nos tin cu siña algo di Samuel su mama, Ana.

Pa hopi tempo, Ana tabatin hopi gana di tin un yiu, pero e no tabata por. Pesey, el a haci oracion na Jehova y a pidie pa por fabor yud’e. El a priminti Dios cu si e haya un yiu homber, e ta lag’e bay biba y traha na e tabernakel. Jehova a haci loke Ana a pidie, anto Ana a haya un yiu homber. El a yam’e Samuel. Anto despues, Ana a haci precies manera el a priminti Jehova. Ora Samuel tabatin tres of cuater aña, Ana a hib’e na e tabernakel pa e bay sirbi Dios eynan.

Eli tabata sumo sacerdote na e tabernakel. Su dos yiu hombernan tambe tabata traha eynan. Corda cu e tabernakel tabata Dios su cas di adoracion. Esey kiermen cu na e luga ey ta cos bon so hende mester a haci. Pero e dos yiunan di Eli tabata haci cos hopi malo mes. Samuel a mira e cosnan cu nan tabata haci. Samuel tambe a cuminsa haci malo manera e yiunan di Eli?— No, el a sigui haci cos cu Jehova gusta, manera su tata cu su mama a siñ’e.

Kico abo ta haya cu Eli mester a haci cu su dos yiu hombernan?— E mester a straf nan. E no mester a laga nan traha mas na e cas di Dios. Pero Eli no a hacie. Pesey Jehova a rabia cu ne y cu su dos yiunan. Jehova a dicidi cu e ta bay castiga nan.

Samuel a duna Eli un mensahe di Jehova

Un anochi ora cu Samuel tabata drumi, el a tende un stem ta yam’e: ‘Samuel!’ El a core bay cerca Eli, pero Eli a bis’e: ‘Mi no a yama bo.’ E mesun cos a bolbe sosode dos biaha mas. E di tres biaha, Eli a bisa Samuel cu si e bolbe tende e stem, e mester contesta: ‘Ata mi aki, Jehova. Mi ta scucha.’ Anto asina  Samuel a haci tambe. E ora ey, Jehova a bisa Samuel: ‘Bisa Eli cu mi ta bay castiga su famia pa e mal cosnan cu nan a haci.’ Bo ta kere cu tabata facil pa Samuel duna Eli e mensahe ey?— No, no tabata facil. Pero aunke Samuel tabatin miedo, el a haci manera Jehova a mand’e. Loke Jehova a bisa a pasa tambe. Nan a mata e dos yiunan di Eli, anto Eli mes tambe a muri.

Samuel ta un bon ehempel pa nos. Aunke el a mira otro hende ta haci cos malo, e si a sigui haci cos cu Jehova gusta. Anto, abo awor? Abo kier ta manera Samuel y sigui haci cos cu Jehova gusta? Si bo haci asina, lo bo haci Jehova y bo tata cu bo mama hopi contento.

BAN LESA DEN BO BIJBEL

  • 1 Samuel 2:22-26; 3:1-21