Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Lesa cu Bo Yiunan

 LES 12

Pablo Su Subrino Tabatin Curashi

Pablo Su Subrino Tabatin Curashi

Ban siña di un mucha homber cu a scapa bida di su omo. Su omo ta apostel Pablo. Nos no sa con yama e mucha homber, pero nos sa si cu e tabatin hopi curashi. Bo kier tende kico el a haci?—

Pablo tabata den prizon na Jerusalem. Nan a hinc’e den prizon pasobra e tabata predica tocante Hesus. Un par di mal hende tabatin rabia riba Pablo. Pesey nan a traha un plan malbado. Nan a bisa: ‘Ban pidi e comandante di e soldaatnan pa e laga nan trece Pablo aki dilanti di huez. Nos ta bay sconde canto di caminda, anto ora Pablo pasa, nos ta mat’e!’

Pablo su subrino a conta Pablo y e comandante di soldaat tocante e plan malbado

Pablo su subrino a haya sa di e plan. Kico el a haci e ora ey? El a bay na e prizon y a conta Pablo loke el a tende. Mesora, Pablo a bis’e pa e bay conta e comandante di e soldaatnan tocante e plan malbado. Bo ta kere cu tabata facil pa Pablo su subrino bay papia cu e comandante?— No, pasobra e comandante tabata un homber importante. Pero e subrino di Pablo a mustra curashi y a bay papia cu e comandante si.

E comandante tabata sa bon kico pa haci. El a pone un grupo di casi 500 soldaat pa cuida Pablo! El a manda nan hiba Pablo Cesarea e anochi ey mes. Pablo a scapa?— Si, e mal hendenan no por a mat’e! Nan plan malbado a faya.

Kico e storia aki ta siña bo?— Abo tambe por tin curashi mescos cu Pablo su subrino. Nos mester tin curashi ora nos ta papia cu hende tocante Jehova. Abo lo tin curashi y sigui papia cu hende tocante Jehova?— Si bo hacie, lo bo por scapa un hende su bida tambe.

BAN LESA DEN BO BIJBEL

  • Echonan 23:12-24

  • Mateo 24:14; 28:18-20

  • 1 Timoteo 4:16