Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Lesa cu Bo Yiunan

 LES 6

David No Tabatin Miedo

David No Tabatin Miedo

Kico abo ta haci ora bo tin miedo?— Kisas bo ta bay cerca bo mama of bo tata. Pero no ta nan so por yuda bo. Bo sa ken tambe por yuda bo?— Si, Jehova. Y e tin mas poder cu tur hende! Ban papia awor di un mucha homber den Bijbel cu yama David. E tabata sa cu semper Jehova lo yud’e. Pesey e no tabatin miedo.

For di tempo cu David tabata baby, su tata y su mama a siñ’e stima Jehova. Esey a yuda David pa e no tin miedo, hasta ora un cos pasa cu por duna hende miedo. E tabata sa cu Jehova ta su Amigo y cu Jehova lo yud’e. Un dia cu David tabata cuida carne, un leon grandi a bin anto coy un di e carnenan den su boca! Bo sa kico David a haci? El a core tras di e leon, gar’e na su barba anto dal e mata! Anto un biaha cu un beer a ataca e carnenan, David a mata e tambe! Ken bo ta kere a yuda David?— Si, Jehova.

Un otro biaha tambe David tabatin masha hopi curashi. E soldaatnan di Israel tabata bringa contra un grupo di hende cu yama ‘Filisteo.’ Un di e soldaatnan Filisteo tabata un homber hopi hopi halto mes, un gigante! Su nomber ta Goliat. E gigante ey tabata tenta e soldaatnan di Israel y Jehova tambe. Goliat tabata bisa e soldaatnan di Israel cu si nan no bin bringa cu ne, nan ta cobarde. Pero e soldaatnan di Israel tabatin mucho miedo di bringa cu ne. Ora David a tende kico tabata pasando, el a bisa Goliat: ‘Ami si ta bay bringa cu bo! Jehova lo yuda mi, anto mi ta bay gana bo tambe!’ Bo no ta haya cu David tabatin hopi curashi?— Si, hopi mes. Bo kier sa kico a pasa e ora ey?

David a coy cinco piedra lizo y su slinger. Un slinger ta un pida largo di cuero of di otro cos, cu nan tabata uza pa zwaai piedra cu ne. Asina David a sali bay bringa cu e gigante. Ora Goliat a mira con jong David ta, el a tenta David. Pero David a bis’e: ‘Abo ta bin bringa cu mi cu un spada, pero ami ta bay bringa cu bo den nomber di Jehova!’ E ora ey el a pone un piedra den su slinger, core bay riba  Goliat anto zwaai e piedra stret riba dje. E piedra a dal Goliat precies den su frenta, anto el a cay abou morto! E Filisteonan a haya asina tanto miedo cu nan tur a saca careda core bay. Con un mucha homber jong manera David por a gana un gigante asina?— Ta Jehova a yud’e, y Jehova tin mucho mas poder cu e gigante ey tabatin!

David no tabatin miedo pasobra e tabata sa cu Jehova lo yud’e

Kico e storia di David ta siña bo?— Jehova tin mas poder cu tur hende. Y e ta bo Amigo. Pesey, e siguiente biaha cu bo sinti miedo, corda cu Jehova por yuda bo haya curashi!

BAN LESA DEN BO BIJBEL

  • Salmo 56:3, 4

  • 1 Samuel 17:20-54