Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Hala Serca Yehova

 CAPITULO 9

“Cristo, e Poder di Dios”

“Cristo, e Poder di Dios”

1-3. (a) Ki experencia spantoso e disipelnan a pasa aden riba Lama di Galilea, y kico Hesus a haci? (b) Pakico Hesus ta ser yama corectamente “Cristo, e poder di Dios”?

E DISIPELNAN di Cristo tawata morto spanta. Nan tawata crusando Lama di Galilea ora un tormenta a sorprende nan. Sin duda nan a yega di mira tormenta riba e lago aki caba—al fin y al cabo, algun di e hombernan aki tawata piscado pa hopi aña. * (Mateo 4:18, 19) Pero esaki tawata “un tempestad di biento fuerte”, y den un rato di ora el a pone e lama bira masha bruto. E hombernan a traha desesperadamente pa maneha e boto, pero e tormenta tawata demasiado fuerte. Olanan halto tawata “dal den e boto”, y esaki a cuminsa yena cu awa. Apesar di e conmocion, Hesus tawata morto na soño patras den e boto, cansa despues di a pasa henter un dia ta siña e multitudnan. Mirando nan bida na peliger, e disipelnan a lant’e y rog’e: “Señor, salba nos, nos ta perece!”—Marco 4:35-38; Mateo 8:23-25.

2 Hesus no tawatin miedo. Cu confiansa total, el a reprende tanto e biento como e lama: “Silencio, keda keto!” Mesora e biento y lama a obedece—e tempestad a caba na nada, e olanan a baha y lama “a bira completamente calmo.” Awor si e disipelnan a haya miedo! “Ta ken esaki ta anto?” nan a cuminsa fluister. En berdad, ta ken por ta capas di reprende biento y lama como si fuera ta un mala mucha e ta corigiendo?—Marco 4:39-41; Mateo 8:26, 27.

 3 Pero Hesus no tawata cualkier hende. E poder di Yehova a actua mediante dje y na fabor di dje na un manera extraordinario. Bou di inspiracion apostel Pablo por a referi corectamente na dje como “Cristo, e poder di Dios.” (1 Corintionan 1:24) Den ki manera Dios ta manifesta su poder den Hesus? Y ki influencia e manera cu Hesus ta haci uzo di poder por tin den nos bida?

E Poder di Dios Su Yiu Unigenito

4, 5. (a) Ki poder y autoridad Yehova a delega na su Yiu unigenito? (b) Con e Yiu aki a ser prepara pa realisa e propositonan relaciona cu e creacion di su Tata?

4 Tuma por ehempel e poder cu Hesus tawatin durante su existencia prehumano. Yehova a eherce su “poder eterno” ora el a crea su Yiu unigenito, kende despues a bira conoci como Hesucristo. (Romanonan 1:20; Colosensenan 1:15) Despues di esei, Yehova a delega un enorme poder y autoridad na e Yiu aki, dunand’e e tarea di realisa e propositonan relaciona cu Su creacion. En conexion cu e Yiu, Bijbel ta bisa: “Tur cos a bini na existencia pa medio di dje, y fuera di dje nada di loke ta existi no a bini na existencia.”—Huan 1:3.

5 Nos no por caba di compronde e magnitud di e tarea ei. Imagina e poder cu ta necesario pa crea miyones di angel poderoso, e universo fisico cu su miles di miyones di galaxia y tera cu su variedad abundante di bida. Pa cumpli cu e tareanan aki, e Yiu unigenito tawatin e forsa di mas poderoso den universo na su disposicion: spirito santo di Dios. Pa e Yiu aki, tawata un gran placer di por a fungi como e Trahado Experto cu Yehova a uza pa crea tur otro cos. —Proverbionan 8:22-31.

6. Despues di Hesus su morto riba tera y su resureccion, ki poder y autoridad el a haya?

6 E Yiu unigenito por a ricibi asta mas poder y autoridad? Despues di e morto di Hesus riba tera y su resureccion, el a bisa: “Tur autoridad a wordo duna na mi den shelo y riba tera.” (Mateo 28:18) Si, Hesus a haya e capasidad y  derecho pa eherce poder universalmente. Como “Rei di Reinan y Señor di Señornan”, el a haya autorisacion pa “pone un fin na tur dominio y na tur autoridad y poder”—tanto visibel como invisibel—cu ta oponiendo su Tata. (Revelacion 19:16; 1 Corintionan 15:24-26) Cu excepcion di E mes, Dios ‘no a laga nada cu no ta someti na’ Hesus.—Hebreonan 2:8; 1 Corintionan 15:27.

7. Pakico nos por ta sigur cu Hesus hamas lo haci mal uzo di e poder cu Yehova a dun’e?

7 Nos tin cu precupa cu Hesus ta bai haci mal uzo di su poder? Di ningun manera! Hesus tin un gran amor pa su Tata y lo no haci nada pa desagrad’e. (Huan 8:29; 14:31) Hesus sa mucho bon cu hamas Yehova, como e Todopoderoso, lo haci mal uzo di su poder. Hesus mes a mira con Yehova ta busca oportunidad pa e “sostene fuertemente esnan cu nan curason ta completamente di dje.” (2 Cronicanan 16:9) Si, Hesus tin e mesun amor cu su Tata tin pa humanidad, di manera cu nos por confia cu semper Hesus lo uza su poder pa un bon causa. (Huan 13:1) Hesus a establece un registro intachabel den esaki. Laga nos considera e poder cu e tawatin tempo cu e tawata riba tera y con el a ser motiva pa uz’e.

“Poderoso den . . . Palabra”

8. Despues cu Hesus a ser ungi, el a ricibi poder pa haci kico, y con el a uza su poder?

8 Tur cos ta mustra cu Hesus no a haci milager tempo cu el a lanta como mucha na Nazaret. Pero cosnan a cambia despues cu el a batisa na aña 29 di nos era, tempo cu e tawatin 30 aña di edad. (Lucas 3:21-23) Bijbel ta bisa: “Dios a ungie cu spirito santo y cu poder, y . . . el a bai rond, haciendo bon y curando tur cu tawata bou di poder di Diabel.” (Echonan 10:38) E echo cu Hesus tawata “haciendo bon” no ta demostra cu Hesus a haci bon uzo di su poder? Despues cu Yehova a ungie, el a bira “un profeta poderoso den echo y den palabra.”—Lucas 24:19.

9-11. (a) Unda Hesus a duna gran parti di su siñansa, y kico tawata un reto p’e? (b) Pakico e multitudnan a keda asombra cu Hesus su manera di siña?

 9 Den ki sentido Hesus tawata poderoso den palabra? Hopi bes el a siña hende na aire liber—na oriya di lama, riba sero y tambe den caya y na plasa. (Marco 6:53-56; Lucas 5:1-3; 13:26) Esnan cu tawata scuch’e por a simplemente cana bai si su palabranan no a capta nan interes. Den un epoca cu no tawatin buki imprimi ainda, e hendenan cu a scuch’e cu aprecio tawatin cu warda su palabranan den nan mente y curason. Pues e siñansa di Hesus mester tawata fasinante, bon cla pa compronde y facil pa corda. Pero e reto aki no tawata problema pa Hesus. Tuma por ehempel su Sermon Riba Sero.

10 Un mainta tempran na aña 31 di nos era, un multitud di hende a bin hunto riba un sero banda di Lama di Galilea. Algun a bin for di Hudea y Herusalem, 100 pa 110 kilometer leu. Otronan a bin for di e costa di Tiro y Sidon, den nort. Hopi hende enfermo a yega serca Hesus pa mishi cu ne, y el a cura nan tur. Ora no a resta ni sikiera un hende seriamente malo mas den e multitud, el a cuminsa siña nan. (Lucas 6:17-19) Ora el a caba di papia un rato despues, e multitud a keda asombra pa loke nan a tende. Pakico?

11 Añanan despues, un di e personanan cu a tende e sermon ei a skirbi: “E multitudnan a keda asombra di su siñansa; pasobra e tawata siña nan manera un hende cu tin autoridad.” (Mateo 7:28, 29) Nan por a sinti Hesus su poder ora el a papia. El a papia como representante di Dios y a respalda su siñansa cu e autoridad di e Palabra di Dios. (Huan 7:16) Hesus su declaracionnan tawata cla, su spiertamentonan tawata combencente y su argumentonan tawata irefutabel. Su palabranan a touch esencia di asuntonan y tambe curason di esnan cu a scuch’e. El a siña nan con pa haya felicidad, con pa resa, con pa busca e Reino di Dios y con pa traha riba un futuro sigur.  (Mateo 5:3–7:27) Su palabranan tawata un estimulo pa esnan cu tawatin hamber pa e berdad y husticia. E personanan ei tawata dispuesto pa “nenga” nan mes y bandona tur cos pa por a siguie. (Mateo 16:24; Lucas 5:10, 11) Esei tawata un bon testimonio di e poder di Hesus su palabranan!

“Poderoso den Echo”

12, 13. Den ki sentido Hesus tawata “poderoso den echo”, y cua ta e varios tipo di milagernan cu el a haci?

12 Tambe Hesus tawata “poderoso den echo.” (Lucas 24:19) E Evangelionan ta papia spesificamente di mas cu 30 milager cu Hesus a haci—tur cu poder di Yehova. * (Lucas 5:17) E milagernan di Hesus tawatin efecto riba bida di miles di hende. Den dos di e milagernan ei so caba—dia el a alimenta 5.000 homber, y despues dia el a alimenta 4.000 homber “sin conta hende mohe y mucha”—lo por tawatin un total di 20.000 hende envolvi!—Mateo 14:13-21; 15:32-38.

“Nan a mira Hesus ta cana riba lama”

13 Hesus a haci un gran variedad di milager. E tawatin autoridad riba demoño; e tawata saca nan sin problema. (Lucas 9:37-43) E tawatin poder riba materia; el a haci awa bira biña. (Huan 2:1-11) Pa sorpresa di su disipelnan, el a cana riba e lama bruto di Galilea. (Huan 6:18, 19) E por a cura tur enfermedad, manera mal funcionamento di organo, malesa cronico y enfermedadnan fatal. (Marco 3:1-5; Huan 4:46-54) El a efectua e curacionnan ei den varios manera. Hesus a cura algun hende for di un distancia, mientras cu otronan el a mishi cu nan personalmente. (Mateo 8:2, 3, 5-13) El a cura algun instantaneamente, otronan gradualmente.—Marco 8:22-25; Lucas 8:43, 44.

14. Bou di ki circunstancianan Hesus a demostra cu e tawatin poder pa deshaci di e efecto di morto?

14 Algo sobresaliente ta cu Hesus tawatin e capasidad di deshaci  di e efecto di morto. Bijbel ta papia di tres ocasion cu Hesus a lanta morto: el a debolbe un mucha mohe di 12 aña na su mayornan, el a duna un mama biuda su unico yiu bek, y a debolbe un ruman stima na su ruman mohenan. (Lucas 7:11-15; 8:49-56; Huan 11:38-44) No tawatin ningun situacion demasiado dificil p’e. El a lanta e mucha mohe di 12 aña for di su cama di morto un poco despues cu el a muri. El a resusita yiu di e biuda for di e tabla cu nan tawata carg’e ariba, obviamente, riba e mesun dia cu el a muri. Y el a lanta Lazaro for di graf despues cu esaki tawata morto pa cuater dia.

Uzo di Poder sin Egoismo, Responsabel y cu Compasion

15, 16. Ki evidencia tin cu Hesus no a uza su poder na un manera egoista?

15 Bo por imagina bo cuanto mal uzo di poder un gobernante lo a haci si ta e tawatin e poder di Hesus? Pero Hesus tawata un homber sin pica. (1 Pedro 2:22) E no a laga su mes wordo contamina pa e egoismo, e ambicion ni e golosidad cu ta impulsa hende imperfecto pa uza nan poder pa perhudica otronan.

16 Nunca Hesus a uza su poder na un manera egoista, por ehempel, pa saca bentaha personal. Ora e tawatin hamber, el a nenga di haci piedra bira pan pa su mes. (Mateo 4:1-4) E poco recursonan cu e tawatin ta mustra cu e no a uza su poder pa metanan materialista. (Mateo 8:20) Tin mas evidencia cu su obranan poderoso a brota for di motivacionnan sin egoismo. Ora el a haci milager, esei a nifica cierto sacrificio p’e. Ora e tawata cura hende enfermo, poder tawata sali for di dje. E tawata conciente di esaki, aunke tawata trata aki di un curacion so. (Marco 5:25-34) No obstante, el a laga henter e multitud mishi cu ne, y nan a ser cura. (Lucas 6:19) Ki un spirito di sacrificio propio!

17. Con Hesus a demostra cu el a uza su poder na un manera responsabel?

17 Hesus a uza su poder na un manera responsabel. Nunca  el a realisa obranan poderoso djis pa impresiona otro hende of meramente pa duna un show. (Mateo 4:5-7) El a nenga di haci milager djis pa satisface e curiosidad maligno di Herodes. (Lucas 23:8, 9) En bes di gaba tocante su poder, hopi bes el a instrui esnan cu el a cura pa no bisa ningun hende. (Marco 5:43; 7:36) E no tawata kier pa hende saca conclusion tocante dje a base di informenan sensacionalista.—Mateo 12:15-19.

18-20. (a) Kico a influencia e manera cu Hesus a uza su poder? (b) Kico bo ta pensa di e manera cu Hesus a cura un homber sordo?

18 E homber poderoso aki, Hesus, tawata masha diferente for di e gobernantenan cu a eherce nan poder sin ningun sintimento y sin tene cuenta cu e necesidadnan y sufrimento di otro hende. Hesus tawatin interes den hende. E solo echo cu el a mira hende afligi a conmov’e asina tanto cu el a sinti su mes motiva pa alivia nan sufrimento. (Mateo 14:14) E tawatin un interes profundo den nan sintimento- y necesidadnan, y esaki a influencia e manera cu el a uza su poder. Nos ta haya un ehempel conmovedor di esaki na Marco 7:31-37.

19 Na e ocasion ei, un gran multitud di hende a haya Hesus y a trece hopi hende cu tawata enfermo p’e, y el a cura nan tur. (Mateo 15:29, 30) Pero Hesus a duna atencion special na un cierto homber. E homber aki tawata sordo y apenas por a papia. Hesus lo a ripara cu sea e homber aki tawata hopi nervioso of e tawatin berguensa. Cu compasion, Hesus a hala e homber un banda y hib’e leu for di e multitud na un luga priva. E ora ei Hesus a haci algun seña pa mustra e homber kico e tawata bai haci. El “a hinca su dede den su horea, y el a scupi y a mishi cu su lenga.” * (Marco 7:33) Despues, Hesus  a wak na shelo y a suspira un suplica. Cu e accionnan aki e lo a laga e homber compronde: ‘Loke mi ta bai haci pa bo ta cu poder di Dios.’ Finalmente, Hesus a bisa: “Sea habri!” (Marco 7:34) Cu esei, e homber por a tende atrobe, y e por a papia normalmente.

20 E solo echo cu Hesus den su gran compasion a tene cuenta cu sintimento di e personanan cu el a cura cu poder di Dios, ta conmove nos! No ta un consuelo pa sa cu Yehova a pone e Reino Mesianico den man di un Gobernante asina compasivo y amoroso?

Señal di Cosnan Benidero

21, 22. (a) E milagernan di Hesus ta un señal di kico den futuro? (b) Door cu Hesus tin dominio riba e forsanan di naturalesa, kico nos por spera bou di su reinado?

21 E obranan poderoso cu Hesus a efectua riba tera tawata djis un muestra di e bendicionnan asta mas grandi cu mester bin bou di su reinado. Den Dios su mundo nobo, Hesus lo bolbe haci milager—pero e biaha aki na escala mundial! Pensa riba algun di e perspectivanan emocionante ei!

22 Hesus lo restaura e balansa perfecto di ecologia di tera. Corda cu el a demostra su dominio riba e forsanan di naturalesa door di calma un tormenta. No tin duda anto cu bou di Cristo su Reinado, humanidad lo no tin nodi tene miedo cu horcan, temblor, volcan of otro desaster natural lo haci nan daño. En bista cu Hesus ta e Trahador Experto, esun cu Yehova a uza pa crea tera y tur bida riba dje, e ta compronde perfectamente con tera ta hinca den otro. E sa con pa uza su recursonan na un manera adecua. Bou di su gobernacion, henter tera lo ser comberti den un paradijs.—Lucas 23:43.

23. Como Rei, con Hesus lo satisface e necesidadnan di humanidad?

23 Ke tal di e necesidadnan di humanidad? E echo cu Hesus por a alimenta miles di hende generosamente, haciendo uzo di masha poco medio, ta garantisa nos cu bou di su  gobernacion ningun hende lo sufri di hamber. Si, un abundancia di cuminda, reparti na un manera husto, lo pone fin na hamber di unabes pa semper. (Salmo 72:16) E echo cu e tawatin poder riba enfermedad ta indica cu hende malo, ciego, sordo, mancaron y coho lo wordo cura di un forma completo y permanente. (Isaias 33:24; 35:5, 6) E echo cu e por a resusita morto ta un garantia cu como Rei celestial e tin poder tambe pa resusita e miyones y miyones di personanan cu su Tata ta corda cu placer.—Huan 5:28, 29.

24. Ora nos reflexiona riba e poder di Hesus, kico nos tin cu tene na mente y pakico?

24 Segun cu nos ta reflexiona riba e poder di Hesus, laga nos tene na mente cu e Yiu aki ta imita su Tata perfectamente. (Huan 14:9) E manera cu Hesus ta uza su poder ta duna nos un idea cla con Yehova ta uza su poder. Por ehempel, pensa riba e manera tierno cu Hesus a cura un cierto leproso. Yen di compasion, Hesus a mishi cu e homber y a bis’e: “Mi kier.” (Marco 1:40-42) Pa medio di e relatonan aki, ta como si fuera Yehova ta bisa nos: ‘Asina ami ta uza mi poder!’ Bo no ta sinti bo conmovi pa alaba nos Dios todopoderoso y gradicie pa e manera tan amoroso cu e ta uza su poder?

^ par. 1 Ta masha comun pa tormentanan surgi diripiente riba Lama di Galilea. Debi cu e lago aki ta hopi bou di nivel di lama (rond di 200 meter), e aire ta mucho mas cayente riba e lago cu den e area rond di dje, y esaki ta crea disturbionan atmosferico. Bientonan fuerte ta baha riba e Vaye di Yordan for di Sero Hermon, situa den nort. Di un momento pa otro un tempo calmo por cambia bira un tormenta fuerte.

^ par. 12 Ademas, tin biaha e Evangelionan ta agrupa hopi milager bou di un solo descripcion general. Por ehempel, na un ocasion “henter [un] stad” a bini serca Hesus, y el a cura “hopi” hende enfermo.—Marco 1:32-34.

^ par. 19 Tanto e Hudiunan como hende no Hudiu a considera scupimento como un medio of señal di curacion, y e scrituranan rabinico ta papia di scupi como remedi. Talbes Hesus a scupi djis pa mustra e homber cu lo e wordo cura. Sea como sea, Hesus no a uza su scupi como remedi natural.

Mas Informacion

E TOREN DI VIGILANCIA (EDICION DI ESTUDIO)

“Laga Bo Reino Bin”—Pero Ki Dia?

Dicon nos por ta sigur cu pronto Dios su Rey ungi lo tuma paso pa laga e boluntad di Dios sosode completamente riba Tera?