Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Hala Serca Yehova

 CAPITULO 6

Poder pa Destrui—“Señor Ta un Guerero”

Poder pa Destrui—“Señor Ta un Guerero”

1-3. (a) Ki peliger e Israelitanan a enfrenta na man di e Egipcionan? (b) Con Yehova a lucha pa su pueblo?

E ISRAELITANAN a keda atrapa meimei di seronan steil inaccesibel y un lama hundo. E ehersito Egipcio, un mashin di exterminacion implacabel, tawata persigui nan, determina pa destrui nan. * Pero Moises a urgi e pueblo di Dios pa no perde speransa. “SEÑOR lo bringa pa boso”, el a garantisa nan.—Exodo 14:14.

2 Asina mes, aparentemente Moises a invoca Yehova, y Dios a contest’e: “Pakico bo ta sclama na mi? . . . Lanta bo bara y extende bo man over di e lama y dividie.” (Exodo 14:15, 16) Djis imagina bo con e susesonan ta cuminsa desaroya. Mesora Yehova ta duna ordo na su angel, y e pilar di nubia ta move bai patras di Israel; kisas e ta forma manera un muraya y blokia e liña di atake Egipcio. (Exodo 14:19, 20; Salmo 105:39) Moises ta saca su man. Impulsa pa un biento fuerte, e lama ta parti na dos. Di un manera of otro e awanan ta keda para y bira manera dos muraya. Esei ta habri un caminda suficiente hancho pa henter e nacion por pasa.—Exodo 14:21; 15:8.

3 Cu tal demostracion di poder, ta miho Farao bati retirada. Na luga di esei, Farao den su orguyo ta kere cu e ta masha cos y ta manda su trupanan ataca. (Exodo 14:23) E Egipcionan ta start un persecucion formal riba e fondo  seco di lama. Pero masha lihe nan atake ta bin caba den un caos ora e wielnan di nan garoshinan cuminsa sali for di luga. Unabes e Israelitanan ta sano y salvo na e otro banda, Yehova ta manda Moises: “Extende bo man over di e lama, pa e awanan bini bek riba e Egipcionan, riba nan garoshinan y riba nan coredonan di cabai.” E murayanan di awa ta bini abou y dera Farao cu su ehersito!—Exodo 14:24-28; Salmo 136:15.

Na Lama Cora, Yehova a demostra di ta “un guerero”

4. (a) Na Lama Cora, kico Yehova a demostra di ta? (b) Con algun persona kisas ta reacciona riba e descripcion aki di Yehova?

4 E liberacion di e nacion di Israel na Lama Cora tawata un suseso memorabel den e historia di Dios su trato cu hende. Ei Yehova a demostra cu e ta “un guerero.” (Exodo 15:3) Awor con bo ta reacciona riba e descripcion aki di Yehova? Pa ta franco, guera a causa hopi dolor y miseria pa humanidad. E echo cu Dios ta uza poder destructivo ta tene bo leu for di dje en bes di hala bo serca dje?

Gueranan di Dios Compara cu Gueranan Humano

5, 6. (a) Pakico ta apropiado pa yama Yehova “Señor di ehersitonan”? (b) Ki diferencia tin entre gueranan di Dios y gueranan di hende?

5 E titulo “Señor di ehersitonan” ta aparece casi tresshen bes den e Scritura Hebreo y dos bes den e Scritura Griego Cristian. (1 Samuel 1:11) Como Gobernante Soberano, Yehova ta dirigi un ehersito enorme di angel. (Hosue 5:13-15; 1 Reinan 22:19) E potencial cu e ehersito aki tin pa destrui ta impresionante. (Isaias 37:36) Destruccion di hende no ta un esena agradabel pa mira. Sinembargo, nos tin cu corda cu gueranan di Dios no ta manera e conflictonan di hende riba co’i kens. Maske cuanto e lidernan  militar y politico purba hustifica nan agresionnan cu motibonan noble, gueranan humano semper ta motiva pa cudishi y egoismo.

6 Na contraste, Yehova si no ta bai ciegamente tras di emocion. Deuteronomio 32:4 ta declara: “E Baranca! Su obra ta perfecto, pasobra tur su camindanan ta husto; un Dios di fieldad y sin inhusticia, husto y recto e ta.” E Palabra di Dios ta condena rabia descontrola, crueldad y violencia. (Genesis 49:7; Salmo 11:5) Pues Yehova nunca ta actua sin motibo. Masha poco biaha e ta uza su poder pa destrui, y ora e haci esei mes, semper e ta e ultimo recurso. Ta manera el a bisa pa medio di su profeta Ezekiel: “‘Acaso mi tin placer den morto di e malbado’, Señor DIOS ta puntra, ‘of mas bien cu e lo bira for di su camindanan y biba?’”—Ezekiel 18:23.

7, 8. (a) Kico Job a conclui eroneamente tocante su sufrimentonan? (b) Con Elihu a corigi Job su rasonamento den e asunto aki? (c) Ki les nos por siña for di Job su experencia?

7 Pakico Yehova ta uza su poder pa destrui anto? Prome cu nos contesta e pregunta ei, nos por corda riba e homber husto Job. Satanas a pretende cu Job—en realidad, cualkier ser humano mes—lo no por mantene su integridad ora e ta bou di prueba. Yehova a contesta e desafio ei door di laga Satanas test e integridad di Job. Como consecuencia di esei, Job a bira malo, y a perde su rikesa y su yiunan. (Job 1:1–2:8) Inconciente di e cuestionnan envolvi, Job a deduci eroneamente cu el a sufri un castigo inhusto di parti di Dios. El a puntra Dios pakico Dios a “mik” riba dje y consider’e su “enemigo.”—Job 7:20; 13:24.

8 Un yoncuman cu yama Elihu (Eliu) a mustra Job riba su rasonamento incorecto, bisando: “Bo ta bisa: ‘Mi husticia ta mas cu husticia di Dios.’” (Job 35:2) Si, no ta sabi pa pensa cu nos sa miho cu Dios ni asumi cu el a comete un inhusticia. “Leu sea di Dios di haci maldad, y di e Todopoderoso  di comete inikidad”, Elihu a declara. Mas despues el a bisa: “Pa loke ta e Todopoderoso, nos no a aberigu’e; e ta halsa den poder. Y rectitud y abundancia di husticia lo e no menosprecia.” (Job 34:10; 36:22, 23; 37:23, NW) Nos por ta sigur cu ora Dios bringa un guera, e ta haci esei pa un bon motibo. Cu esei na mente, laga nos explora algun di e motibonan pakico tin biaha e Dios di pas ta asumi e papel di guerero.—1 Corintionan 14:33.

Pakico e Dios di Pas Ta Hay’e Ta Bringa

9. Pakico e Dios di pas ta bringa?

9 Despues cu Moises a alaba Dios como “un guerero”, el a declara: “Ken ta manera bo entre e diosnan, o SEÑOR? Ken ta manera bo, mahestuoso den santidad?” (Exodo 15:11) Profeta Habacuk a skirbi algo similar: “Bo wowonan ta mucho puro pa aproba maldad, y bo no por wak maldad cu tolerancia.” (Habacuk 1:13) Aunke Yehova ta un Dios di amor, e ta tambe un Dios di santidad, rectitud y husticia. Na cierto ocasion, e cualidadnan ei ta oblig’e haci uzo di su poder pa destrui. (Isaias 59:15-19; Lucas 18:7) Pues Dios no ta mancha su santidad ora e ta bringa. Mas bien, e ta bringa hustamente pasobra e ta santo.—Levitico 19:2.

10. (a) Na ki tempo y dicon pa prome bes a bira necesario pa Dios bringa un guera? (b) Ta den ki manera so e enemistad profetisa na Genesis 3:15 por a ser resolvi, y cu ki beneficio pa humanidad husto?

10 Wak e situacion cu a surgi despues cu e prome pareha humano, Adam y Eva, a rebela contra Dios. (Genesis 3:1-6) Si Yehova a tolera nan inhusticia, lo el a debilita su posicion como Soberano Universal. Como un Dios husto, no a ked’e nada otro sino di sentencia nan na morto. (Romanonan 6:23) Den e prome profecia di Bijbel, el a predeci cu lo a reina un enemistad entre su sirbidonan y e siguidonan di e “colebra”, Satanas. (Revelacion 12:9; Genesis 3:15) Finalmente, ta door di plecha Satanas so lo por pone fin na e  enemistad aki. (Romanonan 16:20) Pero e castigo ei lo resulta den gran bendicion pa humanidad husto, ya cu lo e libra tera di e influencia di Satanas y habri caminda pa un paradijs mundial. (Mateo 19:28) Mientrastanto, esnan cu a tuma parti pa Satanas lo a representa un menasa continuo pa e bienestar fisico y spiritual di e pueblo di Dios. Na algun ocasion, Yehova lo tawatin cu interveni.

Dios Ta Tuma Accion pa Elimina Maldad

11. Pakico Dios mester a trece un dilubio mundial?

11 Un di e intervencionnan ei tawata e Dilubio den tempo di Noe. Genesis 6:11 y 12 ta bisa: “Tera tawata corumpi den bista di Dios y tera tawata yen di violencia. Anto Dios a tira un bista riba tera, y mira, e tawata corupto, pasobra tur carni a corumpi nan caminda riba tera.” Dios lo a permiti maldad caba cu e delaster rastro di moralidad cu a resta riba tera? No. No a keda Yehova nada otro sino di trece un dilubio mundial cu lo a caba cu e hendenan violento y inmoral riba tera.

12. (a) Kico Yehova a profetisa relaciona cu e ‘desendiente’ di Abraham? (b) Pakico Yehova a core cu e Amoreonan?

12 Un otro caso similar ta e huicio di Dios contra e Cananeonan. Yehova a revela cu for di e liña di Abraham lo a bin un ‘desendiente’ mediante cua tur famia di tera lo a bendiciona nan mes. Na harmonia cu e proposito ei, Dios a decreta cu e yiunan di Abraham lo a haya e tera di Canan, caminda e pueblo Amoreo tawata biba. Ki bon motibo Dios por tawatin pa core cu e pueblo aki for di nan tera? Yehova a profetisa cu e lo a saca nan te despues di 400 aña, o sea, te ora e eror of ‘inikidad di e Amoreonan’ a bira “completo.” * (Genesis 12:1-3; 13:14, 15; 15:13, 16; 22:18) Durante e periodo di tempo ei, e Amoreonan a bira completamente  corumpi den sentido moral. Canan a bira un tera di idolatria, di dramamento di sanger y di degeneracion sexual. (Exodo 23:24; 34:12, 13; Numbernan 33:52) E habitantenan di e tera a yega asina leu di sacrifica nan yiunan den candela. Un Dios santo lo por a expone su pueblo na e maldad ei? Claro cu no. El a declara: “E tera ta impuro, y lo mi trece castigo riba dje pa su eror y e tera lo saca su habitantenan afo.” (Levitico 18:21-25, NW) Pero Yehova no a mata hende pa loco. El a salba bida di e Cananeonan cu si tawatin un bon disposicion, manera Rahab y e Gabaonitanan.—Hosue 6:25; 9:3-27.

E Ta Lucha na Fabor di Su Nomber

13, 14. (a) Pakico Yehova tawata obliga pa santifica su nomber? (b) Con Yehova a limpia su nomber di reproche?

13 Yehova ta santo, pesei su nomber tambe ta santo. (Levitico 22:32) Hesus a siña su disipelnan pidi den oracion: “Bo nomber sea santifica.” (Mateo 6:9) E rebelion den Eden a profana e nomber di Dios, ya cu el a lanta duda tocante e reputacion di Dios y su forma di goberna. Yehova no por a ignora e calumnia y e rebelion ei. El a haya su mes obliga pa limpia su nomber di reproche.—Isaias 48:11.

14 Ban bek na e Israelitanan atrobe. Tanten cu nan tawata esclabo den Egipto, e promesa cu Dios a duna Abraham cu pa medio di su Desendencia tur famia di tera lo bendiciona nan mes, a parce un promesa bashi. Pero door di libra nan y forma nan como nacion, Yehova a limpia su nomber di reproche. Pesei profeta Daniel a corda den un oracion: “O Señor nos Dios, [bo] a saca bo pueblo for di tera di Egipto cu un man poderoso y a traha un nomber pa bo mes.”—Daniel 9:15.

15. Pakico Yehova a rescata e Hudiunan for di cautiverio na Babilonia?

15 Ta interesante pa nota cu Daniel a haci oracion den e  manera aki ora Yehova mester a actua un biaha mas na fabor di e Hudiunan pa causa di Su nomber. E Hudiunan desobediente tawata den cautiverio, e biaha aki na Babilonia. Nan mes capital, Herusalem, tawata ruina. Daniel tawata sa cu si e Hudiunan bai bek nan patria, esei lo a engrandece e nomber di Yehova. Pesei Daniel a pidi den oracion: “O Señor, pordona! O Señor, scucha y actua! Pa bo mes causa, o mi Dios, no tarda, pasobra bo stad y bo pueblo ta wordo yama na bo nomber.”Daniel 9:18, 19.

E Ta Bringa na Fabor di Su Pueblo

16. Splica pakico e interes cu Yehova tin pa defende su nomber no ta nifica cu e ta un Dios sin sintimento y cu e ta corda riba su so.

16 E interes cu Yehova tin pa defende su nomber ta nifica cu e ta un Dios sin sintimento y cu e ta corda riba su so? No, pasobra door di actua na harmonia cu su santidad y amor pa husticia, e ta proteha su pueblo. Wak por ehempel Genesis capitulo 14. Ei nos ta lesa di cuater rei invasor cu a secuestra Lot, subrino di Abraham, hunto cu Lot su famia. Cu yudansa di Dios, Abraham a logra un victoria aplastante riba forsanan hopi superior! Probablemente e relato di e victoria aki tawata e prome cu a wordo menciona den “e buki di Gueranan di SEÑOR”, aparentemente un buki cu a documenta tambe algun bataya militar cu no ta menciona den Bijbel. (Numbernan 21:14) Pero lo a sigui mucho mas victoria.

17. Kico ta mustra cu Yehova a bringa pa e Israelitanan despues cu nan a drenta e tera di Canan? Duna ehempel.

17 Un poco prome cu e Israelitanan a drenta e tera di Canan, Moises a garantisa nan: “SEÑOR boso Dios, kende ta bai boso dilanti, e mes lo bringa pa boso, mescos cu el a haci pa boso na Egipto.” (Deuteronomio 1:30; 20:1) Cuminsando cu e susesor di Moises, Hosue, y siguiendo cu e epoca di e huesnan y e gobernacionnan di e reinan fiel di Huda, Yehova en berdad a bringa pa su pueblo, dunando  nan hopi victoria dramatico riba nan enemigonan.—Hosue 10:1-14; Huesnan 4:12-17; 2 Samuel 5:17-21.

18. (a) Pakico nos por ta gradicido cu Yehova no a cambia? (b) Kico lo sosode ora e enemistad describi na Genesis 3:15 yega su culminacion?

18 Yehova no a cambia; su proposito pa haci e planeta aki un paradijs pacifico tampoco no a cambia. (Genesis 1:27, 28) Ainda Dios ta odia maldad. Na mesun tempo, e ta stima su pueblo masha tanto y pronto lo actua na fabor di nan. (Salmo 11:7) De echo, ta di spera cu den futuro cercano e enemistad cu Genesis 3:15 ta papia di dje lo yega na su culminacion dramatico y violento. Pa Yehova santifica su nomber y proteha su pueblo, lo e bira “un guerero” un biaha mas!—Zacarias 14:3; Revelacion 16:14, 16.

19. (a) Ilustra pakico e manera cu Dios ta uza su poder pa destrui por hala nos serca dje. (b) E echo cu Dios ta dispuesto pa bringa pa nos mester tin ki efecto riba nos?

19 Pa ilustra esaki, supone cu un animal feros ta ataca un homber su famia y e homber ta interveni den e situacion y mata e bestia violento. Bo ta kere cu e acto aki ta bai indigna su casa y yiunan? Al contrario, lo bo spera mas bien  cu nan lo keda conmovi pa motibo di su amor sin egoismo. Mescos tambe, e echo cu Dios ta haci uzo di su poder pa destrui no mester indigna nos. E echo cu e ta dispuesto pa proteha nos mester aumenta nos amor p’e. Tambe nos mester haya mas respet pa su poder sin limite. Pesei, nos por “ofrece na Dios un sirbishi aceptabel cu reverencia y temor.”—Hebreonan 12:28.

Hala Serca e “Guerero”

20. Ora nos lesa un relato di Bijbel tocante un guera di Dios cu kisas nos no ta compronde completamente, con nos mester reacciona y pakico?

20 Claro cu no ta den tur caso Bijbel ta splica tur detaye di Yehova su decisionnan relaciona cu su gueranan. Pero loke si nos por ta sigur di dje semper ta cu nunca e ta eherce su poder destructivo den un manera inhusto, malicioso of cruel. Hopi biaha, e contexto di un relato di Bijbel of algun dato historico por yuda nos pone cosnan den nan perspectiva corecto. (Proverbionan 18:13) Asta ora nos no tin tur e detayenan, door di simplemente siña mas tocante Yehova y medita riba su cualidadnan precioso, nos lo por elimina cualkier duda cu lo por presenta. Ora nos haci esaki, nos lo bin mira cu nos tin suficiente motibo pa confia nos Dios, Yehova.—Job 34:12.

21. Aunke tin bes Yehova ta “un guerero”, con e ta di curason?

21 Aunke Yehova ta “un guerero” ora e situacion ta exigi, esaki no ta nifica si cu di curason e ta guerero. Den Ezekiel su vision tocante un garoshi celestial, Yehova ta cla prepara pa bringa contra su enemigonan. Pero Ezekiel a mira Dios rondona pa un regenboog—un simbolo di pas. (Genesis 9:13; Ezekiel 1:28; Revelacion 4:3) Esei ta mustra bon cla cu Yehova ta calmo y pacifico. Apostel Huan a skirbi cu “Dios ta amor.” (1 Huan 4:8) Tur Yehova su cualidadnan ta den balansa perfecto. Ta un privilegio anto cu nos por hala serca un Dios asina poderoso, y alabes amoroso!

^ par. 1 Segun e historiado Hudiu Yosefo, un ehersito cu a consisti di “600 garoshi hunto cu 50.000 homber riba cabai y 200.000 homber na pia fuertemente arma” a persigui e Hebreonan.—Jewish Antiquities, II, 324 [xv, 3].

^ par. 12 Tur cos ta indica cu aki e termino ‘Amoreo’ ta inclui tur e pueblonan di Canan.—Deuteronomio 1:6-8, 19-21, 27; Hosue 24:15, 18.

Mas Informacion

Kico Bijbel Ta Siña Realmente?

Dia di Huicio—Kico E Ta?

Haya sa con Dia di Huicio lo bendiciona henter humanidad.