Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Hala Serca Yehova

 CAPITULO 1

“Mira, Esaki Ta Nos Dios”

“Mira, Esaki Ta Nos Dios”

1, 2. (a) Kico lo bo tin gana di puntra Dios? (b) Kico Moises a puntra Dios?

BO POR imagina bo ta combersa cu Dios? E idea so caba ta lanta un respet profundo—e Soberano di universo papiando cu bo! Na principio bo ta duda, pero despues bo ta logra contesta. E ta scucha bo, e ta responde bo y asta e ta duna bo e confiansa pa hacie cualkier pregunta cu bo ta desea. Kico bo ta bai puntr’e awor?

2 Hopi tempo pasa, tawatin un homber cu a hay’e den net un situacion asina. Su nomber ta Moises. Pero kisas e pregunta cu el a scohe pa haci Dios ta sorprende bo. E no a puntra tocante su mes, ni di su futuro, ni sikiera di e miseria di humanidad. Mas bien, el a puntra Dios con ta su nomber. Podise bo ta haya esei straño, pasobra Moises tawata sa e nomber di Dios caba. Su pregunta lo mester tawatin un nificacion mas profundo anto. Eigenlijk, esei tawata e pregunta mas importante cu Moises por a haci. E contesta tin di aber cu nos tur. E por yuda bo dal un paso vital pa hala serca Dios. Con asina? Laga nos repasa e combersacion memorabel ei.

3, 4. Ki susesonan a hiba na e combersacion cu Moises tawatin cu Dios, y kico tawata e esencia di loke nan a papia cu otro?

3 Moises tawatin 80 aña di edad. El a pasa cuater decada den exilio, leu for di su pueblo, esta, e Israelitanan cu tawata esclabo na Egipto. Riba un dia, mientras e tawata cana cu e tou di bestia di su suegro, el a mira un fenomeno straño: un mata tur na candela, pero cu no a caba na nada. El a sigui kima y briya cla riba e sero. Moises a bai un tiki mas serca pa studi’e. Lo e mester a spanta hopi ora un bos a cuminsa papia cu ne for di meimei di e candela! Pa medio di un angel cu a sirbi como bosero, Dios y Moises  a combersa basta rato cu otro. Y manera lo bo sa, ei ta caminda Dios a manda Moises, kende a duda un tiki, pa bandona su bida trankil y bolbe bek Egipto pa libra e Israelitanan for di sclabitud.—Exodo 3:1-12.

4 Na e momento ei Moises lo por a haci Dios cualkier pregunta. Pero ripara kico el a opta pa puntra: “Mira, mi ta bai serca e yiunan di Israel y lo mi bisa nan: ‘E Dios di boso tatanan a manda mi serca boso.’ Y si nan puntra mi: ‘Con ta su nomber?’ kico lo mi contesta nan?”—Exodo 3:13.

5, 6. (a) Ki berdad simpel pero vital e pregunta di Moises ta siña nos? (b) Ki cos reprochabel nan a haci cu e nomber di Dios? (c) Pakico ta asina importante cu Dios a revela su nomber na hende?

5 E pregunta ei ta siña nos na prome luga cu Dios tin un nomber. Esaki ta un berdad masha simpel, pero di gran importancia. Y toch hopi hende no ta mir’e asina. Nan a saca e nomber di Dios for di masha hopi traduccion di Bijbel y remplas’e cu titulonan manera “Señor” y “Dios.” Esaki ta un di e cosnan mas lamentabel y reprochabel cu hende a haci pa motibonan religioso. Al fin y al cabo, kico ta e prome cos cu bo ta puntra un persona ora bo sera conoci cu ne? No ta su nomber? Mescos ta conta ora nos kier conoce Dios. E no ta un ser misterioso, sin nomber, cu nos no por conoce ni compronde. Aunke e ta invisibel, e ta un persona y e tin un nomber: Yehova.

6 Ademas, door di revela su nomber, Dios ta habri caminda pa un futuro maraviyoso y emocionante pa nos. E ta invita nos pa conoc’e y e kier pa nos tuma e miho decision den bida: hala serca dje. Pero Yehova a haci mas cu djis revela su nomber. Tambe el a siña nos tocante e persona cu e nomber ei ta representa.

Nificacion di e Nomber di Dios

7. (a) Por lo general, kico hende ta compronde cu e nomber di Dios ta nifica? (b) En realidad kico Moises kier a haya sa ora el a puntra Dios pa Su nomber?

7 Ta Yehova mes a scohe su nomber, uno cu tin hopi  nificacion. Por lo general, hende ta compronde cu “Yehova” ta nifica “E Ta Causa pa Bira.” Yehova ta unico den henter universo, pasobra ta e a pone tur cos existi, y e ta percura pa henter su proposito bira realidad. E pensamento ei ta inspira un respet profundo. Pero ta esei so ta loke e nomber di Dios mester duna nos di compronde, of su nificacion tin un otro faseta mas? Evidentemente, Moises tawata kier sa mas, ya cu e tawata sa Dios su nomber caba, y e tawata sa cu Yehova ta e Creador. E nomber dibino no tawata algo nobo. Hende tawata uz’e pa siglonan caba. Realmente, ora Moises a puntra Dios pa su nomber, e kier a haya sa algo di e persona cu e nomber ei ta representa. Cu otro palabra, e tawata bisando: ‘Kico mi por conta bo pueblo Israel tocante bo, pa fortalece nan fe den bo y combence nan cu di berdad bo ta bai libra nan?’

8, 9. (a) Con Yehova a contesta e pregunta di Moises, y dicon e manera cu nan ta traducie hopi bes ta incorecto? (b) Kico e declaracion “lo mi resulta di ta loke lo mi resulta di ta” ta nifica?

8 Como contesta, Yehova a revela un aspecto fasinante di su personalidad, algo cu tawata conecta cu e nificacion di su nomber. El a bisa Moises: “Lo mi resulta di ta loke lo mi resulta di ta.” (Exodo 3:14, NW) Hopi traduccion di Bijbel ta bisa aki: “Ami ta esun cu mi ta.” Pero traduccionnan mas cuidadoso di e palabranan ei ta mustra cu Dios no a djis confirma cu e ta existi. Mas bien, Yehova a siña Moises—y via dje, nos tur—cu lo El a “resulta di ta”, of scohe pa bira, tur loke tawata necesario pa cumpli cu Su promesanan. E version Ingles di J. B. Rotherham ta duna un traduccion hopi cla di e versiculo aki: “Mi Ta Bira loke mi kier.” Un experto di e idioma Hebreo di Bijbel ta splica e frase den e manera aki: “Sea cual sea e situacion of necesidad . . . , Dios lo ‘bira’ e solucion pa e necesidad ei.”

9 Kico esei a nifica pa e Israelitanan? Maske ki obstaculo nan por a enfrenta, of ki dificultad nan por a haya nan  mes cu ne, Yehova lo a bira tur loke tawata necesario pa libra nan for di sclabitud y trece nan den e Tera Priminti. E nomber ei sigur a inspira confiansa den Dios. E por tin e mesun efecto riba nos awe. (Salmo 9:10) Pakico?

10, 11. Con Yehova su nomber ta invita nos pa mir’e como e Tata mas flexibel y mas ideal cu nos por imagina? Ilustra.

10 Pa ilustra: Mayornan sa con flexibel y adaptabel nan mester ta den nan trabou di cria yiu. Riba e mesun dia, un mayor lo tin cu actua como enfermera, coki, maestro, dunado di disiplina, hues y varios otro cos. Pa hopi mayor, e variedad amplio di papel cu nan tin cu cumpli cu ne ta parce demasiado. Nan sa cu nan yiunan chikito tin fe total den nan. E chikitinnan aki no ta duda mes cu papi of mami ta capas di calma cualkier dolor, resolve tur desacuerdo, drecha cualkier co’i hunga kibra y contesta tur pregunta cu ta surgi constantemente den nan mente curioso. Algun mayor no ta haya cu nan merece e confiansa ei, y de bes en cuando nan ta sinti nan frustra pa motibo di nan limitacionnan. Nan no ta sinti nan capas mes pa cumpli cu hopi di e papelnan aki.

11 Yehova tambe ta un mayor amoroso. Pero den e cuadro di su mes normanan perfecto, no tin nada cu e no por bira pa percura pa su yiunan riba tera den e miho manera posibel. Pues, su nomber, Yehova, ta invita nos pa mir’e como e Tata di mas ideal cu nos por imagina. (Santiago 1:17) Masha lihe tanto Moises como tur otro Israelita fiel a bin mira cu Yehova ta duna honor na su nomber. Nan a mira cu asombro con el a causa su mes pa bira un Comandante Militar invencibel, Señor di tur elemento fisico, Legislador sublime, Hues, Arkitecto, Dunador di cuminda y awa, Conservador di paña y co’i bisti na pia, y hopi mas.

12. Ki diferencia tin entre e actitud di Farao pa cu Yehova y esun di Moises?

12 Den e manera aki Dios a haci su nomber conoci, el a  revela cosnan fasinante tocante e persona cu e nomber ei a representa, y el a asta demostra cu loke e ta bisa tocante su mes ta berdad. Sin duda, Dios kier pa nos conoc’e. Con nos ta reacciona? Moises kier a conoce Dios. E deseo intenso ei a forma e bida di Moises y a permitie hala masha serca di su Tata celestial. (Numbernan 12:6-8; Hebreonan 11:27) Lamentablemente, masha poco hende cu a biba den tempo di Moises tawatin e deseo ei. Ora Moises a menciona e nomber di Yehova na Farao, e monarca Egipcio orguyoso ei a contest’e bek: “Ken ta Yehova?” (Exodo 5:2, NW) Farao no kier a siña conoce Yehova, y cu un aire di desprecio el a rechasa e Dios di Israel y a haci como si fuera e no ta importante y cu e no ta conta mes. E actitud ei ta masha comun awe. E ta ciega hende y stroba nan di siña un di e berdadnan di mas importante, esta, cu Yehova ta e Señor Soberano.

E Señor Soberano Yehova

13, 14. (a) Pakico Bijbel ta duna Yehova hopi titulo, y cua ta algun di nan? (Mira e  cuadro na pagina 14.) (b) Pakico Yehova ta e unico persona cu ta digno di e titulo “Señor Soberano”?

13 Yehova ta asina flexibel y adaptabel cu e ta merece e variedad amplio di titulo duna na dje den e Scritura. Pero e titulonan aki no ta mas halto cu su nomber mes; mas bien, for di nan nos ta siña mas cosnan cu su nomber ta representa. Por ehempel, e texto original di Bijbel ta yam’e mas cu shen biaha “Señor Soberano Yehova.” E titulo halto ei ta duna nos un idea di e posicion cu Yehova ta ocupa. E so tin e derecho di ta Gobernante di henter universo. Laga nos wak dicon.

14 Yehova ta e unico Creador. Revelacion 4:11 ta bisa: “Digno bo ta, nos Señor y nos Dios, pa ricibi gloria y honor y poder; pasobra abo a crea tur cos, y pa motibo di bo boluntad nan tawata existi, y a wordo crea.” E palabranan  solem aki no por aplica na ningun otro ser. Tur loke tin den universo ta debe nan existencia na Yehova! Sin duda, Yehova ta digno di e honor, poder y gloria cu e, como Señor Soberano y Creador di tur cos ta merece.

15. Pakico Yehova ta ser yama “Rei eterno”?

15 Un otro titulo cu ta aplica exclusivamente na Yehova ta “Rei eterno.” (1 Timoteo 1:17) Kico esaki ta nifica? Ta dificil pa nos mente limita capta esei, pero Yehova ta eterno tanto den pasado como den futuro. Salmo 90:2 ta bisa: “For di eternidad te na eternidad, abo ta Dios.” Pues Yehova no tawatin un cuminsamento; semper el a existi. E ta ser yama corectamente “e Anciano di Dianan.” El a existi pa un eternidad prome cu cualkier persona of cos den universo a cuminsa existi! (Daniel 7:9, 13, 22) Ken tin motibo valido pa cuestiona su derecho di ta e Señor Soberano?

16, 17. (a) Pakico nos no por mira Yehova, y pakico esei no mester sorprende nos? (b) Den ki sentido Yehova ta mas real cu cualkier cos cu nos por mira of fula?

16 Toch, algun hende ta cuestiona e derecho ei, manera Farao a haci. Parti di e problema ta cu hende imperfecto ta depende mucho riba loke nan por mira cu nan wowonan. Nos no por mira e Señor Soberano. E ta un ser spiritual, invisibel pa wowo humano. (Huan 4:24) Ademas, si un persona di carni y weso para directamente dilanti Yehova Dios, esei lo ta fatal p’e. Yehova mes a bisa Moises: “Bo no por mira mi cara, pasobra ningun hende no por mira mi y keda na bida!”—Exodo 33:20; Huan 1:18.

17 Esei no mester sorprende nos. Moises a mira apenas un pida di e gloria di Yehova, y tur cos ta mustra cu esei tawata pa medio di un angel cu a representa Yehova. Cu ki efecto? Moises su cara a keda “briya” pa un cierto tempo despues. E Israelitanan tawatin asta miedo di wak Moises direct den su cara. (Exodo 33:21-23; 34:5-7, 29, 30) Ta mas cu claro anto cu ningun simpel ser humano no por wak e Señor  Soberano mes den e plenitud di su gloria! Esaki ta nifica cu Dios no ta mes real cu un cos cu nos por mira y fula? No, pasobra tin hopi cos cu nos no por mira pero cu nos ta acepta mesora cu nan ta existi, manera por ehempel biento, onda di radio y pensamento di hende. Ademas, Yehova ta permanente y no ta cambia den transcurso di tempo, ni sikiera den miles di miyones di aña! Den e sentido ei, e ta mucho mas real cu cualkier cos cu nos por mira of fula, pasobra tur cos fisico ta bira bieu y ta bai atras. (Mateo 6:19) Pero nos mester mira Dios simplemente como un forsa sin personalidad of un Prome Causa vago? Laga nos mira.

Un Dios Cu Tin Personalidad

18. Ki vision Ezekiel a haya, y kico e cuater caranan di e ‘sernan bibo’ banda di Yehova ta simbolisa?

18 Aunke nos no por mira Dios, Bijbel ta contene pasashinan emocionante cu ta permiti nos haya un idea di kico tin den shelo. Un ehempel di esei ta Ezekiel capitulo un. Ezekiel a haya un vision di e organisacion celestial di Yehova, cu el a mira como un garoshi celestial inmenso. Loke ta specialmente impresionante ta e descripcion di e criaturanan spiritual poderoso rond di Yehova. (Ezekiel 1:4-10) E ‘sernan bibo’ aki tin un relacion estrecho cu Yehova, y nan aparencia ta bisa nos algo importante tocante e Dios cu nan ta sirbi. Cada un tin cuater cara: cara di toro, di leon, di aguila y di hende. Evidentemente nan ta simbolisa e cuater cualidadnan principal di e personalidad di Yehova.—Revelacion 4:6-8, 10.

19. Ki cualidad ta ser simbolisa pa (a) e cara di toro? (b) e cara di leon? (c) e cara di aguila? (d) e cara di hende?

19 Den Bijbel, hopi bes un toro ta representa poder. Esei ta logico tambe pasobra e ta un animal masha fuerte mes. En cambio, un leon ta simbolisa husticia, pasobra berdadero husticia ta rekeri curashi, un cualidad cu leon ta famoso p’e. Aguila ta conoci pa su bista skerpi. E por mira of  distingui obhetonan chikito for di un distancia di varios shen meter. Pues cara di un aguila ta un simbolo apropiado di e sabiduria penetrante di Dios. Y kico cara di hende ta representa? Wel, ya cu hende a ser crea den e imagen di Dios, e ta sobresali den su capasidad pa refleha Dios su cualidad dominante, esta, amor. (Genesis 1:26) E fasetanan aki di Yehova su personalidad—su poder, su husticia, su sabiduria y su amor—ta resalta asina tanto biaha den e Scritura cu nos por referi na nan como Dios su cualidadnan principal of cardinal.

20. Nos tin cu precupa cu Yehova su personalidad lo por a cambia, y pakico nos ta contesta asina?

20 Nos tin cu precupa cu Dios por a cambia durante e miles di añanan desde cu Bijbel a describi su personalidad? No, su personalidad no ta cambia. Dios ta bisa nos: “Ami, SEÑOR, no ta cambia.” (Malakias 3:6) En bes di cambia ki ora cu e haya ta bon, Yehova ta demostra cu e ta un Tata ideal den e manera cu e ta reacciona na cada situacion. E ta expresa e aspectonan di su personalidad cu ta mas adecua. Di e cuater cualidadnan, esun cu ta predomina ta amor. Tur loke Dios haci ta manifesta amor. E ta eherce su poder,  husticia y sabiduria den un manera amoroso. De echo, Bijbel ta bisa algo extraordinario di Dios y di e cualidad aki. E ta bisa: “Dios ta amor.” (1 Huan 4:8) Ripara cu e no ta bisa cu Dios tin amor of cu Dios ta amoroso. E ta bisa mas bien cu Dios ta amor. Amor, e esencia di Yehova su caracter, ta motiv’e den tur loke e ta haci.

“Mira, Esaki Ta Nos Dios”

21. Kico nos lo sinti segun cu nos ta conoce Yehova su cualidadnan miho?

21 Bo no a yega di mira un mucha chikito mustra su amiguitonan ken ta su tata anto bisa contento y orguyoso di dje: “Esei ta mi papi”? Dios su sirbidonan tin tur motibo pa sinti mescos tocante Yehova. Bijbel ta bisa cu lo yega e dia cu hende fiel lo sclama: “Mira, esaki ta nos Dios.” (Isaias 25:8, 9) Mas bo conoce Yehova su cualidadnan, mas lo bo sinti cu bo tin e miho Tata cu bo por imagina.

22, 23. Con Bijbel ta pinta nos Tata celestial, y con nos por sa cu e kier pa nos hala serca dje?

22 Esaki no ta un Tata indiferente, seco ni leu for di nos, aunke algun filosofo y lider religioso severo a pint’e asina. Nos lo no sinti nos atrai na un Dios indiferente, y Bijbel no ta representa nos Tata celestial den e manera ei tampoco. Al contrario, e ta yam’e “e Dios felis.” (1 Timoteo 1:11, NW) E tin sintimentonan fuerte pero tambe tierno. Ora su criaturanan inteligente kibra e leinan cu el a duna nan pa nan mes bon, esei ta “duel” e. (Genesis 6:6; Salmo 78:41) Pero ora nos actua sabi segun su Palabra, nos ta “haci [su] curason contento.”—Proverbionan 27:11.

23 Nos Tata kier pa nos hala serca dje. Su Palabra ta anima nos pa “busca Dios, si di algun manera, fulando, [nos] por hay’e, maske e no ta leu di cada un di nos.” (Echonan 17:27) Awor, ta posibel pa un simpel ser humano hala serca e Señor Soberano di universo?