Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Hala Serca Yehova

 CAPITULO 12

“Acaso Tin Inhusticia Cerca Dios?”

“Acaso Tin Inhusticia Cerca Dios?”

1. Con actonan di inhusticia lo por afecta nos?

UN BIUDA di edad ta bira victima di un estafa y ta perde tur loke el a spar henter su bida. Un criatura indefenso ta ser bandona pa un mama sin heful. Un homber ta ser encarsela pa un crimen cu e no a comete. Con abo ta reacciona na e situacionnan aki? Probablemente cada un di nan ta molestia bo, y esei ta di compronde tambe. Como hende nos tin un sentido fuerte di loke ta bon y loke ta malo. Ora un inhusticia ser cometi, esei ta indigna nos. Nos kier pa e victima haya un compensacion y pa e delincuente haya su castigo. Si esei no sosode, kisas nos ta puntra nos mes: ‘Dios no ta mira loke ta tumando luga? Pakico e no ta haci nada?’

2. Con Habacuk a reacciona na inhusticia, y pakico Yehova no a scual e pa esaki?

2 Atrabes di historia, fiel sirbidonan di Yehova a haci e mesun preguntanan aki. Por ehempel, profeta Habacuk a puntra Dios den un oracion: “Pakico bo ta laga mi mira e inhusticia horibel ei? Pakico bo ta laga violencia, maldad, crimen y crueldad plama bai tur caminda.” (Habacuk 1:3, Contemporary English Version) Yehova no a scual Habacuk pa su preguntanan franco, pasobra ta E mes a duna hende e nocion di husticia. Si, Yehova a dota nos cu algo di su sentido profundo di husticia.

Yehova Ta Odia Inhusticia

3. Pakico nos por bisa cu Yehova ta mas conciente di inhusticia cu nos?

3 Yehova no ta ciego pa inhusticia. E ta mira tur loke ta pasando. Bijbel ta bisa nos relaciona cu e epoca di Noe: “SEÑOR a mira cu maldad di hende tawata grandi riba tera,  y cu tur intencion di e pensamentonan di su curason tawata continuamente maldad so.” (Genesis 6:5) Pensa riba kico esei ta encera. Hopi bes, nos idea di inhusticia ta basa riba algun incidente cu sea nos a tende di dje of pasa aden personalmente. Na contraste, Yehova si ta conciente di e inhusticianan cu ta tumando luga na escala mundial. E ta mira tur cos! Ademas, e por discerni e inclinacionnan di curason, esta, e pensamentonan perverso tras di actonan di inhusticia.—Yeremias 17:10.

4, 5. (a) Con Bijbel ta mustra cu Yehova ta precupa pa esnan cu ta ricibi un trato inhusto? (b) Con Yehova mes a ser afecta pa inhusticia?

4 Pero Yehova ta bai mas aleu cu djis tuma nota di inhusticia. E ta precupa tambe pa esnan cu a bira victima di dje. Ora nacionnan enemigo a trata su pueblo cruelmente, e “kehamento pa motibo di esnan cu tawata oprimi y afligi [su pueblo]” a duel Yehova. (Huesnan 2:18) Talbes bo a ripara cu mas inhusticia algun hende mira, mas nan ta perde heful. Pero Yehova si no ta asina! Pa un 6.000 aña caba el a mira tur tipo di inhusticia, pero e si no a perde su repudio contra dje. Al contrario, Bijbel ta sigura nos cu Yehova ta odia cosnan manera “un lenga mentiroso”, “mannan cu ta drama sanger inocente”, y “un testigo falso cu ta papia mentira.”—Proverbionan 6:16-19.

5 Pensa tambe riba e critica fuerte cu Yehova a dirigi contra e lidernan inhusto di Israel. “Boso no mester conoce husticia?” e profeta inspira a puntra nan. Despues cu el a describi na un manera grafico con nan a abusa di poder, Yehova a profetisa kico lo tawata e consecuencianan pa e hombernan corupto aki: “Nan lo sclama na SEÑOR, ma e lo no contesta nan. Al contrario, e lo sconde su cara pa nan e tempo ei, pasobra nan echonan tawata malo.” (Mikeas 3:1-4) Yehova tin un repudio total contra inhusticia, y esei no ta nada straño pasobra e mes a pasa aden! Pa miles di  aña el a soporta e desafionan inhusto di Satanas. (Proverbionan 27:11) Ademas, e acto di mas horendo di inhusticia a afect’e bastante. Esei tawata ora su Yiu, kende “no a comete pica”, a ser ehecuta como criminal. (1 Pedro 2:22; Isaias 53:9) Ta bisto anto cu Yehova no ta ciego ni indiferente pa e sufrimento di victimanan di inhusticia.

6. Con nos lo por reacciona ora nos haya nos confronta cu inhusticia, y pakico?

6 Toch ora nos mira inhusticia—of ora nos mes bira victima di un trato inhusto—ta masha natural cu esaki ta lanta emocion fuerte den nos. Nos a ser crea den e imagen di Dios, y inhusticia ta completamente contra tur loke Yehova ta representa. (Genesis 1:27) Pakico anto Dios ta permiti inhusticia?

E Cuestion di e Soberania di Dios

7. Splica con e soberania di Yehova a ser desafia.

7 E contesta riba e pregunta aki ta relaciona cu e cuestion di soberania, esta, si Dios tin derecho di goberna. Manera nos a mira, e Creador tin derecho di goberna riba tera y tur su habitantenan. (Salmo 24:1; Revelacion 4:11) Sinembargo, for di den cuminsamento di historia humano, e soberania di Yehova a ser desafia. Con esaki a tuma luga? Yehova a duna e prome homber, Adam, e mandamento pa no come di un cierto palo den e Paradijs cu a sirbi como su hogar. Y kico lo a sosode si el a desobedece? Dios a bis’e: “Lo bo muri sigur.” (Genesis 2:17) E mandamento di Dios no a kita nada for di Adam of su casa Eva. No obstante, Satanas a combence Eva cu Dios a kita mucho libertad for di nan. Kico lo a pasa si el a come for di e palo? Satanas a bisa Eva botuit: “Siguramente boso lo no muri! Pasobra Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.”—Genesis 3:1-5.

8. (a) Cu su declaracionnan na Eva, kico Satanas a duna di conoce? (b) Ki desafio Satanas a lansa contra e soberania di Dios?

 8 Cu e declaracion aki Satanas a insinua cu Yehova a keda sin duna Eva cierto informacion crucial, y cu El a gañ’e tambe. Satanas tawata suficiente cauteloso pa e no cuestiona e echo cu Yehova ta e gobernante supremo. Pero si el a lanta duda encuanto si su soberania tawata legitimo, husto y mereci. Cu otro palabra, el a pretende cu Yehova no a eherce Su soberania na un manera husto y den e miho interesnan di Su subditonan.

9. (a) Ki consecuencia Adam cu Eva a sufri debi na nan desobediencia, y ki preguntanan di sumo importancia esaki a lanta? (b) Pakico Yehova no a djis destrui e rebeldenan?

9 Mas despues, tanto Adam como Eva a desobedece Yehova door di come di e palo prohibi. Door di nan desobediencia nan a ricibi e castigo di morto, net manera Dios a decreta. E mentira di Satanas a lanta algun pregunta di sumo importancia. Berdad Yehova tin derecho di goberna humanidad, of hende mester goberna nan mes? Yehova ta eherce su soberania den e miho manera posibel? Yehova por a uza su poder todopoderoso pa destrui e rebeldenan mesora. Pero e preguntanan cu Satanas a lanta no a cuestiona Dios su poder, sino su manera di goberna. Pues, si Dios a elimina Adam cu Eva y Satanas, esei lo no a duna prueba cu su gobernacion ta husto. Al contrario, esei lo por a lanta mas duda ainda encuanto su manera di goberna. E unico manera pa determina si hende ta capas pa goberna nan mes, independiente di Dios, tawata pa laga tempo pasa.

10. Kico historia a revela tocante gobierno di hende?

10 Kico tempo a demostra? Den transcurso di e miles di añanan, hende a purba cu tur tipo di gobierno, manera autocracia, democracia, socialismo y comunismo. Bijbel ta resumi francamente e resultado di nan tur: “Hende a eherce  autoridad riba . . . otro hende pa su daño.” (Eclesiastes 8:9) Cu bon motibo, profeta Yeremias a declara: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.”—Yeremias 10:23.

11. Pakico Yehova a laga e rasa humano sufri?

11 Yehova tawata sa for di principio cu e independencia di hende, cu nan mes forma di goberna, lo a resulta den hopi sufrimento. Tawata inhusto di su parti anto pa laga hende cosecha e fruta inevitabel di nan rebeldia? Di ningun manera! Pa ilustra esaki, supone cu bo yiu tin cu haci un operacion pa cura un enfermedad cu ta pone su bida na peliger. Bo ta conciente cu e operacion lo pone bo yiu sufri un poco, y esaki ta haci bo hopi tristo. Na mesun tempo, bo sa cu e operacion lo permiti bo yiu disfruta di un miho salu mas despues den bida. Mescos tambe, Dios tawata sa—y asta a profetisa—cu door di permiti hende goberna nan mes, esei lo a trece cierto dolor y sufrimento cu ne. (Genesis 3:16-19) Pero e tawata conciente tambe cu e unico alivio duradero y significativo lo tawata posibel si el a laga henter humanidad mira e mal fruta di nan rebelion. Den e manera aki, e cuestion lo por a wordo resolvi di unabes pa semper.

E Cuestion di Hende Su Integridad

12. Manera e caso di Job ta ilustra, ki acusacion Satanas a lanta contra tur ser humano?

12 Tin un aspecto mas den e asunto aki. Ora Satanas a lanta duda encuanto si e gobernacion di Dios ta legitimo y husto, no ta Yehova so el a calumnia relaciona cu Su soberania; el a calumnia e sirbidonan di Dios tambe pa loke ta nan integridad. Por ehempel, ripara kico Satanas a bisa Yehova tocante husto Job: “Bo no a traha un trankera rond  di dje, rond di su cas, y rond di tur loke e tin na tur banda? Bo a bendiciona e trabou di su man, y su propiedadnan a aumenta den e tera. Ma saca bo man awor y mishi cu tur loke e tin; siguramente e lo maldiciona bo den bo cara.”—Job 1:10, 11.

13. Kico Satanas a insinua cu su acusacionnan contra Job, y con esaki ta envolve tur ser humano?

13 Satanas a pretende cu Yehova tawata uza Su poder di duna proteccion pa cumpra Job su debocion. Cu esei el a insinua cu e integridad di Job tawata puro hipocresia, cu Job a adora Dios solamente pa loke e por a haya a cambio. Satanas a pretende cu si Dios a kita su bendicion for di Job, asta e homber ei lo a maldiciona su Creador. Satanas tawata sa cu Job a sobresali como “un hende perfecto y recto, cu [a] teme Dios y cu [a] aparta su mes for di maldad.” * Pues, si Satanas por a kibra e integridad di Job, kico lo a para di e resto di humanidad? De echo anto, loke Satanas tawata cuestionando ta e lealtad di tur hende cu kier sirbi Dios. En berdad, ampliando riba e cuestion, Satanas a bisa Yehova: “Tur loke un hende [no Job so] tin e lo duna pa su bida.”—Job 1:8; 2:4.

14. Kico historia a demostra relaciona cu e acusacion cu Satanas a lanta contra tur ser humano?

14 Contrario na loke Satanas a pretende, historia a demostra cu hopi hende manera Job a keda leal na Yehova aunke nan tawatin cu soporta prueba. Cu nan fieldad nan a alegra Yehova su curason, y esaki a duna Yehova un contesta pa e desafio di Satanas, kende tawatin e frescura di bisa cu hende lo stop di sirbi Dios ora nan haya nan cu dificultad.  (Hebreonan 11:4-38) Si, hende di curason recto ta nenga di bira lomba pa Dios. Y ora e situacionnan di mas angustioso confundi nan, nan ta depende asta mas riba Yehova pa e duna nan e forsa pa soporta.—2 Corintionan 4:7-10.

15. Ki pregunta por surgi relaciona cu Dios su huicionan di pasado y futuro?

15 Pero e manera cu Yehova ta eherce su husticia ta encera mas cu e cuestionnan di soberania y hende su integridad. Bijbel ta duna nos un relato di Yehova su huicionan relaciona cu cierto personanan y asta nacionnan completo. Tambe e ta contene profecianan di e huicionan cu lo e ehecuta den futuro. Pakico nos por tin sigur cu Yehova ta y semper lo ta husto den su huicionan?

Pakico e Husticia di Dios Ta Superior

Yehova nunca lo “destrui e husto hunto cu e malbado”

16, 17. Ki ehempelnan ta mustra cu hende tin un punto di bista limita di loke ta berdadero husticia?

16 Cu rason Bijbel por bisa encuanto Yehova cu “tur su camindanan ta husto.” (Deuteronomio 32:4) Ningun di nos por bisa algo asina di nos mes, pasobra hopi bes nos punto di bista limita ta stroba nos di mira bon cla kico ta corecto. Tuma por ehempel e caso di Abraham. El a debati cu Yehova encuanto e destruccion di Sodoma—apesar cu maldad a reina na gran escala einan. El a puntra Yehova: “Di berdad bo ta bai destrui e husto hunto cu e malbado?” (Genesis 18:23-33) Claro cu e contesta tawata no. De echo, ta te ora husto Lot y su yiu mohenan a yega na e stad di Zoar sano y salvo Yehova a ‘laga yobe suafel y candela’ riba Sodoma. (Genesis 19:22-24) Di otro banda, Yonas a keda masha “desgusta” ora Dios a mustra misericordia na e hendenan di Ninive. Yonas a anuncia caba cu nan lo ser destrui, pues tur loke e tawata kier ta pa nan wordo likida—sin importa nan repentimento sinsero.—Yonas 3:10–4:1.

17 Yehova a sigura Abraham cu Su manera di husga a  encera no solamente destrui e malbadonan, sino tambe rescata e hustonan. Di otro banda, Yonas tawatin cu siña cu Yehova ta misericordioso. Si e malbadonan stop di haci malo, e ta “cla pa pordona.” (Salmo 86:5) Distinto di algun hende cu ta insigur tocante nan mes, Yehova no ta impone castigo djis pa demostra cuanto poder e tin, ni e no ta keda sin mustra compasion pa miedo cu otronan lo haya cu e ta debil. Su sistema ta di mustra misericordia semper y cuando tin base pa esei.—Isaias 55:7; Ezekiel 18:23.

18. Mustra for di Bijbel cu Yehova no ta actua djis a base di sintimento.

18 Esaki no ta nifica si cu Yehova ta laga sintimento cieg’e. Ora su pueblo a cai den idolatria, Yehova a declara cu firmesa: “Lo mi husga bo segun bo conducta, y lo mi pone tur bo abominacionnan riba bo. Lo mi no wak bo cu duele, ni spar bo tampoco, ma lo mi pone bo conducta riba bo.” (Ezekiel 7:3, 4) Pues, ora hende cuminsa practica maldad na un manera descara, Yehova ta husga nan segun loke nan merece. Pero su huicio ta basa riba pruebanan solido. Por ehempel, ora un “clamor” fuerte relaciona cu Sodoma y Gomora a alcansa su horea, el a declara: “Lo mi baha awor y wak si nan a haci completamente segun e clamor cu a yega na mi; si no, lo mi haya sa.” (Genesis 18:20, 21) Nos por ta masha gradicido cu Yehova no ta manera hopi hende cu ta cla pa saca conclusion prome cu nan tende tur e detayenan! Berdad, manera Bijbel ta bisa, Yehova ta “un Dios di fieldad y sin inhusticia.”—Deuteronomio 32:4.

Confia den e Husticia di Yehova

19. Kico nos por haci si tin cierto cos cu nos no ta compronde encuanto Yehova su manera di husga?

19 Bijbel no ta contesta delaster un pregunta relaciona cu Yehova su accionnan den pasado; ni e no ta duna tur detaye encuanto con Yehova lo husga cierto personanan y grupo  di hende den futuro. Ora nos no ta compronde un relato of profecia den Bijbel pa falta di cierto detaye, nos por desplega e mesun lealtad di profeta Mikeas, kende a skirbi: “Lo mi spera riba e Dios di mi salbacion.”—Mikeas 7:7.

20, 21. Pakico nos por ta sigur cu semper Yehova lo actua na un manera recto?

20 Nos por ta sigur cu den tur situacion Yehova lo actua na un manera recto. Asta ora segun nos opinion hende no ta haci caso di inhusticia, Yehova ta priminti: “Ta di mi vengansa ta, ami lo paga bek.” (Romanonan 12:19) Si nos demostra un actitud di spera, nos tambe lo por bisa cu e mesun conviccion firme di apostel Pablo: “Acaso tin inhusticia serca Dios? Di ningun manera!”—Romanonan 9:14.

21 Mientrastanto, nos ta biba den “temponan trabahoso.” (2 Timoteo 3:1) Inhusticia y “actonan di opresion” a resulta den hopi abuso cruel. (Eclesiastes 4:1) Pero Yehova no a cambia. Ainda e ta odia inhusticia, y e tin interes profundo den esnan cu ta bira victima di esaki. Si nos keda leal na Yehova y na su soberania, lo e duna nos e forsa pa wanta te ora yega e dia cu lo e corigi tur inhusticia bou di e gobernacion di su Reino.—1 Pedro 5:6, 7.

^ par. 13 Yehova a bisa di Job: “No tin ningun hende manera e riba tera.” (Job 1:8) Probablemente anto, Job a biba despues di e morto di Yosef y prome cu Moises a ser nombra como Lider di Israel. Pues, ta na su luga pa bisa anto cu na e tempo ei no tawatin ningun hende mes integro cu Job.