Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Hala Serca Yehova

 CAPITULO 16

“Haci Husticia” Canando cu Dios

“Haci Husticia” Canando cu Dios

1-3. (a) Pakico nos tin un obligacion cu Yehova? (b) Kico nos Rescatador amoroso ta pidi bek for di nos?

IMAGINA cu bo ta riba un barco cu ta sink. Net ora bo pensa cu tur speransa a caba un rescatado ta yega y hiba bo na un luga sigur. Bo ta sinti un gran alivio ora e persona cu a rescata bo saca bo for di peliger y bisa bo: “Awor bo ta sano y salvo”! Lo bo no tin un obligacion moral cu e persona ei? Literalmente, bo debe bo bida na dje.

2 Den cierto sentido, esaki ta ilustra loke Yehova a haci pa nos. Nos sigur tin un obligacion cu ne. Al fin y al cabo, ta e a percura e rescate, y esei a haci posibel pa nos ser libra for di e gara di pica y morto. Nos ta sinti nos sano y salvo pasobra nos sa cu tanten nos eherce fe den e sacrificio precioso ei, nos picanan ta ser pordona, y nos futuro eterno ta garantisa. (1 Huan 1:7; 4:9) Manera nos a mira den Capitulo 14, e rescate ta un manifestacion supremo di e amor y husticia di Yehova. Con nos mester reacciona na esaki?

3 Ta bon pa considera kico nos Rescatador amoroso mes ta pidi bek for di nos. Yehova a bisa pa medio di profeta Mikeas: “El a bisa bo, o hende, loke ta bon; y kico SEÑOR ta exigi di bo, si no ta pa haci husticia, pa stima misericordia, y pa cana humildemente cu bo Dios?” (Mikeas 6:8) Ripara cu un di e cosnan cu Yehova ta pidi bek for di nos ta pa nos “haci husticia.” Con nos por cumpli cu e rekisito aki?

Busca ‘Berdadero Husticia’

4. Con nos por sa cu Yehova ta spera pa nos biba na harmonia cu su normanan husto?

4 Yehova ta spera pa nos biba segun su normanan di loke ta bon y malo. Siendo cu su normanan ta husto, nos ta busca  husticia ora nos ta harmonisa nos bida cu nan. “Siña di haci bon, busca huicio”, segun Isaias 1:17. E Palabra di Dios ta anima nos seriamente pa “busca husticia.” (Sofonias 2:3) Tambe e ta urgi nos pa “bisti e hende [“personalidad”, NW] nobo, cu a wordo crea segun Dios den husticia y santidad berdadero.” (Efesionan 4:24) Berdadero husticia no ta laga luga pa violencia, impuresa y inmoralidad, pasobra e cosnan aki ta bai contra loke ta santo.—Salmo 11:5; Efesionan 5:3-5.

5, 6. (a) Pakico no ta un carga pa nos cumpli cu Yehova su normanan? (b) Con Bijbel ta mustra cu buscamento di husticia ta un proceso continuo?

5 Ta un carga pa nos biba segun e normanan husto di Yehova? No. Un curason cu ta sinti su mes atrai na Yehova no ta haya su rekisitonan un carga. Pa motibo cu nos ta stima nos Dios y tur loke e ta representa, nos kier biba den un forma cu ta agrad’e. (1 Huan 5:3) Corda cu Yehova “ta stima husticia.” (Salmo 11:7) Pesei si nos berdaderamente kier imita su husticia, nos mester stima loke Yehova ta stima y odia loke e ta odia.—Salmo 97:10.

6 No ta facil pa nos como hende imperfecto busca husticia. Nos tin cu kita e personalidad bieu cu su practicanan pecaminoso y bisti esun nobo. Bijbel ta bisa cu e personalidad nobo ta “wordo renoba” pa medio di conocemento exacto. (Colosensenan 3:9, 10) E palabranan “wordo renoba” ta indica cu bistimento di e personalidad nobo ta un proceso continuo, uno cu ta rekeri esfuerso diligente. Maske cuanto nos lucha pa haci loke ta corecto, ta yega momentonan cu nos naturalesa pecaminoso ta pone nos trompica den pensamento, palabra y accion.—Romanonan 7:14-20; Santiago 3:2.

7. Con nos tin cu mira recaidanan den nos esfuerso pa busca husticia?

7 Con nos tin cu mira recaidanan den nos esfuerso pa busca husticia? Claro cu nos no kier minimisa e seriedad  di pica. Na mesun tempo, nos no mester entrega nunca, pensando cu nos fayonan ta haci nos indigno pa sirbi Yehova. Nos Dios misericordioso a haci areglo pa esnan cu ta repenti di curason recobra su fabor. Pensa riba e palabranan alentador di apostel Huan: “Mi yiu chikitonan, mi ta skirbi boso e cosnan aki pa boso no haci pica.” Pero el a agrega mesora den un forma realista: “Y si un hende haci pica [pa motibo di imperfeccion hereda], nos tin un abogado serca e Tata, Hesucristo.” (1 Huan 2:1) Si, Yehova a percura e sacrificio di rescate di Hesus pa nos por sirbie di un manera aceptabel apesar di nos naturalesa pecaminoso. Esei no ta impulsa nos pa haci nos best pa agrada Yehova?

E Bon Nobo y Husticia Dibino

8, 9. Con e proclamacion di e bon nobo ta demostra e husticia di Yehova?

8 Nos por eherce husticia—de echo imita e husticia di Dios—door di haci nos maximo esfuerso pa predica e bon nobo di e Reino di Dios na otro hende. Ki conexion tin entre e husticia di Yehova y e bon nobo?

9 Yehova lo no pone fin na e mundo malbado aki sin laga duna un spiertamento prome. Den su profecia tocante loke lo tuma luga den e tempo di fin, Hesus a bisa: “E evangelio mester wordo predica prome na tur nacion.” (Marco 13:10; Mateo 24:3) E palabra “prome” den e frase ei ta indica cu despues di e predicacion mundial lo sigui otro susesonan. E susesonan ei ta inclui e tribulacion grandi profetisa cu lo nifica destruccion di e malbadonan. Esei na su turno lo habri caminda pa un husto mundo nobo. (Mateo 24:14, 21, 22) Definitivamente lo no tin ningun base pa acusa Yehova di a comete un inhusticia contra e malbadonan. Door di laga duna e spiertamento, Yehova ta dunando e personanan ei oportunidad amplio pa cambia y asina evita destruccion.—Yonas 3:1-10.

Nos ta manifesta husticia dibino ora nos ta predica e bon nobo di un forma imparcial

10, 11. Con nos predicacion di e bon nobo ta un refleho di e husticia di Dios?

 10 Con nos predicacion di e bon nobo ta un refleho di e husticia di Dios? Na prome luga, ta husto pa nos haci loke ta na nos alcanse pa yuda otro hende haya salbacion. Pensa atrobe riba e ilustracion di un barco cu ta sink for di cua nos ta ser rescata. Unabes bo ta safe den e boto salbabida, sin duda lo bo kier yuda otro hende cu ainda ta den awa. Mescos tambe, nos tin un obligacion cu esnan cu ainda ta luchando den e “awanan” di e mundo malbado aki. Aunke hopi ta rechasa nos mensahe, tanten cu Yehova ta sigui tene pasenshi cu hende, nos tin e responsabilidad di duna nan e oportunidad pa “bini na repentimento” y asina haya e oportunidad di ricibi salbacion.—2 Pedro 3:9.

11 Ora nos ta predica e bon nobo na tur hende cu nos topa, nos ta manifesta husticia den un otro manera importante: Nos ta mustra cu nos ta imparcial. Corda cu “Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.” (Echonan 10:34, 35) Si nos kier imita Su husticia, nos no mester tin prehuicio. Mas bien, nos mester comparti e bon nobo cu otro hende sin importa nan rasa, nivel social of recurso financiero. Asina nos ta duna tur hende cu lo scucha un oportunidad pa tende y responde na e bon nobo.—Romanonan 10:11-13.

Con Nos Ta Trata Otro Hende

12, 13. (a) Pakico nos no mester ta lihe pa husga otro hende? (b) Kico ta e nificacion di Hesus su conseho pa “no husga” y “no condena”? (Mira tambe e nota na pia di pagina.)

12 Tambe nos por haci husticia door di trata otro hende manera Yehova ta trata nos. Ta masha facil pa husga otro hende, critica nan fayonan y cuestiona nan intencionnan. Pero cua di nos lo kier pa Yehova scudriña nos intencionnan y fayonan sin tene piedad di nos? No ta asina Yehova  ta trata cu nos. E salmista a remarca: “Si abo, SEÑOR, tuma inikidadnan na cuenta, o Señor, ken lo por a keda para?” (Salmo 130:3) Nos no ta gradicido cu nos Dios husto y misericordioso no ta consentra riba nos foutnan? (Salmo 103:8-10) Con nos anto mester trata otro hende?

13 Si nos compronde cu e husticia di Dios ta misericordioso, nos lo no ta lihe pa husga otro den asuntonan cu realmente no ta toca nos of cu ta di menor importancia. Den Hesus su Sermon Riba Sero, el a duna e spiertamento: “No husga, pa boso no wordo husga.” (Mateo 7:1) Segun e relato di Lucas, Hesus a agrega: “No condena, y boso lo no wordo condena.” * (Lucas 6:37) Hesus a mustra cu e ta conciente cu hende imperfecto tin tendencia di husga. Cualkier un di su oyentenan cu tawatin e custumber di husga otro severamente mester a stop di haci esei.

14. Pa ki motibonan nos tin cu stop di husga otro hende?

14 Pakico nos tin cu stop di husga otro? Wel, na prome luga, pasobra nos autoridad ta limita. Disipel Santiago ta recorda nos: “Tin solamente un dunador di lei y hues”, y esei ta Yehova. Pues Santiago ta haci e pregunta penetrante: “Ta ken abo ta cu bo ta husga bo prohimo?” (Santiago 4:12; Romanonan 14:1-4) Ademas, nos naturalesa pecaminoso por pone cu facilmente nos ta bai husga na un manera inhusto. Hopi actitud y motivacion—manera prehuicio, sintimento di ofensa, yaluci y ser husto den nos mes bista—por pone nos saca conclusion robes di nos prohimo. Nos tin mas limitacionnan, y ora nos pensa riba nan, nos ta mira cu nos no mester ta mucho lihe pa busca fout serca otro hende. Nos no por lesa curason di otro hende, ni nos no por conoce tur nan circunstancianan personal. Ken nos ta anto pa atribui mal intencion na nos rumannan den  fe of pa critica e esfuersonan cu nan ta haci pa sirbi Dios? Ta mucho mas miho pa imita Yehova door di busca e bon den nos rumannan en bes di consentra riba nan fayonan!

15. Pa ki tipo di palabra y trato no tin luga den e pueblo di Dios y pakico?

15 Kico di miembronan di famia? Lamentablemente, den e mundo djawe, net e luga cu mester ta un refugio di pas ta caminda tin biaha hende ta husga otro mas pisa cu nunca: e ambiente di cas. Hopi bes nos ta tende di esposonan, esposanan of mayornan cu ta “condena” miembronan di nan famia cu un avalancha constante di palabranan insolente of maltrato fisico. Pero den e pueblo di Dios si no tin luga pa palabranan cruel, sarcasmo amargo ni agresion fisico. (Efesionan 4:29, 31; 5:33; 6:4) E conseho di Hesus pa stop di husga y stop di condena ta conta pa ora nos ta na cas tambe. Corda cu haci husticia ta encera trata otro  hende manera Yehova ta trata nos. Y hamas nos Dios ta trata nos na un manera severo of cruel. Mas bien, e “ta yen di compasion” pa esnan cu ta stim’e. (Santiago 5:11) Ki un bunita ehempel pa nos imita!

Ancianonan Cu Ta Sirbi “cu Husticia”

16, 17. (a) Kico Yehova ta spera di ancianonan? (b) Kico mester haci ora un pecado no mustra repentimento sinsero, y pakico?

16 Nos tur tin e responsabilidad pa haci husticia, ma specialmente ancianonan den e congregacion cristian tin e responsabilidad aki. Tuma nota di e descripcion profetico cu Isaias a duna di “prinsnan”, of ancianonan: “Mira, un rei lo reina cu husticia, y prinsnan lo goberna cu huicio.” (Isaias 32:1) Si, Yehova ta spera pa ancianonan sirbi conforme husticia. Con nan por haci esaki?

17 E hombernan spiritualmente capasita aki ta bon conciente cu husticia ta exigi pa mantene e congregacion limpi. Tin biaha ancianonan ta haya nan ta husga casonan di malecho serio. Ora nan ta haci esei, nan ta corda cu ki ora cu ta posibel husticia dibino ta busca pa extende misericordia. Pues, nan ta purba guia e pecado na repentimento. Pero kico mester haci si e pecado no demostra repentimento sinsero apesar di esfuerso pa yud’e? Den husticia perfecto e Palabra di Yehova ta manda pa tuma e siguiente medida firme: “Saca e homber malbado for di meimei di boso.” Esei ta nifica expuls’e for di e congregacion. (1 Corintionan 5:11-13; 2 Huan 9-11) Ta duel e ancianonan ora nan tin cu tuma un accion asina, pero nan ta reconoce cu esaki ta necesario pa salvaguardia e limpiesa moral y spiritual di e congregacion. Asina mes, nan ta spera cu un dia e pecado lo bin bek na su sano huicio y regresa na e congregacion.—Lucas 15:17, 18.

18. Kico ancianonan ta tene na mente ora nan ta ofrece nan rumannan conseho basa riba Bijbel?

18 Sirbi conforme husticia ta encera tambe ofrece conseho  basa riba Bijbel ora esei ta necesario. Claro cu ancianonan no ta cana busca fout den nan rumannan, ni probecha di cada ocasion pa corigi esakinan. Pero por ta un ruman den fe ta “dal un paso robes prome cu e realisa esei.” Ancianonan lo corda cu husticia dibino no ta ni cruel ni sin heful, y esei lo motiva nan pa “trata na reahusta e homber ei cu un spirito di suavidad.” (Galationan 6:1, NW) Pesei, ancianonan lo no zundra un ruman cu a faya, ni papia bruto cu ne. Mas bien, ora un hende ricibi conseho duna cu amor, esei ta lanta su animo. Asta ora e ancianonan duna un reprendemento necesario—splicando francamente kico ta e consecuencianan di un proceder imprudente—nan ta tene na mente cu e ruman cu a faya ta un carne di e tou di Yehova. * (Lucas 15:7) E chens di reahusta e ruman cu a faya ta mas grandi ora cu e sinti cu a trat’e cu cariño y amor na momento di conseh’e y reprend’e.

19. Ki decisionnan ancianonan tin cu tuma, y riba kico nan tin cu basa e decisionnan ei?

19 Hopi bes ancianonan tin cu tuma decisionnan cu tin di aber cu nan rumannan den fe. Por ehempel, nan ta reuni cada tanto tempo pa analisa cua ta e ruman hombernan den e congregacion cu tin e cualificacionnan pa wordo recomenda como anciano of sirbido ministerial. E ancianonan sa cu ta importante pa nan ta imparcial. Nan ta basa nan recomendacionnan riba e rekisitonan di Dios, y no djis riba preferencia personal. Den e forma ei nan ta actua “sin prehuicio, sin haci nada cu parcialidad.”—1 Timoteo 5:21.

20, 21. (a) Kico ancianonan ta purba di ta, y pakico? (b) Kico ancianonan por haci pa yuda “esnan cu ta falta animo”?

 20 Ancianonan ta administra husticia dibino den otro maneranan tambe. Despues cu Isaias a profetisa cu ancianonan lo sirbi “cu husticia”, el a sigui bisa: “Cada un lo ta manera un refugio contra biento, y un proteccion contra tempestad, manera coridanan di awa den un tera seco, manera sombra di un baranca masha grandi mes den un tera cu tin sed di awa.” (Isaias 32:2) Pesei ancianonan ta purba di ta un fuente di consuelo y di refrescamento pa nan rumannan.

21 Awe, cu tur e problemanan cu tin tendencia di deprimi hende, hopi ta esnan cu tin mester di animacion. Ancianonan, kico boso por haci pa yuda “esnan cu ta falta animo”? (1 Tesalonicensenan 5:14) Scucha nan cu empatia. (Santiago 1:19) Kisas nan kier pa un hende cu nan ta confia tende  e “ansha” cu nan tin den nan curason. (Proverbionan 12:25) Garantisa nan cu nan ta personanan hopi keri y stima, y cu den bista di tanto Yehova como nan rumannan nan tin hopi balor. (1 Pedro 1:22; 5:6, 7) Ademas, boso por haci oracion hunto cu nan y pa nan. Ora nan tende un anciano haci un oracion di curason na fabor di nan, esei lo por duna nan un gran consuelo. (Santiago 5:14, 15) E Dios di husticia lo no keda sin tuma nota di boso esfuersonan amoroso pa yuda esnan cu ta falta animo.

Ancianonan ta refleha e husticia di Yehova ora nan ta curasha esnan cu ta falta animo

22. Den ki maneranan nos por imita e husticia di Yehova, y cu ki resultado?

22 Si, nos ta hala mas y mas serca Yehova door di imita su husticia! Ora nos ta pega na su normanan husto, ora nos ta comparti e bon nobo cu ta hiba na salbacion y ora nos ta enfoca riba loke ta bon den otro hende en bes di busca nan fayonan, nos ta desplegando husticia dibino. Y boso, ancianonan, cada bes cu boso proteha e puresa di e congregacion, ofrece conseho edificante di Bijbel, tuma decisionnan imparcial y anima esnan deprimi, boso ta reflehando husticia dibino. Esta contento Yehova ta keda ora e wak for di shelo y mira su sirbidonan haci nan best pa “haci husticia” canando cu nan Dios!

^ par. 13 E escritornan di Bijbel a pone e dos imperativonan negativo aki den tempo presente (accion continuo). Pues, e accionnan describi ta cosnan cu na e momento ei tawata tumando luga, pero cu mester a stop.

^ par. 18 Na 2 Timoteo 4:2 Bijbel ta bisa cu tin biaha ancianonan mester “spierta, reprende, exhorta.” E palabra Griego traduci como “exhorta” (pa·ra·ka·lé·o) por nifica “anima.” Un palabra Griego relaciona cu ne, pa·rá·kle·tos, por referi na un abogado den un caso legal. Pues asta ora ancianonan duna un reprendemento firme, nan mester actua como dunado di yudansa na esnan cu tin mester di yudansa spiritual.