Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Hala Serca Yehova

 CAPITULO 14

Jehova Ta Percura un “Rescate pa Hopi”

Jehova Ta Percura un “Rescate pa Hopi”

1, 2. Con Bijbel ta describi e condicion di humanidad, y kico ta e unico solucion?

“HENTER e creacion ta keha y ta sufri e dolornan di parto hunto.” (Romanonan 8:22) Cu e palabranan ei apostel Pablo ta describi e condicion deplorabel di humanidad. For di un punto di bista humano, ta parce cu no tin solucion pa sufrimento, pica y morto. Pero Yehova no tin e limitacionnan cu hende tin. (Numbernan 23:19) E Dios di husticia a duna nos un solucion pa nos dificultadnan. Esei ta e asina yama rescate.

2 E rescate ta e regalo di mas grandi cu Yehova a duna humanidad. E ta haci posibel pa nos wordo libra for di pica y morto. (Efesionan 1:7) E ta e base di nos speransa di bida eterno, sea den shelo of den un paradijs riba tera. (Lucas 23:43; Huan 3:16; 1 Pedro 1:4) Pero kico exactamente ta e rescate? Kico e ta siña nos tocante e husticia supremo di Yehova?

Con e Necesidad di un Rescate A Surgi

3. (a) Pakico e rescate a bira necesario? (b) Dicon Dios no por a simplemente cambia e castigo di morto den uno menos severo pa e desendientenan di Adam?

3 E rescate a bira necesario pa motibo di e pica di Adam. Door di desobedece Dios, Adam a laga pa su desendientenan un herencia di enfermedad, tristesa, dolor y morto. (Genesis 2:17; Romanonan 8:20) Dios no por a laga sentimentalismo gui’e, ni simplemente cambia e castigo di morto den uno menos severo. Cu esei lo el a ignora su propio lei cu ta bisa: “Pago di pica ta morto.” (Romanonan 6:23) Y si Yehova  a invalida su propio normanan di husticia, esei lo a habri caminda pa maldad y caos universal!

4, 5. (a) Con Satanas a calumnia Dios, y pakico Yehova tawata obliga pa contesta e desafionan ei? (b) Kico Satanas a insinua relaciona cu Yehova su sirbidonan leal?

4 Manera nos a mira den Capitulo 12, e rebelion den Eden a lanta cuestionnan mas grandi cu e rebelion mes. Satanas a mancha e bon nomber di Dios. Practicamente el a acusa Yehova di ta un gañado y un dictado cruel cu ta priva su criaturanan di libertad. (Genesis 3:1-5) Door di crea e impresion cu el a frustra e proposito di Dios di yena e tera cu hende husto, Satanas a tilda Dios di a fracasa tambe. (Genesis 1:28; Isaias 55:10, 11) Si Yehova a keda sin contesta e desafionan ei, hopi di su criaturanan inteligente lo por a perde confiansa, por lo menos te na cierto grado, den su gobernacion.

5 Tambe Satanas a calumnia Yehova su sirbidonan leal door di insinua cu nan ta sirbi Dios puramente pa motibonan egoista y cu si nan haya nan bou di presion, ningun di nan lo keda fiel na Dios. (Job 1:9-11) E cuestionnan aki tawata mucho mas importante cu e dificultadnan cu humanidad a haya su mes aden. Cu rason Yehova a sinti su mes obliga pa contesta e insinuacionnan difamatorio di Satanas. Pero con Dios lo por a resolve e cuestionnan aki y na mesun tempo salba humanidad?

E Rescate—Un Ekivalente

6. Cua ta algun di e expresionnan biblico cu ta describi e medio cu Dios ta uza pa salba humanidad?

6 E solucion di Yehova tawata sumamente misericordioso y husto; ningun ser humano lo por a bin cu un idea asina. Toch e tawata algo masha simpel. Bijbel ta referi na dje como un compra, un reconsiliacion, un redencion y un expiacion. (Salmo 49:8; Daniel 9:24; 1 Corintionan 6:20; Colosensenan 1:20; Hebreonan 2:17) Pero kisas e miho descripcion di loke a tuma luga ta esun cu Hesus mes a duna, ora el  a bisa: “E Yiu di hende no a bini pa wordo sirbi, ma pa sirbi, y pa duna su bida como prijs di rescate [Griego, lý·tron] pa hopi.”—Mateo 20:28.

7, 8. (a) Kico e palabra “rescate” ta nifica den e Scritura? (b) Den ki sentido e rescate ta encera e idea di algo ekivalente?

7 Kico ta un rescate? E palabra Griego den e versiculo aki ta deriva for di un verbo cu ta nifica “laga bai, libra.” Nan tawata uza e palabra aki pa indica e placa cu ta ser paga a cambio di libertad pa presonan di guera. Basicamente anto, por defini un rescate como algo cu ta wordo paga pa cumpra algo bek. Den e Scritura Hebreo, e palabra pa “rescate” (kó·fer) ta bin di un verbo cu ta nifica “cubri.” Por ehempel, Dios a bisa Noe cu e mester a ‘cubri’ (un forma di e mesun palabra) e arca cu breu. (Genesis 6:14, NW) Esaki ta yuda nos compronde cu e palabra rescata ta nifica tambe cubri pica.

8 Ta bon pa menciona tambe cu segun Theological Dictionary of the New Testament, e palabra aki (kó·fer) “ta referi semper na un ekivalente”, algo di mesun balor of cu ta coresponde cu ne. Por ehempel, e tapa di e arca di pacto tawatin un forma cu a coresponde cu e arca mes, y pesei el a cubrie completamente. Mescos tambe, pa por cubri pica, mester paga un prijs cu ta coresponde completamente cu e daño cu pica a causa, of, cu ta cubri e daño causa den su totalidad. Pesei mes e Lei cu Dios a duna Israel a declara: “Bida pa bida, wowo pa wowo, djente pa djente, man pa man, pia pa pia.”—Deuteronomio 19:21.

9. Pakico hombernan di fe a ofrece sacrificio di animal, y con Yehova a mira e sacrificionan ei?

9 Hombernan di fe for di Abel padilanti a ofrece sacrificio di animal na Dios. Den e manera ei nan a demostra cu nan tawata conciente cu nan tawata peca y cu nan tawatin mester di un redencion. Ademas, nan a mustra nan fe den e liberacion cu Dios a priminti pa medio di su “simiña.”  (Genesis 3:15; 4:1-4; Levitico 17:11; Hebreonan 11:4) Yehova a mira e sacrificionan ei cu fabor y a duna su aprobacion na e adoradonan aki. No obstante, sacrificio di animal tawata solamente un simbolo. Bestia no por a cubri pica di hende realmente, pasobra nan ta inferior na hende. (Salmo 8:4-8) Pesei mes Bijbel ta bisa: “Ta imposibel pa e sanger di toro y cabrito kita pica.” (Hebreonan 10:1-4) E sacrificionan ei tawata simplemente un simbolo di e berdadero sacrificio di rescate cu mester a bin.

“Un Rescate Corespondiente”

10. (a) Cu ken e redentor tawatin cu coresponde, y pakico? (b) Pakico un sacrificio humano so tawata necesario?

10 “Den Adam tur ta muri”, segun apostel Pablo. (1 Corintionan 15:22) Di manera cu e rescate tawatin cu encera morto di un persona exactamente igual cu Adam: un ser humano perfecto. (Romanonan 5:14) Ningun otro criatura lo por a ekilibra e balansa di husticia. Ta un ser humano perfecto so, uno cu no tawata bou di e pena di morto di Adam, por a ofrece “un rescate corespondiente”—uno cu a coresponde perfectamente cu Adam. (1 Timoteo 2:6, NW) Lo no tawata necesario pa laga un cantidad incontabel di hende wordo sacrifica pa coresponde cu cada desendiente di Adam. Apostel Pablo a splica: “Door di un hende [Adam] pica a drenta den mundo, y morto door di pica.” (Romanonan 5:12) Y “como cu morto a bini pa medio di un hende”, Dios a percura e liberacion di humanidad “pa medio di un hende.” (1 Corintionan 15:21) Con?

“Un rescate corespondiente pa tur”

11. (a) Con e redentor lo a “experencia morto pa tur hende”? (b) Pakico Adam cu Eva lo no por a beneficia di e rescate? (Mira e nota na pia di pagina.)

11 Yehova a haci areglo pa laga un homber perfecto sacrifica su bida boluntariamente. Segun Romanonan 6:23, “pago di pica ta morto.” Door di sacrifica su bida, e redentor lo a “experencia morto pa tur hende.” Cu otro palabra, lo el a  cumpli cu e pago di e pica di Adam. (Hebreonan 2:9; 2 Corintionan 5:21; 1 Pedro 2:24) Esaki lo tawatin consecuencianan legal profundo. Door di anula e pena di morto riba e desendientenan obediente di Adam, e rescate lo a elimina e poder destructivo di pica net na su raiz. *Romanonan 5:16.

12. Ilustra con pagamento di un solo debe por trece beneficio pa hopi hende.

12 Pa ilustra esaki, imagina cu bo ta biba den un stad caminda mayoria di e habitantenan ta traha na un fabrica grandi. Tanto abo como bo biciñanan ta wordo bon paga y boso ta hiba un bida comodo. Pero riba un dia e fabrica ta sera su portanan pa motibo cu e gerente a bira corupto y a pone e negoshi bati bankroet. Awor cu diripiente bo a perde trabou, ni abo ni bo biciñanan no por paga boso debenan mas. Casa y yiunan, y tambe esnan cu e negoshi debe ta sufri pa motibo di e corupcion di un solo hende. Tin un solucion? Si! Un benefactor rico ta dicidi di interveni. E sa cu e negoshi tin hopi balor y tambe e tin duele di su tantisimo empleadonan y nan famianan. Pesei e ta haci areglo pa paga e debe di e empresa y habri e fabrica atrobe. Canselacion di e solo debe ei ta trece alivio pa e cantidad di empleadonan y nan famianan y tambe esnan cu e negoshi debe. Mescos tambe, canselacion di e debe di Adam ta trece beneficio pa miyones y miyones di hende.

Ken Ta Percura e Rescate?

13, 14. (a) Con Yehova a percura e rescate pa humanidad? (b) Na ken e rescate ta ser paga, y pakico e pago ei ta necesario?

13 Ta Yehova so por a percura “e Lamchi . . . cu ta kita pica di  mundo!” (Huan 1:29) Pero Dios no a manda cualkier angel pa rescata humanidad. Mas bien, el a manda Esun cu por a duna e contesta final y decisivo na Satanas su acusacion contra Yehova su sirbidonan. Si, Yehova a haci e sacrificio supremo di manda su Yiu unigenito, esun cu tawata “su delicia.” (Proverbionan 8:30) E Yiu di Dios mes tawata dispuesto pa “bandona su mes gloria” como criatura spiritual. (Filipensenan 2:7) Via un milager Yehova a transferi e bida y patronchi di personalidad di su primogenito celestial pa e matris di un birgen Hudiu cu yama Maria. (Lucas 1:27, 35) Como hende, el a haya e nomber Hesus. Pero den sentido legal e por a wordo yama e segundo Adam, pasobra el a coresponde perfectamente cu Adam. (1 Corintionan 15:45, 47) Den e manera ei Hesus por a ofrece su mes como un sacrificio di rescate pa humanidad pecaminoso.

14 Na ken e rescate lo a ser paga? Salmo 49:7 ta bisa spesificamente cu e rescate ta ser paga na “Dios.” Pero no ta Yehova mes a haci areglo pa e rescate? Si, pero esaki no kiermen cu e rescate tawata un intercambio mecanico y sin sentido—como si fuera saca placa for di un saco y hinc’e den un otro. Nos tin cu compronde cu e rescate no ta un pago literal en cambio di algo material, sino un transaccion legal. Door di percura e pago di e rescate, aunke esei a nifica un sacrificio enorme p’e, Yehova a confirma cu e mes ta pega firmemente na su husticia perfecto.—Genesis 22:7, 8, 11-13; Hebreonan 11:17; Santiago 1:17.

15. Pakico tawata necesario pa Hesus a sufri y muri?

15 Den lente di aña 33 di nos era, Hesucristo a somete su mes boluntariamente na un prueba doloroso cu a hiba na pago di e rescate. El a laga nan arest’e riba acusacion falso, declar’e culpabel y clab’e na un staca di ehecucion. Tawata realmente necesario pa Hesus a sufri asina tanto? Si, pasobra mester a resolve e cuestion di integridad di sirbidonan di Dios. Ta bon pa nota cu Dios no a laga Herodes mata Hesus tempo e tawata chikito. (Mateo 2:13-18) Pero como adulto,  Hesus por a enfrenta e furia di e atakenan di Satanas plenamente conciente di e cuestionnan envolvi. * Door di keda “santo, inocente, sin mancha [y] separa for di pecadonan” apesar di e trato horibel cu el a ricibi, Hesus a proba fuera di tur duda y na un manera dramatico cu Yehova tin sirbido cu ta keda fiel bou di prueba. (Hebreonan 7:26) Nada straño anto cu djis prome cu Hesus a muri, el a sclama den triunfo: “Ta cumpli!”—Huan 19:30.

Completando Su Trabou Como Redentor

16, 17. (a) Con Hesus a continua cu su trabou como Redentor? (b) Pakico tawata necesario pa Hesus aparece “den e presencia di Dios pa nos”?

16 Pero ainda Hesus tawatin cu completa su trabou como Redentor. Riba e di tres dia despues cu Hesus a muri, Yehova a lant’e for di morto. (Echonan 3:15; 10:40) Cu e acto importantisimo ei Yehova no solamente a recompensa su Yiu pa su sirbishi fiel, sino tambe a dun’e oportunidad pa completa su tarea como Redentor y Sumo Sacerdote di Dios. (Romanonan 1:4; 1 Corintionan 15:3-8) Apostel Pablo ta splica: “Ora Cristo a aparece como un sumo sacerdote . . . , el a drenta . . . no pa medio di e sanger di cabrito y bishe, ma pa medio di su mes sanger el a drenta den e luga santo un biaha pa semper, siendo cu el a obtene redencion eterno caba. Pasobra Cristo no a drenta den un luga santo traha cu man, djis un copia di esun berdadero, ma den shelo mes, awor pa aparece den e presencia di Dios pa nos.”—Hebreonan 9:11, 12, 24.

 17 Cristo no por a hiba su sanger literal den shelo. (1 Corintionan 15:50) Mas bien, el a hiba loke e sanger aki a simbolisa, esta, e balor legal di e bida humano perfecto cu el a sacrifica. Anto, den e presencia di Dios, el a haci un presentacion formal di e balor di e bida ei como un rescate a cambio di humanidad pecaminoso. Yehova a acepta e sacrificio ei? Si, y esaki a bira bisto na Pentecoste di aña 33 di nos era, ora spirito santo a ser drama riba mas o menos 120 disipel na Herusalem. (Echonan 2:1-4) Aunke e suseso ei tawata algo excitante, e tawata apenas un principio di e beneficionan maraviyoso cu e rescate lo a trece.

Beneficionan di e Rescate

18, 19. (a) Cua dos grupo di personanan ta beneficia di e reconsiliacion cu a bira posibel mediante e sanger di Cristo? (b) Cua ta algun di e beneficionan cu e rescate lo trece awor y den futuro pa esnan cu ta pertenece na e “multitud grandi”?

18 Den e carta cu Pablo a dirigi na e Colosensenan, e ta splica cu Dios a mira cu tawata bon pa mediante Cristo e reconsilia tur otro cos cu Su mes door di haci pas pa medio di e sanger cu Hesus a drama riba e staca di tormento. Tambe Pablo ta splica cu e reconsiliacion aki ta encera dos grupo di persona distinto, esta, “cosnan den shelo” y “cosnan riba tera.” (Colosensenan 1:19, 20; Efesionan 1:10) E prome grupo ei ta consisti di 144.000 cristian cu ta haya e speransa di sirbi como sacerdote den shelo y goberna como rei riba tera hunto cu Cristo Hesus. (Revelacion 5:9, 10; 7:4; 14:1-3) Pa medio di nan, lo aplica e beneficionan di e rescate gradualmente na humanidad obediente durante un periodo di mil aña.—1 Corintionan 15:24-26; Revelacion 20:6; 21:3, 4

19 “Cosnan riba tera” ta referi na e personanan cu tin speransa di disfruta di bida perfecto den Paradijs riba tera. Revelacion 7:9-17 ta describi nan como “un multitud grandi” cu lo sobrevivi e benidero “gran tribulacion.” Pero nan no tin nodi warda te na e tempo ei pa cuminsa haya e beneficionan  di e rescate. Ya nan a “laba nan pañanan y a haci nan blanco den e sanger di e Lamchi.” Como cu nan ta eherce fe den e rescate, ya caba nan ta ricibiendo beneficionan spiritual for di e areglo amoroso ei. Nan a ser declara husto como amigo di Dios! (Santiago 2:23) Como resultado di Hesus su sacrificio, nan por “acerca e trono di gracia cu confiansa.” (Hebreonan 4:14-16) Ora nan faya, nan ta haya berdadero pordon. (Efesionan 1:7) Apesar cu nan ta imperfecto, nan tin un consenshi limpi. (Hebreonan 9:9; 10:22; 1 Pedro 3:21) Pues reconsiliacion cu Dios no ta un desaroyo cu nan tin cu spera ariba, sino un realidad actual! (2 Corintionan 5:19, 20) Durante e Mil Aña, gradualmente nan “lo wordo libra for di . . . sclabitud na corupcion pa drenta den e libertad glorioso di e yiunan di Dios.”—Romanonan 8:21.

20. Ki efecto meditacion riba e rescate tin riba abo personalmente?

20 “[Nos] ta duna gradicimento na Dios door di Hesucristo” pa e rescate! (Romanonan 7:25) E principio su tras ta simpel, pero suficiente profundo pa yena nos cu admiracion. (Romanonan 11:33) Y ora nos medita cu gratitud riba e rescate, esei ta conmove nos y ta hala nos mas y mas serca e Dios di husticia. Mescos cu e salmista, nos tin tur motibo pa alaba Yehova como Esun cu ta “stima husticia.”—Salmo 33:5.

^ par. 11 Adam cu Eva no por a beneficia di e rescate. E Lei di Moises tawata contene e principio aki relaciona cu un malechor boluntario: “No tuma placa di rescate pa bida di un matado cu merece morto.” (Numbernan 35:31) Ta bisto anto cu Adam cu Eva a merece morto pasobra nan tawata sa mucho bon cu nan a desobedece Dios deliberadamente. Cu esei nan a tira afo nan oportunidad di haya bida eterno.

^ par. 15 Pa compensa e pica di Adam, Hesus tawatin cu muri, no como un mucha perfecto, sino como un homber perfecto. Corda cu Adam a peca boluntariamente. E tawata plenamente conciente di e seriedad di su acto y di su consecuencianan. Pues pa Hesus por a bira “e ultimo Adam” y cubri e pica ei, e tawatin cu haci un escohencia conciente y bon pensa pa keda integro na Yehova. (1 Corintionan 15:45, 47) Asina, henter Hesus su bida fiel—incluso su morto sacrificial—a sirbi como “un echo di husticia.”—Romanonan 5:18, 19.