Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Hala Serca Yehova

 CAPITULO 24

Nada Por “Separa Nos for di e Amor di Dios”

Nada Por “Separa Nos for di e Amor di Dios”

1. Ki sintimento negativo ta afecta hopi hende, incluso algun cristian berdadero?

YEHOVA DIOS ta stima abo personalmente? Tin hende ta di acuerdo cu loke Huan 3:16 ta bisa, esta, cu Dios ta stima humanidad en general. Pero na mes momento nan ta pensa: ‘Ta imposibel pa Dios stima ami como persona.’ Tin biaha asta cristiannan berdadero tin duda tocante e asunto aki. Desanima, un homber a yega di bisa: “Ta duro pa mi kere cu Dios tin interes den mi.” Abo tambe sa sinti e tipo di dudanan ei de bes en cuando?

2, 3. Ken ta esun cu kier pa nos kere cu nos no ta bal nada y cu ta imposibel pa Yehova stima nos, y con nos por bringa e pensamento ei?

2 Satanas tin masha gana pa nos kere cu Yehova Dios no ta stima nos ni balora nos. Hopi bes Satanas ta seduci hende door di traha cu nan sentido di orguyo. (2 Corintionan 11:3) Pero den caso di hende vulnerable, e gusta caba cu nan sentido di dignidad tambe. (Huan 7:47-49; 8:13, 44) Y den e “ultimo dianan” critico aki, esaki ta sosode mas cu nunca. Awendia hopi hende ta crece den famianan “sin amor.” Otronan ta haya nan mes constantemente enfrenta cu hende grosero, egoista y cabesura. (2 Timoteo 3:1-5) Despues di añanan di maltrato, rasismo of odio, hende asina por cuminsa sinti cu nan no ta bal nada, y cu ta imposibel pa stima nan.

3 Si bo sa detecta e tipo di sintimentonan negativo ei den bo mes, no perde speransa. De bes en cuando hopi di nos ta husga nos mes cu un severidad irasonabel asina. Pero corda cu e Palabra di Dios ta diseña pa ‘corigi asunto’ y pa ‘basha abou’ cosnan cu ta duro hancra manera ‘baluarte.’ (2 Timoteo 3:16; 2 Corintionan 10:4) Bijbel ta bisa: “Nos . . . lo sigura nos curason  dilanti dje den kico cu nos curason condena nos; pasobra Dios ta mas grandi cu nos curason y sa tur cos.” (1 Huan 3:19, 20) Ban wak cuater manera cu e Scritura ta yuda nos “sigura nos curason” di cu Yehova ta stima nos.

Yehova Ta Balora Bo

4, 5. Con e ilustracion di Hesus tocante parha di Jonchi ta mustra cu nos tin balor den Yehova su bista?

4 Pa cuminsa, Bijbel ta bisa spesificamente cu Dios ta considera cada un di su sirbidonan balioso. Por ehempel, Hesus a bisa: “Dos mofi [“parha di Jonchi”, NW] no ta wordo bendi pa un cen? Y ni un di nan lo no cai na suela si no ta e boluntad di boso Tata. Y asta e drachinan di cabei riba boso cabes, tur ta conta. Pesei, no tene miedo; boso bal mas cu un cantidad di mofi.” (Mateo 10:29-31) Pensa un rato kico e palabranan ei lo a nifica pa e hendenan cu tawata scuchando Hesus den prome siglo.

‘Boso bal mas cu un cantidad di parha di Jonchi’

5 Kisas bo ta puntra bo mes pakico un hende lo kier cumpra un parha chikito asina. Wel, den tempo di Hesus nan tawata e parha mas barata cu bo por a cumpra pa come. Corda cu pa un moneda di poco balor un hende por a cumpra dos. Pero despues Hesus a bisa cu si un hende tawata dispuesto pa paga dos moneda, e por a haya cinco di nan na luga di cuater. Nan tawata laga e parha extra bai como si fuera e no ta bal nada mes. Pero maske hende por a pensa cu e criaturanan ei no tin balor, kico e Creador ta pensa di nan? Hesus a bisa: “Ni un di nan [ni sikiera esun cu nan a laga bai pornada] no ta wordo lubida dilanti di Dios.” (Lucas 12:6, 7) Awor nos por cuminsa compronde loke Hesus kier a bisa. Si Yehova ta balora asta un solo parha asina tanto, cuanto mas balor un hende lo tin? Manera Hesus a splica, Yehova conoce delaster un detaye tocante nos. Asta e cabeinan riba nos cabes ta conta!

6. Dicon nos sa sigur cu ora Hesus a bisa cu e cabeinan riba nos cabes ta conta, e no tawata irealistico?

6 Nos cabeinan ta conta? Un hende por pensa cu aki si Hesus  a bira irealistico. Pero djis corda riba e speransa di resureccion. Pa Yehova por crea nos di nobo, e mester conoce delaster un detaye di nos! E ta balora nos asina tanto cu e ta corda tur cos tocante nos, incluso nos codigo genetico y tur nos añanan di memoria y experencia. * Na comparacion cu tur esaki, conta nos cabeinan ta un cos simpel (como promedio tin mas o menos 100.000 riba nos cabes).

Kico Yehova Ta Mira den Nos?

7, 8. (a) Segun cu Yehova ta rista curasonnan humano, cua ta algun cualidad cu ta dun’e goso ora e topa nan? (b) Cua ta algun obra cu nos ta efectua, cu Yehova ta balora?

7 Di dos, Bijbel ta siña nos kico ta loke Yehova ta balora di su sirbidonan. Den poco palabra nos por bisa cu e tin deleite den nos bon cualidadnan y den e esfuerso cu nos ta haci. Rei David a bisa su yiu Salomon: “SEÑOR ta scudriña tur curason y ta compronde tur intencion di e pensamentonan.” (1 Cronicanan 28:9) Segun cu Dios ta rista tur e miles di miyones di curasonnan humano den e mundo violento y yen di odio aki, ora e topa un curason cu ta stima pas, berdad y husticia, e mester ta sinti un gran goso! Kico ta sosode ora Dios topa un curason yen di amor p’e, un curason cu ta busca manera pa siña tocante dje y comparti loke e ta siña cu otro hende? Yehova ta bisa nos cu e tin atencion pa hende cu ta conta otronan tocante dje. Asta e tin un “buki di recuerdo” pa tur “esnan cu ta teme SEÑOR y cu ta honra su nomber.” (Malakias 3:16) E cualidadnan ei ta precioso den su bista.

8 Kico ta algun bon obra cu Yehova ta balora? Sin duda, e ta balora cu nos ta haci esfuerso pa imita su Yiu Hesucristo.  (1 Pedro 2:21) Y un obra vital cu Dios ta balora ta e predicacion di e bon nobo tocante su Reino. Na Romanonan 10:15 nos ta lesa: “Ki bunita ta e pianan di esnan cu ta predica e evangelio di pas, esnan cu ta trece noticianan alegre di cosnan bon!” Normalmente kisas nos no ta haya cu nos pober pianan ta bunita. Pero den e texto aki nan ta simbolisa e esfuerso cu Yehova su sirbidonan ta haci pa predica e bon nobo. Tur esfuerso haci cu e meta ei ta bunita y precioso den su bista.—Mateo 24:14; 28:19, 20.

9, 10. (a) Dicon nos por tin sigur cu Yehova ta balora e echo cu nos ta persevera apesar di diferente dificultad? (b) Ki punto di bista negativo Yehova no ta haya nunca tocante su sirbidonan fiel?

9 Yehova ta balora nos perseverancia tambe. (Mateo 24:13) Corda cu Satanas kier pa bo bira lomba pa Yehova. Cada dia cu bo keda leal na Yehova ta un otro dia den cua bo a yuda duna un contesta na e reprochenan di Satanas. (Proverbionan 27:11) Tin biaha cu no ta facil pa sigui persevera. Problema di salu, dificultad financiero, dolor emocional y otro obstaculonan asina por pone cada dia bira un prueba. Ora algo cu nos  ta spera ariba no yega mes lihe cu nos a pensa, esei tambe por desanima nos. (Proverbionan 13:12) Ora nos keda wanta apesar di cosnan asina, ta mas precioso so nos perseverancia ta bira den Yehova su bista. Ta pesei Rei David a pidi Yehova warda su lagrimanan den un “butishi.” Y cu confiansa el a agrega: “Nan no ta den bo buki?” (Salmo 56:8) Si, Yehova ta balora y corda tur nos lagrimanan y tur e sufrimento cu nos ta pasa aden manteniendo nos lealtad na dje. Nan tambe ta precioso den su bista.

Yehova ta balora e echo cu nos ta persevera apesar di prueba

10 Pero tin bes nos curason no kier pa nos stop di sinti nos culpabel. E por nenga di acepta e evidencianan di cu nos tin balor den bista di Dios. Lo e por como si fuera keda papia den nos horea y bisa: ‘Pero tin hopi otro hende cu ta mas ehemplar cu mi. Yehova lo ta hopi desapunta ora e compara mi cu nan!’ Yehova no ta compara. Ademas, su manera di pensa no ta inflexibel ni severo. (Galationan 6:4) Ora e examina nos curason, e ta hacie cu hopi cuidou, y e ta balora tur cos bon cu e topa, maske con insignificante esakinan por parce.

Yehova Ta Sefta Bon for di Malo

11. E manera cu Yehova a trata cu e caso di Abias ta siña nos kico tocante Dios?

11 Di tres, segun cu Yehova ta rista nos, ta como si fuera e ta sefta cu cuidou pa saca loke ta bon. Por ehempel, ora Yehova a decreta ehecucion di henter e dinastia apostata di Rei Jeroboam, El a duna ordo pa Abias, un di e yiunan di e Rei, haya un entiero decente. Dicon? “Den dje . . . algo bon a wordo haya pa cu e SEÑOR Dios di Israel.” (1 Reinan 14:1, 10-13) Den un sentido Yehova a sefta curason di e hoben anto haya “algo bon” den dje. Y maske con chikito y insignificante e pida cos bon ei por tawata, Yehova a haya cu e ta suficiente importante pa laga skirbie den su Palabra. Asta el a recompensa e hoben door di mustr’e un grado apropiado di misericordia apesar cu e tawata miembro di un famia apostata.

12, 13. (a) Con e caso di Rei Josafat ta mustra cu Yehova ta busca loke ta bon den nos, asta ora nos peca? (b) Con Yehova ta actua manera un Mayor amoroso den loke ta trata nos bon obranan y nos bon cualidadnan?

 12 Den caso di e bon Rei Josafat nos por haya un ehempel asta mas bunita. Ora e Rei a actua na un manera bobo, un profeta di Yehova a bis’e cu el a “trece rabia di SEÑOR riba su mes.” Esei ta un cos serio! Pero Yehova su mensahe no a keda te ei. El a sigui bisa: “Sinembargo, tin algo bon den bo.” (2 Cronicanan 19:1-3) Pues, Yehova su rabia husto no a cieg’e di manera cu e no por a mira cu tawatin cos bon tambe den Josafat. Di berdad tin un diferencia grandi entre Dios y hende imperfecto! Ora nos rabia cu un hende nos tin e tendencia di bira ciego pa su bon cualidadnan. Y ora nos peca, e decepcion, berguensa y culpa cu nos ta sinti por ciega nos di tal manera cu nos no ta mira ni nos propio bon cualidadnan. Pero corda cu si nos repenti di nos picanan y haci un berdadero esfuerso pa no bolbe cai den nan, Yehova ta pordona nos.

13 Segun cu Yehova ta sefta loke tin den nos, e ta benta e picanan ei afo mescos cu un hende cu ta coba oro ta benta piedra y tera sin balor afo. Y kico Dios ta haci cu bo bon  cualidadnan y bo bon obranan? Ai, nan ta e “pipitanan di oro” cu e ta warda! Bo a yega di nota con mayornan amoroso ta warda pintura y proyecto di scol di nan yiunan manera tesoro? Tin biaha nan ta keda warda nan pa decadanan largo, asta despues cu e yiunan mes a lubida riba nan. Yehova ta e Mayor di mas amoroso cu tin. Tanten cu nos keda fiel na dje, nunca e no ta lubida nos bon obranan y nos bon cualidadnan. De echo, den su bista lo ta inhusto pa lubida nan; y nunca e no ta inhusto. (Hebreonan 6:10) Y tin un otro manera cu e ta sefta nos tambe.

14, 15. (a) Dicon nunca nos imperfeccionnan no ta stroba Yehova di mira nos bon cualidadnan? Duna un ehempel. (b) Kico Yehova lo haci cu e bon cualidadnan cu e ta topa den nos, y manera kico su pueblo fiel ta den su bista?

14 Yehova ta wak mas aya di nos imperfeccionnan; e ta mira nos potencial. Laga nos tuma un ehempel: Hende cu stima obra di arte ta haci masha hopi esfuerso pa restaura pintura y otro obranan, asta ora nan ta severamente daña. Por ehempel, dia cu un hende a bin cu un rifle y a tira riba un dibuho na balor di 30 miyon dollar di Leonardo da Vinci den e Galeria Nacional di Londen, Inglatera, ningun hende no a pensa mes cu, ya cu e dibuho a daña, mester a tir’e afo numa. Mesora nan a cuminsa traha riba e restauracion di e obra maestra aki di casi 500 aña. Dicon? Pasobra e ta algo precioso den bista di amantenan di arte. Abo no bal mas cu un dibuho traha di krijt y carbon? Den Dios su bista ta sigur cu bo bal mas, apesar di cuanto daño bo imperfeccion hereda a causa bo. (Salmo 72:12-14) Yehova Dios, e Creador habil di famia humano, lo haci loke sea ta necesario pa tur hende cu reacciona bon na su cuido amoroso ser restaura na perfeccion.—Echonan 3:21; Romanonan 8:20-22.

15 Si, tin bes Yehova ta mira bon cualidadnan den nos cu ni nos mes no ta mira. Y segun cu nos ta sirbie, e lo pone e bon cualidadnan ei crece te ora cu finalmente nos bira perfecto. Ni maske con malo e mundo di Satanas a trata nos, Yehova si  ta balora su sirbidonan fiel. Nan ta deseabel manera rikesa; precioso den su bista.—Hageo 2:7.

Yehova Ta Demostra Su Amor cu Accion

16. Cua ta e prueba di mas grandi di Yehova su amor pa nos, y con nos sa cu e regalo aki ta pa nos personalmente?

16 Di cuater, Yehova ta demostra su amor pa nos den hopi manera. Sin duda, e sacrificio di rescate di Cristo ta e contesta mas poderoso cu tin contra e mentira satanico di cu nos no bal nada y cu nos no merece amor. Nunca nos no mester lubida cu e morto agonisante cu Hesus a sufri riba e staca di tormento, y e agonia mas grandi ainda cu Yehova a soporta door di mira su Yiu stima muri, ta prueba di nan amor pa nos. Lamentablemente, hopi hende no por caba di kere cu e regalo aki ta conta pa nan personalmente. Nan no ta sinti cu nan merec’e. Pero corda cu apostel Pablo a yega di persigui siguidonan di Cristo. Y sinembargo el a skirbi: “E Yiu di Dios . . . a stima mi, y a entrega su mes pa mi.”—Galationan 1:13; 2:20.

17. Via ki medionan Yehova ta hala nos na su mes y na su Yiu?

17 Yehova ta demostra su amor pa nos door di yuda cada un di nos probecha di e beneficionan di e sacrificio di rescate di Cristo. Hesus a bisa: “Ni un hende no por bin serca mi, si no ta e Tata cu a manda mi a hal’e.” (Huan 6:44) Si, ta Yehova personalmente ta hala nos serca su Yiu y na e speransa di bida eterno. Con? Pa medio di e obra di predica cu ta alcansa cada un di nos individualmente, y pa medio di Yehova su spirito santo cu e ta uza pa yuda nos capta berdadnan spiritual y pone nan na practica apesar di nos limitacionnan y imperfeccionnan. Pesei, Yehova por bisa di nos mescos cu el a bisa di Israel: “Mi a stima bo cu un amor eterno; pesei cu misericordia mi a hala bo.”—Yeremias 31:3.

18, 19. (a) Cua ta e manera di mas intimo cu Yehova ta demostra su amor pa nos, y kico ta mustra cu e tin interes den cada un di nos? (b) Con e Palabra di Dios ta sigura nos cu Yehova ta scucha nos cu empatia?

18 Kisas ta e privilegio cu nos tin di resa na Dios ta loke ta  permiti nos sinti su amor na e manera di mas intimo. Bijbel ta invita nos tur pa “haci oracion sin stop” na Dios. (1 Tesalonicensenan 5:17) E ta scucha. Bijbel ta asta yam’e “abo cu ta scucha oracion.” (Salmo 65:2) E no a delega e funcion aki na ningun otro persona, ni sikiera na su propio Yiu. Pensa un rato: E Creador di universo ta pidi nos insistentemente pa nos acerc’e den oracion, cu tur frankesa. Y con e ta scucha nos? Na un manera indiferente, sin interes? Absolutamente!

19 Yehova tin empatia. Kico esei kiermen? Un fiel cristian di edad a yega di bisa: “Empatia ta ora bo dolor ta den mi curason.” Ta berdad cu nos dolor ta afecta Yehova? Tocante e sufrimentonan cu su pueblo Israel a pasa aden nos por lesa cu “den tur nan afliccion e tawata afligi.” (Isaias 63:9) Yehova no a djis mira nan sufri; el a sinti pa nan. Yehova su propio palabranan dirigi na su sirbidonan ta yuda nos compronde te na ki grado e ta sinti pa nan: “Esun cu mishi cu boso ta mishi cu [“mi”, NW] pret’i wowo.” * (Zacarias 2:8) Esta doloroso! Si, Yehova ta sinti pa nos. Ora nos pasa den dolor, e tambe ta sinti.

20. Ki punto di bista desbalansa nos mester evita di haya pa nos por cumpli cu e conseho na Romanonan 12:3?

20 Ningun cristian cu un punto di bista balansa lo no uza e evidencia aki di Dios su amor y aprecio como excuse pa bira halsa of sintie masha cos. Apostel Pablo a skirbi: “Door di e gracia duna na mi, mi ta bisa cada un di boso pa no pensa mas halto di su mes cu e mester pensa; ma pa mas bien pensa di su mes cu sano huicio, di acuerdo cu e midi di fe cu Dios a duna bo.” (Romanonan 12:3) Un otro traduccion ta expres’e asin’aki: “Mi por bisa cada un di boso: no pensa cu boso ta  mas di loke boso ta, pero sea realistico.” (BPK) Pesei, maske e calor di e amor di nos Tata celestial ta asina un deleite pa nos, laga nos mantene sano huicio y corda cu nos no a haci nada pa merece e amor di Dios.—Lucas 17:10.

21. Ki mentiranan satanico nos mester keda bringa, y cu cua berdad biblico nos por keda sigura nos curason?

21 Laga cada un di nos haci tur loke ta den su poder pa rechasa tur mentira di Satanas, incluso e mentira di cu nos no ta bal nada y no merece di ser stima. Si cosnan cu bo a pasa aden den bida a pone bo sinti cu bo ta un problema mucho grandi asta pa e inmenso amor di Dios, of cu bo bon obranan ta mucho insignificante pa hala atencion asta di su wowonan cu ta mira tur cos, of cu bo picanan ta mucho hopi asta pa morto di su Yiu stima por cubri, anto bo a ser gaña. Rechasa e engañonan ei cu tur bo curason! Laga nos sigui sigura nos curason cu e berdad expresa den e palabranan inspira aki di Pablo: “Mi ta combenci cu ni morto, ni bida, ni angelnan, ni principadonan, ni cosnan presente, ni cosnan futuro, ni podernan, ni haltura, ni profundidad, ni ningun otro cos crea, lo por separa nos for di e amor di Dios cu ta den Cristo Hesus nos Señor.”—Romanonan 8:38, 39.

^ par. 6 Bes tras bes Bijbel ta asocia e speransa di resureccion cu e memoria di Yehova. Job e homber fiel a bisa Yehova: “O . . . cu bo lo a pone un limite pa mi y corda riba mi!” (Job 14:13) Hesus a papia di resureccion di “tur esnan cu ta den grafnan conmemorativo.” Esaki ta na su luga, pasobra Yehova ta corda delaster un detaye di hende morto cu e tin intencion di resusita.—Huan 5:28, 29, NW.

^ par. 19 Na e versiculo aki, algun traduccion ta duna di compronde cu esnan cu mishi cu Dios su pueblo ta mishi cu nan mes pret’i wowo, of cu esun di Israel, y no cu esun di Dios. Cierto escribanan a origina e fout aki. Den nan bista e pasashi aki tawata un falta di respet, y nan a adapt’e. Nan intencion por tawata bon, pero loke nan a haci a stroba e intensidad di Yehova su empatia di sali na cla.