Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

Hala Serca Yehova

 CAPITULO 31

“Hala Cerca Dios, y E Lo Hala Cerca Boso”

“Hala Cerca Dios, y E Lo Hala Cerca Boso”

1-3. (a) Kico nos por siña tocante naturalesa humano door di observa e relacion entre un baby y su mayornan? (b) Kico ta desaroya automaticamente ora un hende mustra amor na nos, y ki pregunta importante nos por haci nos mes?

MAYORNAN gusta mira nan yiu resien naci smile. Hopi bes nan ta pega nan cara contra cara di e baby, saca zonido suave y smile tiernamente cu ne. Nan ta loco pa mir’e reacciona. Y e no ta tarda pa hacie tampoco; e baby ta haya kuiltje, e lipnan ta cuminsa trek, y un dushi smile ta aparece riba su cara. E smile ei ta manera e prome señal di cariño di parti di e baby, expresa na su mes manera, respondiendo na e amor cu su mayornan ta mustr’e.

2 E smile di e baby ei ta pone nos corda un punto importante tocante naturalesa humano. Nos reaccion natural ta pa stima ora nos ser stima. Ta asina nos ta traha. (Salmo 22:9) Segun cu nos ta crece, nos capasidad di mustra amor tambe ta crece. Kisas bo por corda con den bo infancia bo mayornan y otro famianan of amigonan a mustra amor na bo. Den bo curason un cariño a cria raiz, y cu tempo el a crece y a cuminsa duna fruta den forma di accion. Bo a reacciona na nan amor door di mustra amor na nan. Bo ta mira un desaroyo similar den bo relacion cu Yehova Dios?

3 Bijbel ta bisa: “Nos ta stima, pasobra el a stima nos prome.” (1 Huan 4:19) Seccion 1 te cu 3 di e buki aki a mustra bo cu Yehova Dios ta eherce su poder, husticia y sabiduria na maneranan amoroso pa bo beneficio. Y den Seccion 4 bo a mira cu el a demostra su amor directamente pa humanidad, y pa abo personalmente, na maneranan  impresionante. Awor, un pregunta ta lanta; kisas e pregunta mas importante cu bo por haci bo mes: ‘Con ami ta bai reacciona na Yehova su amor?’

Kico Kiermen Stima Dios

4. Dicon nos por bisa cu hende ta confundi tocante loke kiermen stima Dios?

4 Yehova, Esun cu a origina amor, sa perfectamente cu amor tin un poder masha grandi pa laga hende saca nan miho cualidadnan na cla. Pesei, apesar di e rebeldia constante di humanidad infiel, Dios a keda confia cu algun hende lo reacciona na su amor. Y en berdad, miyones di hende a reacciona. Pero lamentablemente e religionnan di e mundo corupto aki a laga hende tur confundi tocante kico kiermen stima Dios. Masha hopi hende mes ta bisa cu nan ta stima Dios, pero aparentemente nan ta kere cu palabra so ta basta pa expresa e sintimento ei. Amor pa Dios por cuminsa asina, mescos cu e amor di un baby pa su mayornan por cuminsa cu un smile. Pero ora ta trata di hende grandi, amor mester encera mas.

5. Con Bijbel ta defini amor pa Dios, y dicon e definicion ei mester zona bon den nos horea?

5 Ta Yehova ta defini kico kiermen stim’e. Su Palabra ta bisa: “Esaki ta e amor di Dios, cu nos ta warda su mandamentonan.” Pues, nos mester mustra cu nos ta stima Dios pa medio di accion. Ta berdad cu hopi hende no gusta e idea di obedece un otro. Pero bondadosamente e mesun versiculo ta agrega: “Y [Dios] su mandamentonan no ta pisa.” (1 Huan 5:3) Yehova su leinan y principionan ta diseña pa beneficia nos, no pa oprimi nos. (Isaias 48:17, 18) E Palabra di Dios ta yen di principio cu ta yuda nos hala mas serca dje. Con asina? Laga nos repasa tres aspecto di nos relacion cu Dios: comunicacion, adoracion y imitacion.

 Comunica cu Yehova

6-8. (a) Via ki medio nos por scucha Yehova? (b) Con nos por laga e Scritura haya bida ora nos ta les’e?

6 Capitulo 1 a habri cu e pregunta: “Bo por imagina bo ta combersa cu Dios?” Manera nos a mira, e idea ei no ta djis un fantasia. De echo, Moises a yega di tin un combersacion asina. Kico di nos? Den nos tempo Yehova no ta manda su angelnan pa combersa cu hende. Pero Yehova tin medionan excelente pa comunica cu nos awe si. Con nos por scucha Yehova?

7 Ya cu “tur Scritura ta inspira pa Dios”, nos por scucha Yehova door di lesa su Palabra, Bijbel. (2 Timoteo 3:16) Pesei un escritor di salmo a urgi sirbidonan di Yehova pa nan haci esei “di dia y anochi.” (Salmo 1:1, 2) Esei ta exigi hopi esfuerso di nos parti. Pero tur esfuerso cu nos haci ta bale la pena. Manera nos a mira den Capitulo 18, Bijbel ta manera un carta precioso cu nos Tata celestial a manda pa nos. Pues, lo no mester ta un carga pa les’e. Ora nos lesa e Scritura, nos mester hinca bida den e informacion. Con nos por haci esei?

8 Segun cu bo ta lesa, visualisa e relatonan biblico. Purba mira e personahenan biblico como personanan real. Purba compronde nan background, nan circunstancianan y loke a motiva nan. Anto pensa profundamente tocante loke bo ta lesa, y haci bo mes preguntanan manera: ‘Kico e relato aki ta siña mi tocante Yehova? Cua di su cualidadnan ta bin dilanti? Ki principio Yehova kier pa mi siña, y con mi por aplic’e den mi bida?’ Lesa, medita y aplica. Segun cu bo haci asina, e Palabra di Dios lo haya bida pa bo.—Salmo 77:12; Santiago 1:23-25.

9. Ken ta “e esclabo fiel y prudente”, y dicon ta importante pa nos paga bon tino na loke e “esclabo” ei ta bisa?

9 Ademas Yehova ta papia cu nos pa medio di “e esclabo fiel y prudente.” Manera Hesus a profetisa, un grupo chikito  di ruman homber ungi a ser nombra pa percura “cuminda [spiritual] na su debido tempo” den e ultimo dianan dificultoso aki. (Mateo 24:45-47) Ora nos lesa literatura prepara pa yuda nos gana conocemento exacto di Bijbel, y asisti na reunionnan y congresonan cristian, nos ta ricibi alimento spiritual for di e esclabo ei. E esclabo ta di Cristo. Pues, ta importante pa nos haci manera Hesus a bisa: “Pone bon atencion con boso ta scucha.” (Lucas 8:18) Nos ta scucha cu atencion door cu nos ta reconoce cu e esclabo fiel ei ta un di Yehova su medionan pa comunica cu nos.

10-12. (a) Pakico oracion ta un don maraviyoso di Yehova? (b) Con nos por resa na un manera cu ta agrada Yehova, y pakico nos por confia cu e ta aprecia nos oracionnan?

10 Pero kico di comunica bek cu Dios? Nos por papia cu Yehova? E idea so caba ta impresiona bo profundamente. Si bo purba acerca e gobernante di mas poderoso den bo pais pa papia cu ne tocante un ke otro precupacion, cuanto chens lo bo tin di logra yega serca dje? Den algun caso por ta asta peligroso pa purba! Den tempo di Ester cu Mardokeo, bo por a muri si bo acerca e monarca di Persia sin cu e invita bo. (Ester 4:10, 11) Awor, imagina bo para dilanti e Señor Soberano di universo. Asta e ser humanonan di mas poderoso ta keda parce “tiracochi” su dilanti. (Isaias 40:22) Nos mester tin miedo di acerc’e? Di ningun manera!

11 Yehova a duna nos un manera simpel pa nos tur acerc’e—oracion. Asta mucha hopi chikito por resa na Yehova cu fe, den nomber di Hesus. (Huan 14:6; Hebreonan 11:6) Pero oracion ta permiti nos comunica nos pensamentonan y sintimentonan mas intimo tambe—asta esnan doloroso cu nos tin problema pa expresa cu palabra. (Romanonan 8:26) No ta bale la pena purba impresiona Yehova cu abla elocuente y poetico, ni cu oracion largo sin fin. (Mateo 6:7, 8) Sinembargo, Yehova no a pone un limite na e largura ni e frecuencia di nos oracionnan. Su Palabra ta asta invita nos pa “resa sin stop.”—1 Tesalonicensenan 5:17.

 12 Corda cu ta Yehova so yama ‘Esun cu ta scucha oracion’, y e ta scucha nos cu berdadero empatia. (Salmo 65:2) Ora e ta scucha oracion di su sirbidonan fiel, e ta djis scucha pa scucha? No, e ta scucha nan cu placer. Den su Palabra, oracionnan asina ta ser compara cu sencia cu ta kima y laga un holo dushi subi bai laira. (Salmo 141:2; Revelacion 5:8; 8:4) No ta un consuelo pa sa cu nos oracionnan sinsero ta subi mescos cu sencia, y cu nan ta agrada e Señor Soberano? Pues, si bo kier hala serca Yehova, humildemente haci oracion regular na dje, tur dia. Desahoga bo na dje sin tene nada atras. (Salmo 62:8) Comparti bo precupacion, alegria, gratitud y alabansa cu bo Tata den shelo. Como resultado, e laso entre abo cu ne lo bira cada bes mas fuerte.

Adora Yehova

13, 14. Kico adora Yehova ta encera, y pakico ta apropiado pa nos ador’e?

13 Ora nos ta comunica cu Yehova Dios, nos no ta djis papia y scucha manera ora nos ta combersa cu un famia of amigo. Loke nos ta haci ta un acto di adoracion na Yehova. Oracion ta un manera di duna Dios e honor cu asina tanto e merece. Henter nos bida ta drei rond di adoracion berdadero. Door di ador’e nos ta mustra Yehova e amor y debocion cu nos ta sinti p’e di henter nos curason. Tur Yehova su criaturanan fiel, tanto den shelo como riba tera, ta uni den e adoracion aki. Den un vision apostel Huan a tende un angel proclama e siguiente ordo: “Adora esun cu a traha shelo y tera y lama y fuentenan di awa.”—Revelacion 14:7.

14 Pakico nos mester adora Yehova? Pensa un rato riba su cualidadnan cu nos a trata den e buki aki, manera santidad, poder, dominio propio, husticia, curashi, misericordia, sabiduria, humildad, amor, compasion, lealtad y bondad. Manera nos a mira, Yehova ta e representacion supremo, e norma mas eleva posibel, di tur caracteristica deseabel. Ora nos purba compronde tur su cualidadnan completamente,  nos ta bin realisa cu e ta mucho mas cu un Personahe grandi y admirabel. E ta inmensamente glorioso, y superior na nos na un grado cu palabra no por expresa. (Isaias 55:9) No tin duda cu Yehova ta nos Soberano legitimo. Definitivamente e merece nos adoracion. Pero, con nos mester adora Yehova?

15. Con nos por adora Yehova “den spirito y berdad”, y ki oportunidad reunionnan cristian ta brinda nos?

15 Hesus a bisa: “Dios ta Spirito, y esnan cu ta ador’e mester adora den spirito y berdad.” (Huan 4:24) Esei ta nifica cu nos mester adora Yehova cu un curason yen di fe y amor, guia door di su spirito. Tambe e ta nifica cu nos mester ador’e di acuerdo cu e berdad, e conocemento exacto cu nos ta haya den e Palabra di Dios. Ki ora cu nos reuni cu otro adoradonan, nos tin un oportunidad precioso pa adora Yehova  “den spirito y berdad.” (Hebreonan 10:24, 25) Ora nos canta alabansa na Yehova, uni den oracion na dje, y scucha y participa den studio di su Palabra, nos ta expresando amor p’e pa medio di adoracion puro.

Reunionnan cristian ta ocasionnan dushi pa nos adora Yehova

16. Cua ta un di e mandamentonan di mas grandi cu cristiannan berdadero a ricibi, y kico ta motiva nos pa cumpli cu ne?

16 Ademas nos ta adora Yehova ora nos papia cu otro hende tocante dje, alabando e publicamente. (Hebreonan 13:15) Si, un di e mandamentonan di mas grandi cu cristiannan berdadero a ricibi ta di predica e bon nobo di Yehova su Reino. (Mateo 24:14) Nos ta obedece e mandamento aki di buena gana, pasobra nos ta stima Yehova. Ora nos pensa con “e dios di e mundo aki”, Satanas e Diabel, “a ciega mente di esnan cu no ta kere” door di plama mentiranan flagrante contra Yehova, acaso nos no ta sinti un anhelo di sirbi como Testigonan na fabor di nos Dios, y combati e calumnianan ei? (2 Corintionan 4:4; Isaias 43:10-12) Y ora nos pensa riba Yehova su cualidadnan maraviyoso, nos no ta sinti un deseo lanta den nos pa conta otro hende tocante dje? Di berdad no ta existi privilegio mas grandi cu yuda hende siña conoce e amor di nos Tata celestial mescos cu nos.

17. Kico adoracion di Yehova ta encera, y dicon nos tin cu ador’e cu integridad?

17 Adora Yehova ta encera asta mas. E ta toca delaster un aspecto di nos bida. (Colosensenan 3:23) Si di berdad nos ta acepta Yehova como nos Señor Soberano, anto nos lo purba cumpli cu su boluntad den tur cos: den nos bida di famia, na trabou, den nos trato cu otro hende y durante nos oranan di relahamento. Nos lo purba sirbi Yehova ‘cu henter nos curason’, cu integridad. (1 Cronicanan 28:9) Si nos ta adora Yehova asina, esei lo no laga luga pa nos sirbie cu curason dividi of hiba un bida dobel, esta, pretende di sirbi Yehova, y na mes momento, hipocritamente, practica pica serio den secreto. Integridad no ta laga luga pa hipocresia;  amor ta pone nos sinti asco di dje. Temor di Dios tambe ta yuda. Bijbel ta mustra cu e temor ei ta hopi importante pa nos por keda den un relacion intimo cu Yehova.—Salmo 25:14.

Imita Yehova

18, 19. Dicon ta realistico pa pensa cu nos como simpel hende imperfecto por imita Yehova Dios?

18 Cada un di e seccionnan di e buki aki a termina cu un capitulo tocante con pa ta “imitadonan di Dios, manera yiunan stima.” (Efesionan 5:1) Ta esencial pa nos keda corda cu maske nos ta imperfecto, nos por imita e manera perfecto cu Yehova ta uza su poder, eherce husticia, actua cu sabiduria y mustra amor. Con nos por sa cu ta posibel berdad pa nos imita e Todopoderoso? Corda loke e nomber di Dios ta nifica. Su nomber ta siña nos cu e ta haci su mes bira loke sea cu e kier, pa e cumpli cu su proposito. E habilidad aki cu e tin ta impresiona nos profundamente. Pero, ta completamente imposibel pa nos imit’e den esaki? No.

19 Nos ta traha segun Dios su imagen. (Genesis 1:26) Pues hende ta diferente cu tur otro criatura riba tera. Loke ta motiva nos no ta simplemente instinto, composicion genetico y factornan den nos medioambiente. Yehova a duna nos un don precioso—boluntad liber. Apesar di nos limitacionnan y imperfeccionnan, nos tin e libertad di scohe kico nos ta bira. Bo kier ta un persona amoroso, sabi, husto, cu ta haci bon uzo di su poder? Danki na e yudansa di Yehova su spirito, esei ta precis loke bo por bira tambe! Pensa cuanto cos bon lo bo por logra.

20. Kico nos por logra haci door di imita Yehova?

20 Lo bo agrada bo Tata celestial y haci su curason contento. (Proverbionan 27:11) Bo por asta “agrad’e den tur sentido”, pasobra e ta compronde bo limitacionnan. (Colosensenan 1:9, 10) Y segun cu bo ta sigui desaroya bon cualidadnan, imitando bo Tata stima, lo bo ser bendiciona cu  un privilegio masha grandi. Den un mundo scur y aleha for di Dios, lo bo ta un cargado di lus. (Mateo 5:1, 2, 14) Lo bo yuda plama algo di e refleho di Yehova su glorioso personalidad rond mundo. Esta un honor!

“Hala Serca Dios, y E Lo Hala Serca Boso”

Mare semper bo keda hala mas y mas serca Yehova

21 E animacion simpel cu ta para skirbi na Santiago 4:8 ta mas cu un meta; e ta un biahe, un proceso. Tanten cu nos keda fiel, e biahe ei no ta caba nunca. Nunca nos lo stop di hala mas y mas serca Yehova. Al fin y al cabo, semper nos lo tin mas cos pa siña tocante dje. Nos no mester pensa cu e buki aki a siña nos tur loke tin di sa tocante Yehova. No, esaki ta apenas e comienso di tur loke Bijbel ta siña nos tocante nos Dios! Ademas, ni Bijbel mes no ta conta nos tur loke tin di siña tocante Yehova. Apostel Huan a pensa cu si mester a skirbi tur loke Hesus a haci durante su ministerio riba tera, “ni mundo henter lo no por a contene e bukinan cu lo a wordo skirbi.” (Huan 21:25) Si esei ta cierto tocante e Yiu, cuanto mas cierto e ta den caso di e Tata!

21, 22. Ki biahe sin fin tin dilanti di tur hende cu ta stima Yehova?

 22 Ni bida eterno lo no permiti nos caba di siña tur cos di Yehova. (Eclesiastes 3:11) Pesei, pensa riba loke ta spera nos. Despues di a biba shen, mil, un miyon, of asta mil miyon aña mas, nos lo sa hopi mas tocante Yehova Dios cu loke nos sa awor. Pero ainda nos lo sinti cu tin un sin fin di cos maraviyoso cu nos por siña. Nos lo ta ansioso pa siña mas, pasobra semper nos lo tin bon motibo pa sinti mescos cu e salmista cu a canta: “Hala serca Dios ta bon pa mi.” (Salmo 73:28, NW) Nos no por ni imagina con varia y yen di nificacion bida eterno lo ta. Y pa semper, loke lo duna nos mas satisfaccion den bida ta e echo cu nos lo sigui hala serca Yehova.

23. Kico bo ta ser anima pa haci?

23 Reacciona awor riba Yehova su amor, door di stim’e cu henter bo curason, alma, mente y forsa. (Marco 12:29, 30) Haci bo amor p’e leal y constante. Tuma tur bo decisionnan di tur dia, for di esun di mas chikito te esun di mas grandi, guia door di e siguiente principio: semper scohe e rumbo cu ta hiba bo na un relacion mas intimo cu bo Tata celestial. Y riba tur cos, semper keda hala mas y mas serca Yehova, y semper e lo keda hala mas y mas serca bo—pa tur eternidad!