Sigui pa e contenido

Sigui pa e index

 LES 6

Ki Speransa Tin pa Hende Cu A Muri?

Ki Speransa Tin pa Hende Cu A Muri?

1. Kico ta e bon noticia relaciona cu e mortonan?

Ora Hesus a yega Betania, un pueblito cerca di Jerusalem, su amigo Lazaro tabatin cuater dia morto caba. Anto Hesus a bay na e graf hunto cu Marta y Maria, ruman muhernan di e difunto. Un poco despues, un multitud di hende a yega eynan. Imagina bo con contento Marta y Maria a keda ora Hesus a resucita Lazaro.—Lesa Juan 11:21-24, 38-44.

Marta tabata sa caba di e bon noticia relaciona cu e mortonan. E tabata sa cu Jehova lo resucita nan pa biba riba tera atrobe.—Lesa Job 14:14, 15.

2. Kico ta pasa cu nos ora nos muri?

Dios a bisa Adam: “Stof bo ta, y na stof lo bo bolbe.”—GENESIS 3:19.

Hende ta traha di stof. (Genesis 2:7; 3:19) Nos tin un curpa fisico, y despues cu nos muri no tin nada cu ta sali bay y sigui biba otro caminda. Ora nos muri, nos celebro ta muri y nos pensamentonan ta caba. Pues, despues cu Lazaro a resucita, e no a papia nada di loke el a pasa aden mientras cu e tabata morto, pasobra e mortonan no sa nada.—Lesa Salmo 146:4; Eclesiastes 9:5, 6, 10.

Dios ta tormenta hende den candela despues di morto? Ya cu Bijbel ta mustra cu e mortonan ta inconsciente, ta bisto cu e siñansa di fierno di candela ta calumnia Dios. E idea so di tormenta hende den candela ta algo repugnante p’e.—Lesa Jeremias 7:31.

 3. E mortonan por comunica cu nos?

E mortonan no por papia ni tende. (Salmo 115:17) Pero tin angel malbado cu ta papia cu hende y ta haci comosifuera nan ta hende cu a fayece. (2 Pedro 2:4) Jehova ta prohibi hende di purba consulta cu e mortonan.—Lesa Deuteronomio 18:10, 11.

4. Ken lo haya resureccion?

Miyones di hende cu a muri lo haya resureccion pa biba riba tera. Hasta hende cu a yega di haci malo debi cu nan no tabata conoce Dios lo haya resureccion.—Lesa Lucas 23:43; Echonan 24:15.

Hende resucita lo haya oportunidad di siña e berdad tocante Dios y di mustra fe den Hesus pa medio di nan obediencia na dje. (Revelacion 20:11-13) Si nan haci loke ta bon, nan lo por biba pa semper riba tera.—Lesa Juan 5:28, 29.

5. Kico resureccion ta siña nos tocante Jehova?

Dios a manda su Yiu pa e muri pa nos y asina habri caminda pa hende haya resureccion. Pues, e speransa di resureccion ta siña nos tocante Jehova su amor y su bondad inmereci. Ora hende cuminsa lanta for di morto, ken lo bo tin hopi gana di mira?—Lesa Juan 3:16; Romanonan 6:23.